MOTHI 9
9
Atot Kangwe Kiso Arleng Kapame
(Mrk. 2:1-12; Luk. 5:17-26)
1La-aphel Jisu tilong long arlusi langpe arpatsi abithang rongso yok wang phakngo. 2Aro langot, angkhan arleng tar along pa-ih hetsi kibi ihut atot kangwe kiso arleng anang dung yok wano; la-apor Jisu anali kikrolpo theksi, labang atot kangwe kiso arlengpo yok pulo, “Ei pa, la-an neng aduk chiwanek; nang pap hel rontango.” 3Lapara angkhan kanong paklang abang analidak chipulo, “Anang Arnam yok kapatharak alam thando.” 4La-amun Jisu ke anali kachiron hel than unsi pulo, “Piyokte nalithin arlo akangho chiron do?” 5Piyok pu tene nang pap hel rontango; ma thurne kengkam chijornot; la hini alam dakthu kipuyok jalso chot? 6Manta pirthimipe apap kiron ayok Arleng Aso apharan do, labang kithek ayok, la-amun anang atot kangwe kiso poyok pulo, “Thurnot, nang tar chi-olne hemyok damot.” 7Aro arlengpo thursi abithang ahemyok damo. 8Labangpo theksi rat hel phere detno; aro Arnam ke munusi yok ladi apharan pilo, pusi Arnam yok jortang pajiro.
Mothi poyok Jisu Kataram
(Mrk. 2:13-17; Luk. 5:27-32)
9Jisu labang athempo para kidam amun, Mothi amen ihut arlengyok khajana kirung ahemlong iningsi kido theksi, anangyok pulo, “Ne phel-phel wangdun not.” Aro anang thursi anang phel-phel duno. 10La-aphel langot, anang hem along kicho yok kangning amunsi, kalukdar hel aro papi arleng wangsi, Jisu aro anang adun hel pen wang ining duno. 11Pharisi hel labangpo theksi, anang adunhelyok pulo, “Nali paklangpo ke khajana kirung aro papi helpen piyokte choman?” 12Anang bangpo arjusi pulo, “So-lak kangwe arleng daktor nangne, manta kiso aphansi kanange do. 13Nali damot, ne buli karkli nali hanghe, jinsosi hangdo, labang alamthe acho chirli damot. Piyok pu tene ne dhorom kangthir aphan kalek, manta papi helyok kataram aphansi wangdo.”
An-kihum Alam
(Mrk. 2:18-22; Luk. 5:33-39)
14La-amun Johon Baptist po adun hel Jisu adungyok wangsi pulo, “Hali aro Pharisi abangta an-hum lenman, manta nang adun helke an-humhe, bangpo aronke pot te?” 15La-amun Jisu analiyok pulo, “Konbak adin jorme alokjor hel pen osopo doman, la-arniyok anali aneng doho unman ma? Manta konam arnisi anali alokjorpara osopoyok pon detman, la-arnipe wang hlenge, la-amun anali an-humme. 16Kaita aban ape long akimi ape bang-tunte; piyok pu tene akimi ape pen bang-tun tene, labang ape si aban ape ayok pangsekman; la-amun chingseknek ongman. 17Aro arleng hel akimi ahor aban areng mathi along bibe; ladi bitene, areng mathi inghang detman, hor alangta lidet man, aro areng mathipo chingho detne, manta hor akimipoke akimi areng mathi alongsi thalman, tangsi la hinita arni dingsi bi un.”
So-arloso peyok Kapabur; Jisu Ape Ki-ot peyok Kapame
(Mrk. 5:2-43; Luk. 8:40-56)
18Jisu analiyok lamehel alam thanne kido amunsi, langot, ihut phu-phangpo wangsi anangyok tarhuksi pulo, “Neso pe minon jongsi thilo; manta nang wangsi bangpe aphuthak nang-ari batnot, la-amun anang hrenge.” 19Lasi Jisu thursi, anang adun hel pen chiloksi anang phel phel duno. 20Aro langot, nengkan kere-hini arloso aron kiboilen ihutpe Jisu aphel aga wangsi, anang pe-apre otno. 21Piyok pu tene anang anenglong kachipu, “Ne anang pe otchet hlongta, ne mepenne.” 22La-amun Jisu aphel kachilang phaksi arloso pe yok theksi pulo, “Ei ai, la-an neng aduk chiwanek; nang kikrolposi nangyok pamelo.” Aro la apor jongsi arloso pe me peno. 23Aro Jisu labang kapangdom phu-phangpo ahem hlengsi, pongsi kibut arleng helyok aro rat surujo kido arlengyok theksi, 24anang pulo, “Chiterek detnot; piyok pu tene osope thithe yong, amek jangsi do.” La-amun lahel anangyok ingneksolo. 25La aphel ke arleng helyok wang pa-ole detsi Jisu osope kido apuluyok lut damsi, oso pe arilong otno apot, osope thuro. 26Labang kichok ajortangpo longri dungsi chitha-ang detno.
Jisu Chotok Bang-Hiniyok Kapame
27Aro Jisu lalong para kidam amun, bang hini chotok arleng anang phel phel dunsi, hang-wongsi pulo, “O Dabhit po asopo, toh haliyok jinsonot.” 28La-amun Jisu hemlong lut damo, la chotok arleng bang-hini anang dungyok wango. La-amun Jisu analiyok arjulo, “Bangpo ne pame unyok jakongdo pusi nali nekrol do ma?” Anali anangyok pulo, “Oik Hemphu.” 29Lapara ke Jisu anali mek hel otsi pulo, “Nali kikrol atengsi nali pame nang.” 30Aro la-amun analimek hel charo. Aro Jisu analiyok than klaksi pulo, “Chilangwen, kaiyok ta thanne not.” 31Manta anali olesi damo aro labang longri dungsi anang ajortangpo longri dungsi pachitha-ang detno.
Jisu Kalar Ihut Kapame
32Anali olesi kidam amun, langot, arleng hel si-ik kachu-u ihut kalar Jisu adungyok wano. 33La-ako labang si-ik ujhar tango, parake kalarpo lam thanpono. Lalong rat hel asombhik hlongsi pulo, “Israyel adak labadi jatsi thek hlonghle yong.” 34Manta Pharisi hel ke pulo, “Anang ke si-ik arecho po apotsi, anang si-ik helyok ujhar man.”
Jisu Kangjinso : Katiki Abang Beksodet
(Luk. 10:2-3)
35Jisu ahuwit rongpe aro rong long arting damsi, anali kachirdom ahem long paklango, longri kime-alamthe paharo, aro ajat jat bet hel aro kiso kilak helta pame detno. 36Konam anang arleng helyok thekngo, analiyok anang kajinso wango; piyok pu tene anali ke khokhre kangwe bherabik hel badi, duk-tap kachiplang. 37La-aporsi anang adun hel yok pulo, “Kirot nange sok dojap do, manta katiki abang bekso det; 38lasi anang bithar asok longyok katiki abang kitolyok, sok Ahemphu ayok pingkit not.”
Currently Selected:
MOTHI 9: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
