LUKAS 4

Jesus icubai Iblis

(Mat 4:1-11; Mrk 1:12-13)

1Asum Jesus mulih i Lau Jordan nari, idemi Kesah Si Badia IA, janah ibabai Kesah Si Badia e IA ku taneh gurun pasir. 2I je me IA icubai Iblis empat puluh wari dekahna. Kidekah i je kai pe la lit ipanNa, e maka kenca si e igejapNa melihe.

3E maka nina Iblis man baNa, “Adi Anak Dibata kin Kam salihken dage batu-batu enda jadi roti.”

4Ngaloi Jesus, “Lit kap tersurat i bas Pustaka Si Badia, ‘Labo ibahan pangan ngenca maka manusia nggeluh.’ ” #Ul 8:3

5Jenari ibabai Iblis Jesus ku ingan si meganjang, janah icidahkenna kerina kerajan doni. 6Nina Iblis man baNa, “Kerina kuasa ras kinibayaken enda kubereken man baNdu, sabap kerina e enggo iendesken man bangku janah banci kubereken man ise ateku. 7Adi nggit Kam nembah mungkuk man bangku, kerina enda kubereken man baNdu.”

8Ngaloi Jesus, “Lit kap tersurat i bas Pustaka Si Badia, ‘Sembahlah Tuhan Dibatandu, janah IA saja ngenca si man sembahen!’ ” #Ul 6:13

9Kenca bage ibabai Iblis ka Jesus ku Jerusalem janah ipetedisna i babo ingan si meganjangna i bas tarum Rumah Pertoton, jenari nina man Jesus, “Adi kam kin Anak Dibata, dabuhken dage baNdu ku teruh. 10Sabap lit kap tersurat i bas Pustaka Si Badia, ‘Isuruh Dibata kap malekat-malekatNa reh njagai Kam,’ #Msm 91:11 11bage pe itatang malekat-malekat e nge Kam alu tanna gelah naheNdu pe ola terantuk ku batu.” #Msm 91:12

12Nina Jesus, “Lit kap tersurat i bas Pustaka Si Badia, ‘Ola cubai Tuhan Dibatandu.’ ” #Ul 6:16

13Kenca Iblis dung ncubai Jesus arah kerina dampar itadingkenna IA seh lit kesempaten si deban.

Jesus menaken pengajaren i Galilea

(Mat 4:12-17; Mrk 1:14-15)

14E maka mulihken Jesus ku Galilea, janah ikuasai Kesah Si Badia IA. Mbar me berita kerna Jesus ku belang-belang daerah e. 15Ngajar IA i bas rumah-rumah pertoton si lit i je janah kerina kalak muji IA.

Jesus la ialoken i Nasaret

(Mat 13:53-58; Mrk 6:1-6)

16Seh ka pe Jesus i Nasaret, e me kuta inganNa ipebelin. Sanga wari Sabat ku rumah pertoton IA bagi biasana. Tedis IA guna ngoge Pustaka Si Badia. 17Jenari ibereken kalak man baNa kitap Nabi Jesaya. Kenca ipepayoNa, idahNa me ayat-ayat si ateNa iogekenNa e me,

18“Kesah Tuhan lit i babongKu,

sabap enggo ipilihNa Aku guna meritaken Berita Si Meriah man kalak si musil.

IsuruhNa Aku erberita man kalak si tertaban maka ipulahi me ia,

janah kalak si pentang erpengidah me,

kalak si itindas ipulahi me. #Jes 61:1-2

19Janah mpebetehken masana Tuhan mulahi bangsaNa.”

20Kenca dung IA ngoge, igulungNa kitap ndai, iulihkenNa man si erdahin i je, jenari kundul IA. Kerina mata kalak i bas rumah pertoton e ngenen ku IA. 21E maka ibenaken Jesus ngajar nina, “Sendah enggo seh isi Pustaka Si Badia si ibegindu ndai.” 22Tuhu iakap kalak si nterem kai si ikataken Jesus, tapi mamang atena sabap Jesus mbelaskenca kata si mehuli e. E maka nina kalak ndai, “Ma anak si Jusup kin IA?”

23E maka ngerana Jesus man bana kerina, “La banci lang maka ibelaskenndu atendu man bangKu kata enda, ‘O dokter, pepalemlah bandu.’ Bage pe ikatakenndu atendu man bangKu, ‘Bahanlah i kutaNdu enda bagi si enggo ibegi kami ibahanNdu i Kapernaum.’ ” 24Tole nina Jesus, “Kukataken pe man bandu, maka labo lit sekalak pe nabi ipehaga i bas kutana. #Joh 4:44 25Tapi ingetlah: nai paksa Elia nggeluh, sanga musim kemarau telu tahun enem bulan dekahna terjadi kelihen si mesangat i belang-belang taneh enda, nterem kal diberu si enggo mbalu i bas kalak Israel. #1Raj 17:1 26Amin bage pe la isuruh Dibata maka Elia lawes ndahi sekalak diberu balu-balu ndai, tapi Elia isuruhNa ku sada diberu balu-balu i Sarpat i daerah Sidon ngenca. #1Raj 17:8-16 27Bage ka pe sanga paksa Nabi Elisa, nterem nge kalak Israel si gadamen. Tapi labo lit sekalak pe ipepalem, seakatan Naman kalak Siria ngenca ipepalem.” #2Raj 5:1-14

28Megi kata Jesus e, merawa kerina kalak si i bas rumah pertoton e. 29Tedis ia kerina irintakna Jesus ku darat kota jenari ibabana IA ku das uruk ingan kota e ipanteki. I das uruk e nari ianjumkenna atena Jesus ku embang. 30Tapi erdalan Jesus arah tengah-tengah kalak si nterem e, jenari lawes IA.

Sekalak setanen

(Mrk 1:21-28)

31Jenari ngincuah Jesus ku Kapernaum, e me sada kuta i Galilea. I bas wari-wari Sabat ngajar IA man kalak si nterem. 32Mamang ate kalak megi pengajarenNa sabap IA ngajar alu kuasa. #Mat 7:28-29 33I bas rumah pertoton e lit sekalak setanen; serko ia alu megang sorana nina, 34“Oh, man kadeNdu kin kami o Jesus kalak Nasaret? Reh Kam gelah meneken kami? Kueteh nge ise Kam. Kam me si Badia si reh i bas Dibata nari!”

35Isergangi Jesus setan ndai nina, “Sinik! Ndaratlah i bas ia nari!” E maka idampes-dampesken setan e kula si setanen e, i lebe-lebe kalak si nterem, jenari ndarat setan e i bas ia nari alu la nakiti ia.

36Kerina kalak kemamangen, janah sisungkun-sungkunen ia, nina, “Kata-kata si kuga nge enda ndia? Erdolat dingen erkuasa IA merentahken setan-setan e, janah setan-setan e pe ndarat.” 37E maka berita kerna Jesus mbar ku belang-belang daerah e.

Nterem jelma ipepalem Jesus

(Mat 8:14-17; Mrk 1:29-34)

38Kenca ndarat i bas rumah pertoton nari, berkat Jesus ku rumah Simon. Mami Simon sakit mekelek; perbahan e ipindoken kade-kadena man Jesus gelah ipepalemNa min ia. 39E maka idahi Jesus mami Simon, tedis la deherken ingan medemna, jenari ipelawesNa penakit e, janah penakit e pe nadingken mami Simon. Minter keke mami Simon, kuskas ia nikapken pangan dingen ngelai Jesus ras kalak ndai kerina.

40Kenca matawari enggo sundut, kerina kalak maba kade-kadena si erbage-bage penakitna man Jesus. Ipepalem Jesus kerina alu namaken tanNa ku babo kalak si penakiten e sekalak-sekalak. 41Setan-setan pe ndarat i bas kerina kalak si setanen nari, alu serko nina, “Kam kap Anak Dibata.”

Isuriangi Jesus setan-setan e, janah la ibereNa ngerana, sabap ieteh setan-setan e pe maka IA kap Kristus, si Engkelini si ipadanken Dibata.

Jesus ngajar i bas rumah-rumah pertoton

(Mrk 1:35-39)

42Kenca terang wari itadingken Jesus kuta e, berkat IA ku sada ingan si melenget. Kalak si nterem ndarami IA, janah kenca jumpa lanai iberena Jesus lawes sabap atena ola min ia itadingken Jesus. 43Tapi nina Jesus man bana, “Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata.”

44E maka erkotbah Jesus i bas rumah-rumah pertoton i belang-belang daerah Judea.

Currently Selected:

LUKAS 4: BTX

Highlight

Copy