MARKUS 16

Kekeken Jesus

(Mat 28:1-8; Luk 24:1-12; Joh 20:1-10)

1Kenca lepas wari Sabat, Maria Magdalena, Maria nande Jakup ras Salome lawes nukur rempah-rempah si merim, gelah mait Jesus iminakina alu e. 2E maka asum wari Minggu erpagi-pagi si lampas, pultak kenca matawari, berkat me ia ku kuburen. 3-4I tengah dalan nungkun ia sapih-sapih ia nina, “Ise kari nampati kita nggulingken batu si nutupi kuburen e?” Batu e seh kal galangna. Tapi kenca ia seh, idahna kuburen e enggo talang. 5E maka bengket ia ku bas, janah idahna i je sekalak anak perana, mbentar uisna kundul arah kemuhen. Mamang kal atena.

6Tapi iperkuanken anak perana ndai ia nina, “Ola mamang atendu! Kueteh nge maka idaramindu Jesus kalak Nasaret si ipakuken ku kayu persilang. IA lanai i jenda. IA enggo keke! Nehenlah! Enda kap inganNa. 7Genduari mulihlah janah beritaken man Petrus ras ajar-ajarNa, nindu, ‘IA enggo leben ku Galilea; i jah kam itimaiNa bagi si enggo ikatakenNa man bandu.’ ” #Mat 26:32; Mrk 14:28

8E maka ndarat kalak ndai ibas kuburen e nari jenari kiam ia perbahan mamang atena dingen mbiar kal ia. Perbahan biarna lanai iturikenna man ise pe.

Jesus ncidahken bana man Maria Magdalena

(Mat 28:9-10; Joh 20:11-18)

[9Asum wari Minggu erpagi-pagi, kenca Jesus keke ibas si mate nari, man Maria Magdalena lebe icidahkenNa baNa. Maria Magdalena enda me si pernah ipelawes Jesus pitu setan ibas ia nari. 10E maka lawes Maria Magdalena meritakenca man teman-teman Jesus. Kalak enda ndai kerina sangana erceda ate dingen tangis. 11E maka la ia tek sanga iberitaken Maria Magdalena maka Jesus e enggo nggeluh mulihi dingen enggo pe idahna.

Jesus teridah man dua kalak ajar-ajar

(Luk 24:13-35)

12Jenari Jesus ncidahken diriNa ibas rupa si la bagi biasa man dua kalak ajar-ajarNa. Ajar-ajar e sangana ibas perdalanen ku bas sada kuta. 13E maka mulihken ajar-ajar si dua e, iberitakenna man teman-temanna si deban, tapi teman-temanna e la tek.

Jesus teridah man ajar-ajar si sepuluh sada kalak

(Mat 28:16-20; Luk 24:36-49; Joh 20:19-23; Perb 1:6-8)

14Dungna Jesus ncidahken baNa man ajar-ajar si sepuluh sada kalak, asum ia paksa man kerina. Ipandang Jesus ia kerina sabap la lit kinitekenna dingen mersik ukurna. La ia tek nandangi kalak si enggo ngidah Jesus nggeluh mulihi; 15jenari nina Jesus man ajar-ajarNa, “Laweslah, siari doni enda jenari beritaken Berita Si Meriah man kerina manusia. #Perb 1:8 16Ise si tek dingen iperidiken terkelin kap pagi. Tapi ise si la tek ia pagi iukum. 17Kalak si tek lit pagi tandana e me: Ipelawesna setan-setan ibas gelarKu, ngerana ia ibas cakap si mbaru e. 18Adi icikepna nipe ntah inemna racun labo kaden pe ia. Itamakenna tanna ku babo kalak sakit, malem penakit e.”

Jesus nangkih ku Surga

(Luk 24:50-53; Perb 1:9-11)

19Kenca Tuhan Jesus ngerana man ajar-ajar, iangkat me IA ku Surga. I jah IA kundul arah kemuhen Dibata. #Perb 1:9-11 20Lawes ajar-ajar, janah erberita ia ku japa pe. Tuhan nampati ia ibas dahinna, janah Tuhan pe ikut erdahin ras-ras kalak enda. Ibahan Tuhan maka i japa pe kalak enda meritaken berita si ibas Dibata nari e i je pe jadi tanda kuasa ras tanda sengget.]

PENDUNGI SI DEBAN

[9Diberu-diberu ndai lawes ndahi Petrus ras teman-temanna. Alu gendek iturikenna kerina kai si enggo ikataken anak perana ndai man bana. 10Tapi kenca si e, Jesus jine nenahken Berita Si Badia si tetap nggeluh, kerna keterkelinen si rasa lalap e. Si enda ibahanNa erkelang-kelangken ajar-ajarNa i Timur nari seh ku Barat.]

Currently Selected:

MARKUS 16: BTX

Highlight

Copy