MARK 10
10
Jisu Kachise Porman Alo Anat Kapaklang
(Mot. 19:1-9; Luk. 16:18)
1Jisu lalong para damo, aro Jordan langjonpe chirpatno aro Judiya aholyok damo. Aro rat ako-ong anang dung wang chingrum phakngo; aro, anang abi-pun badi, anang lahel yok lamthe paklango. 2Angkhan Pharisi wangsi, anangyok honjat kilangyok arjulo, “Apenso po abithang apiso pe yok kanong badike se-un ma?” 3Anang analiyok pulo, “Mosi po naliyok pot akanong pilo?” 4Lahel pulo, “Mosi po ihut apiso kise aporman alo wisi, pachise ayok hawang pilo.” 5Manta Jisu analiyok pulo, “Nali angthin karthat-ong anat, anang labang kanong nali phan wisi pilo. 6Manta kasanse cheng amun ke ‘Arnam analiyok apenso aro arloso si sanselo.’ 7‘Labang anatsi ihut arleng abithang apo-ape yok tikangsi, apiso pe pen chilok hlongdo, 8aro bang-hini isidet abang chiplange.’ Lasi anali bang hini kalek, manta isi a-ok. 9La-apot Arnam pot jorme pachiloksi bilo, kaita phat dun nangne.” 10Laparake labang alam adun hel Jisu yok hemlong arju phakngo. 11Anang anali yok pulo, “Inghosi anang pisope yok chisedo, aro prek ihut arloso chi-endo anang bangpe pen kangho donerdo; 12aro arloso ta abithang apihan yok chisesi, aro prekyok chi-en do, pu tene anangpe ta kangho donerdo.
Osoyok Jisu Bor-eh Kipi
(Mot. 19:13-15; Luk. 18:15-17)
13La-aphel arleng hel oso helyok ari kibat aphan Jisu adung wano; aro adun hel analiyok tamsi tolo. 14Manta Jisu labang theksi aneng thilo, aro analiyok pulo, “Oso hel yok nedung pawang nang, analiyok tengek; piyok pu tene Arnam-alongri ke labadi hel aphansi. 15Khanangsi ne nali thando, “Inghosi osohel badi chiplangsi Arnam-alongri hlonghle, anang lalong jatsi lutdun un-eh ye.” 16Aro anang analiyok arbak si eno, aro analiyok bor-eh pilo.
Hem Kime Arleng
(Mot. 19:16-30; Luk. 18:18-30)
17Jisu duwar ajon kidamjong amun, arleng ihut anang dungyok wangkatsi, anang ngo tarhuksi arjulo, “Kime Paklangpo, or-eh len ajiubong kihlongyok ne pot ote nange?” 18Jisu anangyok pulo, “Neyok piyok akime nepudo? Kaita akime kalek, manta Arnam detsi akime. 19‘Arleng mari yek; nang kangho donerek; nang chunghu yek; nang asisik hakhi piyek; nang chobelek; nang apo-ape yok mainot; labang kanong hel nang thekdo.” 20Anang Jisu yok pulo, “O Paklang po, ne riso apun para mehel ahuwit mengsi wang do.” 21Jisu, anangyok langsi, anangyok nengdokngo aro pulo, “Nang isi abihini mengme yong; damot, nangpotsi do, aro nohok hel kicho-kangwe abangyok pinot, aro nangphan ethakpe long apuru doye; laparake wangot, nephel-phel wangdun not.” 22Konam labang alamthe arjulo, anang amahang ingtingsu lo, aro anang neng aduksi dam hrolo, piyok pu tene anang apuru ki-ong arleng kido. 23Laparake Jisu chighurensi lang-woro aro anang adun helyok pulo, “Hem kime arleng hel Arnam-alongri long kilut un-eh pho!” 24Anang adun hel labang alamthe arjusi asombhik hlongo. Manta Jisu analiyok puphak ngo, “Osohel, inghosi nohok apuru long kroldo, anali Arnam alongri kilut konbak atan!” 25Ingho hem kime arleng ihut Arnam-alongri kilutyok ke, mihonghang ijon imprim ang-gog aga kiletsi jalsochot. 26Anali watsi asombhik hlongo, aro anali ihut para ihutyok chipu propmo, “Tene inghote jok une?” 27Jisu analiyok lango aro pulo, “Ajiu kithi arlengke un-eh, manta Arnam ke ladi kalek; piyok pu tene Arnam ke ahuwit tiki un.” 28Lalong Pitor po Jisu yok pulo, “Hali ahuwit tikangsi, nang phel-phel wangduno.” 29Jisu pulo, “Khanangsi ne nali thando, inghonebak ne nat, aro kime-alamthe anat, hem, lale korte lale ingjir, lale ape lale apo, lale asohel, lale lungle phalang tikang, 30kihreng adak honjat tongsi hem, korte-ingjir, ape, aso, aro lungle, lamehel aphoro ajiuli aro mo-phel amun or-eh len ajiu hlonghleye— labadi kaita ingjong. 31Manta ango abang ako-ong arleng paphele, aro aphel abangke pango ye.”
Phong-thom Jisu Kithi-Kibur Alam Kithan
(Mot. 20:17-19; Luk. 18:31-34)
32Anali honjeng damjongsi, Jerusalem kidam amun, aro Jisu anali ngo-ngo kidam; anali la-apor asombhik hlongo aro aphel-aphel kidunhel kaphere wango. Anang bang kere-hini adun yok pangrum phaksi, ananglong kachiplange hel analiyok thanpon hilo, 33pulo, “Langot, ili Jerusalem yok damsi do; aro Arleng Aso bor-bangthe aro kanong paklang hel arideng champi ye, aro analike anangyok kamari ado batne; laparake anali Bang-ajat hel arideng pekdetne; 34analike anangyok chongneknge, aro anangyok ingthoknge, aro sabuk pen sapme, aro mariye; aro ni-thom arni aphel anang bur phaknge.”
Jems po Pen Johon po Kachingduk
(Mot. 20:20-28)
35Jebedi po aso Jems po aro Johon po, Jisu adungyok wango aro anangyok pulo, “O Paklang po, hali nangyok potsi chihang, labang hali katikipi aneng do.” 36Aro anang analiyok pulo, “Ne nali phan, pot katikipi nange aneng do?” 37Aro anali Jisu yok pulo, “Nang jortangpen, hali ihutyok nang ancho-ari aga aro ihut yok debera ari aga ining dun hlong ayok, bor-eh pinot.” 38Manta Jisu analiyok pulo, “Nali potsi chihangdo, bangpo nali thekthe yong. Ne kijun alanghan nali jun une ma, lale ne baptist kachiplang badi nali baptist chiplang une ma? 39Anali anangyok pulo, “Hali une.” Laparake Jisu analiyok pulo, “Ne kijun alanghan nali jun hlonge; aro ne baptist kachiplang badi, nalita ladi baptist chiplang hlonge; 40manta ne ancho-ari aga lale debera-ari aga kangning tolyok ne apharan ingjong, manta ingho aphansi honjoksi bido, anangsi hlonge.” 41Konam bang-kep adun hel labangpo alam arjulo, anali Jems po pen Johon po yok aneng thilo. 42Lasi Jisu analiyok anang dung inan taramsi pulo, “Nali Bang-ajat yok thekdo, lake anali kapangdom abangdo anali aphuthak kithe-kiding asal kapatiki apharan do. 43Manta nali sitem ke labadi kalek, manta inghosi nali sitem akithe chiplange nali sitem murkiya chiplang nange, 44aro nali sitem inghosi akithepo kachiplang yok aneng do, anang ahuwit aphan murkiya chiplang nange. 45Piyok pu tene Arleng Aso al-kihlong yok kalek, manta al-ki-en yok, aro ako-ong kijok ajiuli ador aphan abithang ajiu kipi yok wango.”
Bartimayus Chotok poyok Jisu Kapame
(Mot. 20:29-34; Luk. 18:35-43)
46La-aphel anali Jeriko rongpe yok wango. Jisu aro adun hel aro rat ako-ong Jeriko tikangsi kidam amun Timayus po aso Bartimayus amen, kachohrek-wor mek-chotok ihut duwar akung iningsi kido. 47Konam, bangpo Najaret Jisu pusi arju hlongo, anang hang-wongsi pulo, “O Dabhit po agijing Jisu, neyok jinso not!” 48Ako-ong arleng anang kido-sit yok tam-reno, manta anang hang ong-ongsi pulo, “O Dabhit po agijing, neyok jinso not!” 49Jisu sang kuk ngo aro pulo, “Anangyok holek taramot.” Aro arleng hel mek-chotok poyok taramo, anangyok pulo, “Neng chipangdom; thurnot, anang nangyok taramdo.” 50La-akosi anang pe-rik mar warsi, chonthelsi, aro Jisu adungyok wango. 51Laparake Jisu anangyok pulo, “Ne nangyok pot katikipi ayok anengdo?” Mek-chotok po anangyok pulo, “Ne Paklang po, nemek pathek phakngot.” 52Jisu anangyok pulo, “Damot; nang kikrolsi nangyok nang pamelo.” Lajongsi anang mek thek hlongo aro duwar ajon anang phel-phel duno.
Currently Selected:
MARK 10: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
