KEJADIN 5
5
Sinursur Adam
(1Kro 1:1-4)
1I jenda isuratken gelar-gelar sinursur Adam. [Sanga ijadiken Dibata manusia, ijadikenNa manusia e bagi tempasNa. #Kej 1:27-28 2IjadikenNa jelma dilaki ras diberu, ipasu-pasuNa, ibahanNa gelarna “Manusia”.] #Mat 19:4; Mrk 10:6 3Tupung umur Adam 130 tahun tubuh anakna dilaki, tempasna seri ras ia, janah ibahanna gelarna Set. 4Kenca tubuh Set, 800 tahun nari dekahna Adam nggeluh, janah ipupusna denga tole anakna dilaki ras diberu. 5Jadi i bas umur 930 mate ia.
6Tupung umur Set 105 tahun, tubuh anakna Enos. 7Kenca tubuh Enos, 807 tahun nari ia nggeluh, janah ipupusna denga tole anak dilaki ras diberu. 8Jadi i bas umur 912 tahun mate ia. 9Tupung umur Enos 90 tahun, tubuh anakna dilaki, Kenan gelarna.
10Jenari 815 tahun nari ia nggeluh janah ipupusna denga tole anak dilaki ras diberu. 11Jadi i bas umur 905 tahun mate ia.
12Tupung umur Kenan 70 tahun, tubuh anakna dilaki, Mahalalel gelarna. 13Jenari 840 tahun nari ia nggeluh janah ipupusna denga tole anak dilaki ras diberu. 14Jadi i bas umur 910 tahun mate ia.
15Tupung umur Mahalalel 65 tahun, tubuh anakna dilaki, Jaret gelarna. 16Jenari 830 tahun nari ia nggeluh, janah ipupusna denga tole anak dilaki ras diberu. 17Jadi i bas umur 895 tahun mate ia.
18Tupung umur Jaret 162 tahun tubuh anakna dilaki, Enoh gelarna. 19Jenari nggeluh ia 800 tahun nari, janah ipupusna denga tole anak dilaki ras anak diberu. 20Jadi i bas umur 962 tahun mate ia.
21Tupung umur Enoh 65 tahun, tubuh anakna dilaki, Metusalah gelarna. 22Kenca tubuh Metusalah, Enoh nggeluh i bas persadan ras Dibata 300 tahun dekahna, janah ipupusna denga tole anak dilaki ras diberu. 23Jadi ia nggeluh 365 tahun dekahna. 24Kidekah geluhna tetap ia erdalan i bas dalan Dibata, tapi dungna lanai ia teridah perbahan iangkat Dibata ia. #Heb 11:5; Jud 1:14
25Tupung umur Metusalah 187 tahun tubuh anakna dilaki, Lameh gelarna. 26Jenari nggeluh ia 782 tahun nari, janah ipupusna denga tole anak dilaki ras diberu. 27Jadi i bas umur 969 tahun mate ia.
28Tupung umur Lameh 182 tahun tubuh anakna dilaki, 29janah nina, “Anak enda me si mereken kemalemen ate man banta i bas kelatihenta erdahin ngusahai taneh si enggo isumpahi TUHAN.” E maka ibahanna gelar anak ndai Nuah! 30Jenari lit 595 tahun nari Lameh nggeluh, janah ipupusna denga tole anak dilaki ras diberu. 31Jadi i bas umur 777 tahun mate ia.
32Tupung umur Nuah 500 tahun enggo ipupusna telu anak dilaki e me kap: Sem, Ham, ras Japet.
Currently Selected:
KEJADIN 5: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
