MOTHI 18
18
Ethakpe Alongri Long Ingho Thechot
(Mrk. 9:33-37; Luk. 9:46-48)
1La apor adun hel Jisu adungyok wangsi pulo, “Ethakpe-alongri longke inghote thechot?” 2Lasi Jisu oso ihut taramsi anangyok adun hel asitem long parjapmo, 3aro pulo, “Khanangsi ne naliyok thando, nali neng chipharlepsi oso badi chiplangple leng ke, nali jatsi ethakpe-alongri long lut un-eh ye. 4Inghosi anang bithang labang oso badi chipabek hopme, anangsi ethakpe-alongri long ke thechot. 5Inghosi ne men pen ladi ihut osoyok chideng, anangke neyoksi chidengman.
Papyok Honjat Kipon
(Mrk. 9:42-48; Luk. 17:1-2)
6“Manta nali sitem inghone bak neyok kikrol labang oso asitem ihutyok honjat pi, anang phanke angphun long isi arlong akithe chibam dungsi aro anangyok langpe abi long pardip plupsi mechot. 7Ahonjat anat pirthepe long kaphere memedo! Piyok pu tene honjat wange, manta ingho para honjat wange, labang arleng kaphere meme do! 8Lasi nang ari lale akengpo honjatyok nangpon, tene bangpo thum hletne nang para war-chor; ari hong-ni lale akeng hong-ni dosi, jutjelen me-thengdang long kiwar damyok, akeng-ari ihong konga, lale akeng ihong kengkok kido, ajiubong karjapsi nangphan mechot. 9Aro nang mekpo nang honjat pawangman, tene labang amekpo hek ngot, nang para olene tinot; amek hini dosi me-thengdang jom along kachiti damyok ke, amek isi done, karjaksi nangphan mechot.
Kachingbo Bherabik Kaparhlan
(Luk. 15:3-7)
10“Chilang wenot, labang akibek osohel ihut yok ta langmo ke doyek; piyok pu tene ne nali thando, ethakpe long kido ne Apa amahang, ethakpe long anang atharlonhel, arni thek lendo. 11piyok pu tene ingho chingbo jango, anangyok bisarsi kiral ayok Arleng Aso wango. 12Nali neng long pot chirondo? Arleng ihut phoro isi bherabik do tene, anali sitem para ijon chingbo det, tene anang jon-kep pen sirkepne-sirkep ayok inglong akung tikangsi, labang kangbo ijonso yok lang damde ma? 13Aro anang labangso hlong, tene khanangsi ne nali thando, kangbobe jon-kep pen sirkepne-sirkep bherabik yok ke, labang ijon bherabik ayoksi aneng arong chot. 14Ladisi labang osohel asitem ihut ta kapangho ayok, ethakpe long kido nali Apa aneng ingjong.”
Pap Katiki Korte Alam
15“Manta nang korte pone nangyok kangho tiki, tene damot, anang ahudet kido amun, anangyok adukpo chithanot. Anang nang lampo onedo, tene nang kortepo yok nang hlongo. 16Manta anang nanglam one, tene jaibak ke bang-hini, lale bang-kithom arleng hakhi alam ahuwit khanang chikenge, la anat aro ihut lale bang-hini nang pen chiponot. 17Anang analiyok ta lampo o-eh, tene labangpo kachikruk yok thanot; aro kachikruk alamta ado katikipo o-eh, tene anangyok ihutke nali phan bang adhorom ajat aro ihut papi kalukdar badi pado nang.”
Ki-un Aro Un-eh Alam
18“Ne naliyok khanangsi thando, nali pirthimipe athak potsi ingnaknge, ethakpe longta chingnak nge, aro pirthimipe long athak jibak phlok, labangsi ethakpe long ta phloknge. 19Ne nali thanphak do, pirthimipe along nali bang-hini arleng kapingkit penebak alam isi-aneng chiplang, tene ethakpe kido ne Apa parasi analiyok bangpo pachok piye. 20Piyok pu tene daklong bang-hini, lale bang-kithom nemen pen chingrumdo, lalong ne ta anali sitem doman.”
Kiron Un-eh Murkiya Kaparhlan
21La-amun Pitor po wangsi Jisu yok pulo, “Hemphu, ne kortepo neyok phongkan kangho tiki tene ne anangyok ron nange? Phong thorok isi ma? 22Jisu anangyok pulo, “Phong thorok isi puke ne nang thanthe, manta phong kepthorok isine thorok isi ayok.” 23La-apot ethakpe-alongri ke murkiyahel pen alekha hel kilang phrot yok kiron ihut rechopo badisi pachingbar do. 24Konam anang kachilang phrotyok chengo, ihutpo inghosi hajarkep ki-en anangyok wano. 25Aro, anang kipi un-eh pho apot, anangyok aro anang piso, aso lamehel ahuwit anang kido jorphrotsi, kapawol detyok anang ahemphupo thano. 26Lapor labang murkiyapo anang keng-ari long tarhuksi chingduksi pulo, “Hemphu, chihinot, ne nangyok kido-kangwe nangwol detne. 27La-amun labang murkiyapo yok ahemphupo ingjinso memelo, anang murkiyapo yok pajokngo aro anang kipi nangepo dhar ta ronno. 28Manta labang murkiyapo, mokolyok damsi, anang phoro isi nohok kipi dhar ki-en ihut murkiya alokjor pochaksi, anang yok otsi, angphun tumsi pulo, “Nang pot kipi nangedo pinot.” 29Laparake anang alokjorpo tarhuksi aro chingduksi pulo, “Bekso apor nechihi not, ne nangyok nangwol piye.” 30Manta anang mengme yongot, aro nohok pipe lengke, anangyok akrol long thalsi bilo. 31Konam anang murkiya alokjor hel labang kachiplang theksi, anali aneng dohodaksi, anali ahemphupo adung damsi, jibak chiplango, labang ahuwit thano. 32Laparake anang ahemphupo murkiyapo yok taramsi anangyok pulo, “Ei nang pamuktong amurkiya po, nang neyok kachinduk apot, ne nang labang ahuwit kichak nohok nang rono. 33Tene ne jibadi nangyok kajinso kido, nangta ladi nang murkiya alokjorpo yok jinso nangne ma? 34Aro la-amun anang ahemphupo aneng kang ongsi, murkiyapo kichak pon anohok pidetde lengke, anang yok kapaduk akrol phu-phang helyok champilo. 35Nali abangten nang kortepo ingthinpen ronpipe, tene ne ethakpe long Apa ta nali abangten yok labadisi inghole.
Currently Selected:
MOTHI 18: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
