Markub 3
3
ǃHom hâ ǃomma ge ūhâ i khoeb
(Mateub 12:9-14; Lukab 6:6-11)
1ǁKhawab ge Jesuba sinagogeb* ǃnâ ǂgâ, ob ge ǃhom hâ ǃomma ūhâ khoeba ge hâ i. 2O gu ge Farisega Jesuba xū-e tsūse dī hâb ase ǀhapimā ǂgao tsî ǂōrisase gere kō, Jesub nē khoeba Sabbattsēs* ai nî ǂuruǂuru ǃkhaisa. 3Ob ge Jesuba ǃhom hâ ǃomma ūhâ khoeba ge mîba: “Nēpa ǀkhī re.” 4Tsîb ge ǁîna ge dî: “ǂHanu i a, Sabbattsēs ai da ǃgâi sîsenga nî dīsa tamas ka io tsū sîsenga da nî dī? Khoe-i di ûiba da nî sâu tamas ka io da kha nî hîkākā?”
Xawe i ge ǀgui-i tsîna xū-e ǃhoa tama ge i. 5Ob ge Jesuba khoena ǁaixasib ǀkha ge kō, xaweb ge ǁkhāti ǁîn di ǃgariǂgaoxasib xa kaise ge ǃoa. Tsîb ge khoeb ǃoa ge mî: “Sa ǃomma ǀhōǂui re.” ǁÎb ge ǃommi âba ge ǀhōǂui tsîb ge ǃhom ge hâ i ǃomma ǁkhawa ge ǂuru. 6O gu ge Farisega sinagogeba xu ge ǂoa. Tsî ǁnātimîsi gu ge Jesuba ǃgams ǃaroma ǀapena Herodeb di saoǃgonaogu#3:6 Herodeb di saoǃgonaogu: ǂGīǂgōsi saoǃgonaogu, Herodeb Kaib tsî ǁîb di ôab Herodeb Antipab tsîkha digu. ǀkha ge dītsoatsoa.
Kai ǂnubis ge Jesub ǃoa ra hā
7Ob ge Jesuba ǁîb di ǁkhāǁkhāsabega* huri-ammi ǁga ge ǂgaeǂguiǁgôa. Tsîn ge kai ǂnubis di khoena Galileab, Judeab 8tsî Jerusalemsa xu ge sao bi. Khoen ge Idumeaba xu tsî ǀkhara ǃkhain Jordanǃāb di aiǂoas ǃnâ ǁgoena xu ge ǀkhī. ǁÎn ge ǁkhāti Tirus tsî Sidons di ǂnamipe hâ ǃāde xu ge ǀkhī. Nē ǂnubis hoaragas ge Jesub ra dī xūnan ge ǁnâu, o ge sī. 9#Mrk. 4:1; Luk. 5:1-3ǁNātikōse ī tsîb ge ǁkhāǁkhāsabegu âba ge mîba, î gu ǂgauro-e ǂhomi, îb tā nē ǂnubis xa ǀāhe. 10Jesub ge ǂgui khoena ǂuruǂurutoas khaoǃgân ge ǀaesen hâna gere ǀkhoma, ǁîba tsâǀkhāsa. 11Tsî ǂkhaba gagan ge Jesuban gere mûo, ǃhūb ai ǁnāǁgoe tsî “Sats ge Elob di Ôatsa!” ti gere ǂgaiǂui.
12Ob ge Jesuba ǂkhaba gagade ǁîb a tari ǃkhaisa ǃhoasa ge ǃkhâikhom.
Jesub ge disiǀgamǀa apostelga ra ǁhûiǂui
(Mateub 10:1-4; Lukab 6:12-16)
13Ob ge Jesuba ǃhommi ai ǃapa tsî ǀnî ǁkhāǁkhāsabegu âba ge ǁkhau, o gu ge ge sī. 14Tsîb ge disiǀgamǀagu, apostelgu* tib ge ǂgaiga ge ǁhûiǂui, ǁîb ǀkha gu nî hâse. ǁKhātib ge ǁîba ǁîga ge sîǂui, aoǁnâ 15tsî gu nî ǁgâuaga* ǃhaeǂuis di ǁkhāsiba ūhâse.
16ǁÎgu ge: Simonni Petrub tib ge ǀonǂgaib, 17Jakobub tsî Johaneb tsîkha, Sebedeub ôakha, Boanerxekha tib ge ǀonǂgaikha, nēs ge “ǃGurub di ôakha” ti ra ǂâibasen. 18Andreab, Filipub, Bartolomeub, Mateub, Tomab, Alfeub ôab Jakobub tsî Tadeub, Simonni, Māsenxa ǀGuib tis tsîna ge ǂansa ib,#3:18 Māsenxa ǀGuib tis tsîna ge ǂansa ib: Grike xoaǁguib ge Kanaanǁîb ti ūhâ hîa Hebregowab ǃnâ mâǃoaxa ti ra ǂâibasensa (Luk. 6:15 tawa sī kō re). Mâǃoaxa ti hâ ǀons ge ega Jodeǁî khoen di ǃnans hîa Romeǁîna mâǃoa tsî gere ǃkhamsa ge māhe. 19tsî Judab Iskariotǁîb,#3:19 Iskariotǁîb: Nēs ge Kerios di khoeb ti ǂâibasen ǁkhā tsî Judeab ǃnâ hâ ǃās ǁga ra ǁnaeǁgau. Xawe ǃnāsase ǀnîsi ǂhumi-aob tamas ka io ǀapexū-aob tis tsîna ǂâibasen ǁkhā. Jesuba ge ǀapexūb tsîga.
Jesub tsî Beelsebuli
(Mateub 12:22-32; Lukab 11:14-23; 12:10)
20Ob ge Jesuba oms ǁga ge oa,#3:20 Oms ǁga ge oa: Oms ǃnâ ge ǂgâ. (ǀNîsi Simon Petrub di oms). tsîs ge ǁkhawa kai ǃgôab di ǂnubisa oms tawa ge sī, ǂnûsoa-i tsîn ge ǃaruǀî ǀkhai is kōse. 21Tsî Jesub di ǀaokhoen ge tarenab ra dī ǃkhaisa ǁnâu, on ge ǁîba nî ǃkhōǃnomǃnomse ge sī, ǃkhaub ra tin ge ǂâi xui-ao.
22 #
Mat. 9:34; 10:25 O gu ge Moseb ǂhanub* di ǁkhāǁkhā-aoga Jerusalemsa xu ǀkhī tsî ge mî: “Nē khoeb ge Beelsebuli,* ǁgâuagu di danaǂgaeǂgui-aob ǀgaib ǃnaka hâ! ǁNātikōse ī tsîb ge Beelsebuli di huib ǀkha ǁgâuaga ra ǃhaeǂui.”
23Jesub ge khoena ǁîb ǂnamipe ǀhaoǀhao tsî ǁîna ǂkhōdi* ǃnâ-u ǃhoa-ū tsî ge mî: “Mâtib kha Satanna* Satanna nî ǁgariǂui? 24ǁÎǃnābe ra ǃkham gaosib ge gaxuse hâhâ tide. 25Tsî oms hîa a ǀgorasas tsîn ge nî ǀgaru. 26Tsîb ga Satanna ǁîb ǂûb ǃoagu ǃkham, os ge ǁnāsa ǁîb di ǀamsa nî ǂâibasen.
27“Mâti i khoe-e ǀgaisa khoeb di oms ǃnâ khôaǂgâ tsî ǁîb di xūna nî ǃnari, aibe i ga nē ǀgaisa khoeba ǃgaeǂnûi tama io? ǁNās khaoǃgâ ǀgui i kom ǁîb oms ǃnâ khôaǂgâ tsî a ǃnari ǁkhāo.
28“Amase ta ge ra mîba du, hoa ǁorena du ge nî ǀûbahe, ǁoren tsî ǃkhāǃkhās, mâs ǀguis ga ǃkhāǃkhā xawe. 29#Luk. 12:10Xawe ǃAnu Gagaba du ga ǃkhāǃkhā, o du ge tātsē ǀûbahe tide tsîb ge nē ǁoreba ǀamose sadu ǃoagu nî ǃgôa.”
30Khoen gere ǁîb ǂkhaba gaga-e ūhâ ti mî, xui-aob ge Jesuba nēsa ge mî.
Jesub di îs tsî ǁîb ǃgâsagu
(Mateub 12:46-50; Lukab 8:19-21)
31On ge Jesub îs tsî ǃgâsagu tsîna ge ǀkhī. ǁÎn ge ǃauga mâ tsî khoe-e ǁîb ǁga ge haisi, îb ǂoaxa. 32Os ge Jesub di ǂnamipe ge ǂnôa i ǁaesa ge mîba bi: “Sa îs, sa ǃgâsagu tsî ǃgâsadi#3:32 Tsî ǃgâsadi: Nē mîdi ge ǀnî xoaǁguigu ǃnâ ǀkhai. tsîn ge ǃauga hâ tsî ra ǀhao-ū tsi ǂgao.”
33Ob ge Jesuba ge dî: “Tarisa kha ti î tsî tariga ti ǃgâsa?” 34ǁNās khaoǃgâb ge ǁîb ǂnamipe ge ǂnôa i khoena kō tsî ge mî: “Nēn ge ti î tsî a ti ǃgâsa. 35Mâ-i hoa-i hîa Eloba ra ǁnâuǀnam-i ge a ti aore tsî tare ǃgâsa, tsî a ti î.”
Currently Selected:
Markub 3: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
