Johaneb 16

1“Tita ge nēna sago ge mîba, î go tā ǂgoms ǃnâ ǂkhabu. 2Sinagogega* xu go ge ǁîn xa nî ǃhaeǂuihe, xaweb ge ǁaeba nî hā ǁnān sago ra ǃgamn hoan Eloban ǁnās ǀkha ra ǃoaba ti nî ǂâisa. 3Tsîn ge nēna nî dī, ǁîn ti Îb tsî tita tsîkhoma a ǀū xui-ao. 4O ta ge nē xūna sago ǃoa ge mî, î go ǁaeb ga hāo ǂâihō tita ge ǁîn xa mîba go hâ i ǃkhaisa.

ǃAnu Gagab di sîsenni

“Tsî ta ge ǁîna tsoatsoasa xu mîba go tama hâ, sago ǀkha ta ge hâ i xui-ao. 5Xawe ta ge nēsi tita ge sîb ǃoa ra ǃgû tsîb ge xawe ǀguib âgo tsîna dî tama hâ mâǀî ta ra ǃgû ǃkhaisa. 6Dîs ǃās ǃnâ gu ge sago ǂgaoga ǃoab xa ǀoa hâ. 7Xawe ta ge amaba ra mîba go, sago ǃaroma i ge a ǃgâi ǃgû ta ra ǃkhaisa. ǁNās ge ǃaromas ǃgûba ta rasa. Tita ga ǃgû tama io, ob ge ǁKhaeǂgao-aoba hā tsî tita ǀkhai ǁaeb ǃnâ hui go tide. Xawe ta ge ǁîba ta nî sago ǃoa sîse ra ǃgû. 8Tsîb ge ǁîba hāb kao, ǃhūbaiba amab ǁoreb dib xa nî gowadan tsî Elob di ǂhanu-aisib tsî ǀgoraǃgâs xa nî ǁgau. 9ǁOreb xa, tita ǃnân ǂgom tama xui-ao. 10ǂHanu-aisib xa, ti Îb ǃoa ta ra ǃgû amaga tsî go ge ǃaruǀî mû te tide. 11Tsî ǀgoraǃgâs xa, nē ǃhūbaib di danaǂgaeǂgui-aob ǀnai ǀgoraǃgâhe hâ xui-ao.

12“ǂGuina ta ge ganupe ūhâ mîba go ta nîna, xawen ge nēsisa kaise a ǂgui tsî go ge a tani ǁoa. 13Tsî ǃAnu Gagab amab dib ga hā, ob ge ǁîba hoaraga amab ǃnâ nî ǂgaeǂgui go. ǁÎb ǂûb di ǁkhāsiba xub ǃhoa tide xui-ao, xaweb ge ǁnâub rana nî ǃhoa tsî ǃgoaxana nî ǂhôa go. 14ǁÎb ge ǂkhaisiba tita nî mā, ǁîb nî tita ra mîna ū tsî sago ǂhôa xui-ao. 15Ti Îb ūhân hoan ge a ti. ǁNā-amaga ta ge ab ti mîdi xa ū tsî sago ǂhôa ti ge mî.

ǃOab ge ǃgâiaǂgaob ǃnâ nî ǀkharaǀkharasen

16“ǂKhari ǁaero-e go ge mû te tide, xawe go ge ǁkhawa ǂkhari ǁaero-i khaoǃgâ nî mû te.”

17O gu ge ǁkhāǁkhāsabega ǁîǃnābe ge dîgu: “Tare-eb ra ǁnās ǀkha ǂâibasen ‘ǂKhari ǁaero-e go ge mû te tide tsî ǁkhawa ǂkhari ǁaero-i khaoǃgâ go ge nî mû te’ tsî ‘ti Îb ǁga ta ra ǃgû’ tib ra mîo?” 18O gu ge ge mî: “Tare-eb ra nēs ǀkha ǂâibasen ‘ǂkhari ǁaero-i’ tib ra mîo? Sage ge a ǀū tare-eb ra ǂâibasen ǃkhaisa.”

19Jesub ge ge ǂan i ǁîgu gere dî bi ǂgao ǃkhaisa, ob ge ǁîgu ǃoa ge mî: “Tare-e ta ‘ǂKhari ǁaero-e go ge mû te tide tsî ǁkhawa ǂkhari ǁaero-i khaoǃgâ go ge nî mû te’ ti ta go mî ǃkhais ǀkha ra ǂâibasen ǃkhaisa go kha ra dîgu?” 20“Amase, amase ta ra mîba go, sago ge tita ǀkha nî īn ǂama ā tsî nî ǃgae, xaweb ge ǃhūbaiba nî ǃgâiaǂgao; sago ge nî ǃoa, xaweb ge sago ǃoaba ǃgâiaǂgaob ǃnâ nî ǀkharaǀkharahe. 21Taras ga ǁora, os ge kai tsûb ǃnâ hâ. Xawe hoan ga ǃkharu os ge tsûba ǀuru tsî ra ǃgâiaǂgao, ǀgôaro-es go ǃhūbaib ai hā-ū xui-ao. 22Nēsi go ge kaise ǃoa hâ. Xawe ta ga ega mû go, o go ge nî ǃgâiaǂgao tsî khoe-i xare-i ge ǁnā ǁkhāsib sago ǃgâiaǂgaoba ūbēs diba ūhâ tide.

23“Tsî ǁaeb ga hā, o go ge xū-i xare-e dî te tide. Amase, amase ta ra mîba go, ǁGûb tawa go ga ti ǀons ǃnâ ǂgan xūn hoana go ge nî māhe. 24Nēsis kōse go ge ti ǀons ǃnâ xū-e ǂgan tama hâ; ǂgan, o go ge nî māhe tsî go ge dīǀoaǀoasa ǃgâiaǂgaoba nî ūhâ.

Tita ge ǃhūbaiba ge dan

25“Nēna ta ge ǂkhōdi* ǃnâ sago ǃoa gere ǃhoa. Xaweb ge ǁaeba nî hā sago ǃoa ta ǂkhōdi ǃnâ-u ǃaruǀî ti Îb xa ǃhoa tideba. 26ǁNā tsēs ga hā o go ge ti ǀons ǃnâ nî ǂgan. Tsî ta ge aigowa-ao-i ase sago ti Îb tawa ǂganba tide, 27ti Îb sago a ǀnam amaga. ǁÎb ge sago a ǀnam, sago tita a ǀnam tsî Eloba xu ta ge hā ǃkhaisa ra ǂgom amaga. 28Ti Îba xu ta ge ǃhūbaib ai ge hā tsî ta ge nēsi ǁkhawa ǃhūbaiba ǁnāxū tsî ti Îb ǁga ra ǃgû.” 29O gu ge ǁkhāǁkhāsabegu âba ǁîb ǃoa ge mî: “Nēsits ge ǂhauǃnâse ǂkhō-i tsîna sîsenū tamase sige ǀkha ra ǃhoa. 30Tsî ge ge nēsi a ǂan hoanats ǂan tsîts khoe-i nî dîs aiǃâ ǀnai ǃereamde ǂan ǃkhaisa. Tsî ge ge nēsisa ra ǂgom Eloba xuts ra hā ǃkhaisa.” 31Ob ge Jesuba ge ǃeream gu: “ǂGom go ra nēsi? 32Iri ge nî hā tsî ǀnaib ge go hā sago nî ǀgaruǀgaruheba. Xawe ta ge ǀguri hâ tama hâ tsîb ge ti Îba tita ǀkha hâ. 33Tita ge sago nēna ra mîba ti ǃaroma go nî ǂkhîba sago ǂgaogu ǃnâ ūhâse. ǃHūbaib ǃnâ go ge ǂōǂōsiba nî ūhâ, xawe ǂgaoba ūhâ re, tita ge ǃhūbaiba dan xuige.”

Currently Selected:

Johaneb 16: KKG20

Highlight

Copy