Genesis 14
14
Abrammi ge Lota ra huiǂui
1Haka gaogu, Amrafeli Babiloniab dib, Arioxi Elasari dib, Kedorlaomeri Elammi dib tsî Tidali Goimmi dib tsîgu 2ge ǀnî koro gaogu ǃoagu nî torodīse ge khâimâ. Nē korogu ge Berab, Sodoms dib Birsab, Gomoras dib Sinab, Admas dib Semeberi, Seboims dib tsî Belas, ǁnās ge Soarsa, ǁîs di gaob tsîga. 3Nē koro gaogu ge Sidims di ǃgoaǃnāb, ǂŌxahurib ti a ǂansab tawa ǀhûǁaresa ge dī. 4Disiǀgamǀa kurigu ǁaeba gu ge ǁîga Kedorlaomeri ǂgaeǂguis ǃnaka ge hâ i, xawe gu ge disiǃnonaǀaǁî kurib ǃnâ ǁîba ge mâǃoa. 5Disihakaǀaǁî kurib ǃnâb ge Kedorlaomera ǁîb ǀkha ge hâ i gaogu ǀkha Refaimǁîna Asterot Karnaims ǃnâ Susǁîn, Hams din Emiǁîn Kirjataims din 6tsî Horǁîn, Edoms ǃhomgu ǃnâ tsî Elparans ǃgaroǃhūb di ǀammi kōse hâna ge hîkākā. 7Tsî gu ge dabasen tsî Kades, ǁnā ǁaeb ai Enmispat ti ge ǂansa is ǁga ge oahā. ǁÎgu ge hoaraga Amalekǁîn tsî Hasason-Tamars ǃnâ ǁan hâ Amorǁîn di ǃhūba ge dan.
8Tsî gu ge Sodoms, Gomoras, Admas, Seboims tsî Belas di koro gao-aoga Sidims di ǃgoaǃnāb ǃnâ ǃkhams ǃaroma toroǂnubidi âga ge ǂgaekhâi 9Elammi, Goimmi, Babiloniab tsî Elasari di haka gaogu ǃoagu nî ǃkhamse. 10Nē ǃgoaǃnāb ge tēr-i ǀkha ǂkhauǂuiǃnâsa ādi xa ge ǀoa hâ i tsî gu ge Sodoms tsî Gomoras di gao-aoga ǃkhamsa xu gu ga ǃkhoeni ǂgao, o nē ādi ǃnâ gere ǁnā, xawe gu ge nau ǃnona gao-aoga ǃhomgu ǁga gere ǃkhoeni. 11O gu ge haka gao-aoga hoaraga xūn Sodoms tsî Gomoras ǃnâ ge hâ ina, ǂûna ǃkhōǂgā hâse ge ǀâǀhana. 12ǁKhātib ge Loti, Abrammi ǃgâsab ôab tsîna Sodoms ǃnâ ge hâ i tsîn ge ǁîb di xūn tsîna ge ūhe.
13ǀGuib hîa ge ǃkhōhe tama hâ ib ge hā tsî Abrammi, Hebreǁîb hîa Mamres, Amorǁîb di aikehaidi tawa ǁan hâba ge mîba. Mamreb tsî ǁîb di ǃgâsakha, Eskoli tsî Aneri tsîgu ge Abrammi ǀkha ǃhûǁaresa ge ūhâ i. 14Tsî ǁîb ǃgâsab ôab ge ǃkhōhe ǃkhaisab ge ǁnâu, ob ge Abramma ǁîb di ǃkhamaogu, ǁîb oms ǃnâ ge ǃnaegu, ǃnonakaidisi tsî disiǁkhaisaǀaga ū tsî nē haka gao-aoga Dans kōse ge ǃgôaǃgon. 15ǁNāpab ge khoegu âba ǃgubidi ǃnâ ǀgoraǂgā tsî khākhoega tsuxub ǃnâ ǁnāǂam tsî ge dan. Tsîb ge ǁîga Hobas, Damaskus di ǀapasǀkhāb ai ǂnôas kōse sauruǃgon 16tsî ǁkhâuǁnâhe ge hâ i xūna ge hō-oa. ǁKhātib ge ǃgâsab ôab, Lota ǁîb di ūhâxūn, tarekhoedi tsî nau ǃkhōsaben ǀkha ǀhao hâse ge oahā-ū.
Melxisedeki ge Abramma ra ǀkhae
17Abrammi ge Kedorlaomeri tsî ǁîb ǀkha ge ǀhûǁare hâ i gao-aoga dan tsî oa, ob ge Sodoms di gao-aoba ǁîb ǀkha nî Skaveǃgoaǃnāb, Gao-aob di ǃgoaǃnāb tis tsîna ǂansab ǃnâ ǀhaose ge ǂoaxa. 18Tsîb ge Melxisedeki, Salems di gao-ao tsî ge ǁkhāti Hoan xa ǀGapi Elob di prister iba pere-i tsî ǂauxûi-i tsîna Abramma hā-ūba,#Heb. 7:1-10 19ǁîba ǀkhae tsî ge mî: “Ab Hoan xa ǀGapi Elob, ǀhommi tsî ǃhūbaiba ge kuruba Abramma ǀkhae! 20Ab Hoan xa ǀGapi Elob, satsa sa khākhoen ǂama dansa go māba koahe!” Ob ge Abramma hoaraga xūn, ǁkhâuǁnâhe ge hâ in hîab ge hō-oan di disiǁîǃâsa Melxisedeka ge mā.
21Ob ge Sodoms gao-aoba Abrammi ǃoa “Hō-oats go xūna ūhâbasen, xawe khoen ti ǃāsa xu ge ǃkhōsabese ūhe hâ ina mā te re” ti ge mî. 22Ob ge Abramma “Tita ge ǃKhūb, Hoan xa ǀGapi Elob, ǀhommi tsî ǃhūbaib di Kuru-aob aiǃâ ra nū, 23ǀgui ǁapa-i tamas ka io sa ǁharoǃhâuro-i tsîna ta ū tide ǃkhaisa. Îts tā ‘Tita ge Abramma go ǃkhū kai’ ti mî. 24Tita ge xū-i xare-e ūbasen tide, ti khoegu go ǂûn ǀguin ose. Xawe Aneri, Eskoli tsî Mamreb hâgu hîa tita ǀkha ǀhû hâse goro ǃkhamgu ge ǁîgu di ǃâ-e nî hō.”
Currently Selected:
Genesis 14: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
