LUKAS 15

Biri-biri si bene

(Mat 18:12-14)

1Sekali jadi nterem reh pengalo cuke ras kalak perdosa si deban megiken pengajaren Jesus. #Luk 5:29-30 2Ngidah si e jungut-jungut kalak Parisi ras guru-guru agama nina, “Ialo-aloNa kalak perdosa janah man pe IA ras.” 3E maka ituriken Jesus man bana perumpaman enda,

4“Adi sekalak i bas kam lit seratus biri-birina janah bene sada kuga nge ibahanna? Tentu itadingkenna biri-biri si siwah puluh siwah i mbalmbal, lawes ia ndarami biri-biri si bene e seh dat. 5Kenca idatna biri-biri e, meriah kal ukurna, itamakenna biri-biri e ku datas barana, 6jenari ibabana mulih. Kenca bage, idilona teman-temanna ras si ndeher-ndeher rumahna janah nina, ‘Meriah kal ukurku sabap enggo ku dat biri-biringku si bene e. Marilah kita ermeriah ukur ras-ras.’ 7Kukataken man bandu: Belinen pe keriahen i Surga nandangi sekalak perdosa si jera asangken si siwah puluh siwah kalak si akapna ia benar dingen la perlu jera.”

Duit si bene

8“Ntah pe sekalak diberu lit sepuluh duit pirakna, janah bene sada kuga nge ibahanna? Tentu isaganina lampu isapuina jabuna, idaramina manjar-anjar seh dat. 9Kenca idatna duitna e, idilona teman-temanna ras tetanggana, janah nina, ‘Ermeriah ukur gelah kita, sabap enggo ku dat duitku si bene e!’ 10Kukataken man bandu, bage me pe malekat-malekat ermeriah ukur nandangi sekalak perdosa si jera.”

Anak si bene

11Iterusken Jesus ngerana nina, “Lit me sekalak perbapan, dua kalak anakna dilaki. 12Nina si nguda man bapana, ‘O bapa, bereken genduari man bangku erta-erta sikerajangenku.’ E maka ibagi bapana erta-erta e man anakna duana. 13Kenca piga-piga wari, idayaken anak si nguda e me sikerajangenna, jenari lawes ia ku negeri si ndauh. I je isia-siakenna duitna e. 14Kenca keri ibahanna duitna e, jadi me kelihen i bas negeri e, janah mulai me iakapna suhsah. 15E maka erdahin ia ras sekalak anak negeri e. Isuruhna ia ku juma ermakan babi. 16Nakan iba-iba babi e pe meriah nge min ukurna manca, tapi ise pe la mereken kai pe man bana. 17Dungna rukur ia, janah nina i bas ukurna, ‘Kerina si erdahin bapangku riba-iba panganna, tapi aku i jenda menam mate kelihen. 18Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu. 19Lanai metunggung pe aku igelari anakndu.’ 20E maka berkat ia ndahi bapana.

Ndauh denga pe ia i rumah nari enggo idah bapana ia. Mekuah ate bapana, e maka kiam ia ngayakisa, idakepna janah iemaina. 21Nina anakna e man bana, ‘O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu.’ 22Tapi idilo bapana juak-juakna nina, ‘Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia. 23Jenari geleh sada anak lembu si mburna, gelah erbahan pesta man-man kita. 24Sabap anakku enda nai enggo mate, tapi genduari enggo nggeluh mulihi; ia enggo bene, tapi genduari mulihken ia.’ E maka ibenakenna erpesta ras ermeriah-meriah.

25Tapi anakna sintua paksa e i juma. Asum ia i bas perdalanen i juma nari, lanai ndauhsa ku rumah, ibegina sora gendang ras sora rende. 26E maka idilona sekalak juak-juak, isungkunna nina, ‘Kai si jadi e?’ 27Erjabap juak-juak man bana, ‘Agindu enggo reh mulihken janah isuruh bapandu igeleh sada anak lembu si mburna, sabap agindu si enggo bene e enggo reh mulihken i bas mejuah-juah.’ 28E maka nembeh kal ate anak sintua e dingen la ia nggit ku rumah. E maka reh bapana nami-nami ia i darat. 29Ngaloi ia man bapana, ‘Enggo piga-piga tahun aku erdahin ras kam bagi sekalak juak-juak janah la pernah kusimbak katandu. Kai kin enggo iberekenndu man bangku? Sada anak kambing pe la iberekenndu man bangku gelah aku man-man ras teman-temanku. 30Tapi anakndu ah, enggo ikerikenna erta-ertandu ras diberu perdenggal, janah kenca ia mulihken minter igelehndu sada anak lembu pilihen si mbur!’ 31Ngaloi bapana, ‘O anakku, kam tetap ras aku janah kerina erta-ertangku sikerajangenndu kap. 32Tapi patut pe kita erbahan kerja man-man dingen ermeriah ukur, sabap agindu si nai enggo mate, genduari enggo nggeluh mulihi; ia enggo bene, tapi genduari enggo reh mulihken.’ ”

Currently Selected:

LUKAS 15: BTX

Highlight

Copy