Luka 10
10
Yeso ʉtʉma ɓakpataka makumi ʉmalɨanɨka nʉ ɓapɨnɨ
(Mat 10:7-16)
1Mbise ʉ moni ngikʉnanɨ, Makʉʉɓɨɨ ambʉchwa ɓata ɓakpataka nga ɓɔmɔ makumi ʉmalɨanɨka nʉ ɓapɨnɨ,#10:1 Mubio nga kɔmɔ kaasigo ɓɔ: « Ɓakpataka ɓi꞉nye makumi ʉmalɨanɨka ». ambʉɓʉtʉma ɓapɨɨ ɓapɨɨ kʉsa apɛɛ angɔ, akʉ ɓagʉlʉ nʉ lizi kʉ liɓomu ngila yi꞉nye kʉta ɓɔ ɛyɔ mambɨnyɔngɔ ʉsa‑ɛɛ. 2Ambuɓusigio ɓɔ: « Masɔɔ ka maja akʉ watɨnɨ, ɨkyɛmɨngana ɓombi ɓʉ kuu ɓa ɗɛkɛkɛ. Kʉ ɓwanɨ, teni makʉʉ ʉ masɔɔ ɓɔ ʉtʉma ɓombi ɓʉ kuu akʉ watɨnɨ nakɔ kʉʉngwiso. 3Seni! Ʉna tɔ, maninu kʉtʉma ndʉ ɓana ɓʉ ɓakɔndɔlɔ ati ʉ ɓakwei. 4Ati ngia naɓio‑ɔɔ kʉsa, nɔɔɓotonokɔmʉ nʉ iɓongi yɨ falanga, gʉkʉ mbakaya, gʉkʉ mɨtɨndɨ yɨ lɨkpakʉ dyepini, nʉ nɔɔɓiokɔmʉ kʉmakaka nɨngbaa kuɓukuo ɓombi.
5Akʉ ɨkáa kʉ iɓomu ngia nakumunio‑ɛɛ, sigeni‑zʉ ɓɔ: ‹ Majɨɔ kuɓio amati ʉ ɨkáa ngia. › 6Ndʉ mombi ngia aakʉnda majɨɔ aɓio amati ʉ ɨkáa ngiinanɨ, majɨɔ ngikʉnanɨ ka꞊tio ekoo angɔ. Chʉkɔmʉ ɓwanɨ, majɨɔ ngikʉnanɨ ka꞊nɨtʉɨya kʉ inu ɓakʉɓɔngɔ. 7Ɓieni tʉkʉ amati ʉ ɨkáa ngiinanɨ, chɔkɔmʉ kʉsa akʉ lɨkáa kʉ gbaɨ. Dyeni nʉ mweni tʉkʉ ɨkyɛmɛ ngia ɓa꞊ninzo, jʉ mombi ʉ kuu ʉkwanana kʉnyɨa nʉ ʉkʉa wʉ kuu ngiangɔ.
8Amati ʉ ɓagʉlʉ tɨmanɨ na꞊kumunio‑ɛɛ nʉ akʉ ɓa꞊nɨjananɨa‑ɛɛ, dyeni ɨkyɛmɛ ngia ɓa꞊nɨnapɨa. 9Hiiseni ɓombi ɓʉ ɓakwisikiso ngiɓa ɓaɓio ananɨ nʉ ɓusigieni ɓɔ: ‹ Wati wʉ Ɓʉngama ɓʉ Asʉɓɨɨ wa tiga kʉ tinene ninu. › 10Ɨkyɛmɨngana, gʉlʉ kʉ 'uɓomu ngia na꞊kumunio‑ɛɛ chʉkɔmʉ ɓambʉnɨjananɨa, ɓʉeni‑ɛɛ tʉkʉ ɓʉaa. Ati ngia naɓio‑ɔɔ kʉɓaɓaka akʉ mɨngyɛndʉ ngiindaɓʉ sigeni ɓɔ: 11‹ Kʉɓɛndaka aɓungu wʉ ɨkʉmbʉ ngiindɛnʉ utiɗito akʉ mɨtɨndɨ ngiindɛsʉ, ninu kʉpananiso ɓɔ nʉkyɨa ɓɨɓɨ. Ɨkyɛmɨngana, mbɨeni iɗo ɓɔ Ɓʉngama ɓʉ Asʉɓɨɨ ɓʉka tiga kʉ tinene ninu. › 12Maninu kusigio ɓɔ, ɓisi ongo akʉ ɓisi ɓʉ 'ʉkɔmbɔ, Asʉɓɨɨ a꞊tɨna 'ʉkɔmbɔ wʉ ɨkʉmbʉ ngiinanɨ ɓʉkaɨ nadɨndɨ kʉɓaa uwa wʉ ɨkʉmbʉ yɨ Sɔdɔmɔ. »
Ɓagʉlʉ ngiɓa ɓaatata baya
(Mat 11:20-24)
13Kija Yeso a꞉matɨa ɓata kusigo ɓɔ: « Ya ikoko nɔwɛ gʉlʉ ʉ Kolajini! Ya ikoko nɔwɛ gʉlʉ ʉ Betesaida! Jʉ ɓamoni ɓɔɔ ɓʉmbangɛ ngiɓa ɓa꞉kyɨanɨa andɛnʉ, ɓʉkyɨanɨeni jɛnɛ amati ʉ ɓagʉlʉ ɓʉ Tilo nʉ Sɨdɔna, ambʉ́ ɓombi ɓʉ ɓagʉlʉ ngiɓʉnanɨ ɓa꞉pɨnya jɛnɛ ɓagunia pɨnyaa nʉ tono isupu nʉ ndʉtʉ, kupananiso ɓɔ ɓa꞉nicho mɨtʉma ngiindaɓʉ nichoo. 14Akʉ ɓisi ɓʉ 'ʉkɔmbɔ, Asʉɓɨɨ a꞊tɨna sina 'ʉkɔmbɔ nguʉndɛnʉ ɓʉkaɨ nadɨndɨ kʉɓaa uwa wʉ ɓagʉlʉ ɓʉ Tilo nʉ Sɨdɔna. 15Nʉ ɔwɛ gʉlʉ ʉ Kapelenaumu, ajʉ wakuyo ɓɔ ɓa꞊nazono kʉɓʉya ekoo ʉ ɓisi ɓiɛ? Yambʉkɔmʉ ɓwanɨ. Ɨkyɛmɨngana, ɓa꞊nijiso kʉɓʉya tʉkʉ akʉ ʉpɨa wʉ ɓʉbɨa uwa wa ɛsɨ nadɨndɨ! »
16Kija Yeso a꞉sigio tiga ɓakpataka ngiɓangɔ ɓɔ: « Mombi ngia aninu kʉkɔ, anɛmɛ kʉ kʉkɔ. Mombi ngia aninu kʉtata, a nɛmɛ kʉ kʉtata. Nʉ mombi ngia anɛmɛ kʉtata, a kʉ kʉtata mombi ngia a꞉natʉma ɛmɛ. »
Tʉa ngia yɨ ɓakpataka makumi ʉmalɨanɨka nʉ ɓapɨnɨ
17Ɓakpataka ngiɓʉnanɨ makumi ʉmalɨanɨka nʉ ɓapɨnɨ ɓa꞉tʉa ɓuhueni nʉ ɨgyagya, ɓambufaniso sigo ɓɔ: « Makʉʉndɛsʉ, abana tʉkʉ mɨtʉma yɨ ɓabɨa ya nisu kʉ kʉkɔ aka ekoo ʉ nɨchwa ino ngiisɔɔ. »
18Yeso ambuɓutisio ɓɔ: « Mʉna Sɨtanɨ kijo ekoo ʉ ɓisi ndʉ ʉgbaa wɔɔ ʉngɨnanɛ. 19Ʉna tɔ, ma꞉ninzo inu angu kichoo ɓazɨɨ nʉ ɓanakwavanɨ, nʉ kʉɓaa angu kʉ 'uɓomu ngia wʉ Makwa, nʉ ɨkyɛmɛ yɛɛ ɓɨɓɨ yambʉkʉnɨkyɨa. 20Ɨkyɛmɨngana, nɔɔkwakɔmʉ ɨgyagya jʉ mɨtʉma yɨ ɓabɨa yaninu kʉkɔ. Kweni ɨgyagya jʉ muno ngikʉndɛnʉ kamʉtɨndakɨɛ amati ʉ ɨtaɓʉ ekoo ʉ ɓisi. »
Yeso akʉkwa ɨgyagya
(Mat 11:25-27; 13:16-17)
21Ati ngiinanɨ, Yeso a꞉kwa ɨgyagya akʉ angu ʉ 'Ʉtʉma wɔɔ Tu, kija a꞉sigo ɓɔ: « Tidoo, Makʉʉɓɨɨ wʉ ekoo ʉ ɓisi nʉ ɨtaka, manɔwɛ kubibiso jʉ wa꞉nayɨa ɓombi ngiɓa ɓanʉ 'ʉtʉma wɔɔ pimise moni nʉ ɓombi ɓʉ mbimbanaka moni ngika nayɨaa. Ɨkyɛmɨngana, wa꞉kʉpanzakɨa tiga ɓombi ɓɔɔ ɨsʉkʉɓwanɨ. Oyi, Tidoo wa꞉baya ɓɔ yɨkyananakɨa tʉkʉ ɓwanɨ, kʉkpatanakɨa nʉ ɓʉkʉnda ngiɓʉsɔɔ.
22Tidoo a꞉nanzo ɛmɛ moni tʉkʉ kʉ muɓomu. Nʉ mombi gʉkʉ mʉngana ambakambɨa ɓɔ Mwana a anɨ, tʉkʉ Tidoo kʉ nangana aambɨa. Nʉ mombi gʉkʉ mʉngana ambakambɨa ɓɔ Tidoo a anɨ, tʉkʉ Mwana aambɨa, tiga kʉ nʉ mombi ngia Mwana aakʉnda nayɔ kumbiiso. »
23Ambʉnɨtana mesu akʉ ɓakpataka ɓi꞉nye‑ɛɛ, ambuɓusigio tʉkʉ ɛɓɔ ɓɔ: « Ya ɨgyagya nʉ ɓombi ngiɓa ɓakʉna moni ngika inu nakʉna engo. 24Jʉ maninu kʉɓɨa ɓɔ lɨgbɛ lɨja nʉ ɓangama ɓɔɔ ɓʉkpɔkpɔ ɓa꞉tananɨa ɓɔ ɓʉna gɔ moni ngika inu nakʉna engo, chʉkɔmʉ ɓambʉkʉna gʉkʉ ɗɛkɛkɛ. Nʉ ɓa꞉tananɨa ɓɔ ɓʉkɔ gɔ moni ngika inu kakʉkɔ engo, chʉkɔmʉ ɓambʉkʉkɔ. »
Isisinio yɨ 'Ʉsamalɨa wɔɔ moni muɗo
(Mat 22:34-40; Mak 12:28-31)
25Mʉpananakɨa wʉ mapanʉ mungono wa꞉ʉngwa ɨkʉʉ kukanyo Yeso. Ambumuɓukuo ɓɔ: « Mʉpananakɨa, mʉkwanana kʉkyɨa tanɨ kʉnyɨa nʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá? »
26Yeso ambumutisio ɓɔ: « Ɓa꞉tɨndakɨa‑zʉ tanɨ amati ʉ ɨtaɓʉ yɨ mapanʉ? Iya waaɨpopoko waakɔ ɨmanɨ amati ɔngɔ? »
27Ambutisio ɓɔ: « Kʉnda Makʉʉbɨɨ Asʉɓɨɨ ngiasɔɔ nʉ 'ʉtʉma nguʉsɔɔ kʉ uɓomu, nʉ ʉwɔndɔ wʉ 'ʉtʉma nguʉsɔɔ kʉ 'uɓomu, nʉ angu ngiasɔɔ kʉ 'uɓomu, nʉ mbɨmbanaka ngiisɔɔ kʉ iɓomu, nʉ kʉnda mangɛ kʉndʉ waakʉndana ɔwɛ makʉɔngɔ. »
28Yeso ambumusigio ɓɔ: « Ɛɛ, wutisio iɗo. Wukyieni ɓwanɨ, wa꞊nyɨa nʉ ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá. »
29Mʉpananakɨa wʉ mapanʉ nguʉnanɨ wi꞉nye kʉkʉnda kʉpana ɓɔ a mombi ɔɔ ngbingbii. Kija a꞉ɓukuo tiga Yeso ɓɔ: « Mangɛ zʉ anɨ? »
30Yeso ambumutisio nʉ isisinio ɓɔ: « Mombi mʉngana a꞉ʉngwa akʉ gʉlʉ ʉ Yelusalɛma kʉsa#10:30 kʉsa: Yɛmɔ ɓɔ: « kujo », jʉ Yelusalɛma a ekoo ʉ ɨkpangba. akʉ gʉlʉ ʉ Yeliko. Nɨngbaa ambʉkwa akʉ lɨkɔndɔ lʉ ɓombi ɓʉ ndiɓo, ɓambumuɗuo lɨpʉkʉ, ɓambumiko nʉ ɓɛnda tʉkʉ ɓʉ sɛkɛ, ɓambʉsa yɨndaɓʉ, ɓambʉmʉsɨa tii tʉkʉ tinene kʉtɨnɨa 'ʉtʉma. 31Akʉ ngasa, kumu‑kumu mʉngana i꞉nye kʉɓaa kʉ nɨngbaa ngiinanɨ. Iya a꞉na nayɔ mombi ngiinanɨ, ambʉmʉzʉngʉa, ambʉsa yangɔ. 32Tiga 'Ulawi mungono a꞉ka kʉ akʉ mʉa nguʉnanɨ. Iya a꞉mʉna, a꞉mʉzʉngʉa tʉkʉ anambamba. 33Ɨkyɛmɨngana, mombi mʉngana wʉ gɨpa ʉ Samalɨa i꞉nye kʉɓaa kʉ nɨngbaa ngiinanɨ. Iya a꞉choo ananɨ, ambʉmʉdyɨa ikoko nadɨndɨ. 34Ambʉsɨngana tinene nayɔ, ambumuchichoko lɨpɨ nʉ umbundo nʉ vinyo,#10:34 Ɓi꞉nye to vinyo ekoo ʉ ɨpɨ kukpinyo ɓutetu. ambʉlɨmbɨtɨtaka nʉ magba kʉ lɨpʉkʉ. Tiga a꞉muɗitiso ekoo ʉ punda ngiangɔ, ambʉsa nayɔ akʉ ɨkáa yɨ mubika. I꞉nye tiga nayɔ kʉtʉka tʉkʉ nani. 35Kʉɓa ɔngɔ, ambiso mikpekpe yɨ falanga ɓepini ambunzo makʉʉ ʉ ɨkáa, ambumusigio ɓɔ: ‹ Tʉká mombi ngia iɗo. Falanga ngia wa꞊mʉtʉka nayɔ ʉɓaeni nɨkʉʉ, ma꞊natuisio ɛyɔ aka maɓio ɓisi tiga‑ɔɔ kʉtʉa. › »
36Yeso ambumuɓukuo ɓata ɓɔ: « Anɨ ati ʉ ɓombi ɓaatʉ ngiɓʉnanɨ iya wakʉna ɓɔ a꞉pananiso ɓʉkʉnda akʉ mangɛ ngiinanɨ a꞉kwa akʉ lɨkɔndɔ lʉ ɓombi ɓʉ ndiɓo? »
37Mʉpananakɨa wʉ mapanʉ nguʉnanɨ ambutisio ɓɔ: « Ya gwa ngia a꞉mʉnɨa ikoko. »
Kija Yeso a꞉musigio ɓɔ: « Sa! Ɔwɛ kyɨa kʉ ɓwanɨ. »
Yeso ɨzɔ nʉ ɔɔ Malata nʉ Malɨa
38Ati ngia ɔɔ Yeso nʉ ɓakpataka ngiɓangɔ ɓi꞉nye‑ɔɔ amati ʉ kɨnda, ambukumunio akʉ mwanʉ ʉ ɨkʉmbʉ mɨngana, akʉ moi mʉngana ino ɓɔ Malata i꞉nye‑ɛɛ. Kija moi ngiinanɨ a꞉jananɨa Yeso andɔngɔ. 39Malata i꞉nye nʉ manye ɔɔ moi ino ɓɔ Malɨa, iya i꞉nye ɓuwei apɛɛ ʉ Makʉʉɓɨɨ kʉkɔ moni ngika i꞉nye kʉyaka engo. 40Ɨkyɛmɨngana, Malata i꞉nye kuyongono nʉ kuu ɨja. Kija a꞉ka anambamba ʉ Yeso ambumusigio ɓɔ: « Makʉʉɓɨɨ! Iya mwana ʉ inoo ʉ꞉nasɨa‑ɔɔ nʉ kuu tii tʉkʉ nangana ɓɔ, ajʉ yambʉkɔmʉ nɔwɛ kʉnyɨa ndʉ ɨkyɛmɛ ɓiɛ? Musigio‑zʉ ɓɔ ʉka nɛmɛ kʉsalɨa. »
41Makʉʉɓɨɨ ambumutisio ɓɔ: « Ɔwɛ Malata, Malata, wakuyongono nʉ bʉmbana nʉ lɨngbaa lʉ moni lɨja. 42Ɨkyɛmɛ yɛɛ ɨja ya tʉkʉ mɨngana. Malɨa ʉ꞉chɨka yangɔ ɨkyɛmɛ yɛɛ iɗo nadɨndɨ, nʉ yambʉkɔmʉ nʉ mombi ngia a ikanzi ngia a꞊mʉhɨnɨa ɛyɔ. »
Currently Selected:
Luka 10: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
