यूहन्ना 4

यीशु एठा सामरी जापाए

1डाबोलटे जब यीशु गेन मालूमजेकी अदा फरीसि कुरकू दियागा हेजा बारेन आजुम्के होय, कि देटेन यूहन्ना बपतिस्मा जिऊमिठाच टे जदा चेलाकू आरुवा एठा दिकुके बपतिस्मा जिऊवा होय। 2पेनो यीशु हेज बाने बनकी दियागा चेलाकू बपतिस्मा जिऊ डा। 3मेटे डीच देटेन यहूदिया जिल्हा के आराटे हेजा गा चेलाकू सेंग्गोन डाबोलटे गलील जिल्हा गेन ओले, 4दियागा सामरीया जिल्हा टे लिंजटे #4:4 परमेश्वर इच्छा रोंगो सेने जरुरी डा। 5एठा देटेन सामरीया जिल्हा गेन टाकु सुखार पूरा गेन हेन, जो डी ओटे गा मेरान होय डीके याकूब नी हेजा कोणटे यूसुफ के जीके डा। 6याकूब नी जो कुई लाके डा, देटेन आए भी देटेनका डा। इनी डया गा टेमो डा। यीशु कोरा टे सेंद्रा वोजीटे लोकोमके डो डी कुईन येनेगोका सुबानजे। 7येटो गेन सामरीया जिल्हा टे म्या जापाए डा भेबट्टी हेन। यीशु नी दियाटे मंडीके, “इंज्के डा आनोए।” 8एठा दियागा चेलाकू मेटे पुरान आटा मोलाटे सा ओले डा। 9सामरी जापाएनी दियाटे मंडीके, “आम यहूदी कोरो होय, एठा इंज सामरी जापाए मेना। आम इंजाटे डा चोया आसिवा?”#4:9 आम इंजाटे डा चोया आसिवा? चोयाकी यहूदी कुरकू सामरी कुरकू गा सेंग्गोन तुनिकाभी रेंगो रिश्ता बान दडा। 10यीशु नी जवाब जीके, “आम बान हाडाई कि परमेश्वर आमके चोच जिऊ चाहतावा होय, आमेन बान मालूम डा, जे अमाटे डा आसी लक्के होय। अगर आमेन मालूम धारे, मेटे आम इंजाटे डा आसी डा एठा इंज आमके डी डा जेबा जो जीवन जिऊवा होय।” 11डीचनी यीशु टे मंडीके, “हे गुरु, अमागा मेरान डा भेबट्टी घल्जी चोचका बाऊ होय एठा कुई भेबाव खोल होय, मेटे डबोलोटे देटेन जीवन गा डा अमा मेरान तुंगाटे हेन? 12चोच आम आलेगा जुना सनाकु याकूब टे खाट होय, डीचनी आलेके इनी कुई जिले एठा हेज्का हेजा गा कोणकु एठा जानवरकु गेल्ला येनेटे डा नुवे?” 13यीशु नी डीचके जवाब जीके, “जो जेकाभी येटेन डा नोएवा देटेन डाबोलटे डा तटामबा, 14पेनो जो जेकाभी डी डा टे नोएवा, जो इंज डीचके जेबा, देटेन डाबोलटे बान स्यागु टाएन डा तटाम बाने। बनकी जो डा इंज डीचके जेबा देटेन डेन म्या पाजेर आरुवा, जो दिकुके जीवन जिऊ मिनी डा जेबा एठा डीचके हमेशा गा जीवन घाटाऊवा।” 15जापाएनी दियाटे मंडीके, “हे प्रभु, देटेन डा इंज्के सेगे ताकी इंजा डा तटाम बाकी थंदळजू एठा न डा भेबट्टी येटो लेंक्कीन हेयु।” 16यीशु नी दियाटे मंडीके, “सेने अमागा साना के येटेन हाकोलेच।” 17जापाएनी जवाब जीके, “इंज साना बान मेना।” यीशु नी दियाटे मंडीके, “आम बराबोरका मंडीवा होय, अमा साना बान मेना। 18पेनो सच्चो नी इनी होय मोनाई सानाकु पेलाटेका अमा सेंग्गोन थंदळके होय। एठा नका भी जो अमा सेंग्गोन थंदळ लक्के होय, अमा साना बाऊ होय। इनी आमनी सच्चो मंडीके होय।” 19जापाएनी दियाटे मंडीके, “हे प्रभु, इंजेन लगातिंजुवा कि आम परमेश्वर गा कोनेटे मंडीमिठाच कोरो होय। 20आलेगा सामरी जुना सनाकु इनिका टुक्कीन परमेश्वर गा आराधना दडा डा एठा आपे यहूदी कुरकू मंडीवाकी देटेन जगा देटेन आराधना दडा होना यरूशलेम शहर गेन होय।” 21यीशु नी दियाटे मंडीके, “हे तराई, इंजागा बातो गा विश्वास डाए कि देटेन टेमो हेजेवा होय कि आपे न इनी टुक्की लिंजेन बाटे परमेश्वर गा आराधना दडावा एठा न यरूशलेम शहर गेन। 22आपे सामरी कुरकू डीचके बान हाडाई दियागा आराधना दडावा मेना, आले यहूदी कुरकू डीचके हाडाई होय दियागा आराधना दडावा होय। चोयाकी उध्दार यहूदी कुरकू तलाटे होय। 23पेनो देटेन टेमो हेजेवा होय, यानेकी आए भी होय, डेन सच्चो भक्त बाटे परमेश्वर गा आराधना आत्मा एठा सच्चाई गेन डाएवा, चोयाकी बाटे परमेश्वर हेजा घल्जी येनोगोका भक्तकुके घागटावा होय। 24परमेश्वर आत्मा होय इनिघल्जी जरुरी होय कि दियागा आराधना दडामिठाच गा आत्मा एठा सच्चाई गेन आराधना डाएवा।” 25जापाएनी दियाटे मंडीके, “इंज हाडाई मना कि मसीह जो ख्रिस्त मेन्बा होय देटेन हेजेवा होय। जब डीच हेजेवा मेटे आलेके सेबाई बातो घालेवा।” 26यीशु नी दियाटे मंडीके, “इंज जो अमाटे बातो लक्के मेना, डीचका मेना।”

चेलाकू गा हिरा

27येटो गेन यीशु गा चेलाकू हेन एठा अचम्बो दडा लज्जे कि देटेन जापाएटे बातो लक्के होय। फिरभी जेकाभी बान कोम्बराडुका, “आम चोच चाहतावा होय?” या “जेगा घल्जी दियाटे बातो लक्के होय?” 28मेटे जापाएनी हेजा गुंडो आराटे पुरान ओले एठा कुरकू मंडी लज्जे, 29“हेजे, म्या कोरो के डोगेच डीचनी सेबाईका जो इंज डाके होय इंज्के घाल्ले। चोच इनिज्का मसीह बाऊ होय?” 30मेटे पुराटे घोनेच कुरकू ओटजे डो यीशु के दोडो गा घल्जी दियागा मेरान हेजे लज्जे। 31येटो गेन दियागा चेलाकू यीशु टे विनंती दडा लज्जे, “हे गुरु, चोचका जोमे।” 32पेनो डीचनी दिकुटे मंडीके, “इंजागा मेरान जोम गा घल्जी येनोगो आटा होय डीके आपे बान हाडाई।” 33मेटे चेलाकूनी इकुका मंडीके, “चोच जेका एठा दिया घल्जी चोचका जोम गा साले?” 34यीशु नी दिकुटे मंडीके, “इंजा आटा डी परमेश्वर गा इच्छा गा पालन दडा होय डीचनी इंज्के कुल्लेमी होय एठा डी कामय के पुपरा होना होय जो डीचनी इंज्के सोपातिंज्के होय। 35चोच आपे बान मंडी, ‘हिर टेमो हेजेन आए भी उफुन महिना बाकी होय?’ इंज आपेटे मंडीवा मेना कि आपेगा मेट टीगळे हेजेमिंकू कुरकू के डोकु। दिकु म्या खिटी रोंगो होय जो हिर घल्जी तैयारके होय। 36हिरमिठाच मुंजरी घाटाऊ लक्के होय। एठा हमेशा गा जीवन गा घल्जी फल गोगला लक्के होय, ताकी बिबीट मिठाच एठा हिरमिठाच बार्खिंज बेल्लाटे खुशी मनातिंजे। 37चोयाकी इनी बातो लिंजेन इनी कहावत पक्का सुबानबा होय, ‘बिबीट मिठाच एठा जेका होय एठा हिरमिठाच एठा जेका होय।’ 38इंज्नी आपेके देटेन खिटी हिर घल्जी कुल्केमी डेन आपेनी कामय बान दडुका, दूसराकु नी कामय डाके एठा आपे दिकुगा कामय गा फल गेन बेल्लाएन।”

सामरीकु गा विश्वास दोडो

39डी पूरा गा घोनेचका सामरी कुरकू नी डी जापाए गा मंडीटे यीशु लिंजेन विश्वास डोके। जापाएनी इनी मंडीके डा कि डीचनी सेबाईका जो इंज्नी डाके होय इंज्के घाल्ले होय। 40जब इनी सामरी कुरकू दिया मेरान हेन। मेटे विनंती दडा लज्जे कि आलेगा इंगान थंदळे। इनिघल्जी देटेन बरी दिन टाएन थंदळके होय। 41दियागा वचन गा वोजीटे येठाभी घोनेचकुनी यीशु लिंजेन विश्वास डाके। 42एठा कुरकू नी डी जापाएटे मंडीके, “नका आले अमागा मंडीटेका विश्वास बान दडा, चोयाकी आलेनी खुद का आजुम्जे एठा मलूम होय कि इनिज्का सच्चोनका दुनिया गा कुरकू गा उध्दार दडामिठाच, मसीह होय।”

(मत्ती 8:5-13; लूका 7:1-10)

43डाबोलटे डी बरी दिन बादोन डीच देटे ओटजे डो गलील जिल्हान ओले। 44चोयाकी यीशु नी हेज्का गवाही जीके कि परमेश्वर गा कोनेटे मंडीमिठाच आबुगा देशोन आदर बान घटाऊ। 45जब देटेन गलील जिल्हान हेन मेटे गलील जिल्हान थंदळ मिंकू कुरकू खुशी सेंग्गोन दियाटे मिलातिंजे। चोयाकी जोभी कामय डीचनी नी यरूशलेम शहर गेन तिवार गा टेमो डाके डा, दिकुनी दिकु सेबाईकु के डोकेकु डा, चोयाकी दिकुभी तिवार गेन डा।

राजकर्मचारी गा कोण के सजाकेनेच

46मेटे यीशु डाबोलटे गलील जिल्हा गा काना पुरान हेन, देटेन डीचनी डाके अंगूर रेस्सो आरुके डा। देटेन राजा गा म्या कर्मचारी डा दियागा कोणटे कफरनहूम पुरान बिमार के डा। 47देटेन इनी आजुमटे कि यीशु यहूदिया जिल्हा टे गलील जिल्हा गेन हेन होय, यीशु गा मेरान ओले एठा दियाटे विनंती दडा लज्जे बो डो इंजागा कोण के साजाकेच चोयाकी देटेन गुजून के होय। 48यीशु नी दियाटे मंडीके, “जब टाएन आपे चिन्हा एठा अचम्बो कामय बान दोडो मेटे टाएन इंजा लिंजेन विश्वास बान दोडो कि इंज मसीह मेना।” 49राजा गा कर्मचारी नी दियाटे मंडीके, “हे प्रभु, इंजा कोण गुजूटे सुटू बो।” 50यीशु नी दियाटे मंडीके, “सेने अमागा कोण जीटाका होय।” डी कोरोनी यीशु नी मंडी मिनी बातो विश्वास डाके एठा ओले। 51देटेन कोरा टे चेल्केका डा, कि दियागा भाग्य हेंडो मिलातिंजे एठा मंडी लज्जे, “अमा कोण जीटाका।” 52डीचनी दिकुटे कोम्बाराके, “इनी टेमो देटेन सजाऊ लज्जे?” दिकुनी डीचके मंडीके, “कोल्ली डया म्या बाजान दियागा राँवा आगोरोएन।” 53मेटे बाटे चिनाये कि येटेन डीका टेमोन डायेन जो टेमोन यीशु नी डीचके मंडीके, “अमागा कोण जीटाका होय।” एठा डीचनी एठा दियागा पूरा सगाकुनी यीशु लिंजेन विश्वास डाके। 54येटेन दूसरा अचम्बो कामय गा चिन्हा डा, जो यीशु नी यहूदिया जिल्हा टे गलील जिल्हा गेन हिरा टेमोन टिपीके।

Currently Selected:

यूहन्ना 4: GOKNT

Highlight

Copy