JOHANES 2

Kerja Erdemu-bayu i kuta Kana

1Dua wari kenca si e lit kerja erdemu-bayu i kuta Kana i daerah Galilea. Nande Jesus ikut i bas kerja e. 2Jesus pe ras ajar-ajarNa iundang ku kerja e. 3Asum enggo keri lau anggur nina nande Jesus man Jesus, “Enggo keri lau anggur kalak si erkerja enda.”

4Ngaloi Jesus, “O nande, labo man aturenkenndu kai si man bahanenKu. PaksangKu langa seh.”

5Tapi nina nande Jesus man serayan e, “Ikutken kai si ikatakenNa.”

6I je lit isikapken enem guci guna keperlun erburih rikutken adat Jahudi. Isi tep-tep guci lit kira-kira 100 liter. 7Nina Jesus man serayan e, “Isi tambe e alu lau seh dem.” E maka idemi kalak ndai tambe e. 8Jenari nina Jesus man kalak e, “Genduari jaruk lau e sitik jenari baba man sukut i bas kerja enda.” 9E maka ibaba kalak ndai lau e man sukut kerja e, jenari inanamina lau si enggo salih jadi anggur e. (La ietehna i ja nari rehna; tapi serayan si njaruksa metehsa.) E maka idilo sukut e si empo, 10jenari nina man bana, “Biasana anggur si mehulina nge lebe ielaken kalak, janah kenca puas temue e minem, ielaken anggur si biasa. Tapi kam seh asa genduari lit i bas kam anggur si mehulina!”

11Enda me tanda sengget si pemena ibahan Jesus i kuta Kana i daerah Galilea. IcidahkenNa kuasaNa si mbelin e maka ajar-ajarNa tek man baNa.

12Kenca bage lawes Jesus ras nandeNa, sembuyak-sembuyakNa bage pe ajar-ajarNa ku Kapernaum, janah i je me ia kerina ringan piga-piga wari dekahna. #Mat 4:13

Jesus bengket ku Rumah Pertoton kalak Jahudi

(Mat 21:12-13; Mrk 11:15-17; Luk 19:45-46)

13Kenca Wari Raya Paskah kalak Jahudi enggo ndeher, lawes Jesus ku Jerusalem. #Kel 12:1-27 14I bas Rumah Pertoton idapetiNa kalak erbinaga lembu, biri-biri ras nderapati. Lit pe i je kalak kundul si dahinna nukari duit. 15Jesus erbahan cambuk si idandan i bas nali nari. Alu e iligasiNa gelah ndarat asuh-asuhen e kerina i bas Rumah Peroton nari: subuk lembu, biri-biri. ItunggalingkenNa meja-meja kalak si nukari duit, seh maka merap duitna e kerina. 16Man kalak si erbinaga nderapati nina Jesus, “Angkat ndarat barang-barangndu e! Ola bahan rumah BapangKu jadi ingan erbinaga!” 17Perbahan si e inget ajar-ajar maka lit tersurat i bas Pustaka Si Badia, “O Dibata, keleng-ateKu nandangi rumahNdu, ngutkut desken api.” #Msm 69:10

18Jenari kalak Jahudi si erkuasa ngelawan Jesus nina, “Tanda sengget kai banci ibahanNdu guna nuduhken man kami maka lit hakNdu erbahan si enda kerina?”

19Erjabap Jesus, “Runtuhkenlah rumah Dibata enda, maka i bas telu wari Kupajekken ka mulihi.” #Mat 26:61; 27:40; Mrk 14:58; 15:29

20Ngaloi kalak e, “IpajekkenNdu ateNdu mulihi i bas telu wari? La mungkin, sabap empat puluh enem tahun nai dekahna majekken Rumah Dibata enda!”

21Tapi Rumah Dibata si ikataken Jesus, e me kulaNa. 22E maka kenca Jesus nggeluh mulihi, iinget ajar-ajar kai si ikatakenNa enda; janah tek ajar-ajar e kai si isuratken i bas Pustaka Si Badia bage pe kai si enggo ikataken Jesus.

Kerina manusia itandai Jesus

23Paksa Jesus i Jerusalem denga tupung Wari Raya Paskah, nterem kalak tek man baNa erkiteken tanda-tanda sengget si ibahanNa. 24Tapi Jesus la tek nandangi kalak e, sabap kerina manusia tangkas itandai Jesus. 25Labo perlu kalak nuriken kerna manusia man Jesus sabap ieteh Jesus nge kai si lit i bas pusuh manusia.

Currently Selected:

JOHANES 2: BTX

Highlight

Copy