MOTHI 21

Jisu Hal Pensi Jerusalem Ayok Kidam

(Mrk. 11:1-11; Luk. 19:28-40)

1Konam anali Jerusalem adung wango aro Olip anglongpe akung Betphagi arong yok wang hlengsi, laparake Jisu adun bang hiniyok tolsi, 2anali yok pulo, “Nali rongpo angoyok dam, aro lalong ijon noselmurep apepe, adomora pen kokne kibi thekdam penpane; anali yok hlone nedung yok wanot. 3Inghone bak naliyok pene bak pu tene, nali than, “Hemphu analiyok kanange do aro anang analiyok photsi wanghlo dun pen pane.” 4Turki po parasi pot alam kipathan, labang alam kichok ayoksi ladi chiplango, 5“Jayon asope yok than, langot, nali rechopo nali dungyok wangsi do, chipabek hopsi noselmurep apepe aro adomora athak, arlusi wang do.” 6Adunhel damo aro Jisu lahelyok kithan alam badisi tikilo; 7anali noselmurep aro adomorapo yok wano, aro anali thak pehlemo, lamehel athak Jisu arlulo. 8Ako-ong chot arat anali pehel duwar athak hlemo aro angkhan ke thengpe arong arohel thu-thusi duwar athak deno. 9Rat hel anang ngo-ngo aro anang phel kidun abang hang pono, “Dabhit recho Aso po! pahal nang! pahal nang! Inghosi Hemphu amen pen wangdo bor-eh pado nang! Ethakpe long kidopo pahalnang.” 10Konam Jisu Jerusalem lut damo, aro rongpe long arleng hel chibhongsol lo, aro anali pulo, “Anang ingho te?” 11Rat hel pulo, “Labang ke Galili kido Najaret arongso para kiwang Jisu turkipo.”

Jisu Arnam Ahem Kapangthir

(Mrk. 11:15-19; Luk. 19:45-48; Jhn. 2:13-25)

12Jisu Arnam ahem lut damo, Arnam ahem kijor aro kinam abangyok mokol pa-ole detno, aro anang nohok kachihole abang anghol hel pen wothum kijor abang anghol helyok harlek phrotno. 13Anang analiyok pulo, labadisi wido, “Ne hempo kapingkit ahem pusi puye, manta nalike kanghu hel kachibuti longdangsi inghol phakdo.” 14Chotok arleng aro kengkok arleng Arnam ahem along anang dung wango, aro anang analiyok pamelo. 15Manta konam bor-bangthe aro kanong paklang hel anang katiki asombhik asal hel, aro “Dabhit po Aso pahal nang!” ladi pusi Arnam ahem kihangsol oso helyok theksi, arju hlongsi anali aneng kango, 16aro anali anangyok pulo, “Lamehel pot pu do, nang arjudo ma?” Jisu analiyok pulo, “Oik; nang oso hel yok pachirlilo aro oso aleta hel angho parata khanang kardom pachok peno puke Lo-kangthir long chiporhe hlonghle yong ma?” 17Jisu analiyok tikangsi, Bethani arongpe yok olesi damo, aro anang lalong anuwe rilo.

Jisu Dumuru Arongpe yok Hao Kipi

(Mrk. 11:12-14,20-25)

18Phiyo adap prang, konam anang rongpe yok wang kachirul amun, anang ingchiro. 19Aro anang duwar akung dumuru irong theksi, anang labang adungyok damo, aro ahuwit arwodet detsi aro athe thekthe yongot. Laparake anang bangpoyok pulo, “Nang long moyok athe pawang phakphe nang!” Aro dumuru arong pe lajong jongsi kreng hapmo. 20Konam adun hel labang thekngo, anali asombhik hlong detsi pulo, “Dumuru arongpe pot badi jong-jongsi kreng hap mo?” 21Jisu analiyok pulo, “Ne naliyok khanangsi thando, nali kroldo pu tene aro ihik-bihik dode tene, dumuru arongpe yok kanghol badi detke kalek, manta labang inglong kartulpe yok ta nali pu, “Holek para ingthur aro langpe long jang damot,” labang ta choknge. 22Nang kikrol pen pingkitsi potsi chihang, nang hlonge.”

Jisu Ajakong Karju Alam

(Mrk. 11:27-33; Luk. 20:1-8)

23Konam Jisu Arnam ahem lutdamo, anang lamthe paklangsi kido amun, bor-bangthe hel aro kithe-kiding abang wango aro pulo, “Pot ajakong para lamehel tikido aro labang ajakong ingho nangpilo?” 24Jisu analiyok pulo, “Ne ta naliyok lam imung nali arjudo; bangpo neyok nethan, tangsi ne ta pot apharan pensi lamehel tiki do bangpo nali thane. 25Johon po baptist daklong parasi kiwang? Ethakpe para ma arleng parasi kiwang? La-amun lahel ihut para ihut lam chirjusi pulo, “Ethakpe para” pusi than nang, tene “piyok anang yok krol-kre yongot?” pusi anang ladi ili puye. 26Manta “Arleng para,” pusi punang, tene arleng hel ili kachiphere memedo; piyok pu tene ahuwit ta Johon po ayok ihut turki pusi krolman.” 27Lasi anali Jisu yok pulo, “Halike thek the.” Aro la-amun anangta analiyok pulo, “Ladi tene pot apharan pen si lamehel tikido, ne ta nali thanthe.”

Bang-Hini So-penso Athenghlan

28“Nali pot chironman? Ihut arleng bang hini sopenso kido aro anang aklengpo adung damsi pulo, “Ei nesopo, damot aro minike rihanthu barik sal tiki dammot.” 29Anang pulo, “Ne ke damde” manta bekso aphel anang neng chipharlep si dam phak ngo. 30Anang pa po la-adun asopo adung laben thotsi pu damo; aro anang pulo, “Oik dame, pa;” manta anang damde yongot. 31Bang-hini adak dak bangpo te anang papo angthin badi tikilo?” Anali pulo, “Akleng po.” Jisu analiyok pulo, ne naliyok khanangsi thando, kalukdar hel aro bang pen kidoner kangho arloso pemar ta nali-ngosi Arnam-alongri ayok dame. 32Piyok pu tene Johon Baptist po kadhorom aduwar pensi nali dung wango, layongta nali anangyok krolkre yongot, manta kalukdar hel aro kangho kidoner arloso pemar si anangyok krol duno; nalike bangpo thek-er yongta, aphel kikrol yok nalineng chipharleple yongot.

Rihanthu Barik Kihon Arleng Athenghlan Alam

33Jisu pulo, “Kamprek athenghlan isi onenot, ihut rihathu barik kikom lungle ahemphu kido. Anang barikpo gomora komdetsi alang kisor yok tukngo aro tong kemo aro sukunihel yok peksi kamprek alongri yok damo. 34Athe kapangrum apor wang kihleng amun, anang bhakpo kihlongyok sukuni kipipo adungyok anang murkiya helyok angtolo. 35Sukuni ki-en abang helke anang murkiya hel ihutyok nepcheksi pamo, ihutyok ke mari klakngo aro la ihut yok ke arlong waro. 36Aro anang angoyok ke ongchotsi kamprek amurkiya tolo aro analiyok ta anali labenthotsi ingholo. 37Kijut amun anang so poyok anali dung tolsi pulo, ‘Ananli neso poyok ke aman paklange.’ 38Manta sukuni kicho abang aso poyok kithek amun anali abithang adak chipulo, ‘Labang ke ahemphupo aso po, wangot anangyok mari minang aro anang kihlonge abhak ili en nang!’ 39Lasi anali anang yok nepmo, rihanthu barik apar waro, aro anangyok marilo. 40Minonke rihanthu barik ahemphupo wangsi, anang sukuni kipi abangyok pot inghole?” 41Anali Jisu yok pulo, “Anang labang sotonghler helyok dul-lak pisi mariye, aro inghosi athe apor atengsi anang bhakpo pi-une, ladi sukuni arideng yoksi barikpo sukuni pi phaknge.” 42Jisu analiyok pulo, “Nali lo-kangthir long jatsi porhe hlonghle yongma: ‘Hem kikem abang kanangne arlengpo atok long arlong aghai chiplango; labangsi Hemphu ke tiki do, aro labang ke imek ango konbak asombhik;’ 43“Lasi ne nali thando, Arnam-alongri nali para pon detne aro athe kiwang ajatyok si piye. 44Labang arlongpo athak inghosi jange, anang abeng-ano chiplange, manta ingho athak labang arlongpo jange, anangyok pangjir phrotne.” 45Bangthehel pen Pharisi hel anang athenghlan kipu arjusi analiyok anang paphosi pudo pusi atot chihlongo. 46Aro anangyok kinepyok awak kilang amun, anali rat abangyok chipherelo, piyok pu tene anali anangyok turki pusi kamainot.

Currently Selected:

MOTHI 21: AMRI-BSI

Highlight

Copy