Lukab 9
9
Jesub ge disiǀgamǀa ǁkhāǁkhāsabega* ra sîǂui
(Mateub 10:5-15; Markub 6:7-13)
1Jesub ge disiǀgamǀa ǁkhāǁkhāsabegu âba ǂgaiǀhao tsî ǁîga ǁgâuaga* ǃhaeǂuis tsî ǀaena ǂuruǂurus di ǀgaib tsî ǁkhāsiba ge mā. 2ǁNās khaoǃgâb ge ǁîga ge sîǂui, Elob Gaosiba aoǁnâ tsî gu ǀaesen hâna nî ǂuruǂuruse. 3#Luk. 10:4-11Tsîb ge ǁîgu ǃoa ge mî: “Tā xū-i xare-e sago ǃgûdaob ai ūsao, ǁgâibasenhai-i kas, ǁgaru-i kas, pere-i kas, mari-i tamas ka io ǀnî sara-i kas hoasa. 4Tsî ommi ǃnâ go ga ūǃoaheo, ǁnāpa hâ, ǁkhawa go nî ǁnā ǃāsa xu ǃkharus kōse. 5#ǃNǃkh. 13:51Khoen ga ǁkhoreǁhare go ǂgao tama i, o ǁnā ǃāsa xu ǃgû, î sago ǂaidi ǃnaka hâ tsaraba, ǁîn ǁga hâ ǃkhâikhoms ase ǃgubuǁnâ.”
6O gu ge ǃgûǂoa tsî hoa ǃādi ǃnâ ǃGâiǂhôasa aoǁnâ tsî gu ǀaesen hâna nî ǂuruǂuruse gere ǃgûma.
Herodeb ge ra ǀgommaǂâi
(Mateub 14:1-12; Markub 6:14-29)
7 #
Mat. 16:14; Mrk. 8:28; Luk. 9:19 Gao-aob Herodeb ge hoaraga xūn ī geren xab ge ǁnâu, o kaise ge ǂâiǂhansen, ǀnî khoen gere Johaneb ǁĀǁnâ-aob ǁōba xu khâi hâ ti mî amaga. 8ǀNîn ge Eliab ge go ǂhai ti gere mî tsî nauna, ǀguib ǀoro ǁaeb kēbo-aogu dib go khâi ti. 9Ob ge Herodeba ge mî: “Johaneba ta ge tita ge ǁhāǁnâdana. O tariba, ǁîb xa ta nēti ī xūna ra ǁnâuba?” Tsîb ge Jesuba mûsa gere ôa-am.
Jesub ge kai ǂnubis khoena ra ǂûmā
(Mateub 14:13-21; Markub 6:30-44; Johaneb 6:1-14)
10Tsî apostelgu* ge oaǀkhī gu geo Jesuba hoaraga xūn ǁîgu gere dīna ge mîba. Jesub ge ǁîga ǁîb ǀkha ū tsî Betsaida ti ǀon hâ ǃās ǀkhāb ǁga ge ǃgû. 11Xawen ge ǂgui khoena mâpab ra ī ǃkhaisa ǂan tsî ge sao bi. ǁÎb ge ǁîna ǁkhoreǁhare, Elob Gaosib xa ǃhoa-ū tsî ǁnān ǂuruǂuruhesa ǂhâba hâna ge ǂuruǂuru.
12Tsî sores ge ǂgâǃgûtsoatsoao, o gu ge ǁkhāǁkhāsabega Jesub ǃoa hā tsî ge mî: “Nē khoena oa kai re, în ǀgūse ǂnôa ǃādi tsî ǃgaroǃārodi tawa ǁgoeǃkhai-i tsî ǂûn tsîna sī ôabasen, ǃū-aisa ǃkhais ai ge hâ xuige.”
13Ob ge Jesuba ǁîgu ǃoa ge mî: “Sago ǁîna ǂûn nî xū-e mā re.”
O gu ge ge ǃeream bi: “Nēpa ge ge koro peregu tsî ǀgam ǁaukha tsîn ǀguina ūhâ. Nē ǂnubisa ge ǁnâi ǃgû tsî ǂû-e sī nî ǁamaba?” 14Aogu ǀguigu ge ǁaubexa ge koroǀoadisi i.
Ob ge Jesuba ǁkhāǁkhāsabegu ǃoa ge mî: “An khoena ǃnandi, mâs hoas korodisi khoena ǃkhōǂgā hâdi ǃnâ ǂnû.”
15O gu ge ǁkhāǁkhāsabega ǁnāti dī tsî khoena ge ǂnû kai. 16ǁNās khaoǃgâb ge Jesuba koro peregu tsî ǀgam ǁaukha tsîna ge ū. ǀHommi ǃoa kōkhâi, ǀkhaeba ǂgan tsîb ge khôa tsî ǁkhāǁkhāsabega ge mā, î gu khoen ǃnâ ǀgora. 17Mâ ǀguiǀguibe khoe-i hoa-i ge ǂû tsî ǂâu hâse ge ǁâ tsî gu ge ǁkhāǁkhāsabega disiǀgamǀa ǀharude, ǃgau ge ǃârodi ǀkha ge ǀoaǀoa.
Petrub ge Jesub xa ra ǁguiǁnâ
(Mateub 16:13-19; Markub 8:27-29)
18ǀGuitsēb Jesuba ǀguri ra ǀgore hîa gu ge ǁkhāǁkhāsabega ǁîb tawa ge hā. Ob ge ǁîga ge dî: “Tita a tari ti ra mî khoena?”
19 #
Mat. 14:1-2; Mrk. 6:14-15; Luk. 9:7-8 “ǀNîn ge Johane ǁĀǁnâ-aots ti ra mî, ǀnîna Eliats tsî nauna ‘ǀOro ǁaeb kēbo-aob ge khâimâ hâ’ ” ti.
20 #
Jhn. 6:68-69
Ob ge Jesuba ǁîga ge dî: “O sago mâti ra mî, tita tarita?”
Ob ge Petruba ge ǃeream: “Elob di ǀnausats* kom satsao.”
Jesub ge ǁîb tsâb tsî ǁōb xa ra ǃhoa
(Mateub 16:20-28; Markub 8:30—9:1)
21Jesub ge ǁîga ǁkhōse ge ǃkhâikhom, î gu tā nau khoena ǁnāsa mîba. 22ǃAruǀîb ge ge mî: “Khoen Ôab ge kaise nî tsâ tsî ǂnomdomgu* tsî danapristergu tsî Moseb ǂhanub* di ǁkhāǁkhā-aogu tsîn xa nî ǂharahe. ǁÎb ge nî ǃgamhe, xawe ǃnonaǁî tsēs ai ǁōba xu nî ǂkhaiǂkhaihe.”
23 #
Mat. 10:38; Luk. 14:27 Ob ge Jesuba hoan ǃoa ge mî: “Khoe-i ga tita sao ǂgao, o-i ge ǁî-aitsama ǀurusen tsî tsēkorobe ǃgâuhaiba* ūkhâi tsî tita nî sao. 24#Mat. 10:39; Luk. 17:33; Jhn. 12:25ǁNā-i ǁî-i ûiba ra sâubasen ǂgao-i ge ǁîba nî ǂoaǃnâ, xawe mâ-i hoa-i ǁî-i ûiba ga tita ǃaroma ǂoaǃnâ-i ge ǁîba nî sâu. 25Tare xū-e i nî khoe-e harebeba, hoaraga ǃhūbaiba i ga hōbasen tsî xawe ûib â-e ǂoaǃnâ tsî kāǁō-o? 26Tita tsî ti mîde ga tao-i hoa-i, ǁnā-eb ge Khoen Ôab tsîna nî tao, ǁîb di ǂkhaisib tsî ǁGûb tsî ǃanu ǀhomǃgāgu di ǂkhaisib ǃnâb ga hāo. 27Amase ta ra mîba du, nēpan ge ǀnîna mâ, Elob Gaosiban mû tama hîa ǁō tidena.”
Jesub di ǀkharaǀkharahes
(Mateub 17:1-8; Markub 9:2-8)
28 #
2Pet. 1:17-18
ǁAubexa ǁkhaisa tsēdi ǃkharu hâseb nēna mî hâs khaoǃgâb ge Jesuba Petrub, Johaneb tsî Jakobub hâgu ǀkha ǃhommi ai ge ǃapa, ǀgore gu sī nîse. 29Tsî ǀgoreb ra hîab ge ai-īsib âba ge ǀkhara tsî saran âb ge ǂkhai rase ge ǃuri. 30ǃNapetamase kha ge ǀgam khoekha ǁnāpa mâ tsî ǁîb ǀkha gere ǃhoa. ǁNākha ge Moseb tsî Eliab tsîkha, 31ǀhomsi ǂkhaisib ǃnâ ǂhai tsî Jesub ǀkha Elob di ǀapes Jerusalems ǃnâb nî ǁōs xa gere ǃhoakha. 32Petrub tsî horesakha ge kaise ǃgâise ge ǁom hâ i tsî ǂkhai gu geo, o gu ge Jesub di ǂkhaisib tsî ǁîb ǀkha ge mâ i kha tsîna ge mû. 33Tsî khoekha Jesuba xu ra ǃgû hîab ge Petruba Jesub ǃoa ra mî: “ǁKhāǁkhā-aotse, ǃgâi-i ge a nēpa ge hâsa. A ge ǃnona tentomrode nēpa kuru re, ǀguisa sats ǃaroma, ǀguisa Moseb ǃaroma tsî ǀguisa Eliab ǃaroma.” (ǁÎb ge ge ǀū i tarenab ra ǃhoa ǃkhaisa.)
34Ganupeb mâ ra ǃhoa hîas ge ǃâusa ǁîga ge somsomǂam tsî ǃâus ge ǃnamiǂgā gu, o gu ge ǁkhāǁkhāsabega ge ǃao. 35#Jes. 42:1; Mat. 3:17; 12:18; Mrk. 1:11; Luk. 3:22Tsî i ge dom-e ǃâusa xu ge mî: “Nēb ge ti Ôab, ǁhûiǂui ta geba, ǁîba ǃgâ re!”
36Tsî dommi ge ǃhoatoa, o gu ge Jesub ǀguiba ǁnāpa ge mûmâ. Nēn hoan xa gu ge ge ǃnō tsî ǁnā ǁaeb ǃnâ khoe-i xare-e mû gu gen xa ge mîba tama i.
Jesub ge ǂkhaba gagab xa hâǃnâhe axaba ra ǂuruǂuru
(Mateub 17:14-18; Markub 9:14-27)
37Sao ra tsē, ǃhomma xu gu ra Jesub tsî ǃnona ǁkhāǁkhāsabegu tsîga ǁgôaxa hîan ge kai ǂnubis khoena Jesuba ge ǃgûǃoa. 38O-i ge ao-e ǂnubis di ǁaeguba xu ge ǂgai: “ǁKhāǁkhā-aotse, ǀkhoma tsi ta ge ra, ti ôab hoara ta ūhâba kōǀî re! 39Gaga-i ge ǃnapetamase ra ǁnāǂam bi tsîb ge ǁnātimîsi ǃau, ǀkhâǁgoe tsî ra goa-am. Gagab ge ǃhaese ǁnāxū bi tama hâ tsî ra hîkākā bi. 40Tita ge sa ǁkhāǁkhāsabega go ǀkhoma, î gu nē ǂkhaba gagaba ǃhaeǂui, xawe gu ge go ǃhaeǂui ǁoa i.”
41Ob ge Jesuba ge ǃeream: “Sa ǂgomoǃnâ tsî ǃnâudanaxa khoedo, mâǁaeb kōse ta kha sadu ǀkha nî hâ, ǂgom du nîse? Mâtikōse ta kha sado nî tani? Axaba ti tawa ǀkhī-ū re.”
42Ganupeb axaba ǃgoaxa hîab ge ǁgâuaba* ǃhūb ai ǃgau bi tsî ǁkhōǁkhōsase ge ǀkhâǁgoe kai bi. Xawe Jesub ge nē ǃanuoǃnâ gagaba ǁkhōse ǃgabe, axaroba ǂuruǂuru tsî ǁgûba ge mā-oa bi. 43On ge hoana Elob di kaisib xa ge burugâ.
Jesub ge ǁkhawa ǁîb ǁōb xa ra ǃhoa
(Mateub 17:22-23; Markub 9:30-32)
Khoen hoan burugâ hâ, Jesub di dīgu xa hîab ge ǁkhāǁkhāsabegu âb ǃoa ge mî: 44“ǃGaoǃgâ nēsi ta ra mîba gona; Khoen Ôab ge khoen ǃomǁae nî māǁnâhe.” 45Xawe gu ge ǁkhāǁkhāsabega nē mîde ge ǁnâuǃā tama hâ i. ǂÂibasens âdi ge ǂganǃgâsaba gu i tsî gu ge ǃkhā ǁoa i, xawe gu ge gere ǃao Jesuba ǁnās xa dîsa.
Tari-e hoan ǃnâ a kai?
(Mateub 18:1-5; Markub 9:33-37)
46 #
Luk. 22:24
ǂNoagu-i ge ǁkhāǁkhāsabegu ǁaegu ge hā, tarib ǁîgu xa a kai ǃkhais di-e. 47Jesub ge a ǂan tare-e gu ǂgaogu âgu ǃnâ ra ǂâisa, ob ge ǀgôaro-e ū tsî ǁîb xōǀkhā mâi 48#Mat. 10:40; Luk. 10:16; Jhn. 13:20tsî ǁîgu ǃoa ge mî: “Nē ǀgôaro-e ga ti ǀons ǃnâ ǃkhōǃoa-i hoa-i ge tita go ǃkhōǃoa. Tsî tita ga ǃkhōǃoa-i hoa-i ge tita ge sîba ra ǃkhōǃoa. Sadu hoadu ǃnâ a ǂkhariro-i, ǁî-i ge hoadu xa a kai.”
Sago ǃoagu hâ tama i ge sago ǀkha hâ
(Markub 9:38-40)
49Ob ge Johaneba ge mî: “ǁKhāǁkhā-aotse, sige ge sa ǀons ǃnâ ǁgâuaga ra ǃhaeǂui khoeba mû tsî ǁîba go ǂkhā, sage di ǀgui tamab hâ xui-ao.”
50Xaweb ge Jesuba ge mî: “Tā ǂkhā bi re, sago ǃoagu hâ tama-i kom sago dio.”
Samariaǁîn ge Jesuba ra ǂhara
51Tsî ǁaeb ge ǀgū Jesub nî ǀhommi ǃoa ǃapaba, ob ge mîǀgui tsî Jerusalems ǁga ǃgû, 52tsî sîsabega ǁîb aiǃâ ge sîǂui, ǃgûǂoa tsî gu Samariaǁîn di ǃās ǃnâ hâǃkhai-e Jesuba nî ǂhomibase. 53Xawen ge ǃās ǁanǂgā-aona ǃkhōǃoa bi ǂgao tama ge i, Jerusalems ǁgab ge garu i amaga. 54#2Gao. 1:9-16Tsî ǁîb di ǁkhāǁkhāsabekha, Jakobub tsî Johaneb tsîkha ge nēsa a mû, o kha ge ge mî: “ǃKhūtse, ǀaesa khom nî mîmā îs ǀhomma xu ǁgôaxa tsî ǁîna hîkākā ǃkhaisats ra ǂgao?”#9:54 ǀNî xoaǁguigu ge Eliab ge dī khami ti ra ǀaro.
55Jesub ge dabasen tsî ǁkhōǁkhōsase ǁîkha ge ǃgabe.#9:55 ǀNî ǀoro xoaǁguigu ge tsî ge mî: “ǂAn tama kho hâ mâ gagab di kho a ǃkhaisa; Khoen Ôab kom khoen di ûiba bi hîkākā ga hā tamao, xawe ǁîna nî sâuse” ti ra ǀaro. 56ǁNāpa xu gu ge Jesub tsî ǁîb di ǁkhāǁkhāsabegu tsîga ǀnî ǃās ǁga ge ǃgû.
Jesuba saoǃgons
(Mateub 8:19-22)
57Garu gu a hîab ge ǀgui khoeba Jesub ǃoa ge mî: “Satsa ta ge ra sao ǂgao, mâǀîts ga ǃgûs hoasa.”
58Ob ge Jesuba ǁîb ǃoa ge mî: “ǀGirin ge āna ūhâ tsî ǀhomaniron ge ani-omde ūhâ, xawe Khoen Ôab ge danasab nî ǂnûi tsî sâ ǃkhai-i tsîna ūhâ tama hâ.”
59Ob ge Jesuba ǀnîb ǃoa “Sao te re” ti ge mî.
Xaweb ge ge ǃeream: “ǃKhūtse, mā-am te, î ta aibe ti îba sī ǁkhō.”
60Ob ge Jesuba ge mîba bi: “An ǁō hâna ǁîn di ǁō hâna ǁkhō, xawe satsa ǃgû, îts Elob Gaosiba sī aoǁnâ.”
61 #
1Gao. 19:20
ǀNîb ge ganupe ge mî: “Tita ge nî sao tsi, ǃGôahesatse, xawe mā-am te î ta ti ǀaokhoena sī oms tawa tawedeǁnāxū.”
62Ob ge Jesuba ge mî: “ǃHūǃgao-ūdas ai ǃkhō tsî ra ǂnanoa-i ge Elob Gaosiba ǁkhāba tama-e.”
Currently Selected:
Lukab 9: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
