Genesis 25
25
Abrahammi ge ǁkhawa ra ǃgame
(1 Kroniks 1:32-33)
1Abrahammi ge Ketura ti ge ǀon hâ i khoes ǀkha ge ǃgame. 2ǁÎs ge ǁîba Simranni, Joksanni, Medanni, Midianni, Isbaki tsî Sua hâga ge ǁoraba. 3Joksanni ge Skebab tsî Dedanni tsîkha di î ge iba tsî Dedanni ôan ge Assurǁîn, Letusiǁîn tsî Leumiǁîn tsîna. 4Midianni ôagu ge Efab, Eferi, Hanoxi, Abidab tsî Eldab tsîgu, hoagu hîa Keturas ôaga.
5Abrahammi ge hoaraga xūn ǁîb dina Isaka ge mā; 6xaweb ge noxopab ûitsama hîa ǁîb di nau taradi ôagu, ǁîb ge ǁorabahega ǀkhaexūna gere mā. Tsîb ge nē ǀgôagu âba Aiǂoasǀkhāb ǁga, ǃnūse gu nî Isaka xu hâse ge sîbē.
Abrahammi di ǁō tsî ǁkhōhes
7Abrahammi ge ǀguikaidisihûdisikoroǀa kuriga ge ûi. 8ǁÎb ge kaiseb kaira tsî ûiǂâu hâ hîa ǁō tsî ǁîb khoen ǀkha ge ǀhaoǀhaohe. 9ǁÎb ôakha, Isaki tsî Ismael hâkha ge Abrahamma Maxpelas di ǁhoaǃnās, Mamres di aiǂoasǀkhāb ai ǁgoe ǃhanab, Efronni, Sohari, Hetǁîb ôab di ge ib ǃnâ hâs ǃnâ ge ǁkhō. 10Abrahammi ge nē ǃhanaba Hetǁîga xu ge ǁama hâ i. Tsî ra ge Abrahammi tsî ǁîb taras Saras hâra hoara ǁnāpa ge ǁkhōhe.#Gen. 23:3-16 11Abrahammi di ǁōb khaoǃgâb ge Eloba ǁîb ôab, Isaki “ǁNā-Ûitsamab-hîa-ra-Mû-teb-di-Tsaus” tawa ge ǁan hâ iba ge ǀkhae.
Ismaeli di surib
(1 Kroniks 1:28-31)
12Egipteǁî ǃgās, Saras dis ge Abrahamma ǁoraba ǀgôab Ismaeli 13ge sao ra ǀgôagu ǃnae gu ge saogub ai mâisaga ge ūhâ i: Nebajoti, Kedari, Adbeli, Mibsammi, 14Mismab, Dumab, Masab, 15Hadadi, Temab, Jeturi, Nafisi tsî Kedemab tsîga. 16Nēdi ge Ismaeli ôagu ǀondi hîa ega ǁîgu di ǃhaodi tsî ǁîgu ǁanǃkhaigu tsîna gere māhede. 17Ismaeli ge ǀguikaidisiǃnonadisihûǀa kurigu ǀkha ge ǁō. 18Isaki di surib ge Havilas tsî Surs di ǀkharib, Egipteb di aiǂoasǀkhāb, Asiriab ǁga hâb ǃnâ ge ǁan. ǁÎn ge nau surib Abrahammi diba xu ǃkharagaguse ge ǁan hâ i.
Esaub tsî Jakob hâkha di ǃnaes
19Nēs ge Abrahammi ôab, Isaki di ǂhôasa: 20Isaki ge hakadisi kurixab a hîa Rebekas, Betueli, Arameaǁîb, Padan-Arams dib di ôas, Labanni ǃgâsas ǀkha ge ǃgame. 21Rebekas ge ǁora ǁoa i xui-aob ge Isaka ǀgaisase ǃKhūb ǃoa ge ǀgore. Ob ge ǃKhūba ǁîb ǀgoresa ge ǁnâu-am tsîs ge Rebekasa ge ǀgamǀkhā. 22ǁÎs ge ǀgēkha ge ǀgamǀkhā i tsî nē ǀgôarokha gere ǃnāb âs ǃnâ ǃkham, o “Tare xū-i ǃaroma i kha nēti ī xū-e tita ǀkha ra ī?” ti mî tsî ǃKhūba sī ge dî. 23Ob ge ǃKhūba ge mî:
“ǀGam ǁaera ge sas ǃnâ hâ;
sas ge ǀgam ǃhaora nî ǁora;
ǀguis ge naus xa nî ǀgaisa;
kaib ge ǂkhamma nî ǃoaba.”
24Tsî ǁoras nî tsēdi ge ǀoa os ge Rebekasa ǀgēkha ge ǁora. 25ǂGurob ge ǀapaǃnâse ge ī i tsî khōb âb ge ǀûxaǀkhā anaǂamsara-i khami ī i xui-aob ge Esau#25:25 Esau: Nēs ge Seirs, egab ge Esaub di suriba a ǁanǃnâs ǁga ra ǁnaeǁgau. ǁKhātis ge Hebregowab di mîs ǀûxa ti hâs khami ra ǀō. ti ge ǀonǂgaihe. 26ǀGamǁîb ge Esaub di ǃnôas ai ǃkhō hâse ge ǃnae. ǁNā-amagab ge Jakob#25:26 Jakob: Nē ǀons ge Hebregowab di mîs hîa ǃnôas ti hâs khami ra ǀō. ti ge ǀonǂgaihe. Isaki ge nē ǀgôakha ge ǃnae o ge ǃnanidisi kurixa i.
Esaub ge ǂguroǃnaesabesisa ra ǁamaxū
27Nē ǀgôakha ge ge kai. Esauba ǂoaǂamsa ǃau-ao tsî ǃgarob ǃnâ hâsa ǀnam tsîb ge Jakoba ǃnōsa khoeb, oms tawa ra hâb ase ge ī i. 28Isaki ge Esaub gere ǃau xamarin ǁgan-eb gere ǂû xui-ao ǁîba kaise ge ǀnam i, xawes ge Rebekasa Jakoba ge ǀnam i.
29ǀGuitsēb ge Esauba Jakob ra ǂû-e sâi hîa ǃgaroba xu kaise ǃâ hâse oahā 30tsî Jakob ǃoa ge mî: “Toxopa kaise ta ǃâsa xuige ǁnā ǀapa xū-i hîats sâi hâ-i xa au te re.” ǁNāpa xus ge Edom#25:30 Edom: Nē ǀons ge Hebregowab mîs ǀapa ti hâs khami ra ǀō. tib ge ǀonǂgaihesa.
31Ob ge Jakoba “O aibe sats ǂguroǃnaesats ase ūhâ ǂhanuga tita ai ǁamaxū re” ti ge mî.
32Ob ge Esauba ǃgâsaba ge ǃeream: “Tita kom ra ǁōǁgao. Mâ harebe-e gu ǂguroǃnaesabesis di ǂhanuga ǁnâi tita nî ūhâba, ǁō ta kas khaoǃgâ?”
33Ob ge Jakoba “Aibe titats nî sa ǂguroǃnaesabesis di ǂhanuga mā ǃkhaisa nū re” ti Esauba ge mîba.#Heb. 12:16
Ob ge Esauba nū tsî ǁîb di ǂguroǃnaesabesis di ǂhanuga Jakoba ge mā. 34Ob ge Jakoba Esauba pere-i tsî sâib hâ lensi-i tsîn xa ge mā tsîb ge ǂû, ā tsî khâi ge ǃgû. Nē ǀgaus aib ge Esauba ǁîb di ǂguroǃnaesabesisa ge ǃharaxū.
Currently Selected:
Genesis 25: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
