Genesis 19
19
Sodoms khoen di ǂkhabasib
1ǀGam ǀhomǃgākha ge ǃoes ǃnâ Sodoms tawa, Loti Sodoms ǂgâ-ams tawa ǂnôa hîa ge sī. ǁÎkhab ge mû ob ge Lota khâi tsî ǁîkha ge ǃgûǃoa. Tsîb ge ǁîkha aiǃâ ais âb ra ǃhūba tsâǀkhāse ǃhon 2tsî ǁîkha ǃoa ge mî: “ǃGôahesakho, sakho ǃgāta di oms tawa toxopa sī, î ǁnāpa ǁom re. ǁNāpa kho ge ǂaidi âkho ǁā tsî ǁgoaǃaroma ǁnāpa xu khâi a ǃkharu ǁkhā.”
O kha ge ǀhomǃgākha “Hî-î, sikhom ge ǂgās ai nî ǁom” ti ge ǃeream bi.
3ǁÎb ge kaise ǀûs ose ǂgan, o kha ge ǀams ai Lota oms ǁga ge sao. Sī gu ge ob ge Lota ǃgān âba pere-e am tsîn nî nē ǃhaokhoekha ǃaroma ǃgâi ǂû-e sâi ǃkhaisa ge mîmā, tsî gu ge toa i ge o ge ǂû.
4Noxopa kha ǁîkha ǁomǃgû tama hîa gu ge Sodoms di aorekhoega Loti omsa ge ǃnamiǂgā. Hoaraga khoegu ǃās digu, kaigu tsî ǂkhamgu hoagu ge ǁnāpa ge hâ i. 5ǁÎgu ge Lota ǂgai tsî gere mî: “ǁNā khoekha, sa tawa nî hâse go nēǃoe hākha mâpa hâ? Sige tawa ǂoaxa-ū, î ge sige ǁîkha ǀkha sorosise ǁgoe!”#ǂHǂh. 19:22-24
6Ob ge Lota ǃauga ǂoa tsî daosa ǁîb ǃgâb ai ǂganam 7tsî ǁîga gere ǀkhoma: “Ti khoego, tā go toxopa ǁnāti ī ǂkhaba xū-e dī re!
8“Kō re, tita ge ǀgam oaxaeǀgôara ūhâ. A ta ǁîra ǂoaxa-ūba go re, î go ǁîra ǀkha ǂgao go ra khami dī. Ti oms di ǃhaokhoekha tsî ta ǁîkha nî sâuse i xuige, ǁîkha tā toxopa xū-e dī re.”
9O gu ge ge mî: “Sige daoba xu ǂgō. Satsa ǃhaokhoese ge hāǃâ tari-i ǂama ǀgoraǃgâ-aose ra hâ ǂgao? Sige daoba xuts ga ǂgō tama io, o ge nî ǁnā khoekha ǃgâ-ai tsûtsû tsi.” Tsî gu ge Lota ǂhābē tsî ais ǁga ge ǁgū, dao-amsa nî khôaǁnâse. 10Xawe kha ge oms ǃnâ ge hâ i khoekha Lota ǂgaeǂgâxa tsî dao-amsa ge ǂganam. 11ǁNās khaoǃgâ kha ge hoaraga khoegu ǃauga ge hâ iga ge ǂgī kai, dao-amsa gu hō tidese.#2Gao. 6:18
Loti ge Soars ǁga ra ǃhū
12Nē ǀgam khoekha ge Lota ge mîba: “Nēpa ga hâ khoen âts; ǀgôan, ǀuiǀgôagu, tamas ka io hâ ka ǀaokhoe-i sa-i hoa-i hîa nē ǃās ǃnâ ǁan hâ-i ga hâo, ǁîna nēpa xu ūǂui 13nē ǃāsa khom nî hîkākāse ī xuige. ǃKhūb ge nē khoen tsî ǃās ǂama hâ ās xa kaibahe tsî sikhoma Sodomsa nî hîkākāse go sî.”
14Ob ge Lota ǁîb di ôara ge ǃgameba mîmâiba hâ i khoekha sī ge mîba: “Khâi, î kho nē ǃāsa xu ǂoa, ǃKhūb nî nē ǃāsa hîkākā xuige.” Xawe kha ge ǁîkha ǀnoreǃhoab ra ti ge ǂâi hâ i.
15ǁGoaǂnobos ge ǁhai, o kha ge ǀhomǃgākha Lota ǁgari tsî ge mî: “Khâimâ! Sa taras tsî sa ôara tsîna ū îts ǂoa, î du tā ǃās ga hîkākāhe o sadu di ûiga ǂoaǃnâ.” 16Loti ge ǀhabe, o kha ge ǀhomǃgākha ǁîb, ǁîb taras tsî ôasara tsîna ǃomgu ai ǃkhō tsî ǃāsa xu, ǃKhūb gere ǁîba ǀkhom xui-ao ge ǂgaeǂguiǂui.#2Pet. 2:7 17Tsîb ge ǀhomǃgākha di ǀguiba Lota ǃāsa xu ǂoaxa-ū tsî ge mîba: “ǃKhoe, sadu ûigu nî sâuhese. Tā ǂnanoa, î tā ǂgāb ǃnâ mâ. ǃNâub ǁga ǃkhoe, î du tā ǃgamhe.”
18Ob ge Lota ge ǃeream: “Hî-î, tā toxopa ǁnāǀîs ti mî re. 19Kaisets ge tita ǃaroma go ǃgâi i tsî ti ûiba go sâu. Xawe gu ge ǃnâuga kaise a ǃnū tsî ta ge garu ta a hîa tsūǃgâb xa hāǂamhe tsî ǁnāpa ta sī tama hîa nî ǁō. 20ǁNās ge ǁîs ǁga ta a ǃkhoeni ǁkhā ǃārosa ǀgūse hâ. Kaise ǂkhari ǃāros ge tsî ta ge ǁnāpa nî ǃnorasa.”
21Ob ge ge ǃeream: “Ā, ǂhanu a. O ta ge ǁnā ǃārosa hîkākā tide. 22O ǁnāǀî ǃkhoe re! Tita ge sats ǁnāpa sī tamas kōse xū-e a dī ǁoa.”
Loti ge ǂkhari a ti mî xui-aos ge nē ǃārosa Soar#19:22 Soar: Nē ǀons ge Hebregowab di mîs ǂkhari ti ra ǂâibasens khami ra ǀō. ti ge ǀonǂgaihe.
Sodoms tsî Gomoras hâra di hîkākāhes
23Sores ǁhaib ǀkhab ge Lota Soars ǃnâ ge ǂgâ. 24Ob ge ǃKhūba ǃnapetamase khau ra sulfura Sodoms tsî Gomoras ǂama ǀapi kai#Mat. 10:15; 11:23-24; Luk. 10:12; 17:29; 2Pet. 2:6; Jud. 7 25tsî hoa ǀgam ǃāra, ǁîra ǃnâ ǁan hâ khoen tsî ǃhūba xu ra hā xūn hoan ǀkha ge hîkākā. 26Xawes ge Loti tarasa ǂnanoa tsî ge ǂōǂkhâǃnâ kai.#Luk. 17:32
27Abrahammi ge nautsēkam ǃnauǁgoaga khâi tsî ǁnā ǃkhaib, ǁîb tawab ǃKhūb ǀkha gere ǃhoab tawa ge sī. 28ǁNāpa xub ge Sodoms tsî Gomoras hâra tsî hoaraga ǂgāb ǁga kōǁnâ, ob ge ǃhūba xu, ǁganomsa xus khami ra khâi ǀanna ge mû. 29Xaweb ge Eloba ǂgāb di ǃāra, Loti ge ǁanǃnâ hâ irab gere hîkākāo, Abrahammi xa ǂâi tsî Lota hîkākāheb tidese ge sâu.
Moabǁîn tsî Amonǁîn ge ǃhui ǀgaus
30Soars ǃnâ ǁansab gere ǃao xui-aob ge Lota ôasara ǀkha ǁnāpa xu ǃnâugu ǁga doeǃapa tsî ǁhoa-i ǃnâ sī ge ǁan. 31Os ge ǀgôas kaisa ǃgâsasa ge mîba: “Sam îb ge ra kaira tsî nē ǃhūb ǃnâ gu ge samma nî ǃgame tsîm ǀgôana nî ǁoraba aore khoega ǀkhai. 32Xuige ǀkhī, îm sam îba āsiǀhoroǀhoro tsî ǁîb ǀkha sorosise ǁgoe tsî ǁîba ǀgôana ǁoraba.” 33ǁNāǃoe ra ge mî ra ge khami ǁgûba ge āsiǀhoroǀhoro. Tsîs ge kai ǀgôasa ǁgûb ǀkha sorosise ge ǁgoe. ǁÎb ge ǁnātikōse ge ǀhoro hâ i tsî mâ ǁaes ge hā ǁgoe tamas ka io ǁîba xu khâi ǃkhais tsîna ge ǀū i.
34Tsî sao ra tsēs ais ge ǀgôas kaisa ǃgâsasa ge mîba: “Tita ge ǁanǃoe sam îb ǀkha go ǁom. ǀKhī îm nēǃoe ǁkhawa āsiǀhoroǀhoro bi, îs sasa nēǃoe ǁîb ǀkha sorosise ǁgoe. ǁNā ǀgaus aim ge mâs hoasa sam îb di suriba a ǃkhōǀgara ǁkhā.” 35ǁNāǃoe ra ge mî ra ge khami ǁgûba ge āsiǀhoroǀhoro. Tsîs ge ǀgôas ǂkhamsa ǁgûb ǀkha sorosise ge ǁgoe. ǁKhawab ge ǁîba ǁnātikōse ge ǀhoro hâ i tsî mâ ǁaes ge hā ǁgoe tamas ka io ǁîba xu khâi ǃkhais tsîna ge ǀū i. 36ǁNā ǀgaus ai ra ge hoa ǀgôara Loti dira ǁîra di ǂhunuma ǁgûba xu ge ǀgamǀkhā. 37ǀGôas kais ge aore axab Moab#19:37 Moab: Nēs Hebregowab di mîs hîa Ti îba xu ti hâs khami ra ǀō. tis ge ǀonǂgaiba ge ǁora. ǁÎb ge nētsē hâ Moabǁîn di aboxa ge iba. 38ǀGôas ǂkhams tsîn ge aore axab, Ben-ammi#19:38 Ben-ammi: Nē ǀons ge Hebregowab ǃnâ Ti khoexakhoeb di ôab ti ra ǂâibasen tsî Hebremîs Amon ti hâs khami ra ǀō. tis ge ǀonǂgaiba ge ǁora. ǁÎb ge nētsē hâ Amonǁîn di aboxa ge iba.
Currently Selected:
Genesis 19: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
