यूहन्ना 17

यीशु गा खुद गा घल्जी प्रार्थना

1यीशु नी हेजा चेलाकू टे इनी बातो मंडी गा बादोन बदळा धोटे मंडीके, “हे बाटे, डी टेमो हेन कि अमा कोण गा महिमा डाए, एठा कोण भी अमा महिमा डाकी। 2आमनी इंज्के सेबाई कुरकू लिंजेन हाक जिले होय, ताकी जो कुरकू के आमनी इंज्के जिलेकु होय, डी सेबाई कुरकू के इंज हमेशा गा जीवन जे। 3हमेशा गा जीवन इनी होय, कि कुरकू आमके चिनाकोम मतलब बस म्याका सच्चो परमेश्वर के एठा यीशु मसीह के, एठा इंज्के डीचके आमनी कुल्केनेच होय। 4जो कामय आमनी इंज्के दडा गा जिले डा, डीके पुराटे इंज्नी पृथ्वी लिंजेन अमागा महिमा डाके होय। 5नका, हे बाटे अमा थंदळ गेन इंजा महिमा डाए, डीका महिमा जो दुनिया के आरुटे पेला अमा सेंग्गोन थंदळ टेका इंजा मेरान डा।”

यीशु गा हेजा चेलाकू गा घल्जी प्रार्थना

6“इंज्नी अमा जीमू डी कुरकू लिंजेन ओटके दिकुके आमनी दुनिया टे इंज्के जिलेकु। दिकु अमा डा एठा आमनी दिकुके इंज्के जिलेकु एठा दिकुनी अमा वचन गा पालन डाके होय।” 7नका दिकु चिनाये होय, कि जो चोचकाभी आमनी इंज्के जिले होय, सेबाई आम कोनेटे होय। 8चोयाकी जो खाबोर आमनी इंज टाएन आदिरले, इंज्नी डीके दिकुके इडीके एठा दिकुनी खाबोर लिंजेन विश्वास डाके। एठा सच्चाई चिनाए, कि इंज आम कोनेटे हेन मेना एठा इनी विश्वास डाके, कि आमका इंजा कुकूल मिठाच होय। 9इंज दिकु घल्जी बिनती दडावा मेना, दुनिया गा घल्जी बिनती बान दडा मेना, पेनो दिकुका घल्जी दिकुके आमनी इंज्के जिलेकु होय, चोयाकी दिकु अमागा होय। 10जो चोचकाभी इंजा होय, देटेन सेबाई अमा होय एठा जो चोचकाभी अमा होय, देटेन इंजा होय एठा दियागा द्वारा इंजा महिमा ओटके होय। 11नका इंज दुनिया गेन बान थंदळ, इंज अमा मेरान हेजे लक्के मेना। लेकिन इंजा चेलाकू आए भी दुनिया गेन होय। हे चोखरा बाटे अमा जीमू गा शक्ती दिकुगा रक्षा डाए। कि जैसा आले म्या मन गा होय, डेनेगोका दिकुभी म्या मन जुवा। 12जब इंज दिकु सेंग्गोन डा, मेटे इंज्नी अमा डी जीमू टे जो आमनी इंज्के जिले होय, दिकुगा रक्षा डाके एठा देटेन कोरो डीचनी नाशोऊ डाऊ गा कोरा के कलमजे होय, डीचके आराटे दिकु तलाटे जेकाभी नाशोडुका ताकी पवित्र ग्रंथ गेन जो ओल्के होय देटेन पुरायु, 13पेनो नका इंज अमा मेरान हेजेवा मेना, दुनिया गेन थंदळ टे इनी बातो मंडीवाकी दिकु इंजा खुशीके भरपूर टे घटायु। 14इंज्नी अमा खाबोर दिकुके इडीके होय एठा दुनिया गा कुरकू नी दियाटे दुश्मानी डाके, चोयाकी जैसा इंजा दुनिया टे रिश्ता बाऊ डा, डेनोगोका दिकुभी दुनिया टे रिश्ता बान दोडो होय। 15इंज येटेन बिनती बान दडा कि आम दिकुके दुनिया टे ठुलजाकु पेनो येटेन कि आमनी डी शैतान टे दिकुगा रक्षा डाए। 16जैसा इंज इनी दुनिया टे रिश्ता बान दोडो डेनोगोका दिकुभी दुनिया टे रिश्ता बान दोडो। 17अमा वचन सत्य होय इनिघल्जी दिकुके सत्य गा द्वारा चोखरा आरुयु होना। 18जैसा आमनी दुनिया गेन इंज्के कुलकेमी, डेनोगोका इंज्नी भी नी दिकुके दुनिया गेन कुलकेकु। 19दिकु फायदा घल्जी इंज्नी खुद जेबा। ताकी दिकुभी सत्य गा द्वारा अलग्गो डाटे चोखरा आरुयु होना।

यीशु गा हेजा सेबाई विश्वासीकु गा घल्जी प्रार्थना

20“इंज बस इंजा चेलाकू घल्जी बिनती बान दडा, पेनो सेबाईकु घल्जी भी जो कुरकू दिकुगा खाबोर आजोम गा द्वारा इंजा लिंजेन विश्वास डाएवा। 21ताकी दिकु सेबाईकु म्याजू। जैसा आम हे बाटे इंजेन मेना, डेनेगोका दिकुभी आलेनजू मेना एठा इंज आमेनके मेना, डेनेगोका दिकुभी आलेन म्याजू। इनिघल्जी कि इनी दुनिया कुरकू विश्वास डाए, कि आमका नी इंज्के कुल्लेमी। 22एठा देटेन महिमा जो आमनी इंज्के जिले, इंज्नी दिकुके जीके होय, ताकी दिकु म्यायु होना, जैसा आले म्याये होय। 23इंज दिकु तलाटे एठा आम इंजेन कि दिकु सहीटेका म्या मन जे होय, एठा दुनिया चिनाए कि आमका नी इंज्के कुलकेमी, एठा जैसा आमनी इंजाटे प्यार डोके, डेनेगोका दिकुटे प्यार डोए। 24हे बाटे, इंज चाहतावा कि दिकुके आमनी इंज्के जिले होय, येटेन इंज मेना, देटेन दिकुभी इंजा सेंग्गोन जू कि दिकु इंजा डी महिमा के डोगेवा, जो आमनी इंज्के जिले होय, चोयाकी आमनी दुनिया के आरुटे पेला इंजाटे प्यार डोके। 25हे धार्मी बाटे परमेश्वर, दुनिया गा कुरकू नी इंज्के बान चिनाडुका, पेनो इंज्नी आमके चिनायेमी एठा इनी चेलाकूभी नी आमके चिनायेमी कि आमका नी इंज्के कुलकेमी होय। 26इंज्नी आमके दिकु लिंजेन ओटकेमी एठा ओठ्कोम्बा कि जो प्यार आमेन इंजाटे डा, देटेन प्यार दिकुन भी थंदळजू एठा इंजभी दिकुन आरुका थंदळवा।”

Currently Selected:

यूहन्ना 17: GOKNT

Highlight

Copy