Yʉanɨ 21

Yeso ʉ꞉ɓwanɨa ɓakpataka ngiɓangɔ 'ʉmalɨanɨka

1Mbise ngiinanɨ, Yeso ambʉɓwanɨa ɓata ɓakpataka ngiɓangɔ anambamba ʉ yapuu yɛɛ ɨja ngia ɓaisoko ɓɔ Tibelia. Aɓʉɓwanɨa ɓɔ: 2Ɔɔ Simoni Pɛtɛlɔ, Tʉma (Iya ɓi꞉nye musoko ɓɔ ipiyó) nʉ Natanaɛlɛ mombi ʉ gʉlʉ ʉ Kana amati ʉ gɨpa ʉ Galilaya, nʉ ɓana ɓʉ Zɛbɛdayɔ, nʉ ɓakpataka ɓapɨnɨ nga ɓɔmɔ ngiɓʉ Yeso. Ɛɓɔ kʉ ɓuɓomu ɓi꞉nye tʉkʉ izi mɨngana. 3Simoni Pɛtɛlɔ ambuɓusigio ɓɔ: « Ma‑zʉ ɛmɛ kʉsa kʉfa sipe. » Kija ɛɓɔ ma꞉mutisio ɓɔ: « Kabi ninu kʉtaa. »

Kija ɓa꞉ʉngwa, ɓambuɗito ɨngbɔɔ. Ɨkyɛmɨngana, nuɓutu ngiinanɨ chʉkɔmʉ ɓakpataka ɓambʉfa 'usipe gʉkʉ mungono.

4Tiga kʉɓa ɔngɔ akʉ igbandindi, Yeso ambʉmaa anambamba ʉ yapuu yɛɛ ɨja. Ɨkyɛmɨngana, chʉkɔmʉ ɓakpataka ɓambʉmʉmbɨa. 5Yeso ambuɓuɓukuo ɓɔ: « Inu ɓana ɓʉsɛmɛ, ajʉ nʉ꞉fa ti‑zʉ sipe kʉ fanɨ ɓiɛ? » Kija ɓa꞉mutisio ɓɔ: « Chʉkɔɔ. » 6Yeso ambuɓusigio ɓɔ: « Giseni‑zʉ ʉkaʉ nʉ wagba wʉ ɨkɔndɔ yɨ guɔngɔ wʉ ɨngbɔɔ, na꞊fa sipe tʉkʉ fanɨ. »

Kija ɓa꞉giso ʉkaʉ anizini, ʉkaʉ wambʉɓʉkyɨaka kito, jʉ sipe ya꞉huo tiga amati ɔngɔ chʉkɔmʉ nʉ imbi. 7'Ʉkpataka ngua Yeso i꞉nye mʉkʉnda ɓʉkaɨ ambusigio Pɛtɛlɔ ɓɔ: « Makʉʉɓɨɨ ɨnanɨ! »

Iya Simoni Pɛtɛlɔ a꞉kɔ nayɔ ɓɔ « Makʉʉɓɨɨ ɨnanɨ », ambʉchɨka ɨpʉkʉ yɨ ekoo ngiangɔ, ambʉɨpɨnya jʉ i꞉nye ɓɔ u꞉iɗueni ɗuoni. Kija a꞉kwa amati ʉ mepo ɓʉ kyɔɔ. 8Ɓakpataka nga ɓɔmɔ ɓi꞉nye tiga kʉka nʉ ɨngbɔɔ, nʉ kito ʉkaʉ ngua wi꞉nye uhue nʉ sipe. Ɨdʉnda yi꞉nye tii tʉkʉ tinene ndʉ akʉ mɛtɛlɛ mɨa mʉngana. 9Iya ɓa꞉ijoko nayɔ akʉ ɨdʉnda, ɓambʉna sipe ekoo makyɛkyɛ kʉ dyaa nʉ mikati. 10Yeso ambuɓusigio ɓɔ: « Ikeni nʉ mikpekpe yɨ sipe amati ʉ sipe ngia nʉ꞉faa. »

11Kija Simoni Pɛtɛlɔ a꞉ɗito kʉ mbise akʉ ɨngbɔɔ, ambufaniso ɗuɗuo ʉkaʉ kʉɓʉya akʉ ɨtaka. Sipe yɛɛ ɨkpɔkpɔ yi꞉nye amati ɔngɔ mɨa mʉngana makumi ɓɔkɔ nʉ ɓeetu (153). Abana ndʉ sipe yi꞉nye ɨja ɓwanɨ kititi, chʉkɔmʉ ʉkaʉ wambutinyoo gʉkʉ ɗɛkɛkɛ. 12Yeso ambuɓusigio ɓɔ: « Ikeni‑zʉ kʉdyakaka. » Ati ʉ ɓakpataka, yambikinye nʉ iya i꞉nye ikanzi ngia amuɓukuo ɓɔ: « Ɔwɛ anɨ iinanɨ? », jʉ ɓa꞉mbɨa kusigo ɓɔ tʉkʉ Makʉʉɓɨɨ iinanɨ. 13Yeso ambʉɗʉana tinene naɓɔ, ambʉchɨka mukati, ambufaniso naɓɔ kʉɨpakɨa, ambuɓunzikio sipe kʉ ɓwanɨ. 14Yi꞉nye tiga nɨsɨ kaatʉ ɔngɔ Yeso kʉɓwanɨa ɓakpataka ngiɓangɔ mbise ʉ jʉkana ngiangɔ akʉ ingyo.

Ɔɔ Yeso nʉ Pɛtɛlɔ

15Iya ɓa꞉pipo nayɔ dyakaka ɓʉ gba, Yeso ambuɓukuo Simoni Pɛtɛlɔ ɓɔ: « Simoni mwana ʉ Yɔna, ajʉ waanakʉnda kʉɓaa ɓombi ngiɓaɓɛ ɓiɛ? » Ambumutisio ɓɔ: « Oo, Makʉʉɓɨɨ, wakʉmbɨa iɗo ɓɔ maanakʉnda kʉndaa! » Yeso ambumusigio ɓɔ: « Pɨmakɨa ɓana ɓʉ ɓakɔndɔlɔ ngiɓʉsɛmɛ. » 16Yeso ambumuɓukuo ɓata akʉ nɨsɨ kapɨnɨ ɔngɔ ɓɔ: « Simoni mwana ʉ Yɔna, ajʉ waanakʉnda kingono ɓiɛ? » Pɛtɛlɔ ambumutisio ɓɔ: « Oo! Makʉʉɓɨɨ, waambɨa tʉkʉ ɓɔ maanakʉnda kʉndaa. » Yeso ambumusigio ɓɔ: « Pɨmakɨa ɓakɔndɔlɔ ngiɓʉsɛmɛ. » 17Ambumuɓukuo ɓata akʉ nɨsɨ kaatʉ ɔngɔ ɓɔ: « Simoni, mwana ʉ Yɔna, ajʉ waanakʉnda kʉndanɨ ɓiɛ? » Pɛtɛlɔ ambʉdya ikoko akʉ 'ʉtʉma nadɨndɨ jʉ Yeso u꞉muɓukuo akʉ nɨsɨ kaatʉ ɔngɔ ɓɔ: « Ajʉ waanakʉnda kʉndanɨ ɓiɛ? » Kija a꞉mutisio ɓɔ: « Oo, Makʉʉɓɨɨ waambɨa moni kʉ muɓomu, wakʉmbɨa ɓɔ maanakʉnda kʉndaa. » Yeso ambumusigio ɓɔ: « Pɨmakɨa ɓakɔndɔlɔ ngiɓʉsɛmɛ.

18Manɔwɛ kusigio tʉkʉ kingono ɓɔ, ati ngia wi꞉nye‑ɔɔ mwana, wi꞉nye sangana 'ʉkaɓa tʉkʉ ɔwɛ makʉɔngɔ, wambʉsa akʉ wi꞉nye kʉnda‑ɛɛ kʉsa. Ɨkyɛmɨngana, ati ngia waɓio sina tiga‑ɔɔ ikwei‑kwei, wa꞊ɓʉkyɨa tiga kuyumio tii tʉkʉ mombi ɔmɔ ɨkɔndɔ, ambʉka nɔwɛ kʉsanga 'ʉkaɓa, ambʉsa nɔwɛ akʉ wambukuɓio‑ɛɛ kʉkʉnda. » 19Yeso a꞉yaka moni ngikʉnanɨ kʉpananiso 'ʉgbʉ wʉ ingyo tɨmanɨ uwa Pɛtɛlɔ i꞉nye ɓɔ a꞊wo kunziso Asʉɓɨɨ ɨbɨba. Kʉ ɓwanɨ, ambumusigio ɓɔ, « Nakpata! »

Ɔɔ Yeso nʉ 'ʉkpataka nguangɔ wʉ ɓʉkʉnda

20Pɛtɛlɔ ambʉtɨna waja ambise, ambʉna 'ʉkpataka ngua Yeso i꞉nye mʉkʉnda ɓʉkaɨ. Ɛyɔ iya ati ngia ɓi꞉nye jɛnɛ‑ɔɔ kʉdyakaka, i꞉nye ʉ꞉nakambanɨeni Yeso ambumuɓukuo ɓɔ: « Makʉʉɓɨɨ anɨ‑zʉ iya akʉsa nɔwɛ kʉgaba? » 21Iya Pɛtɛlɔ a꞉mʉna nayɔ, ambuɓukuo Yeso ɓɔ: « Makʉʉɓɨɨ, moni tɨmanɨ ka꞊ɓaanɨa nʉ gue ngiakɛ? »

22Yeso ambumutisio ɓɔ: « Ndʉ makʉnda ɓɔ gue ngiakɛ uɓio kʉkʉʉ kʉɓʉya ɓisi ngiɓa ma꞊ka sina‑ɔɔ, yɨsɔɔ ɨmanɨ amati ɔngɔ? Ɔwɛ, nakpata! » 23Kʉ ɓwanɨ, ɨsaʉ ngiinanɨ yambʉnadaa ati ʉ ɓayoo ɓʉ Yeso kʉ ɓuɓomu ngiɓa ɓa꞉baya ɓɔ 'ʉkpataka nguʉnanɨ wambukuwo sina tii. Ʉna tɔ, Yeso a꞉sigokɔmʉ ɓɔ ambukuwo tii, a꞉sigo tʉkʉ ɓɔ: « Ndʉ makʉnda ɓɔ uɓio kʉkʉʉ kʉɓʉya aka ma꞊ka sina‑ɔɔ, yɨsɔɔ ɨmanɨ amati ɔngɔ? »

24Ya ɓata tʉkʉ 'ʉkpataka mungono nguʉnanɨ uwa wa꞉ɓʉya ɓʉtɛmʉ ɓʉ moni ngikʉnanɨ ambʉkʉtɨndakɨa, nʉ isu kakʉmbɨa ɓɔ ɓʉtɛmʉ ngiɓʉnanɨ ɓa tʉkʉ ɓʉ ingono.

Moni kʉ 'upipio

25Yanʉ lɨngbaa lʉ moni nga lɔmɔ lɨja ila Yeso a꞉lɨkyɨa. Ɓʉ꞉lɨtɨndakɨeni jɛnɛ kʉ liɓomu kʉ nangana nangana, makʉna ɓɔ ambʉ ɨtaka kʉ iɓomu ya꞉nyɨakɔmʉ nʉ izi ngia ɓakwanana‑ɔɔ kʉnapɨa lɨtaɓʉ ngilʉnanɨ ɓʉlɨtɨndakieni jɛnɛ.

Currently Selected:

Yʉanɨ 21: BudKoya

Highlight

Copy