यूह 11

लाजरस मर्या

1लाजरस नाउँ भया एक जानो मान्स बिमारी होइरइथ्यो। उ मरियम रे उइकी दिदि मार्था बेथानिया गाउँका बासिन्दा थ्या। 2प्रभुलाइ अँत्तर लाइबर उनरा खुट्टा आफना रौंले पुछि दिनेइ मरियम यिइन थिन। इसइको भाइ लाजरस बिमारी थ्यो। 3यिन दुएइ दिदिले येशूका वाँ यिसो भणबर खबर पठायो, “प्रभु, जइलाइ तम प्रेम अरन्छौ, त्यो बिमार होइरइछ।”

4तर यो सुणिबर येशूले भण्यो, “यइ बिमारले मद्द्या होइन, तर यो परमेश्वरको महिमाकी निउति हो, कि यइ बठेइ परमेश्वरका चेलाको महिमा होउ।” 5येशूले मार्था, तइकि बैनि रे लाजरसलाइ प्रेम अरन्थ्या, 6रे पइलगइ लाजरस बिमारी छ भण्न्या सुणिबर उन आजी दुइ दिन ताँइ बस्या।

7दुइ दिन पछा उनले शिष्यालाइ भण्यो, “लौ, आस हाम यहुदिया जिल्ला फर्किबर जानाउ।”

8शिष्याले भण्यो, “गुरु, भर्खरइ मान्तर यहुदि अगुवानले तमलाइ ढुङाले हाण्नाइ बटिरइथ्या, रे आजी तम ताँइ जान्ना छौ?”

9येशूले जबाफ दियो, “कि दिनमि बार घन्टा हुनाइनन ब? दिनमि हिट्यालाइ ठेस लाग्दइन, क्याकि तइले संसारको ज्योति धेकन्छ, 10तर रात हिट्यालाइ ठेस लागन्छ, क्याकि मान्समि केइ उजालो हुनइन।”

11तइ पछा उनले तिननलाइ भण्यो, “हामरा मित्तुर लाजरस निनमि पडिरइछन, रे तइलाइ निन बठेइ बिउजाउनाइ म ताँ जानउ।”

12शिष्याले उनलाइ भण्यो, “प्रभु, त्यो निनमि छ भण्या त्यो निको होइजान्या हो।” 13येशूले तइको मृत्युका बारेमि भणिराइथ्यो, तिननले स्वाभाबिक निनको बारेमि भण्या हो भणि सोच्यो।

14येशूले तिननलाइ खुलस्त भणिदियो, “लाजरस मरियो। 15तमनले बिश्वास अर भणबर तमरा खातिर म ताँ नभयामि खुशी होइरइछु। जसो भएलगइ हाम तिनरा वाँ जानाउ।”

16तब दिदुमस भणिन्या थोमाले आफना संगि शिष्यालाइ भण्यो, “लौ, हाम लगइ जानाउ, रे उसइसित मद्दाउ।”

दुइ बैनिलाइ येशूले हौसल्ला दियो

17जब येशू बेथानिया गाउँमी पुग्या, तब लाजरसलाइ चिहानमि राख्या चार दिन भया येशूले था पायो। 18बेथानिया गाउँ यरुशलेम सहर बठेइ करीब: तीन किलोमिटर दुरथ्यो। 19भौत यहुदि मान्सन मार्था रे मरियमका भाइ मर्या हुनाले तिननलाइ सान्त्वना दिनाइ आइरइथ्या। 20येशू आउन्ना छन भण्न्या सुणिबर मार्था निगइ रे उनलाइ भेट्यो। तर मरियम घरइ बसिरइ। 21तब मार्थाले येशूलाइ भणि, “प्रभु, तम यइ भया भए मेरो भाइ मद्देइ थेइन। 22तर म जाण्नउ, कि तमले परमेश्वरसित जी मागन्छौ, परमेश्वर तमलाइ दिनाहान।”

23येशूले तइलाइ भण्यो, “तेरो भाइ आजी जिउनो हुन्या हो।”

24मार्थाले उनलाइ भण्यो, “म जाँण्नउ, कि त्यो न्यायका दिनमि मर्या बठेइ जिउना होइबर उठन्छ।”

25येशूले तइलाइ भण्यो, “म तेइ हु, जो मर्या बठेइ जिउना बनाउनउ रे जइले जीवन दिन्छ। मलाइ बिश्वास अद्द्या मर्या लगइ जिउनो हुन्या हो। 26पइ जिउन्या रे ममि बिश्वास अद्द्या सब कभइ मद्द्या आथिन। कि तु यो बिश्वास अरन्छेइ?”

27तइले उनलाइ भण्यो, “हो प्रभु, म बिश्वास अद्दउ, तम संसारमी आउन्या ख्रीष्ट, परमेश्वरको चेलो हौ।”

28इति भणबर त्यो निगइ, रे आफ्नि बैनि मरियमलाइ बोलाइबर खुसुक्‍क भणि, “गुरुज्यू, पुग्ग्या, रे तुलाइ बोलाउन्ना छन।” 29यो सुणिबर मरियम झट्ट उठीबर येशूलाइ भेट्टाइ उनरा वाँ निगइ। 30तइ बेला सम्म येशू गाउँमी पुग्या थेइन, तर उन तसइ ठाउँमि थ्या जाँ मार्थाले उनलाइ भेटिराइथि। 31घरमि तिनलाइ सान्त्वना दिनाइ आया यहुदि मान्सनले मरियम झट्ट उठीबर गया धेकिबर, त्यो चिहानमि रुनाइ गएइ हो भणि सम्जिबर तइका पछा लाग्या।

32जब मरियम येशू भया ठाउँमि पुगि रे उनलाइ धेक्यो, तब यिसो भण्नी त्यो उनरा खुट्टाइनि पडि, “हे प्रभु, तम याँ भया भए मेरो भाइ मद्देइ थेइन।”

33जब येशूले तइलाइ रून्नारएइ रे तइसित आउन्या यहुदि मान्सन लगइ रुन्नारया धेक्यो, तब उन बड्ताइ ब्याकुल भया रे भौत दुःखित भया 34उनले तिननलाइ सोध्यो, “तमनले तइलाइ काँ राखिराइछौ?” तिननले उनलाइ भण्यो, “प्रभु आइबर, हेर।”

35येशू रोया। 36तबइकिलाइ यहुदि मान्सनले एक अर्खालाइ भण्यो, “हेद्दा, उनले तइलाइ कति प्रेम अरन्थ्या।”

37तर कसइ-कसइले भण्यो, “कि अन्धाका आखा खोल्लया यिनले यइ लाजरस लगइ मद्दा बठेइ बचाउन सक्देइ थेइन ब?”

38तब येशू आजी भौत ब्याकुल होइबर चिहानमि गया। रे त्यो चिहान एक गुफा थ्यो, तइको मुख ठुला ढुंगाले ढाकिराइथ्यो। 39येशूले भण्यो, “ढुङो हटा।” मर्या मान्सकि दिदि मार्थाले उनलाइ भणि, “हे प्रभु, यइ बेला सम्म त त्यो गनाउन पसिगइ हो, क्याकि त्यो मर्या चार दिन होइय्या।”

40येशूले तइलाइ भण्यो, “कि मइले तुलाइ भण्या होइन, तुइले बिश्वास अरि भण्या परमेश्वरको महिमा धेक्देइ हइ?”

41तिननले ढुङो हटाइदियो। रे येशूले मल्तिर नजर उठाइबर भण्यो, “हे पिता, म तमलाइ धन्यबाद दिनउ, क्याकि तमले, मेरो बिन्ति सुणिराइछौ। 42मलाइ थाहा छ, कि तम मेरो बिन्ति सदाइ सुणन्छौ। तर याँ कलिया भिडका खातिर मइले यो जोरले भण्या हु, कि तमले मलाइ पठाया हउ भणि तिननले बिश्वास अरुन।”

43पइ यिन कुरणी भण्या पछा उन जोरले बोल्ल पस्या, “लाजरस, बाइर निकलिबर आइ।” 44त्यो मर्या मान्स तइका हात खुट्टा पट्टीले बादिया रे अनार लगइ लत्ताले बेरिया तसोइ बाइर निकलिबर आयो। येशूले तिननलाइ भण्यो, “तइका बेडियाका लत्ता खोल्दिय, रे तइलाइ जान्दिय।”

येशूलाइ माद्या षडयंत्र

(मत्ती २६:१-५; मर्क १४:१-२; लूका २२:१-२)

45मरियमका वाँ भेट्टाइ आया भौत यहुदि मान्सनले यशूले अर्या काम धेकिबर उनमी बिश्वास अर्यो। 46तर तिननमि हइ कोइ फरिसि मान्सनको समुहका वाँ गया, रे येशूले अर्या काम भणिदियो।

47तब यहुदि मुख्य पुजारि रे फरिसि मान्सनको समुहले यहुदि महासभाका सदस्यलाइ बोलाइबर तिनलाइ भण्यो, “आब हाम कि अददाउ? क्याकि यइ मान्सले त भौत अचम्मका काम अद्दा छ। 48यदि यइलाइ हामले रोकेइन भण्या सबले उनलाइ मसिह भणबर बिश्वास अद्दया हुन रे रोममि आइबर हामरो मन्दिर रे देसलाइ नास पाड्डया हुन।”

49तर तिननमि हइ एक जाना सभाघरको सदस्य, कैयाफा, जो तइ वर्षका यहुदि प्रधान पुजारि थ्या, उइले तिननलाइ भण्यो, “तमन केइलगइ जाण्नानु। 50समस्त जाति नास हुनु भण्ना बरु जनताकी निउति एक जाना मान्स मद्द्यामि तमरो कल्याण छ भणि तमन बुज्जानु।”

51यो तिनले आफ्नाइ तिर बठेइ भण्या होइन, तर तइ वर्षका यहुदि प्रधान पुजारि भया हुनाले इस्राएल जातिकी निउति येशू मद्दु पणन्छ भण्न्या अगमबाणी अर्याथ्यो। 52इस्राएल जातिकी निउति मान्तर तिनले यो भण्या थेइन, तर तितर बितर भया परमेश्वरका सन्तानलाइ एकसित जमा अद्दाइलाइ यो भणिरइथ्यो। 53तबइकिलाइ तइ दिन बठेइ यहुदि अगुवानले उनलाइ माद्द्या सल्लाह अर्यो।

54तबइकिलाइ येशू आजी यहुदि अगुवानका बिचइनि खुला होइबर हिटेइन, तर ताँ बठेइ उजाड ठाउँमिका नजिकै रया एफ्राइम भण्न्या सहरमि गया, रे ताँ शिष्यासित बस्या।

55यहुदि मान्सनको निस्तार काजबार नजिकै थ्यो, रे गाउँ-गाउँ बठेइ भौत जाना आफ-आफलाइ सुद्द बनाउन भणबर निस्तार काजबार सुरु हुनाहइ पइल्ली यरुशलेम सहरमि गया। 56तब तिननले येशूलाइ खोज्यो, पइ तिनन मन्दिरमि खडा हुन्ज्या आपसमी भण्न्न पस्या, “तमनलाइ कसो लागन्छ, कि उन काजबारमि आउन्ना?” 57यहुदि मुख्य पुजारि रे फरिसि मान्सनले येशूलाइ पकोड्डाइ उन काँ छन भणि कसइले था पायाले खबर अर्या भण्न्या आज्ञा दिइराइथ्यो।

Currently Selected:

यूह 11: DTYNT

Highlight

Copy