Johaneb 18

Jesub di ǃkhōhes

(Mateub 26:47-56; Markub 14:43-50; Lukab 22:47-53)

1Tsî Jesub ge ǀgoretoa, ob ge ǁîb ǁkhāǁkhāsabegu* ǀkha ǃgû tsî Kidronni ǃgoaǃnāb di nauǃani ǃgâu tsî ǃhana-i ǃnâ ǁîb ǁkhāǁkhāsabegu ǀkha sī ge ǂgâ. 2Tsî Judab ǀapexū-aob ge ǁkhāti ǁnā ǃkhaiba ge ǂan i, Jesub ǃnuriǃnāde ǁnāpa ǁîb di ǁkhāǁkhāsabegu ǀkha gere ǀhao amaga. 3Ob ge Judaba ǁnā ǃhanab tawa Romeǁî toroǃkhamaogu tsî Tempelǃûi-aogu hîa ge danapristergu tsî Farisegu* xa sîhe hâ i gu ǀkha ǃomǃnâdi, ǃamǀaedi tsî ǁâtanin tsîn ǀkha ge sī. 4Jesub ge ǀnaib ge hoan hîa nî īna ǂan i, xawe aisǀkhāb ǁga hā tsî “Tari-e go ra ôa?” ti ge dî.

5O gu ge “Jesub Nasaretǁîb” ti ge ǃeream.

Ob ge Jesuba ǁîgu ǃoa “Tita ge ǁî ta” ti ge mî.

Tsî Judab ǀapexū-aob ge ǁkhāti ǁîgu ǀkha ge mâ i. 6Tsî Jesub ge “Tita ge ǁî ta” ti mî, o gu ge khao-oa tsî ǃhūb ai ge ǁnā. 7ǁKhawab ge Jesuba ǁîga “Tari-e go ra ôa?” ti ge dî.

O gu ge ǁkhawa “Jesub Nasaretǁîb” ti ge ǃeream.

8Ob ge Jesuba “Tita ge ǀnai tita a ǁî ǃkhaisa go mîba go. Tita go ga ôao, nē khoega ǃgû kai re!” ti ge ǃeream. 9ǁÎb ge nēsa ǁîb ge mî mîs “Hoan titats ge mān xa ta ǀgui-i xare-e ǂoaǃnâ tama hâ” ti hâs nî dīǀoaǀoahese ge dī.

10Ob ge Simon Petruba gôab ūb ge hâ iba ǂgaeǂui tsî ǀgapipristeri* ǃgāb di amǀkhāb ǂgaesa ge ǁhāǁnâ. ǁNā ǃgāb ge Malxub ti ge ǀon hâ i. 11#Mat. 26:39; Mrk. 14:36; Luk. 22:42Ob ge Jesuba Petrub ǃoa ge mî: “Gôab âtsa ǁhōb ǃnâ ǂgā-oa! Ti Îb ge mā te ǀgabisa ta kha ā tide, tits ra ǂâi?”

Jesub ge Annab aiǃâ ra ǂhai

12O gu ge Romeǁîn di toroǃkhamaoga ǁîgu di danakhoeb tsî Jodeǁîn di ǃûi-aogu ǀkha Jesuba ǃkhō tsî ge ǃgae. 13ǁÎgu ge ǁîba ǂguro Annab ǁga ge ǃgû-ū, ǁîb ge Kajafab ǁnā kurib ǃnâ ge ǀgapiprister ib di ǀuiǁgû i xui-ao. 14#Jhn. 11:49, 50ǁÎ Kajafab ǁkhāb ge Jodeǁîna ǀapemā tsî gere mîba: “ǃGâi-i kom nîo ǀgui khoe-i nî ǁaesa ǁōba ǃkhaisa.”

Petrub ge Jesuba ra ǀūxū

(Mateub 26:69-70; Markub 14:66-68; Lukab 22:55-57)

15Simon Petrub tsî ǀnî ǁkhāǁkhāsabeb tsîkha ge Jesuba ge sao. ǁNā ǁkhāǁkhāsabeb ge ǀgapipristera ge ǂan i tsî Jesub ǀkha ǀgapipristeri ai-ommi ǃnâ ge ǂgâ. 16Tsî Petrub ge dao-ams ǀgūse ǃauga ge mâ i. Ob ge nau ǁkhāǁkhāsabeb ǀgapipristeri tawa ge ǂansa iba ǂoa tsî dao-ams tawa ge mâ i ǃûi-aos ǀkha ge ǃhoa tsîs ge ǁîsa Petruba ge ǂgâ kai. 17Os ge dao-amǃûi-aosa Petruba ge dî: “Sats tsîna kha nē khoeb di ǁkhāǁkhāsabegu ǀgui tamatsa?”

Ob ge “ǁÎ tama ta” ti ge ǃeream.

18ǃKhai ge i xui-ao gu ge ǃgāgu tsî Tempelǃûi-aogu tsîga ǀaesa khau tsî gere sâ. Petrub tsîn ge ǁîgu ǀkha mâ tsî gere sâ.

ǀGapipristeri ge Jesuba ra dîǃnâ

(Mateub 26:59-66; Markub 14:55-64; Lukab 22:66-71)

19Tsî ǀgapipristeri ge Jesuba ǁkhāǁkhāsabegu tsî ǁkhāǁkhās âb xa gere dîǃnâ. 20Ob ge Jesuba ge ǃeream: “Tita ge ǃnorasase khoen hoan aiǃâ gere ǃhoa. Tsî ta ge hūgaǀgui sinagogeb* tsî Tempeli ǃnâ hoa Jodeǁîn ra ǀhao ǃkhaigu ai gere ǁkhāǁkhā tsî xū-i xare-e ǂganǃgâsib ǃnâ ǃhoa tama ge hâ i. 21Tare-i ǃaromats nēsa ra dî te? Tare-i ǃaromats tarena ta ge ǁîna mîba ǃkhaisa ge ǁnâuna dîǃnâ tama hâ? ǁÎn ge tarena ta ge mî ǃkhaisa a ǂan.”

22Tsî Jesub ra nēna mî hîab ge Tempelǃûi-aogu di ǀguib, ǁnāpa ge mâ iba Jesuba ais ǃnâ ǁapu tsî “ǁNātits ǀgapipristera ra ǃeream?” ti ge dî.

23Ob ge Jesuba ge ǃeream: “Tsū xū-e ta ga mî hâ io, ǃkhō-am ǁnâi nē tsūsib xa, xawe amaba ta ga ǃhoa hâ io, tare-i ǃaroma du ra ǂnau te?”

24Ob ge Annaba Jesuba ǃgaehe hâse ǀgapipristeri Kajafab ǃoa ge sî.

Petrub ge ǁkhawa Jesuba ra ǀūxū

(Mateub 26:71-75; Markub 14:69-72; Lukab 22:58-62)

25Tsî Simon Petrub ra ǀaes tawa mâ tsî sâ hîan ge ǁnāpa ge mâ i khoena ge dî bi: “Sats tsîna kha ǁîb di ǁkhāǁkhāsabegu ǀgui tama?”

Ob ge ǁkhawa ǀūxū tsî “ǁÎ tama ta” ti ge mî.

26Ob ge ǀgapipristeri ǃgāgu di ǀguib, Petrub ge ǂgaes âba ǂnauǁnâb di khoexakhoe ge iba ge mî: “Tita ǁîb ǀkha ǃhanab ǃnâ go mû tsi tama hâ i?”

27Ob ge Petruba ǁkhawa ge ǀūxū bi tsî ǁnātimîsib ge aniba ge ā.

Jesub ge Pilatub aiǃâ ra sī-ūhe

(Mateub 27:1-2, 11-14; Markub 15:1-5; Lukab 23:1-5)

28ǃNauǁgoagab ge Jesuba Kajafab omma xu gao-ommi ǁga ge ǃgû-ūhe. ǁÎn ge ǃauga ge ǃâu, mâ-i hîa ga ǂgâ-i hoa-i ga ǃanuoǃnâ hâ, xawen Pasxaǃuiǂûsa gere amǃnâxa ǂgao xui-ao. 29Ob ge Pilatuba ǁîn ǁga ǂoa tsî ge dî: “Mâ ǀhapiǀhapi-ai-e du nē khoeb ǃoagu ra hā-ū?”

30O gu ge ǁîba ge ǃeream: “ǂKhabadī-ao tamab ga hâ, o da ge satsa ǁîba ga māǁnâ tama i hâ.”

31Ob ge Pilatuba ǁîgu ǃoa ge mî: “Sado ū bi î sadu ǂhanub ǃoa ǁnâi ǀgoraǃgâ bi.”

On ge Jodeǁîna ge mî: “Khoe-e ǃgamsa da ge mā-amhe tama hâ.” 32(#Jhn. 3:14; 12:32Nēs ge Jesub di mîdi mâtib nî ǁō ǃkhais didi nî dīǀoaǀoahese ge ī.)

33Pilatub ge ǁkhawa gao-ommi ǃnâ ǂgâ-oa tsî Jesuba ǂgai tsî ǁîba “Satsa kha Jodeǁîn di gao-aotsa?” ti ge dî.

34Ob ge Jesuba ge ǃeream: “Satsa xuts nēsa ra dî tamas ka io nauna go tita xa satsa a mîba?”

35Ob ge Pilatuba “Tita a Jodeǁî tits ra ǂâi? Sa ǂhunuma khoen tsî danapristergu tsîn ge satsa tita ai go māǁnâ. Tare-ets go dī?” ti ge ǃeream.

36Ob ge Jesuba “Ti gaosib ge nē ǃhūbaib di tama hâ. Ti gaosib ga nē ǃhūbaiba xu hâ hâo, o gu ge ti saoǃgonaoga ga ǃkhamba te hâ, Jodeǁîna ta māǁnâhe tidega. Xawe nēsib ge ti gaosiba nēpa xu hâ tama hâ” ti ge ǃeream.

37Ob ge Pilatuba ǁîb ǃoa “Ots kha ǁnâi a gao-ao?” ti ge dî.

Ob ge Jesuba ge ǃeream: “Sats ra mî khami ta ge a gao-ao. Amaba ta nî ǃkhō-amse ta ge ǃnae tsî ǁnās ǃaroma ǃhūbaib ai ge hā. Amaba ǀnam-i hoa-i ge tita ra ǁnâu.”

38“Tare-e kha a ama?” tib ge Pilatuba ge dî.

Jesub ge ǁōb ǃoa ra ǀgoraǃgâhe

(Mateub 27:15-31; Markub 15:6-20; Lukab 23:13-25)

Tsî nēsa mî tsîb ge ǁkhawa Jodeǁîn ǁga ǂoa tsî ge mî: “Tita ge ǁî-i ǃnâb a ǀhapixa xū-e hō tama hâ. 39Xawe du ge ǀgui-e ta nî ǃkhō-omsa xu Pasxaǁâudīb* ai ǁnāxūba du ǃkhais di ǁnaetiba ūhâ. ǂHâba du hâ Jodeǁîn di gao-aoba ta nî ǁnāxūba du ǃkhaisa?”

40On ge ǁkhawa ǃgarise ǂgaiǂui tsî ge mî: “ǁÎb ose, xawe Barababa!” Barabab ge ge khâikhâiǃnâ-ao i.

Currently Selected:

Johaneb 18: KKG20

Highlight

Copy