Kyananaka 12
12
Ingyo ngia yɨ Yakɔbɔ nʉ fanɨa ngia yɨ Pɛtɛlɔ akʉ boloko
1Ati ngiinanɨ ngama Ɛlɔdɛ a꞉faniso kyananaka ɓombi ɓʉ kanisa ngana ngana. 2Ambutitio ɓɔ ɓʉwa Yakɔbɔ, manye ʉ Yʉanɨ, nʉ ɨɗɔkɔ. 3Iya a꞉na ɓɔ moni ngikʉnanɨ kʉkataa Ɓayuda, ambutitio ɓɔ ɓʉfa Pɛtɛlɔ kʉ fanɨ, akʉ ɓisi ɓʉ ʉmbɔ wʉ mɨkatɨ ngia yambikinye kyɨa nʉ ɓʉtɨ ɓɔɔ ɓufukise. 4Kija Ɛlɔdɛ a꞉ɓutitio ɓɔ ɓʉfa Pɛtɛlɔ, ɓambumugiso akʉ boloko. Ambunzo ɓasʉda ngiɓa ɓi꞉nye limbi ɓʉgɨna ʉpanʉ ɓɔ ɓuɓio mesu ekoo angɔ ɓʉ gbɛ. Imbi yɨ ɓasʉda ngiinanɨ mɨngana yi꞉nye kyɨa nʉ ɓasuda ɓʉgɨna. I꞉nye ʉkwaisieni ɓɔ a꞊tɨna 'ʉkɔmbɔ nguangɔ apɛɛ ʉ ɓombi, mbise ʉ ʉmbɔ wʉ Pasɨka. 5Na akʉ boloko, ɓi꞉nye mesu tii tʉkʉ ekoo Pɛtɛlɔ ɓʉ gbɛ. Ɨkyɛmɨngana, ɓombi ɓʉ kanisa ɓi꞉nye tii tʉkʉ nayɔ kʉtɨa Asʉɓɨɨ chʉkɔmʉ nʉ ndokono.
Malaika wiso Pɛtɛlɔ akʉ boloko
6Nuɓutu, pɛɛ ʉ ɓisi ngiɓa Ɛlɔdɛ i꞉nye‑ɔɔ kʉkʉnda tɨna 'ʉkɔmbɔ nguangɔ apɛɛ ʉ ɓombi. Pɛtɛlɔ a꞉kwaa ati ʉ ɓasʉda 'ʉsangɛ nʉ ɓaselegeni ɓapɨnɨ, nʉ ɓapɨmakɨa ɓi꞉nye tʉkʉ kʉpɨmakɨa umongu wʉ ɨkáa yɨ boloko. 7Tʉkʉ nɨma ngiinanɨ, malaika wʉ Makʉʉɓɨɨ mungono wambʉɓwanɨa, wanga mungono ɓɔ wambʉjɨa amati ʉ mbɛnɨ ngiinanɨ kʉ uɓomu. Malaika wambumuɓoto akʉ ngaja, wambʉmʉjʉkaniso, wambumusigio ɓɔ: « Ʉngwa ɨkʉʉ gagaa! » Kija ɓaselegeni ɓa꞉ɓununikio akʉ lɨkɔndɔ ngila lʉ Pɛtɛlɔ.
8Kija malaika wa꞉musigio ɓata ɓɔ: « Sanga 'ʉkaɓa nguʉsɔɔ, wambʉpɨnya lɨkpakʉ. » Iya Pɛtɛlɔ a꞉kyɨa ɓwanɨ, malaika wambumusigio ɓata ɓɔ: « Pɨnya tiga kɔtɨ ngiasɔɔ, wambʉnakpata. » 9Pɛtɛlɔ ambʉɓʉa amati ʉ ɨkáa yɨ boloko ɛyɔ tii tʉkʉ ambise ʉ malaika. Moni ngika malaika wa꞉kyɨa, ki꞉nye nayɔ kʉnyɨa ndʉ ʉtakanaka, chʉkɔmʉ ndʉ moni kingono. 10Ɓambʉɓaa imbi yɨ ɓasʉda ngia yɨ pɛɛ nʉ iya yɨ ɓepini, ɓambʉɓʉya akʉ umongu wʉ uko ngua wi꞉nye kʉkangana mesu nʉ gʉlʉ. Tiga nanɨ apɛɛ ʉndaɓʉ, umongu nguʉnanɨ wambʉganɨa kʉ ɛwɔ, ɓambʉɓʉa. Ɓambufaniso ijo ʉngyɛndʉ. Tʉkʉ nɨma ngiinanɨ malaika wambʉsɨa Pɛtɛlɔ.
11Iya Pɛtɛlɔ a꞉mbɨa tiga ɓɔ moni ngikʉnanɨ ka kingono, kija a꞉sigo ɓɔ: « Ɨtakɨ‑takɨ ngiakɛ mʉmbɨa kingono ɓɔ Makʉʉɓɨɨ ʉ꞉natʉmɨa malaika nguangɔ nɛmɛ kʉɓwanakiso akʉ lɨkɔndɔ lʉ Ɛlɔdɛ, nʉ akʉ ɓʉɓɨɓɨ kʉ ɓuɓomu ngiɓa Ɓayuda ɓa꞉kwaisio pongo ɓa꞊kyɨa ekoo asɛmɛ. »
12Ati ngia a꞉mbɨa‑ɔɔ moni ngikʉnanɨ muɗo, ambʉsa akʉ ɨkáa ngia yɨ Malɨa inye ʉ Yʉanɨ ngia ɓi꞉nye musoko ɓɔ Malɨkɔ. Ɓombi ɓaja ɓi꞉nye ɓʉmʉmanɨɛ na ambɛnɨ kʉta Asʉɓɨɨ. 13Iya Pɛtɛlɔ a꞉ɓɛnda umongu ngua wʉ pɛɛ, mwana ɔɔ moi mombi ʉ kuu ɔngɔ ino ɓɔ Lɔda ambʉka anʉ umongu. 14Ati ngia a꞉kɔ‑ɔɔ iyo yɨ Pɛtɛlɔ, a꞉kwa ɨgyagya nadɨndɨ chʉkɔmʉ ambʉgana umongu, ɨkyɛmɨngana ambʉsa bangʉ tii tʉkʉ ambɛnɨ kʉɓɨa ɓɔ Pɛtɛlɔ a aɓei.
15Ɓambumusigio ɓɔ: « Wʉkwa ɓaumu! » Ɨkyɛmɨngana, ambʉɓakana tʉkʉ ɓʉ ndi kusigo ɓɔ ya tʉkʉ kingono. Kija ɓa꞉musigio ɓɔ: « Ya malaika nguangɔ. » 16Pɛtɛlɔ i꞉nye tʉkʉ kʉɓɛnda umongu. Iya ɓa꞉gana umongu, ɓambʉmʉna, yambʉɓʉmbangɨa nadɨndɨ. 17Kija a꞉ɓʉgbʉma nʉ ɨkɔndɔ ɓɔ ɓʉkata, ambʉɓʉngakɨa aka Asʉɓɨɨ a꞉mʉɓwanakiso‑ɔɔ akʉ ɨkáa yɨ boloko. Kija a꞉ɓusigio ɓɔ: « Ɓɨeni Yakɔbɔ nʉ ɓayoo ngiɓɔmɔ moni ngikakɛ tʉkʉ ɓɨaa. » Mbise ngiinanɨ ambʉɓʉa, ambʉsa yangɔ akʉ a꞉sa‑ɛɛ.
18Iya ɓisi ɓa꞉ya nayɔ, ɓasʉda ɓambumbambania nadɨndɨ. Ɓambufaniso ɓokono ɓɔ ɨmanɨ yɨkyɨa Pɛtɛlɔ. 19Ɛlɔdɛ ambunzo ʉpanʉ ɓɔ ɓʉmʉhata mʉa kʉ uɓomu, ɨkyɛmɨngana chʉkɔmʉ ɓambʉmʉna. Ɓambuɓokoko ɓombi ngiɓa ɓi꞉nye kʉpɨmakɨa ɨkáa yɨ boloko, ambunzo ʉpanʉ ɓɔ ɓʉɓʉwa waa. Mbise ngiinanɨ, Ɛlɔdɛ ambʉʉngwa anʉ Yudɛa ambʉsa anʉ Kaisalia akʉ makwaa ɗɛkɛkɛ.
Ingyo ngia yɨ Ɛlɔdɛ
20Tiga nanɨ Ɛlɔdɛ ambupunio ɓombi ɓʉ Tilo nʉ Sidɔna ɓʉkaɨ nadɨndɨ. Kija ɓombi ngiɓʉnanɨ ɓa꞉kɔnɔ ɓɔ ɓʉsa apɛɛ angɔ. Ɓambʉkɔnɔ‑zʉ pɛɛ tʉkʉ nʉ ɔɔ Balasɨtɔ ngia i꞉nye mombi ɔɔ mayɛ ɨmbaa ngia yɨ ngama. Kija ɓa꞉sa tiga ɔɔ Ɛlɔdɛ ɓambʉta ɓɔ majɨɔ kʉtʉa ati ʉndaɓʉ, jʉ idyo ngiindaɓʉ yi꞉nye ʉngwa akʉ ɨkʉmbʉ ngia yɨ ngama. 21Tiga ɓisi ngiɓa ɓa꞉napɨa‑ɔɔ mɨsɨ, Ɛlɔdɛ ambʉpɨnya lɨpʉkʉ ngilangɔ lʉ ɓʉngama, ambuwulo akʉ kiti ʉ ɓʉngama ngiangɔ, ambuzunio ubua apɛɛ ʉ ɓombi. 22Ɓombi ɓambʉtʉɓɨa ɓɔ: « Iyo ngakɛ ya tʉkʉ yɨ mʉngʉ, chʉkɔmʉ iyo yɨ mombi ʉ ɨtaka! » 23Tʉkʉ nɨma ngiinanɨ, malaika wʉ Makʉʉɓɨɨ wambutio Ɛlɔdɛ mʉgwɛ wʉ kweso, jʉ ɛyɔ a꞉baya kʉchɨka ɨbɨba ngia ya꞉kwanana nʉ Asʉɓɨɨ. Mɨsɔngɔɔ yambʉmʉdya, ambuwo.
24Abana ɓwanɨ kititi, ʉpanʉ wʉ Asʉɓɨɨ wi꞉nye tʉkʉ kʉnadaa mʉa kʉ uɓomu nʉ sɨnganaka nʉpɛɛ. 25Iya ɔɔ Balanaba nʉ Saulo ɓa꞉pipo kuu ngiindaɓʉ anʉ Yelusalɛma, ɓambʉtʉa, ɓambʉchɨka Yʉanɨ ngia ɓi꞉nye musoko ɓɔ Malɨkɔ ɨzɔ naɓɔ.
Currently Selected:
Kyananaka 12: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
