Kyananaka 3
3
Pɛtɛlɔ uhiiso jakɛsɨ
1Ɓisi mʉngana mbise ʉ 'usoti, ɔɔ Pɛtɛlɔ nʉ Yʉanɨ ɓi꞉nye kʉsa akʉ ɨkáa yɨ Asʉɓɨɨ akʉ nɨta ngia yɨ saa wʉ nʉɓɔkwɔngɔ. 2Anambamba ʉ umongu wʉ ɨkáa yɨ Asʉɓɨɨ ngua ɓi꞉nye usoko ɓɔ « Umongu wɔɔ Uɗo », mombi mʉngana jakɛsɨ ɔngɔ kʉʉngwa tʉkʉ nʉtanɨa yangɔ i꞉nye ananɨ. Makwaa kʉ muɓomu, ɓi꞉nye mufuɓuo ɓambumuwuliso nanɨ kʉchochonoko falanga nʉ ɓombi ngiɓa ɓi꞉nye kumunio amati ʉ aga wʉ ɨkáa yɨ Asʉɓɨɨ. 3Iya a꞉na ɔɔ Pɛtɛlɔ nʉ Yʉanɨ ɓinyeni tiga tinene kukumunio amati ʉ ɨkáa yɨ Asʉɓɨɨ, ambʉɓʉta falanga. 4Ɔɔ Pɛtɛlɔ nʉ Yʉanɨ ɓambʉmʉkanga ɓʉ gbɔɔ, Pɛtɛlɔ ambumusigio ɓɔ: « Kanga mesu ya kʉ ka‑ɛɛ! » 5Jakɛsɨ ngiinanɨ ambʉɓʉkanga ɓʉ gbɔɔ, jʉ i꞉nye kusiɓo ɓɔ ʉnyɨa gɔ nʉ ɨkyɛmɛ akʉ lɨkɔndɔ lʉndaɓʉ. 6Kija Pɛtɛlɔ a꞉musigio ɓɔ: « Mambʉkɔmʉ nʉ falanga gʉkʉ ɔlɔ, ɨkyɛmɨngana manɔwɛ kunzo ɨkyɛmɛ ngia manayɔ. Akʉ ino yɨ Yeso Klisito ngia ʉ Najalɛtɛ ʉngwa ɨkʉʉ wambʉkɨndaka. » 7Pɛtɛlɔ ambʉmʉfa ɨkɔndɔ yɨ guɔngɔ, ambumumaiso. Tʉkʉ nɨma ngiinanɨ mɨtɨndɨ nʉ liseki ngila lʉ jakɛsɨ ngiinanɨ lambʉʉtandaka. 8Ambʉndalio ɓʉ kpita, ambʉmaa nʉ mɨtɨndɨ ngiangɔ ɓʉ gba, ambufaniso kɨndaka. Ambukumunio ɨzɔ naɓɔ amati ʉ ɨkáa yɨ Asʉɓɨɨ ɛyɔ tii tʉkʉ kʉkɨndaka, nʉ bomboko, nʉ bibiso Asʉɓɨɨ. 9Ungbutu wʉ ɓombi kʉ ɓuɓomu ɓambʉmʉna kʉkɨndaka nʉ bibiso Asʉɓɨɨ. 10Ɓi꞉nye kʉmbɨa iɗo ɓɔ jakɛsɨ ngiinanɨ iiya i꞉nye kyɨa ɓuwei kuchochonoko anambamba ʉ Umongu wɔɔ Uɗo ngua wʉ ɨkáa yɨ Asʉɓɨɨ. Kʉ ɓwanɨ, moni ngikʉnanɨ ka꞉kyananakɨa, ka꞉kyaka ɓombi kambʉɓʉmbangɨa nadɨndɨ.
Pɛtɛlɔ unzo ɓombi ʉpanʉ wʉ Asʉɓɨɨ
11Moni ngikʉnanɨ ki꞉nye‑zʉ tʉkʉ kʉmbangɨa ɓombi kʉ ɓuɓomu. Mombi ngiinanɨ a꞉hɨa, ambikinye tii ɓata kʉʉngwa anambamba ʉ ɔɔ Pɛtɛlɔ nʉ Yʉanɨ, ɓombi ɓambʉka bangʉ kʉmʉmanakɨa anambamba ʉ ʉndaɓʉ akʉ izi ngia ɓi꞉nye isoko ɓɔ: « Basa ʉ Sɔlɔmɔnɔ ». 12Iya Pɛtɛlɔ a꞉na ɓwanɨ, ambusigio ungbutu wʉ ɓombi ɓɔ: « Inu Ɓaɨsalaɛlɛ, jʉtanɨ moni ngika kaninu kʉmbangɨa ɓwanɨ? Nanisu kʉkanga tiga ndʉ gʉ ɓɔ kʉ isu kʉkɨndakiso mombi ngia nʉ angu ʉndɛsʉ, yɛmɔ jʉ ɓɔ kanʉ kɛkɛɛ akʉ kuu yɨ Asʉɓɨɨ. 13Asʉɓɨɨ ngia wʉ Abalama, Ɨsaka nʉ Yakɔbɔ, Asʉɓɨɨ ngia wʉ ɓakuku ngiɓʉndɛsʉ a꞉pananiso ɨbɨba ngia yɨ bayo angɔ Yeso. Inu kʉ na꞉mʉgaba, nambʉmʉtata apɛɛ ʉ Pilato. Ʉna tɔ, ɛyɔ i꞉nye kʉkʉnda nayɔ tʉkʉ kuɓono. 14Inu na꞉tata mombi ngia i꞉nye Tu nʉ Ngbingbii, kija ya꞉nɨkataa kusigio Pilato ɓɔ uniɓunio tʉkʉ mombi ngia a꞉maa ɓombi. 15Kʉ ɓwanɨ, inu na꞉wisiso Makʉʉɓɨɨ, ɨkyɛmɨngana Asʉɓɨɨ ambʉmʉjʉkaniso akʉ ingyo, nʉ isu ka ɓatɛmʉ ɓʉ moni kɔngɔ. 16Mombi ngia nanayɔ kʉna nʉ mbɨa akɛ, a꞉'ʉtandaka bɛ tʉkʉ akʉ ino yɨ Yeso iya isu ka꞉mʉbaya. Mombi ngia a apɛɛ ʉndɛnʉ kʉ ɓuɓomu akɛ, a꞉nyɨa bɛ nʉ angu nʉ ndʉtʉ tʉkʉ aka ekoo baya ngiangɔ akʉ ino yɨ Yeso.
17Inu ɓayoo, ɨtakɨ‑takɨ ngia makʉmbɨa iɗo ɓɔ inu nʉ ɓangama ngiɓʉndɛnʉ na꞉kyɨa Yeso moni ngikʉnanɨ tʉkʉ akʉ ɓujangi‑jangi. 18Kʉ ɓwanɨ, Asʉɓɨɨ a꞉kyɨa moni ngika a꞉ɓɨakɨa jɛnɛ kʉpɛɛ 'upi akʉ moni kʉ lɨgbɛ kʉ liɓomu ɓɔ Masɨa ʉkwanana kʉdya ikoko. 19Nicheni mɨtʉma ngiindɛnʉ nambʉtʉɨya Asʉɓɨɨ, ambʉ ʉnɨpɨa ɓʉɓɨɓɨ ngiɓʉndɛnʉ pɨaa. 20Kija Makʉʉɓɨɨ a꞊ninzo sina wati wɔɔ dʉdʉɛ, nʉ a꞊nɨtʉmɨa Masɨa ngia ʉnʉ ɓɔ Yeso, iya a꞉mʉchwa jɛnɛ akʉ moni kʉndɛnʉ kʉpɛɛ.
21Ɨtakɨ‑takɨ ngiakɛ, ɛyɔ ʉkwanana kuɓio ekoo ʉ ɓisi kʉɓʉya aka Asʉɓɨɨ a꞊maiso‑ɔɔ moni kʉ muɓomu. Kʉʉngwa kʉ jɛnɛ, Asʉɓɨɨ a꞉ɓɨakɨa moni ngikʉnanɨ akʉ moni kʉ lɨgbɛ ngilangɔ lɔɔ tu a꞉lɨtʉma. 22Kʉ ɓwanɨ, Mʉsa a꞉sigo ɓɔ: ‹ Asʉɓɨɨ Makʉʉɓɨɨ ngiʉndɛnʉ a꞊nɨtʉmɨa ɓisi ongo ɨgbɛ kʉndʉ ɛmɛ iya aɓio kʉ amati ʉ ɨkáa yɨ anza ngiindɛnʉ. Inu nʉkwanana kʉkɔ moni kʉ muɓomu ngika a꞉nisigio. 23Nʉ mombi kʉ uɓomu ngia ambʉkʉkɔ ɨgbɛ ngiinanɨ, ɓa꞊miso amati ʉ ɨkáa yɨ anza ngia yɨ Asʉɓɨɨ tʉkʉ isoo, ɓambʉmʉwa. ›
24Lɨgbɛ kʉ liɓomu ngila la꞉yaka jɛnɛ kʉʉngwa akʉ ɨgbɛ Samwɛlɛ, nʉ ila la꞉ka mbise angɔ, kʉ nangana nangana ɓa꞉ɓɨakɨa moni ngika kakʉkyananakɨa akʉ makwaa ngikakɛ. 25Moni ngika Asʉɓɨɨ a꞉nɨpanaka jɛnɛ 'upi akʉ lɨgbɛ ka aka ekoo ʉndɛnʉ. Nʉ agɔmɔ ngia Asʉɓɨɨ a꞉napɨa ati angɔ nʉ ɓatʉngwanɨ ɓʉndɛnʉ a kʉ ekoo ʉndɛnʉ ati ngia a꞉sigio‑ɔɔ Abalama ɓɔ: ‹ Ma꞊mbuiso mababa kʉ ɓombi kʉ muɓomu ngika kʉ ɨtaka 'upi akʉ ɓanɔnɔ ɓʉsɔɔ. › 26Asʉɓɨɨ a꞉iso‑zʉ bayo angɔ tʉkʉ ekoo ʉndɛnʉ. A꞉mʉtʉma aka ekoo ngia ɓɔ unimbuiso, ambunicho ɨkyananakɨa yɛɛ ɓɨɓɨ ngia yɨ mombi kʉ nangana nangana ati ʉndɛnʉ. »
Currently Selected:
Kyananaka 3: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
Kyananaka 3
3
Pɛtɛlɔ uhiiso jakɛsɨ
1Ɓisi mʉngana mbise ʉ 'usoti, ɔɔ Pɛtɛlɔ nʉ Yʉanɨ ɓi꞉nye kʉsa akʉ ɨkáa yɨ Asʉɓɨɨ akʉ nɨta ngia yɨ saa wʉ nʉɓɔkwɔngɔ. 2Anambamba ʉ umongu wʉ ɨkáa yɨ Asʉɓɨɨ ngua ɓi꞉nye usoko ɓɔ « Umongu wɔɔ Uɗo », mombi mʉngana jakɛsɨ ɔngɔ kʉʉngwa tʉkʉ nʉtanɨa yangɔ i꞉nye ananɨ. Makwaa kʉ muɓomu, ɓi꞉nye mufuɓuo ɓambumuwuliso nanɨ kʉchochonoko falanga nʉ ɓombi ngiɓa ɓi꞉nye kumunio amati ʉ aga wʉ ɨkáa yɨ Asʉɓɨɨ. 3Iya a꞉na ɔɔ Pɛtɛlɔ nʉ Yʉanɨ ɓinyeni tiga tinene kukumunio amati ʉ ɨkáa yɨ Asʉɓɨɨ, ambʉɓʉta falanga. 4Ɔɔ Pɛtɛlɔ nʉ Yʉanɨ ɓambʉmʉkanga ɓʉ gbɔɔ, Pɛtɛlɔ ambumusigio ɓɔ: « Kanga mesu ya kʉ ka‑ɛɛ! » 5Jakɛsɨ ngiinanɨ ambʉɓʉkanga ɓʉ gbɔɔ, jʉ i꞉nye kusiɓo ɓɔ ʉnyɨa gɔ nʉ ɨkyɛmɛ akʉ lɨkɔndɔ lʉndaɓʉ. 6Kija Pɛtɛlɔ a꞉musigio ɓɔ: « Mambʉkɔmʉ nʉ falanga gʉkʉ ɔlɔ, ɨkyɛmɨngana manɔwɛ kunzo ɨkyɛmɛ ngia manayɔ. Akʉ ino yɨ Yeso Klisito ngia ʉ Najalɛtɛ ʉngwa ɨkʉʉ wambʉkɨndaka. » 7Pɛtɛlɔ ambʉmʉfa ɨkɔndɔ yɨ guɔngɔ, ambumumaiso. Tʉkʉ nɨma ngiinanɨ mɨtɨndɨ nʉ liseki ngila lʉ jakɛsɨ ngiinanɨ lambʉʉtandaka. 8Ambʉndalio ɓʉ kpita, ambʉmaa nʉ mɨtɨndɨ ngiangɔ ɓʉ gba, ambufaniso kɨndaka. Ambukumunio ɨzɔ naɓɔ amati ʉ ɨkáa yɨ Asʉɓɨɨ ɛyɔ tii tʉkʉ kʉkɨndaka, nʉ bomboko, nʉ bibiso Asʉɓɨɨ. 9Ungbutu wʉ ɓombi kʉ ɓuɓomu ɓambʉmʉna kʉkɨndaka nʉ bibiso Asʉɓɨɨ. 10Ɓi꞉nye kʉmbɨa iɗo ɓɔ jakɛsɨ ngiinanɨ iiya i꞉nye kyɨa ɓuwei kuchochonoko anambamba ʉ Umongu wɔɔ Uɗo ngua wʉ ɨkáa yɨ Asʉɓɨɨ. Kʉ ɓwanɨ, moni ngikʉnanɨ ka꞉kyananakɨa, ka꞉kyaka ɓombi kambʉɓʉmbangɨa nadɨndɨ.
Pɛtɛlɔ unzo ɓombi ʉpanʉ wʉ Asʉɓɨɨ
11Moni ngikʉnanɨ ki꞉nye‑zʉ tʉkʉ kʉmbangɨa ɓombi kʉ ɓuɓomu. Mombi ngiinanɨ a꞉hɨa, ambikinye tii ɓata kʉʉngwa anambamba ʉ ɔɔ Pɛtɛlɔ nʉ Yʉanɨ, ɓombi ɓambʉka bangʉ kʉmʉmanakɨa anambamba ʉ ʉndaɓʉ akʉ izi ngia ɓi꞉nye isoko ɓɔ: « Basa ʉ Sɔlɔmɔnɔ ». 12Iya Pɛtɛlɔ a꞉na ɓwanɨ, ambusigio ungbutu wʉ ɓombi ɓɔ: « Inu Ɓaɨsalaɛlɛ, jʉtanɨ moni ngika kaninu kʉmbangɨa ɓwanɨ? Nanisu kʉkanga tiga ndʉ gʉ ɓɔ kʉ isu kʉkɨndakiso mombi ngia nʉ angu ʉndɛsʉ, yɛmɔ jʉ ɓɔ kanʉ kɛkɛɛ akʉ kuu yɨ Asʉɓɨɨ. 13Asʉɓɨɨ ngia wʉ Abalama, Ɨsaka nʉ Yakɔbɔ, Asʉɓɨɨ ngia wʉ ɓakuku ngiɓʉndɛsʉ a꞉pananiso ɨbɨba ngia yɨ bayo angɔ Yeso. Inu kʉ na꞉mʉgaba, nambʉmʉtata apɛɛ ʉ Pilato. Ʉna tɔ, ɛyɔ i꞉nye kʉkʉnda nayɔ tʉkʉ kuɓono. 14Inu na꞉tata mombi ngia i꞉nye Tu nʉ Ngbingbii, kija ya꞉nɨkataa kusigio Pilato ɓɔ uniɓunio tʉkʉ mombi ngia a꞉maa ɓombi. 15Kʉ ɓwanɨ, inu na꞉wisiso Makʉʉɓɨɨ, ɨkyɛmɨngana Asʉɓɨɨ ambʉmʉjʉkaniso akʉ ingyo, nʉ isu ka ɓatɛmʉ ɓʉ moni kɔngɔ. 16Mombi ngia nanayɔ kʉna nʉ mbɨa akɛ, a꞉'ʉtandaka bɛ tʉkʉ akʉ ino yɨ Yeso iya isu ka꞉mʉbaya. Mombi ngia a apɛɛ ʉndɛnʉ kʉ ɓuɓomu akɛ, a꞉nyɨa bɛ nʉ angu nʉ ndʉtʉ tʉkʉ aka ekoo baya ngiangɔ akʉ ino yɨ Yeso.
17Inu ɓayoo, ɨtakɨ‑takɨ ngia makʉmbɨa iɗo ɓɔ inu nʉ ɓangama ngiɓʉndɛnʉ na꞉kyɨa Yeso moni ngikʉnanɨ tʉkʉ akʉ ɓujangi‑jangi. 18Kʉ ɓwanɨ, Asʉɓɨɨ a꞉kyɨa moni ngika a꞉ɓɨakɨa jɛnɛ kʉpɛɛ 'upi akʉ moni kʉ lɨgbɛ kʉ liɓomu ɓɔ Masɨa ʉkwanana kʉdya ikoko. 19Nicheni mɨtʉma ngiindɛnʉ nambʉtʉɨya Asʉɓɨɨ, ambʉ ʉnɨpɨa ɓʉɓɨɓɨ ngiɓʉndɛnʉ pɨaa. 20Kija Makʉʉɓɨɨ a꞊ninzo sina wati wɔɔ dʉdʉɛ, nʉ a꞊nɨtʉmɨa Masɨa ngia ʉnʉ ɓɔ Yeso, iya a꞉mʉchwa jɛnɛ akʉ moni kʉndɛnʉ kʉpɛɛ.
21Ɨtakɨ‑takɨ ngiakɛ, ɛyɔ ʉkwanana kuɓio ekoo ʉ ɓisi kʉɓʉya aka Asʉɓɨɨ a꞊maiso‑ɔɔ moni kʉ muɓomu. Kʉʉngwa kʉ jɛnɛ, Asʉɓɨɨ a꞉ɓɨakɨa moni ngikʉnanɨ akʉ moni kʉ lɨgbɛ ngilangɔ lɔɔ tu a꞉lɨtʉma. 22Kʉ ɓwanɨ, Mʉsa a꞉sigo ɓɔ: ‹ Asʉɓɨɨ Makʉʉɓɨɨ ngiʉndɛnʉ a꞊nɨtʉmɨa ɓisi ongo ɨgbɛ kʉndʉ ɛmɛ iya aɓio kʉ amati ʉ ɨkáa yɨ anza ngiindɛnʉ. Inu nʉkwanana kʉkɔ moni kʉ muɓomu ngika a꞉nisigio. 23Nʉ mombi kʉ uɓomu ngia ambʉkʉkɔ ɨgbɛ ngiinanɨ, ɓa꞊miso amati ʉ ɨkáa yɨ anza ngia yɨ Asʉɓɨɨ tʉkʉ isoo, ɓambʉmʉwa. ›
24Lɨgbɛ kʉ liɓomu ngila la꞉yaka jɛnɛ kʉʉngwa akʉ ɨgbɛ Samwɛlɛ, nʉ ila la꞉ka mbise angɔ, kʉ nangana nangana ɓa꞉ɓɨakɨa moni ngika kakʉkyananakɨa akʉ makwaa ngikakɛ. 25Moni ngika Asʉɓɨɨ a꞉nɨpanaka jɛnɛ 'upi akʉ lɨgbɛ ka aka ekoo ʉndɛnʉ. Nʉ agɔmɔ ngia Asʉɓɨɨ a꞉napɨa ati angɔ nʉ ɓatʉngwanɨ ɓʉndɛnʉ a kʉ ekoo ʉndɛnʉ ati ngia a꞉sigio‑ɔɔ Abalama ɓɔ: ‹ Ma꞊mbuiso mababa kʉ ɓombi kʉ muɓomu ngika kʉ ɨtaka 'upi akʉ ɓanɔnɔ ɓʉsɔɔ. › 26Asʉɓɨɨ a꞉iso‑zʉ bayo angɔ tʉkʉ ekoo ʉndɛnʉ. A꞉mʉtʉma aka ekoo ngia ɓɔ unimbuiso, ambunicho ɨkyananakɨa yɛɛ ɓɨɓɨ ngia yɨ mombi kʉ nangana nangana ati ʉndɛnʉ. »
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.