Genesis 16
16
Hagars tsî Ismaeli
1Abrammi di taras, Sarais ge ǁîba ǀgôa-e ge ǁoraba ǁoa i. Xawes ge Saraisa Egipteǁî khobos, Hagar ti ǀon hâsa ge ūhâ i 2tsîs ge Abramma ge mîba: “ǃKhūb ge tita ǁora ta tidese ǂganam hâ. Tare-i ǃaromats ǁnâi ti khobos ǀkha ǁomǀhao tama hâ? ǀNîsis kom ǁîsa tita ǀgôaro-e a ǁoraba ǁkhāo?” Abrammi ge taras âb ge mîn ǀkha ge ǀhûǀgui. 3Tsîs ge ǁîs di khobos, Hagarsa Abramma xōǀkhātaras ase ge mā. Nēs ge disi kuriga ra ǁîra ǀnai Kanaanǃhūb ǃnâ ǁan hâ hîa ge ī. 4Tsîb ge Abramma Hagars ǀkha ge ǁomǀhao tsîs ge ǁîsa ge ǀgamǀkhā. ǁÎs ge ǀgamǀkhās a ǃkhaisas ge ǂano, ǀhonkhoes âsa ge ǃharaxū.
5Os ge Saraisa Abramma ge mîba: “Nē ǃharaxūhes hîa ta ra tita hōs ge sats xa ǃaromahe hâ. Tita ge ǁîsa satsa taras ase ge mā, xawes ge ǀgamǀkhās a ǃkhaisas ge ǂan ǁaeba xu ge ǃharaxū te. Ab ǃKhūba sats tsî tita ǁaegu ǀgoraǃgâ, tari-i a ǂhanu ǃkhaisa!”
6Ob ge Abramma Saraisa ge ǃeream: “Sa ǃgās, sa ǃnaka hâs komo, xuige sas ra ǂgao khami dī-ū si re.” Os ge Saraisa ǁnātikōse Hagarsa, egas ge ǁnāpa xu sī ǃkhoenis kōse ge khoedīǁoa.
7 ǃKhūb di ǀhomǃgāb ge Surs daob ǃnâ ǂnôa ǁgamǀau-i tawa ǁîsa ǀhao-ū 8tsî ge mî: “Hagar, Sarais di khobose, mâpa xu tsî mâǀîsa kha?”
Os ge Hagarsa “Tita ge ti ǀhonkhoes, Saraisa xu ra ǃkhoeni” ti ge ǃeream.
9Ob ge ǀhomǃgāba ǁîsa ge mîba: “Oa ǁîs ǁga, î ǁîs di khobose sī hâ re.” 10Tsîb ge ǃaruǀî “Tita ge sas a ǃgôa ǁkhās ǃgâ-ai kai suriba nî mā si. 11Sas ge aore ǀgôaba nî ǁora, os ge ǁîba Ismael#16:11 Ismael: Nē Hebregowab ǃnâ hâ ǀons ge Elob ge ra ǁnâu ti ra ǂâibasen. ti nî ǀonǂgai, ǃKhūb go sas ra tsâ ǀgausa ǁnâu xui-ao. 12Xaweb ge sa ôaba ǃgarodâuki-i khami nî ī; ǁîb ge hoaraga khoen ǃoagu nî hâ, tsî hoa khoena ǁîb ǃoagu. ǁÎb ge hoaraga ǀaokhoen âba xu ǃnūse nî hâ.” 13Os ge Hagarsa ge dîsen: “Amabes ǃnâ ta kha Eloba mû tsî ǁnās xa nî ǃhoase ûi hâ?” Nē mîdi ǀkhas ge ǁîsa ǃKhūb, ǁîs ǀkha ǁnāpa ge ǃhoaba “Mû ra Elob” ti ge ǂgai. 14ǁNāpa xus ge khoen ra ǁnā ǁgamǀaus Kades tsî Bered hâra ǁaegu hâsa “ǁNāb ûitsama a tsî ra mû teb di tsaus” ti ǂgaisa.
15Tsîs ge Hagarsa Abramma ǀgôab, Ismael tib ge ǀonǂgaiba ge ǁoraba.#Gal. 4:22 16Hagars ge Ismaela ǁoraba bi ǁaeb aib ge Abramma ge ǁkhaisadisiǃnaniǀa kurixa i.
Currently Selected:
Genesis 16: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
