LUKAS 12

Pertenget nandangi kalak si pekulah-kulah

(Mat 10:26-27)

1Asum enggo pulung jelma meribu-ribu kalak seh maka enggo rincet-incet ia kerina, perlebe ngerana Jesus man ajar-ajarNa nina, “Metengetlah kam nandangi ragi kalak Parisi, e me biakna si pekulah-kulah. #Mat 16:6; Mrk 8:15 2Kerina si terligen teridah kap pagi, janah kerina rahasia ipetangkas kap pagi. #Mrk 4:22; Luk 8:17 3Kai pe si enggo ikatakenndu i bas gelap terbegi nge pagi i bas terang, janah kai pe si enggo ikusikkenndu ku cuping kalak i bas kamar si tertutup imomoken nge man jelma si nterem.”

Ise si man kebiarenken?

(Mat 10:28-31)

4“O temanku, kukataken man bandu: ola kam mbiar nandangi kalak si ngasup munuh badan tapi kenca si e lanai ngasup erbahan kai pe. 5Kukataken man bandu ise arusna si man kebiaren: Mbiarlah kam man Dibata, si kenca munuh, lit ka kuasaNa ngambekkenca ku bas naraka. Ingetlah, tuhu-tuhu lah min kam erkemalangen man Dibata!

6Ma kin idayaken kalak lima cipcip alu dua sen saja? Amin bage gia labo sada pe ilupaken Dibata. 7Buk takalndu pe kerina enggo ibeligaiNa. E maka ola kam mbiar, sabap ergan kap kam asa cipcip.”

Ngaku ras mersoken Kristus

(Mat 10:32-33; 12:32; 10:19-20)

8“Kukataken man bandu, ise si ngakuken Aku i lebe-lebe manusia ia ajar-ajarKu, Anak Manusia si isuruh Dibata pe pagi ngakuken ia i lebe-lebe malekat Dibata. 9Tapi ise la ngakui maka ia ajar-ajarKu i lebe-lebe manusia, Anak Manusia si isuruh Dibata pe pagi mersoken ia i lebe-lebe malekat Dibata.

10Ise si pengeranana nimbak Anak Manusia si isuruh Dibata, ia banci ialemi, tapi kalak si nggombangi Kesah Si Badia la banci ialemi. #Mat 12:32; Mrk 3:29

11Adi iaduken kalak kam ku Pengadilen Agama, ntah ku pemerentah ntah ku kalak si erkuasa, ola aru atendu kerna kuga kam mpertahanken dirindu, ntah pe kerna si arus ikatakenndu. #Mat 10:19-20; Mrk 13:11; Luk 21:14-15 12Sabap paksa si e pagi iajari Kesah Si Badia nge kam kerna kai arus ikatakenndu.”

Perumpaman kerna kalak bayak si lenge

13Sekalak i bas jelma si nterem e ngerana nina, “O Guru, katakenlah man seninangku maka erbagi kami kerna erta-erta si itadingken bapa kami.”

14Ngaloi Jesus man bana, “O senina, ise kin ngangkat Aku guna ngerunggui kam duana? Labo dahinKu mbagiken erta-ertandu.” 15Tole nina Jesus man bana kerina, “Jaga dingen metengetlah maka ola kam merangap nandangi kai pe; sabap kegeluhen manusia si tuhu-tuhu labo erpalasken erta-erta si lit i bas ia, aminna uga gia ia bayakna.”

16E maka ituriken Jesus man jelma si nterem e perumpaman enda, “Lit me sekalak bayak, melala kal ulih jumana. 17E maka rukur ia nina, ‘Lanai siat lumbung ingan ulih jumangku e kerina. Kuga nge ndia kubahan?’ 18Nina ka i bas ukurna, ‘Bagenda kubahan: Kuruntuhken lumbungku enda, jenari kupajekken si tergalangen; i je me pagi kutamaken ulih jumangku ras kerina erta-ertangku. 19Kenca bage ningku i bas ukurku: Malem atendu, o tendingku! Sabap melala enggo ergun-gun erta-ertandu, cukup guna piga-piga tahun. Pesenangkenlah man bandu, man dingen minemlah.’ 20Tapi nina Dibata man bana, ‘O, bodoh! I bas berngi enda kam arus mate; man ise nge kerina erta-erta si enggo ipepulungndu e?’ ”

21Tole nina Jesus, “Bagenda me jadina nandangi kalak si pepulung kinibayaken man dirina jine, tapi la bayak i bas adep-adepen Dibata.”

Tek lah man Dibata

(Mat 6:25-34)

22Kenca bage nina Jesus man ajar-ajarNa, “Perbahan si e Kukataken man bandu: ola aru atendu kerna nakan si iperlukenndu i bas geluhndu ntah pe kerna uis si iperlukenndu guna dagingndu. 23Sabap ergan nge geluhndu asa pangan, dingen ergan pe badanndu asa uis. 24Nehenlah perik kak: la merdang, la rani, la lit lumbungna; tapi bage gia man nge ia ibahan Dibata. Kam ndauh ergan asa perik-perik e. 25Ise kin i bas kam ngasup pegedangken umurna alu aru ate? 26Adi labo kam ngasup erbahan si kitik e pe, ngkai maka aru atendu kerna kai-kai si debanna? 27Nehenlah perturah bunga ncole, labo ia ertenun ntah pe erbahan uisna. Tapi kukataken man bandu maka raja Salomo si bage kal bayakna labo lit uisna bagi bunga enda jilena. #1Raj 10:4-7; 2Kro 9:3-6 28Dibata nge si erbahanca mejile dukut-dukut i mbalmbal – dukut-dukut si sendah lit, pagi iambekken ku bas api. Makin lebihen kam iuisiNa? Andiko, kitikna kinitekenndu!

29Dage, ola aru atendu, ola gulut ukurndu kerna pangan ras inemenndu. 30(Sabap kalak si la nandai Dibata nge si aru atena kerna si e.) Ieteh Bapandu nge maka iperlukenndu si e. 31Arus maka buen kam rukur kerna Kinirajan Dibata gelah kerina si debanna pe ibereken Dibata ka man bandu.”

Kinibayaken i Surga

(Mat 6:19-21)

32“Ola kam mbiar, o rarasen si kitik sabap meriah ukur Bapandu mereken Kinirajan man bandu. 33Dayaken kerina erta-ertandu jenari bereken duitna man kalak musil. Bahanlah dompetndu si nteguh janah pepulunglah kinibayakenndu i Surga. I je la urak beliganna sabap la ibengketi penangko ntah pe ipan ngetnget. 34Sabap i ja erta-ertandu i je pe ukurndu.”

Juak-juak si erjaga-jaga

35“Tetap min kam erbenting kibul dingen ersinalsal pe lampundu. #Mat 25:1-13 36Bagi sekalak budak si nimai tuanna mulih i bas kerja erdemu bayu nari min kam. Asum reh tuan e dingen nuktuk pintun, minter italangina. #Mrk 13:34-36 37Sangap me budak si idapeti tuanna erjaga-jaga nimai ia mulih. Kukataken man bandu, erbenting kibul me tuan e, isuruhna budak e kundul jenari kuskas ia ngelaisa. 38Sangap me budak e adi idapeti tuanna ia erjaga-jaga aminna gia tuan e mulih tengah berngi ntah pe tekuak manuk. 39Ingetlah katangKu enda: Adi ieteh tuan rumah katawari penangko reh, tentu erjaga-jaga ia dingen la ipelepasna rumah e ibongkar. #Mat 24:43-44 40Bage pe kam, tetaplah min erjaga-jaga sabap Anak Manusia si isuruh Dibata reh i bas paksa si la arapndu.”

Juak-juak si tutus ras si melantar

(Mat 24:45-51)

41Nina Petrus man Jesus, “O Tuhan, man kami saja kin iturikenNdu perumpaman e, ntah man kerina manusia?”

42Erjabap Tuhan, “Ise dage budak si pentar dingen tutus? IA me ipercayaken tuanna jadi kepala budak si deban guna mbagiken pangan man budak e kerina i bas paksana. 43Sangap me budak si asum mulih tuanna idapetina ia sangana ndalanken tugasna! 44Kukataken man bandu, tuhu-tuhu iangkat tuan e me ia jadi pengawas i bas kerina erta-ertana. 45Tapi adi nina budak e i bas ukurna, ‘Tuanku ndekah denga nge maka mulih,’ jenari ipekpekina budak si deban si dilaki ras si diberu, mangani dingen minem ia seh mabuk. 46Jenari alu la iarapna rempet reh tuanna. Ibunuh tuanna ndai ia janah bali ibahanna ras kalak si la patuh.

47Budak si meteh sura-sura tuanna, tapi la ia ersikap dingen la ibahanna bagi si ngena ate tuanna, ia mekelek iligasi. 48Tapi budak si la meteh sura-sura tuanna, jenari ibahana kesalahen seh maka arus ia iligasi, budak e la mekelek iligasi. Sabap kalak si enggo ibereken man bana melala, i bas ia nari ituntut melala. Bage me pe man kalak si iendesken man bana melala, i bas ia nari ipindo ka melala.”

Kerehen Jesus maba pertentangen

(Mat 10:34-36)

49“Aku reh namaken api ku doni enda; mehuli kal adi api e enggo gara! 50Aku pagi ngaloken peridin si tertentu, janah kuga sedakna pusuhku ope denga si e enggo erkedungen! #Mrk 10:38 51Akapndu kin maka Aku reh ku doni enda maba dame? Kukataken man bandu, labo maba dame, tapi pertentangen. 52Genduari nari terjadi pertentangen i bas si lima kalak sada jabu, telu kalak ngelawan dua, janah si dua kalak ngelawan telu. 53Bapa ngelawan anakna si dilaki janah anak si dilaki ngelawan bapana; nande ngelawan anakna si diberu, janah anak si diberu ngelawan nandena; simetua ngelawan permainna janah permain ngelawan simetuana.” #Mi 7:6

Pengertin waktu

(Mat 16:2-3)

54Tole nina Jesus man jelma si nterem, “Adi idahndu reh embun i Barat nari, minter ikatakenndu, ‘Udan atena,’ janah tuhu bage. #Mat 16:2-3 55Bage pe adi igejapndu rembus angin i Selatan nari, minter ikatakenndu, ‘Las me wari,’ janah tuhu bage. 56O, kalak pekulah-kulah! Ietehndu ertina tanda-tanda i bas doni ras i bas langit. Tapi ngkai maka la iangkandu tanda-tanda masa si genduari enda?”

Erdamelah ras imbangndu

(Mat 5:25-26)

57“Engkai maka la itetapkenndu i bas ukurndu kai arus ibahanndu? #Mat 5:25-26 58Adi kam iaduken imbangndu dingen ibabana ku pengadilen, cubakenlah asa ngasupndu erdame ras ia asum kam i bas perdalanen denga gelah ola kam isehkenna ku lebe-lebe hakim, janah hakim nerahken kam ku polisi, jenari itamaken polisi kam ku bas penjara. 59Kukataken man bandu maka labo kam ndarat i bas penjara e nari, adi langa kin igalarindu utangndu seh bali.”

Currently Selected:

LUKAS 12: BTX

Highlight

Copy