मत्ती 20

दाखबारीमी काम अद्या मान्सन

1“स्वर्गको राज्य यइ काहानि जसोइ हो: परभातइ एक जमिनदार बजारमि गयो जाँ द्याणीमि काम अद्द चाहान्या मान्सन जम्मा भयाथ्या। उन आफना अंगुरका बारीमि काम अददाइलाइ मान्सन खोज्जाइ ताँ गया। 2मान्सनसित एक दिनको द्याणी तोकिबर उइले तिननलाइ आफना अंगुरको बारीमि पठायो।

3जब उ आजी ब्याहान लगभग नौ बजे तिर बाइर निकल्यो, उइले औरलाइ बजारमि बेकाम कलिरया धेक्यो, 4रे उइले तिननलाइ भण्यो, ‘तमन लगइ अंगुरको बारीमि काम अद्दाइ जा, रे उचित द्याणी म तमनलाइ दिउलो।’ 5रे तिनन काम अद्द गया। आजी उइले लगभग छाकला बार बजे तिर, रे आजी लगभग तीन बजे तिर बाइर निकलिबर तसोइ अर्यो। 6आजी उइले लगभग पाँच बजे तिर बाइर निकलिबर औरलाइ बेकाम कलिरया भेट्यो, रे तिननलाइ भण्यो, ‘तमन क्यालाइ याँ दीनभरि बेकाम कलिरइछौ?’

7तिननले उइलाइ भण्यो, ‘कसइले हामलाइ द्याणीमि लाया आथिन।’ उइले तिननलाइ भण्यो, ‘तमन लगइ मेरा अंगुरको बारीमि जा रे ताँ काम अर।’ 8जब साँज पड्यो, तब अंगुर बारिका मालिकले आफना मेटलाइ भण्यो, ‘कामदारलाइ बोलाइबर छाड्डीबार आउन्या बठेइ पइलि आउन्या सम्मलाइ लैजाइबर तिनरो द्याणी दिदे।’

9पाँच बजै काम अद्दयावाला आया, रे तिनन सबले एक दिनको द्याणी पायो। 10जब परभातइ द्याणीमि काम अद्दयावाला आया, तब तिननले बरताइ पाउला भण्न्या बिचार अर्यो, तर तिनन सबले एक दिनको द्याणी पायो। 11जब तिननले द्याणी पायो, जमिनदारका बिरोधमी तिनन गनगन अद्द पस्या। 12तिननले भण्यो, ‘यिन पछा आयाले एक घन्टा मान्तर काम अर्यो, तर तमले तिननलाइ लगइ हामलाइ दिया जति द्याणी दिया। हामले दीनभरि चर्को घाममि कठीन काम अर्या।’

13तर जमिनदारले तिननमि हइ एक जनालाइ जबाफ दियो, ‘साथी, मइले तमलाइ केइ अन्याय अर्या आथिन। कि तमले मसित पुरा एक दिनको द्याणीमि काम अदद्या कबुल अर्या होनु ब? 14तमरो पाउन्या द्याणी लैजाइबर जा। यिन पछा द्याणीमि काम अद्दयावालालाइ लगइ तमलाइ दिया जति म दिन चाहानउ। 15मइले चाह्या जसेरि आफनो पैसा खर्च अद्द मेरो अधिकार हो। तमले डाहा अददु पड्डइन क्याकि म औरसित दयालु छु।’

16यिसेरी भौत जो अइल अगाडी छन तिनन आउन्या समयमि पछाडी हुन्या हुन रे जो अइल पछाडी छन, तिनन आउन्या समयमि अगाडी हुन्या हुन।”

आफु मद्या बारेमि येशूको तेसरो अगमबाणी

(मर्क १०:३२-३४; लूका १८:३१-३४)

17यरुशलेम सहरतिर जाना जानाइ येशूले बार शिष्यालाइ अलग लैजाइबर बाटाइनि भण्यो, 18“हाम यरुशलेम सहरतिर जान्नाछु। आब, मान्सको चेलो यहुदि मुख्य पुजारि रे मोशाको कानुन सिकाउन्यावालाका हातमि सुम्पिन्या हो, रे तिननले उइलाइ मृत्यु दण्डको दोषि ठहराउन्या हुन। 19उइलाइ खिसि काट्ट्या हुन, कोर्रा लाउन्या हुन, रे क्रुसमि झुण्न्याउन भणि तिननले उइलाइ गैर-यहुदि मान्सनका हातमि सुम्पिन्या हुन, तर उ तेसरा दिनमि मर्या बठेइ जिउनो होइबर उठन्छ।”

इजाकी बिन्ति

(मर्क १०:३५-४५)

20तब जब्दियाका चेलाकि इजाले आफना चेलालाइ सँङैनि लैजाइबर उनरा साम्नेइ घुडा टेकिबर बिन्ति अरि। 21उनले तइलाइ सोध्यो, “तमरा निउति म कि अरिदिउ भण्न्या तमरो मन छ?”

तइले उनलाइ भणि, “आदेस अर रे तमरा राज्यमि, मेरा यिन दुइ चेलानमि हइ एक जानो तमरा दाइन तिर रे अर्खो तमरा बाउतिर बस्स पाउन।”

22तर येशूले जबाफ दियो, “तमन कि मागन्छौ त्यो जाणनानु। कि जो दु:खको कटौरा म पिनउ, त्यो तमन पिन सकन्छौ?” तिननले भण्यो, “हाम सब सक्दाउ।”

23उनले भण्यो, “पक्‍का लगइ तमनले कष्ट भोग्द्या हौ जसेरि मइले भोग्द्या छु। तर मलाइ यो अधिकार आथिन कि मेरा दाइनतिर रे बाउतिरका सम्मानमि को बस्या हुन। जो परमेश्वरले तिनरा निउती त्यो ठाउ तयार अरिराइछ।”

24जब और दस जाना शिष्याले सुण्यो, तिनन दुइ भाइसित रिसाया। 25तर येशूले तिननलाइ आफना वाँ बोलाइबर भण्यो, “तम जाँणन्छौ, यइ संसारका सासक आफ्नो अधिकार प्रयोग अद्दाइ आफ्नो अधिनमी भया मान्समि अधिकार जमाउन सासन अद्दाहान। रे तिनरा अगुवानले मान्सलाइ आफ्नो भण्या अराउनाइ निउती अधिकारको प्रयोग अददाहान। 26रे तम इसो जन अर्या। पइ तममि जो महान बन्न इच्छा अरलो उ सबको सेवक बनउ, रे जो अगुवा बन्न इच्छा अरलो उ सब मान्सका निउति नम्र सेवक बनउ। 27जइले तममि सबहइ ठुलो हुन्या मन अरन्छ, त्यो दास हुन पणन्छ। 28जसेरि म, मान्सको चेलो यइ संसारमी औरले मेरो सेवा अरुन भणीबर आया होइन तर और मान्सनको सेवा अद्दाइ आया हु। म भौत मान्सनलाइ तिनरा पाप बठेइ छुटकारा अददाइ आया हु।”

दुइ जाना काना मान्स

(मर्क १०:४६-५२; लूका १८:३५-४३)

29जब येशू रे उनरा शिष्या यरिहो गाउँ छाडिबर जान्नाथ्या, एक ठुलो भिड उनरा पछा लाग्यो। 30दुइ जाना काना मान्सन बाटाका ड्यालीमी बस्याथ्या, येशू तसइ बाटा जान्नाछन भण्न्या सुणिबर कला हालिबर तिननले भण्न पस्या, “राजा दाउदका बंस, हाममि दया अर!” 31भिडले तिननलाइ चुप लागन्ना भणि हकार्यो, तर तिनन यिसो भण्नाइ आजी जोरले कला हाल्ल पस्या, “दाउदका बंस, हाममि दया अर!” 32तब येशू ठम्म कलिया रे तिननलाइ बोलाइबर भण्यो, “तमन कि चहान्छउ, म तमरी निउति कि अरु?” 33तिननले उनलाइ भण्यो, “ओ प्रभु, हामरा आँखा खोल्दिय।” 34येशूले दया माणिबर तिनरा आँखा छोइदियो रे उतन्जेइ बठेइ तिनन धेक्द सक्द्या भया रे तिनन उनरा पछा लाग्या।

Currently Selected:

मत्ती 20: DTYNT

Highlight

Copy