Lukab 4

Jesub di ǃâitsâhes

(Mateub 4:1-11; Markub 1:12-13)

1Jesub ge ǃAnu Gagab xa ǀoa hâse Jordanǃāba xu oahā tsî Gagab xa ǃgaroǃhūb ǃoa ge ǂgaeǂguihe. 2ǁNāpab ge ǁgâuab* xa hakadisi tsēde ge ǃâitsâhe. Nē hoaraga ǁaebab ge ǂû tamase hâ tsî ǀunis ai sī ge ǃâ.

3Ob ge ǁgâuaba ǁîb ǃoa ge mî: “Elob Ôats kao, nē ǀuisa mîba, îs pere kai.”

4 # Deu. 8:3 Ob ge Jesuba ge ǃeream bi: “Xoas ge ra mî, ‘Khoe-i ge pere-e xu ǀgui ûi tama hâ.’ ”

5ǁNās khaoǃgâb ge ǁgâuaba Jesuba ǀgapib ai ūǃapa tsî ǀgâurob ǁaeb ǃnâ ǃhūbaib di gaosigu hoaga ǁgau bi 6tsî ge mî: “Tita ge nē hoaraga ǁkhāsib tsî ǂkhaisib tsîna nî mā tsi. Tita ge hoana ge māhe tsî ǂgao ta ra-i hoa-e nî mā. 7Titats ga ǀgoreǀî, on ge nēn hoana nî sa kai.”

8 # Deu. 6:13 Ob ge Jesuba ge ǃeream bi: “Nēti i ge xoahe hâ: ‘ǃKhūb sa Eloba ǀgoreǀî, î ǁîb ǀguiba ǃoaba.’ ”

9ǁNās khaoǃgâb ge ǁgâuaba Jesuba Jerusalems ǁga ǃgû-ū tsî ǀgapi ǃkhaib Tempeli dib ai sī mâ kai tsî ge mî: “Elob Ôats kao, nēpa xu aoǁnâsen re. 10#Psa. 91:11-12Xoahe hâ xui-ao: ‘ǁÎb ge ǀhomǃgāgu âba sats ǃaroma nî mîmā, sâu tsi gu nîsa.’ 11ǁKhāti ra mî: ‘ǁÎgu ge ǃomgu ai nî tani tsi, ǂais âtsats ǀui-i ai ǃnom tidese.’ ”

12 # Deu. 6:16 Xaweb ge Jesuba ge ǃeream bi: “ǁKhātis ge Xoasa ra mî: ‘ǃKhūb sa Elobats ge ǃâitsâ tide.’ ”

13 # Luk. 22:28 Tsî ǁgâuab ge Jesubab ge īǁkhā ǀgau-i hoa-i ai ǃâitsâs khaoǃgâ Jesuba aibe ge ǁnāxū.

Jesub ge ǁîb sîsengu ǀkha Galileab ǃnâ ra tsoatsoa

(Mateub 4:12-17; Markub 1:14-15)

14Jesub ge ǃAnu Gagab di ǀgaib xa ǀoa hâse Galileab ǁga ge oa. Tsî gommi âb ge hoaraga ǀkharib ǃnâ ge ǁnâuhe. 15ǁÎb ge sinagogegu* ǃnâ gere ǁkhāǁkhā tsî hoan xa gere koahe.

Jesub ge Nasarets ǃnâ ra ǂharahe

(Mateub 13:53-58; Markub 6:1-6)

16Jesub ge kaikhâib ge ǃās Nasarets ǃnâ ge sī tsîb ge Sabbattsēs* ai ǁnaetib ǃoa sinagogeb ǁga ge ǃgû. Tsîb ge Xoasab nî khomaise ge khâi 17tsî kēbo-aob Jesajab ǂkhanisa ge māhe, ob ge ǂkhanisa ǁkhowa-am tsî nēti xoamâihe hâ ǃkhai-e ge hō:

18 # Jes. 61:1-2 “ǃKhūb di Gagab ge tita ai hâ,

titab ge ǀnau* amaga,

ǀgâsana ta nî ǃGâiǂhôasa aoǁnâbase.

ǁÎb ge tita ge sî ǃkhōsabena ǃnora kai,

ǂgī hâna mû kai

tsî ta ǁgâiǀāhe hâna nî ǃnoraǃnorase,

19tsî ta kurib, ǁîb ǃnâb ǃKhūba

ǁaes âba nî oreba nî ǂhôase.”

20ǂKhanisa ǂganam tsîb ge ǁîsa ǃoaba-aoba mās khaoǃgâb ge sī ge ǂnû. Hoan sinagogeb ǃnâ ge hâ in di mûdi ge Jesub ai ge hâ i, 21ob ge ǁîn ǃoa ge mî: “Nētsēs ge nē Xoas hîa du go ǁnâusa go dīǀoaǀoahe.”

22Hoan ge ǁnās ǀkha ǂkhîǂâixa tsî gere buru nē ǃgâi mîdi, ǁîb amsa xu ra ǂoaxadi xa tsîn ge ge mî: “ǁÎba kha Josefi ôa tamaba?” 23Ob ge ǁîn ǃoa ge mî: “Sadu ge ǂgom ta rao, nē ǂkhoamîsa tita ra ǁgaeǁgaeba ǂgao: ‘ǀAedī-aotse, aitsama ǂuruǂurusen re! Kapernaums ǃnâ ge īn hoana da ge ge ǁnâu. ǁNā xūn ǁkhāna nēpas tsîna ǃnaets ge ǃās ǃnâ dī re.’ ” 24#Jhn. 4:44ǃAruǀîb ge Jesuba ge mî: “Amase ta ra mîba du, kēbo-ao-i xare-i ge ǁî-i ge kaiǃnâ ǃās ǃnâ ūǃoahe tama hâ. 25#1Gao. 17:1ǃAruǀî ta nēsa ra mîba du, ama-i ge a ǁnāpa di ge ǂgui ǃoatarade Israeli ǃnâ Eliab ǁaeb ǃnâ hâ isa, ǁnā ǁaeb ǃnâ i ge ǃnona kurigu tsî ǃnani ǁkhâgu ǀgaiba ge ǀapi tama hâ i tsîb ge ǃâtsūǀkhāba hoaraga ǃhūb ǃnâ ge hā. 26#1Gao. 17:8-16Xaweb ge Eliaba ǁîdi ǀguis tsîn ǁga sîhe tama i tsî xawe ǃoataras Sidons ǀkharib ǃnâ ǂnôa ǃās, Sarefats, ǃnâ ge hâ is ǃoa ǀgui ge sîhe. 27#2Gao. 5:1-14Kēbo-aob Elisab di ǁaeb ǃnân ge ǂgui khoen, ǃomamasiba ūhâna Israeli ǃnâ ge hâ i. ǀGui-i ân tsîn ge ge ǃanuǃanuhe tama hâ i, xaweb ge Naamanni, Siriaǁîb ǀguiba ge ǃanuǃanuhe.”

28Nē xūnan ge sinagogeb ǃnâ ge hâ i khoena ǁnâu on ge kaise ge ǁaixa. 29ǁÎn ge khâi tsî Jesuba ǃāsa xu sauruǂui tsî ǃās ân ge omaihe hâ i ǃhommi ǂaob kōse ge sī-ū, ǁnāpa xu nî aoǁnâ bise. 30Xaweb ge ǁîn ǁaegu ǃgûǃkharu tsî ge bē.

ǂKhaba gagaba ge ūhâ i khoeb

(Markub 1:21-28)

31ǁNās khaoǃgâb ge Jesuba Galileab ǃnâ ǂnôa ǃās Kapernaums ǁga ǃgû tsî ǁnāpa khoena Sabbattsēs ai gere ǁkhāǁkhā. 32#Mat. 7:28-29Khoen ge ǁîb di ǁkhāǁkhāǀgaub xa ge burugâ, ǁkhāsib ǀkhab gere ǃhoa xui-ao. 33Tsî sinagogeb ǃnâb ge khoeb, ǁgâuab di ǃanuoǃnâ gagab xa hâǃnâheba ge hâ i tsîb ge ǃgarise ge ǃau: 34“ǁNāxū ge! Tare dīxū-e ge sats ǀkha ūhâ, Jesu Nasaretǁîtse? Sigets nî hoaragase hîkākāsets go hā? Tita ge ǃgâise a ǂan tarits a ǃkhaisa: Sats ge Elob di ǃAnutsa!”

35Xaweb ge Jesuba ǀgaisase ge mîmā bi: “ǃNō, î khoeba xu ǂoa!” Ob ge ǁgâuaba khoeba khoen ǁaegu ǃgau tsî tsûtsû bi tamase ǁîba xu ge ǂoa.

36Khoen ge nēs xa burugâ tsî ǁîǃnābe ge dîgutsoatsoa: “Mâǃnôa mîde nēde? ǁKhāsib tsî ǀgaib tsîn ǀkhab ge ǁîba ǃanuoǃnâ gagaga ra mîmā tsî gu ge ǁîga ra ǂoa.” 37Tsî gommi Jesub dib ge hoaraga ǀkharigu ǃnâ ge ǁnâuhe.

Jesub ge ǂgui khoena ra ǂuruǂuru

(Mateub 8:14-17; Markub 1:29-34)

38Jesub ge sinagogeba xu ǃgû tsî Simonni oms ǃnâ ge ǂgâ. Os ge Simonni ǀuiǁgûsa ǀgaisa ǁkhais xas ra tsâse ge ǀaeǁgoe hâ i tsîn ge Jesuba ge ǂgan, îb ǁîsa hui. 39Tsî ǁîs di kharob tawa sī mâ tsîb ge ǁkhaisa ge ǃgabe, os ge ǁkhaisa ge ǂoaxū si. Tsîs ge ǁnātimîsi khâi tsî ǁîga ge ǃoaba.

40Sores ǂgâb ain ge khoena hoan, ǃkharaga ǀaesenaina ūhâna Jesub ǁga ge ǀkhī-ū. ǁÎb ge mâ-i hoa-e ǃomkha ǁgui-ai tsî ge ǂuruǂuru. 41Tsî ǁgâuagu tsîn ge ǂgui khoena xu nēti ra ǃause ge ǂoa: “Sats ge Elob di Ôatsa!” Jesub ge ǁgâuaga ǃgabe tsî ǁîga ǃhoasa mā-am tama ge i, ǁîgu ge ǁîb a Xristu* ǃkhaisa ǂan i xui-ao.

Jesub ge sinagogegu ǃnâ ra aoǁnâ

(Markub 1:35-39)

42Sores ǁhaib ǀkhab ge Jesuba Kapernaumsa xu ǂoa tsî ǀguri hâ ǃkhai-i ǁga ge ǃgû. Khoen ge ǁîba ôa tsî hō bin ge, o ǁîna xub bē tidese ǁîba ǁkhaesa gere dītsâ. 43Xaweb ge ǁîn ǃoa ge mî: “Tita ge nau ǃādi tsîn ǃnâ ta ǃGâiǂhôas Elob Gaosib disa nî aoǁnâse ge sîhe.”

44ǁNātib ge ǃaruǀî hoaraga Judeaǃhūb di sinagogegu ǃnâ gere aoǁnâ.

Currently Selected:

Lukab 4: KKG20

Highlight

Copy