MOTHI 23
23
Kanong Paklang Pen Pharisiyok Jisu Ado Kapaklang
(Mrk. 12:38-40; Luk. 20:45-47)
1Laparake Jisu rat hel aro anang dunhel yok pulo, 2“Kanong paklang hel aro Pharisi hel Mosi po anghol long ining do;” 3lasi naliyok anali kithan hel tiki aro bangpo mengpon, manta anali katiki badike tiki yek, piyok pu tene anali abithang kithan hel anali bithang ta tiki ke. 4Anali kirungpon un-eh kardip abhar ingnaksi arleng hel aphang long batman, manta anali bithang ke ari munso-so ta paklem chetche. 5Anali arleng kapathek yoksi anali ahuwit asal tikiman, anali thengkur arik chihom jalsi enman aro anali pe-apre helke akiding. 6Anali cho-jun long aman kihlong athemsi neng dokman aro Arnam kachirdom ahem long ta kimechot kangning athemsi aneng dokman, 7aro hathi hel along aman paklangsi kardom kipi aro arleng hel analiyok “mastor” pune kipu akime hlongman. 8Manta nali “rabbi, mastor po” puke taramek, piyok pu tene nali ahuwit ihut detsi “paklang po” do, aro nali ahuwit ta korte. 9Aro pirthimipe long kaiyokta nali “apa” puke taramek; piyok pu tene ihut po, lake ethakpe long kidopo si nali “Apa” do. 10Lale “Paklang po” puke taramek, piyok pu tene ihut det paklangpo do, lake Khristo. 11Nali dak akithe chotpo ke, nali murkiya chiplange. 12Ahuwit inghosi abithang yok parklam anang chipabek hop nange, aro ingho si abithang yok chipabek hopme anangyok patheye.
Jisu Anengsik Abangyok Ado Kikol
13“Manta nali nengsik kanong paklang aro Pharisi hel, nali kaphere memedo! Piyok pu tene nali ango ethakpe-alongri inghap klakdo; piyok pu tene nali bithang ta lutle aro kilutne abang yokta nali tengklakman. 14Ei nali nengsik kanong paklang aro Pharisi hel! nali kaphere meme do; nali himepe hel ahem phatman aro pading hrimsi Arnam kapingkit chipaklang man, lasi nali kithe chot adai chibat hlonge. 15“Ei nali nengsik kanong paklang aro Pharisi hel! nali kaphere memedo, piyok pu tene nali ihut arleng Jihudi dhorom kapa-enyok, langpe chirpatsi aro pirthimipe dung arting-worman; aro jai arleng dhorom wang-en dunman, anali yokta bar-ni jom along tolman. 16“Ei nali mek-chotok duwar ki-etpon abang, nali pu man te, Arnam ahem otsi hopot cho, tene jat inghohe, manta inghosi Arnam ahem ser along otsi hopot cho, anang hopot kichopo tikipen hlonge. 17Ei nali chotok hel! Piyok pu tene ser aro seryok kapangthir Arnam ahem, la hini asitem dak bangpo thechot? 18Aro nali pudo, “Inghone bak athuli long otsi hopot cho, tene jat inghohe, manta inghonebak athuli long kipi nibot otsi hopot cho, anang hopot kichopo pachok hlonge. 19Ei nali konbak kachotok! Piyok pu tene dak bang te thechot, nibot lale nibot yok kapangthir un athulipo ma? 20Lasi ingho athuli long otsi hopot choman, anang athuli long, aro labang athak ahuwit long otsi hopot kicho chokman; 21aro inghosi Arnam kangthir ahem otsi hopot cho, anangke lalong kidopo pen hopot choman; 22aro inghosi ethakpe amenpen hopot cho, anangke Arnam anghol amenpen hopot choman aro labang ethakpe long kangning ihutpo ayok hopot choman. 23“Ei nali nengsik kanong paklang aro Pharisi hel kaphere memedo! Piyok pu tene nali pudina, mosola, jira, lamehel ke Arnam yok kep para isi piman, aro kanong kardip alamthe: bisar-kangthir aro kajinso ar kikrol mehel panung kulo. Labang hel tikangkesi aro katiki nange kido. 24Ei nali chotok kipaklang abang! Nali butu ingjang tene archeman, manta mihonghang poyok ke jolman. 25“Ei nali nengsik kanong-paklang aro Pharisi hel kaphere memedo! Piyok pu tene senge aro langhan anglangke pangthir man, manta arloke amek alot aro abithang aphan detsi chironman. 26Ei nali nengsik kanong paklang aro Pharisi hel kaphere memedo! Ango langhan arlo pangthir, tangsi anglang aga ta ingthire! 27“Ei nali nengsik kanong paklang aro Pharisi hel kaphere-memedo! piyok pu tene nali palok phlansi karmil thiri ahilik badi, lamehel anglang ke kilang me-at, manta arlo aga kithi arleng arupe aro ahuwit ajatjat aninik plengthip. 28Lasi nalita anglang ke dhorom kangthir paklangdo, manta nali angthin arloke nali nengsik aro pap detsi plengthip si do.
Jisu Anali Aduk Katurki
29“Ei nali nengsik kanong paklang aro Pharisi hel kaphere memedo! Piyok pu tene nali turki hel aphan ahilik buldo, aro dhorom kangthir hel athiri helyok arje palangme do, 30aro nali pudo, Sar-lar hel apor ili kido tene, hali turkihel kamari apor anali pen chilok dundelo hoi. 31Ladisi nali turkihel kamari agijing pusi nali bithang hakhi chipiman. 32Tene nali sar-lar hel alin chirlinot, laparake, chipachok ngot. 33Ei phurul badi angho abi kido abang! Pot badi nali jom long duk-tap para joknge?” 34Lasi ne nali dungyok turki hel, kithek-kire arleng, aro kanong paklang yok tolman, nali angkhan yok mariye aro angkhan yok ke kros long tare, angkhan yok ke Arnam ahem long sabuk pen sapme aro rongso para rongso yok nang ujhare, 35lasi ado kangwe Hebol po para Barakhiya po asopo Jakhariya apo yok kangthir athem pen athuli asitem nali marilo, anang awi kili pirthimipe athak ahuwit dhorom kangthirhel awi kili ado nali aphuthak wange. 36Khanangsi ne nali thando, lamehel ahuwit kamari ado hel labang owepo arleng hel aphuthak wange.
Jisu Jerusalemyok Aneng Aduk
(Luk. 13:34-35)
37“Turki helyok kamari, aro naliyok wangkitol helyok arlong kiwar ei Jerusalem abang, Jerusalem abang, wope anang awengkong arlo asohel kachikruk pon badi, konbak apor ne naliso helyok kachikom aneng kido, aro nalike wang chinom dunde yongot! 38Langot, nali hempo tikangsi nisotjot aro ahuna lo. 39Piyok pu tene ne naliyok thando, “Inghosi Hemphu amenpen wangdo anangke bor-eh chokdo, ladine pupe lengke, minon para nali nethek phak hlonghle ye.”
Currently Selected:
MOTHI 23: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
