Johaneb 1

Ûib di Mîs

1Tsoatsoas ǃnâs ge Mîsa ge hâ i tsîs ge Mîsa Elob ǀkha ge hâ i tsîs ge Mîsa ge Elo i. 2ǁÎs ge tsoatsoasa xu Elob ǀkha ge hâ i. 3ǁÎs ǃnâ-ub ge Eloba hoa xūna ge kuru; ǀgui xū-i tsîn ge ǁîs ose kuruhe tama hâ. 4Nē Mîs ge ge ûib di ǀau i#1:4 Nē mîs ge ge ûib di ǀau i: Tamas ka io Kuruhe gen hoan ge ǀhû hâse ûiba Mîs tawa ūhâ. tsîb ge nē ûiba ǃnâba khoesiba ge hā-ūba. 5ǃNâb ge ǃkhaenab ǃnâ ra ǃnâ tsî tātsē ǃkhaenab xa ǀarihe ǁoa.

6 # Mat. 3:1; Mrk. 1:4; Luk. 3:1-2 Tsîb ge Eloba ǁîb di sîsabeb, Johane ti ge ǀon hâ iba ge sî, 7khoenab ǃnâb xa nî ǃkhō-amba tsî-i mâ-i hoa-e nēs ǃnâ-u nî ǂgom ǁkhāse. 8ǁÎb ge ge ǃnâ tama hâ i, xaweb ge ǃnâb xa nî ǃkhō-amse ge hā. 9Nēb ge ge ama ǃnâ i, ǃnâb hîa mâ-i hoa-i ai ra ǃnâb ge ǃhūbaib ai ge hā.

10ǁÎb ge ǃhūbaib ǃnâ ge hâ i tsî Elob ge ǃhūbaiba ǁîb ǃnâ-u ge kuru, xaweb ge ǃhūbaiba mûǂan bi tama ge i. 11ǁÎb ge ǁîb di ǂhunuma ǃhūb ǁga ge hā, xawen ge ǁîb ǂhunuma khoena ǃkhōǃoa bi tama ge i. 12ǁÎba ǃkhōǃoa tsî ge ǁîb ǀons ǃnâ ǂgomn hoanab ge Elob ôasis di ǀgaiba ge mā. 13ǁNān ǀaoba xu tamas ka io khoesi turaga xu tamas ka io aob di ǂâisa xu ǃnae taman, xawe Eloba xu ǃnae hâna.

14Tsîs ge Mîsa ge khoe kai tsîs ge sada ǁaegu ge ǁan, ǀkhommi tsî amab tsîkha xa ǀoa hâse. Tsî da ge ǁîs di ǂkhaisiba ge mû, ǁGûba xu ǀguise ǃnae hâ ǀGôab di ǂkhaisib ase.

15Johaneb ge ǁîb xa ǃkhō-am tsî ge ǂgaiǂui: “Nēb ge ǁnāb ǁîb xa ta goro mîba, ‘ǁÎb hîa tita xa kaib tsî ti aiǃâ ge hâ iba, tita xab ge ǂguro i xui-ao.’ ”

16Tsî sada hoada ge ǁîb ǀkhommi di ǀoasasiba xu, nē ǀkhommi ai nauba ge ǃkhōǃoa. 17ǂHanub ge Moseb ǃnâ-u māhe xui-ao, xawe ǀkhommi tsî amab tsîkha ge Jesub Xristub* ǃnâ-u ge hā. 18Khoe-i xare-i ge Eloba tātsēs tsîna mû tama hâ. Xawe ǁîb di ǀguise ǃnae hâ ǀGôab, ǁîb tsîn a Elob tsî kaise ǁîb Îb tawa ǀgūse hâb ge Elob xa ge mîba da.

Johaneb ǁĀǁnâ-aob di aoǁnâs

(Mateub 3:1-12; Markub 1:2-8; Lukab 3:1-18)

19Nēs ge Johaneb di ǃkhō-amsa; Jodeǁî ǂgaeǂgui-aogu ge Jerusalemsa xu pristergu tsî Leviǁîgu tsîga ge sî “Taritsa kha satsa?” ti gu nî dî bise. 20ǁÎb ge îganǀgē tamase “Tita ge Xristu tama ta” ti ge ǁguiǁnâ.

21 # Mal. 4:5; Deu. 18:15-18 O gu ge “Taritsa ǁnâi? Eliatsa ǀnîsi?” ti ge dî bi.

“Hî-î” tib ge Johaneba ǁîga ge ǃeream.

“Kēbo-aotsa ǁnâi?”

“Hî-î” tib ge ge ǃeream.

22O gu ge ǁîb ǃoa ge mî: “Taritsa kha ǁnâi? Mîba gere, î ge sige go sîga ǃeream-e sī mā ǁkhā. Tare-ets sats xa mî ǁkhā?”

23 # Jes. 40:3 Ob ge Johaneba kēbo-aob Jesajab di mîdi ǀkha ge ǃeream:

“Tita ge ǃgaroǃhūb ǃnâ ra ǂgaib di domta,

‘ǃKhūba daoba ǂhanuǂhanuba re!’ ”

24Tsî gu ge sîsabegu Farisegu* diga 25ge dî bi: “Xristu tama i, Elia tama i tsîts kom kēbo-aos tsîna hî tamao, tare-i ǃaromats ǁnâi ra ǁāǁnâ?”

26Ob ge Johaneba ǁîga ge mîba: “Tita ge ǁgam-i ǀkha ra ǁāǁnâ, xawe sadu ǁaegub ge ǀguib hîa sadu xa ǀūheba mâ. 27ǁNāb ge a ǁî, ti khaoǃgâ ǃgoaxab, ǁîb ǀkhapudi ǃhâuroga xores tsîna ta anu tamaba.” 28Nēn ge Jordanǃāb aiǂoas ǃnâ ǂnôa ǃāros Betanis, Johaneb gere ǁāǁnâs tawa ge ī.

Elob di ǁKhaob

29Sao ra tsēb ge Johaneba, Jesub ǁîb ǃoa ǃgoaxa ǃkhaisa mû tsî ge mî: “Mû! Nēb ge a Elob di ǁKhao, ǃhūbaib di ǁorena ra ūbēba! 30Nēb ge ǁîb xa ta gere mîba: ‘Ti khaoǃgâb ge khoeba ǃgoaxa tita xa kaib tsî ti aiǃâ ge hâ iba, tita xab ge ǂguro i xui-ao.’ 31Tita ge tarib a ǃkhaisa ge ǀū i, xawe ta ge ǁgam-i ǀkha gere ǁāǁnâ Israelǁîn ǁîb a tari ǃkhaisa nî ǂanse.”

32Ob ge Johaneba ge ǃkhō-am: “Gagab ǂnabu-i ase ǀhomma xu ǁgôaxa tsî ǁîb ai ra hāba ta ge ge mû. 33Tita tsîn ge ǁîb a tari ǃkhaisa ge ǀū i, xaweb ge Elob hîa ge tita ǁgam-i ǀkha ta nî ǁāǁnâse sîba, nēti ge mîba te: ‘ǁNāb, ǁîb aib Gagaba ǁgôaxa tsî ǁîb ai hâsets ra mûb ge ǃAnu Gagab ǀkha nî ǁāǁnâ.’ 34Tita ge nēsa Jesub ǀkha ra īse ge mû tsî ta ge ǁîb a Elob Ôa ǃkhaisa ra ǃkhō-am.”

Jesub di ǂguro ǁkhāǁkhāsabegu

35Sao ra tsēb ge Johaneba ǁkhawa ǀgamkha ǁîb ǁkhāǁkhāsabegu dikha ǀkha ge mâ i. 36Tsî Jesubab ge ǃkharugaruse mû, ob ge “Mû! Nēb ge Elob di ǁKhaoba!” ti ge mî.

37O kha ge Johaneb di ǀgam ǁkhāǁkhāsabekha dabasen tsî Jesuba ge sao. 38Jesub ge ǂnan tsî ǁîkha ra sao bi ǃkhaisa mû, ob ge ǁîkha ge dî: “Tare-e kho ra ôa?”

O kha ge ge ǃeream: “Rabitse” (Nēs ge ǁKhāǁkhā-aotse ti ra ǂâibasen.) “Mâpats ra hâ?”

39Ob ge ǁîkha ǃoa ge mî: “Hā, î kho mû.” ǁÎkha ge ǁîb ǀkha ǃgû tsî ǁîb ra hâ ǃkhaisa ge mû. Tsî kha ge ǁnāpa ǁîb ǀkha hoaraga tsēsa, tsēǃgâǁaeb di haka irsa xu ge hâ.

40ǁNā ǀgamkha di ǀguib ge Andreab, Simon Petrub di ǃgâsaba. 41ǁNātimîsib ge Andreaba ǁîb ǃgâsab Simonna ôa tsî hō tsî ǁîba ge mîba: “Mesiaba (Nē mîs ge Xristub ti ra ǂâibasen) ge ge go hō.”

42Tsîb ge Andreaba, Simonna Jesub tawa ge sī-ū.

Ob ge Jesuba Simonna kō tsî ge mî: “Sats ge Simon, Johaneb ôatsa, xawets ge Kefab ti nî ǂgaihe.” (Nēs ge Petrub ti hâ ǀons ǀkha a ǀgui tsî “ǃHaob” ti ra ǂâibasen.)

Jesub ge Filipub tsî Natanaeli tsîkha ra ǂgai

43Sao ra tsēb ge Jesuba Galileab ǁga ǃgûsa ge mîǁgui. ǁÎb ge Filipuba sī ǁnāpa ge ǀhao-ū tsî ǁîb ǃoa ge mî: “Tita sao re!” 44Filipub ge Andreab tsî Petrub tsîkha ra hāxu ǃās, Betsaidas di ge i. 45Filipub ge ǃgû tsî Natanaela ôa tsî ǁîba ge mîba: “Sige ge ǁnāb Moseb ǂhanub* tsî kēbo-aogu ge ǁîb xa xoa hâ iba go ǀhao-ū, Josefi ôab, Jesub Nasaretǁîba.”

46“Nasarets ti!” tib ge Natanaela ge ǂgaiǂui. “Mâ ǃgâi xū-e ǁnāpa xu a ǀkhī ǁkhā?”

“Hā, îts aitsama mû” tib ge Filipuba ge mî.

47Natanaeli ǁîb ǁga ǃgoaxa ǃkhaisab ge mû, ob ge Jesuba ǁîb xa “Nē ǃgoaxab ge ama Israelǁîb, gāxaǃnâsi-e ūhâ tamaba” ti ge mî.

48Ob ge Natanaela “Mâpa xuts a ǂan te?” ti ge dî.

Ob ge Jesuba ge ǃeream: “Filipub xats nî ǂgaihes aiǃâ ta ge ǀnomahais ǃnakats hâ hîa go mû tsi.”

49Ob ge Natanaela ge ǃeream: “ǁKhāǁkhā-aotse, sats ge a Elob Ôa, sats ge Israeli di Gao-aotsa!”

50Ob ge Jesuba ge dî bi: “Nēnats kha ǀnomahais ǃgao ta ge mû tsi ti ta go mî ǃkhais ǃaroma ra ǂgom; ǁîn ǃgâ-ai kai xūnats ge nî mû.” 51#Gen. 28:10Ob ge ǁîgu ǃoa ge mî: “Amase, amase ta ra mîba go, sago ge ǀhomma ǁkhowa-amsen hâse nî mû tsî Elob ǀhomǃgāga Khoen Ôab ai gu ǃapa tsî ra ǁgôaxase.”

Currently Selected:

Johaneb 1: KKG20

Highlight

Copy