Markub 14

Jesub ǃoagu hâ ǀapeǀhaos

(Mateub 26:1-5; Lukab 22:1-2; Johaneb 11:47-53)

1ǀGam tsēra ge Pasxaǁâudīb tsî khūkhū-e* ūhâ tama pere-i di kaitsēs xa ge ǃgau hâ i. O gu ge danapristergu tsî Moseb ǂhanub* di ǁkhāǁkhā-aoga ǀhôagaose Jesuba ǃkhō tsî ǃgamsa gere ǀapetsâ. 2O gu ge ǁîǃnābe ge mîǀîgu: “A ge tā Pasxaǁâudīb di ǁaeb ǃnâ nēsa dī, khoen nî nēsan ga ǂanǃnâ geo khâikhâisen xuige.”

Jesub ge Betanis ǃnâ ra ǂkhauhe

(Mateub 26:6-13; Lukab 7:36-38; Johaneb 12:1-8)

3Jesub ge Betanis ǃnâ ǃomamasiba ge ūhâ i khoeb, Simonni di oms tawa gere ǂû. Tsî noxopab tāb tawa ǂnôa hîa i ge tara-i, alabas xaparo-e#14:3 Alabas xaparo-e: ǂKhari xaparos hîa ǀui-i ǀkha a kurusas. ūhâ-e ge hā. Nē soaros ǃnâ i ge ǃgomǀgausa narduǃgâihamoli-e ge hâ i, tsîs ge nē soarosa khôa-am tsî nē ama ǃgâihamoli-e danas âb ai ge ǂnâǂui. 4On ge ǀnî khoen ǁnāpa ge hâ ina kaise ǁgonaǂgao tsî ge mîǀîgu: “Tare-i ǃaromas kha ǁîsa nētikōse ǃgomǀgausa ǃgâihamoli-e nē ǀgaus ai ra ǂkhôa? 5ǁÎs kom nē ǃgâihamoli-e ǃnonakaidisi denardi* ai ǁamaxū tsî ǁnā hōǂgāsa ǀgâsan ǃnâ ǀgora ǁkhāo.” Tsîn ge ǁîsa ge ǃgabe. 6Xaweb ge Jesuba ge ǃeream: “ǁÎsa ǁnāxū re, tare-i ǃaroma du ǁîsa ra ǂhani? Titas ge ǁîsa ǃgâi sîsenna go dība. 7Hoaǁae du ge ǀgâsana sadu ǁaegu nî ūhâ tsî mâǁae-i hoa-i ai ǁîna ǃgâidī ǁkhā, xawe du kom tita hoaǁae sadu ǁaegu ūhâ tideo. 8ǁÎs ge dī ǁkhās a-e dī tsî ǁaeb aiǃâ ti sorosa ǁkhōs ǃaroma ǃgâihamoli-i ǀkha ǂkhaus ǀkha go ǂhomitoa.#Jhn. 19:40 9Amase ta ra mîba du ǃkhais ge ǃgâiǂhôas ga ǃhūbaib hoaragab ǃnâ aoǁnâhe ǃkhai-i hoa-i ai-i ge nē taras di ǃgâidīb xa nî ǃhoahe, ǁîs di ǂâiǂâisensa ǃoa.”

Judab ge Jesuba ǀapexūsa ra ǀhûǀgui

(Mateub 26:14-16; Lukab 22:3-6)

10Ob ge Judab Iskariotǁîb, ǁkhāǁkhāsabegu* di ǀguiba, danapristergu tawa ge sī, Jesuba nî ǀapexūse. 11O gu ge Judab di ǂâibasensa gu ge ǁnâu, o kaise ǃgâiaǂgao tsî mataresa ge mîmâiba bi. Ob ge ǂhanu ǁaeb tsî ǃkhaiba ge ôa, Jesuba māǁnâs ǃaroma.

ǀUni Pasxaǁâus

(Mateub 26:17-19; Lukab 22:7-13)

12Tsî ǂguro tsēs khūkhū-e ūhâ tama pere-i ǁâudīb dis, Pasxaǁkhaob ǁîs ai ra ǁguibahes, ai gu ge Jesub ǁkhāǁkhāsabega hā tsî ge dî bi: “Mâpa ge kha sī tsî satsa Pasxaǁâusa nî aiǂhomiba?”

13Ob ge Jesuba ǀgam ǁkhāǁkhāsabekha sao ra ǁguiǂamdi ǀkha ge sî: “ǃĀs ǃnâ ǂgâ, o kho ge khoeb hîa ǁgamxapasa tani hâba nî ǃoa, ǁîba sao re. 14Tsî ǁîb ga ǂgâǃnâ om-i di ǀhonkhoeb ǃoa mî re: ‘ǁKhāǁkhā-aob ge ra dî: Mâpas ǁnā ǃnā-omsa hâ, ǁîs ǃnâ ta ti ǁkhāǁkhāsabegu ǀkha Pasxaba nî ǂûsa?’ 15Ob ge ǀhonkhoeba ǀgapiseb di kai ǃnā-oms, ǀnai a ǂhomitoasasa nî ǁgau kho. ǁNāpa ǂhomiba ge re.” 16ǃĀs ǃnâ kha ge ǂgâ, o kha ge nē ǁkhāǁkhāsabekha hoa xūna Jesub xa kha go mîbahe khami ge hō. Tsî kha ge Pasxaǂûsa ge aiǂhomi.

17 # Mat. 26:20-25; Luk. 22:14, 21-23; Jhn. 13:21-30; Psa. 41:9 Tsî ǃui i ge, ob ge ǁkhāǁkhāsabegu âb ǀkha ǁnāpa ge sī. 18Tāb tawa gu ǂûǂnû hâ hîab ge Jesuba ge mî: “Amase ta ra mîba go, ǀguib sago dib hîa tita ǀkha ra ǂûb ge nî ǀapexū te.”

19Kaise ǃoa hâse gu ge ǀguiǀguibese ǁîba ge dîtsoatsoa: “Tita kha ǁî ta?”

20“Disiǀgamǀagu di ǀguib, ǁnāb hîa nē ǃores ǃnâ tita ǀkha pere-e ra ǀobeb ge. 21Khoen Ôab ge Xoas ra mî khami nî ǁō. Xawe i ge kaise nî ǃhuriǃhurisaba ǁnā khoeb ǁîba nî ǀapexūba. ǃGâi ga hâ ǃkhais ge ǁnāti ī khoeb ga tātsēs tsîna ǃnae tama hâsa” tib ge Jesuba ǁîga ge ǃeream.

ǃKhūb di ǃAnu ǃUiǂûs

(Mateub 26:26-30; Lukab 22:14-20; 1 Korinteǁîn 11:23-25)

22Tsî ǂû gu ra hîab ge Jesuba pereba ū, ganganǀgoresa dī, pereba khôa tsî ǁkhāǁkhāsabegu âba mā tsî ge mî: “Ū î ǂû, nēs ge ti sorosa.”

23Tsîb ge ǂauxûib di ǀgabisa ū tsî Eloba ge gangan. Tsîb ge ǁkhāǁkhāsabega ge mā, o gu ge hoaga ǁnāpa xu ge ā. 24#Eks. 24:8; Jer. 31:31-34Tsîb ge Jesuba ǁîgu ǃoa ge mî: “Nēb ge ti ǀaob ǀasa ǃgaeǀhaos dib hîa ǂguin ǃaroma ra ǂnâxūheba. 25Amase ta ra mîba go ǃkhais ge ǁkhawa ta nē ǂauxûib xa ā tidesa, ǁnā tsēs ǁîs ai ta ǁî-e ǀasase Elob Gaosib ǃnâ sī nî ās kōse.” 26ǁNās khaoǃgâ gu ge ǁnaetsana-e ǁnae tsî ǀKheraǃhommi ǁga ge ǃgû.

Jesub ge Petrub xa ǀūxūhesa ra aimûǀgaru

(Mateub 26:31-35; Lukab 22:31-34; Johaneb 13:36-38)

27 # Sax. 13:7 Tsîb ge Jesuba ǁkhāǁkhāsabegu ǃoa ge mî: “Nē tsuxub ǃnâ go ge sago hoago nî bēxū te, Xoas nēti ra mî xui-ao:

“ ‘Elob ge

ǃûi-aoba nî ǃgam,

on ge gūna

nî ǀgaruǀgaruhe.’

28 # Mat. 28:16 Xawe ǁōba xu ta ga ūkhâihes khaoǃgâ ta ge sago aiǃâ Galileab ǃoa nî ǃgû.”

29Ob ge Petruba ge mî: “Hoagu ga ǁnāǃgâ tsi, xawe ta ge tita tātsēs tsîna ǀūxū tsi tide.”

30Ob ge Jesuba Petruba ge ǃeream: “Amase ta ra mîba tsi nē tsuxub ǂûb ǃnâ, anib ǀgam ǃnāra nî ās aiǃâts ge ǃnona ǃnāde nî ǀūxū te.”

31Ob ge Petruba ge mî: “Sats ǀkha ta ga ǁō, xawe ta ge tātsēs tsîna ǀūxū tsi tide!” Tsî gu ge naugu ona ǁkhāti ǁnāti ge nū.

Jesub ge Getsemaneb ǃnâ ra ǀgore

(Mateub 26:36-46; Lukab 22:39-46; Johaneb 18:1-2; Hebreǁîn 5:7-8)

32Tsî gu ge Getsemane ti ra ǂgaihe ǃkhaib ǃoa ge ǃgû, ob ge Jesuba ǁkhāǁkhāsabega ge mîba: “Nēpa go ǂnû re, tita sī ra ǀgore hîa.” 33Tsîb ge Jesuba Petrub, Jakobub tsî Johaneb tsîga ǁîb ǀkha ge ūsao. Kaiseb ge ǃoab tsî ǂhansens tsîn xa ge ǃkhōhetsoatsoa. 34Tsîb ge ge mîba gu: “Ti ǀoms ge kaise ǁōb kōse ǃoa hâ. Nēpa hâ, î ǂkhaikari hâ re.”

35ǂKharirose aisǀkhāb ǁga ǃgû tsîb ge ais ǂama, ǃhūb ai ǁnāǁgoe tsî ge ǀgore, îb nē ira īǁkhā i kao ǃgû-īǀkhā bi. 36Tsîb ge “Abotse, ti Îtse sats tawan kom hoaraga xūna īǁkhāo. Toxopa nē ǀgabis, tsâb disa tita xu ūbē re, xawe as sa ǂâisa ī re, tis ose” ti ge ǀgore.

37Tsî ǁkhāǁkhāsabegu tawab ge oahā ob ge ǁîga ǁom hâse ge hō. Ob ge Petrub ǃoa ge mî: “Simontse, ǁomts kha hâ? ǀGui iri tsînats kha tita ǀkha ǂkhaikari hâ ǁoa? 38ǂKhaikari hâ, î ǀgore, î go tā ǃâitsâb ǃnâ ǁnā. Gagas ge amase a māsenxa, xawes sorosa a ǂkhabusa xuige.”

39ǁKhawab ge Jesuba oa tsî ǁkhā ǀkhomadi ǀkha sī ge ǀgore. 40ǁKhawab ge oahāb geo ǁkhāǁkhāsabega ǁom hâse ge hō. ǁÎgu ge dītsâ gu gere xawe mûdi âga ǁkhowa-amsase ge ūhâ ǁoa i. Tsî gu ge tare-e gu nî mîba bi ǃkhaisa ge ǀū i.

41ǀGore sī tsîb ge ǁkhawa ǃnonaǁî ǃnāsa ǁîgu tawa oahā, ob ge ge mîǀî gu: “Noxopa go kha ǁom tsî ra sâ? ǂÂu i ge go! Nēsisab ge ǁaeba go ǀoa, Khoen Ôab ǁore-aon ǃomǁae nî māǁnâheba. 42Khâi, î ge ǃgû re. Tita nî ǀapexūb go hātoa xuige.”

Jesub di ǃkhōhes

(Mateub 26:47-56; Lukab 22:47-53; Johaneb 18:3-12)

43Tsî ganupeb Jesuba ra ǃhoa hîab ge Judab, disiǀgamǀa ǁkhāǁkhāsabegu di ǀguiba, kai ǂnubis hîa gôagu tsî ǃhôadi tsîn ǀkha ǁâtanisen hâs xa ǁnūhe hâse ge hā. ǁÎgu ge danapristergu tsî ǀnî ǂnomdomgu xa ge sîhe. 44ǀNaib ge Judaba ǁîna ǁgauǁgau-e ge mā hâ i: “ǁNāb, ǁoas ǀkha ta ga tawedeb ge ǁîba, ǁîba go ge ǃkhō tsî nî ǂgaeǂguibē” ti.

45Sī gu ra hîab ge Judaba Jesub tawa sī tsî “ǁKhāǁkhā-aotse” ti mî tsî ge ǁoatawede bi. 46O gu ge Jesuba ge ǃkhō. 47Tsî ǀguib ǁnāpa ge mâ in dib ge gôab âba ūǂui tsî ǀgapipristeri* ǃgāba ǂnau tsî ǂgaes âba ge ǁhāǁnâ.

48Ob ge Jesuba ge mîǀî gu: “Tare-i ǃaroma go kha kaise ǁkhōǁkhōsa tsūdī-ao-e go ǃkhōǃgû khami gôagu tsî ǃhôadi ǀkha ǁâtanisen hâse go hā? 49Tarexa du ge ǁnâi Tempeli ǃnâ ǀnai ǃkhō te tama hâ i? Tita kom tsēkorobe ǁnāpa sado gere ǁkhāǁkhāo. Xawe nēn hoan kom Xoas di dīǀoaǀoahes ǃaroma nî īo.”

50O gu ge hoaraga ǁkhāǁkhāsabega ǁîba ǁnāxū tsî ge ǃkhoebē. 51Tsîb ge ǀgui ǂkham khoeb hîa ǃuri, tsaura lapib ǀguiba ǁîb di soros ai ge ana hâ iba Jesuba ge sao. Toroǂnubis digu ge ǁîba ǃkhōsa dītsâ, 52ob ge lapiba ǁnāxū tsî ǀōǀkhāse ge ǃkhoebē.

Jesub ra ǀApemāǃnans aiǃâ ǂhai

(Mateub 26:57-68; Lukab 22:55, 63-71; Johaneb 18:13-14, 19-24)

53Tsî gu ge Jesuba ǀgapipristeri di oms ǁga ge ǃgû-ū, danapristergu, Moseb ǂhanub di ǁkhāǁkhā-aogu tsî ǂnomdomgu ge ǀhao hâ i ǃkhaibǀî. 54Ob ge Petruba ǃâxarose, ǃgâbǀkhāb ai, ǀgapipristeri oms di omǂnamib tawas kōse ǂgâ tsî ǃûi-aogu ǀkha ǀaesa gere sâ.

55Danapristergu tsî hoaraga ǀapemāǃnans#14:55 ǀapemāǃnans: Grike xoaǁguigu ge Sanhedrins ti ūhâ. ge ǂhumi ǃkhō-amsa nî Jesub ǃoagu dī khoena gere ôatsâ. Xawe gu ge ǁîba nî ǀhapiǂnûiǀkhā khoe-e hō tama ge i. 56ǂGuin ân ge ǁîb ǃoagu gere ǃkhō-am, xawen ge ǁîǃnābe ǀhûǀgui tama ge hâ i. 57O gu ge ǀnî khoega sao ra ǀgaub ai Jesub ǃoagu ǂhumi ǃkhō-amsa ge mā: 58“Sige ge ǁîba ‘Tita ge nē Tempeli hîa khoen xa ǂnubihe hâba hîkākā tsî ǃnona tsēdi ǁaeb ǃnâ, khoe-i di ǃomgu ǀkha omhe tama Tempela nî ǂnubikhâi’ tib ra mî hîa ge ǁnâu.” 59Xawe gu ge ǁîgu ona mî gu gen ǃnâ ǀhûǀgui tama ge i.

60Ob ge ǀgapipristera khoen ǁaegu ǂgōse khâimâ tsî Jesuba ge dî: “Satsa nēs ǃoagu hâ ǂgā-amdi xa xū-e mî tama hâ?” 61Xaweb ge Jesuba ǁîba ǃeream tama ge i. Ob ge ǁkhawa ge dî bi: “Satsa kha Xristuts,* ǃAnu Elob di Ôatsa?”

62 # Psa. 110:1; Dan. 7:13 Ob ge Jesuba ge ǃeream: “Tita ge tsî ǃgoaxaǁaeb ǃnâ du ge Khoen Ôaba nî mû, amǀkhāb ǁôab Hoaǀgaixab dib tawa ǂnôase tsî ǀhommi ǃâudi ai ǃgoaxase!”

63Ob ge ǀgapipristera kaise ǂkhîoǃnâ tsî saran âba ǀkhau tsî ge mî: “O tare-i ǃaroman kha ǁnâi ǀnî ǀhûǀguitimî-aona ǂhâbasa? 64#Lev. 24:15Sago hoago kom nē eloǃkhāǃkhāsa go ǁnâuo, o sago mâti nēs ǂama ra ǀhûǀgui?” O gu ge ǁîba ǁōb ǃoa ge ǀgoraǃgâ.

65On ge ǀnîn âna ge ǂāra-ai bi tsoatsoa. ǃGaeǂganmû bi tsîn ge ǃomdi ân ǀkha ais ǃnâ gere ǂnau bi. “ǀHae re! Nē go ǂnau tsi-e tari-e?” ti gu ge ǃûi-aoga gere dî bi tsî gu ge ǁapu bi rase ge ǃgû-ū bi.

Petrub ge Jesuba ra ǀūxū

(Mateub 26:69-75; Lukab 22:56-62; Johaneb 18:15-18, 25-27)

66Ganupeb Petruba noxopa omǂnamib ǃnâ ǂnôa ra sâ hîas ge ǀgui ǃgās ǀgapipristeri disa 67Petruba ge mûǂnôa. ǁÎba ǀgūse mûdi ǃnâ kō tsîs ge “Sats tsîn ge Jesub Nasaretǁîb ǀkha go hâ i” ti ge mî.

68Ob ge Petruba “Tarexas sasa ra ǃhoa ǃkhaisa ta ge ǀū” ti ge ǃeream si. ǁNās khaoǃgâb ge daos ǁgab ge ǂoaǃgûo, aniba ge ā.

69ǁKhawas ge nē ǃgāsa mûmâ bi tsî nauna ge mîba: “Nē khoeb tsîn ge ǂanǂansase ǁîgu di ǀgui!” 70Ob ge Petruba ǁkhawa ge ǀū.

Tsî ǂkhari ǁaero-i khaoǃgân ge ǁnāpa ge mâǂnami hâ ina “Sats tsîn ge amase a ǁîgu di ǀgui, Galileaǁîts a amaga” ti Petrub ǁga ge mîtsoatsoa.

71Ob ge Petruba kaise ǂnoasen tsî “Nū ta ge ra ǃKhūb aiǃâ, amase ta ge nē du ra ǁîb xa ǃhoa khoeba a ǀū” ti ge mî. 72ǁNātimîsib ge aniba ǀgamǁî ǃnāsa ge ā. Ob ge Petruba Jesub di mîdi “Anib ǀgam ǃnāra ā tama hîats ge ǃnona ǃnāde nî ǀūxū te” ti ge hâ ide ge ǂâihō. Tsîb ge kaise tsûsase ra āse ge ǃgûbē.

Currently Selected:

Markub 14: KKG20

Highlight

Copy