Luka 9
9
Yeso ʉtʉma ɓatitima kʉɓɨakɨa Ɨsaʉ yɛɛ Iɗo
(Mat 10:9-15; Mak 6:8-11)
1Kija Yeso a꞉soko ɓatitima ngiɓangɔ kumi nʉ ɓapɨnɨ. Ambuɓunzo angu nʉ ʉpanʉ kiso mɨtʉma yɨ ɓabɨa, nʉ hiiso ɓakwisikiso kʉ di di di. 2Kija a꞉ɓʉtʉma kʉɓɨakɨa ɨsaʉ yɨ Ɓʉngama ɓʉ Asʉɓɨɨ, nʉ kuhiiso ɓombi ɓʉ ɓakwisikiso. 3Ambuɓusigio ɓɔ: « Nɔɔɓotonokɔmʉ nʉ ɨkyɛmɛ yɨ kɨnda, gʉkʉ 'utupe, gʉkʉ mbakaya, gʉkʉ idyo, gʉkʉ falanga. Mombi ɔɔchɨkakɔmʉ lɨpʉkʉ dyepini kʉ ɓwanɨ. 4Akʉ ɨkáa ngia ɓa꞊nɨjananɨa‑ɛɛ, kwaeni tʉkʉ ananɨ kʉɓʉya tʉkʉ aka naʉngwa‑ɔɔ akʉ mʉa nguʉnanɨ. 5Nʉ mʉa kʉ uɓomu ngua ɓombi ɓambʉkʉnɨjananɨa‑ɔɔ, ɓʉeni akʉ ɨkʉmbʉ ngiinanɨ tʉkʉ ɓʉaa, nambʉɓɛndaka aɓungu ʉ mɨtɨndɨ ngiindɛnʉ naɓɔ kumbiiso ɓɔ ɓʉkyɨa ɓɨɓɨ. »
6Kija ɓatitima ɓa꞉ʉngwɨa kɨnda kʉsa, ɓambʉɓaɓaka amati ʉ ɓagʉlʉ kʉ ɓuɓomu kʉɓɨakɨa Ɨsaʉ yɛɛ Iɗo nʉ hiiso ɓombi ɓʉ ɓakwisikiso mʉa kʉ uɓomu.
Mbambania ngia yɨ Ɛlɔdɛ
(Mat 14:1-12; Mak 6:14-29)
7Tiga nanɨ Ɛlɔdɛ ngia i꞉nye ngama anʉ Galilaya ambʉkɔ moni kʉ muɓomu ngika ɔɔ Yeso nʉ ɓatitima ngiɓangɔ ɓi꞉nye kʉkyɨa. I꞉nye tiga kʉkwa ɓatanga jʉ ɓombi nga ɓɔmɔ ɓi꞉nye kusigo moni ekoo ʉ Yeso ɓɔ: « Yʉanɨ ngia i꞉nye ɓatiso ɓombi iinanɨ a꞉jʉkana bɛ akʉ ingyo. » 8Ɓombi nga ɓɔmɔ ɓi꞉nye kusigo ɓɔ: « Ɛlɨa iinanɨ a꞉ɓwanɨa bɛ. »
Ɓombi nga ɓɔmɔ ɓata ɓi꞉nye kusigo ɓɔ: « Ɨgbɛ mɨngana ati ʉ lɨgbɛ ngila lʉ pɛɛ iinanɨ a꞉jʉkana bɛ akʉ ingyo. » 9Ɨkyɛmɨngana, Ɛlɔdɛ ambusigo ɓɔ: « Mɛɛ‑zʉ ma꞉tiniso pongo Yʉanɨ 'ʉtʉ tɨnisoo. Anɨ ɓata iya makʉkɔ ɨsaʉ yangɔ kʉɓɨka ikanzi ngiakɛ? » Tiga kʉ ɓwanɨ, i꞉nye kyɨa tʉkʉ kʉhata kʉna Yeso.
Yeso ʉdyakakiso ungbutu wʉ ɓombi wɔɔ 'ʉja
(Mat 14:13-21; Mak 6:32-44; Yʉa 6:5-13)
10Iya ɓatitima ɓa꞉tʉa nayɔ, ɓambʉngakɨa Yeso moni kʉ muɓomu ngika ɓi꞉nye ɓʉkyɨeni. Kija Yeso a꞉sɨa ungbutu wʉ ɓombi, ambusoko ɓakpataka anʉ ɨtɛtɛtɛ. Ambʉsa naɓɔ akʉ gʉlʉ ʉ Betesaida. 11Ɨkyɛmɨngana, iya ungbutu wʉ ɓombi wa꞉mbɨa ɓɔ ɓʉsa sanɨ, ɓambʉsa nayɔ kʉhata. Yeso ambʉɓʉjananɨa, ambʉɓʉngakɨa ɨsaʉ yɨ Ɓʉngama ɓʉ Asʉɓɨɨ. Ambuhiiso ɓombi ɓʉ ɓakwisikiso.
12Iya ɓisi ɓi꞉nye tiga kuwo, kija ɓatitima kumi nʉ ɓapɨnɨ ɓa꞉ka anambamba ʉ Yeso, ɓambumusigio ɓɔ: « Nanzaniso ɓombi, ɓʉsa kʉhata mʉa wʉ ɓʉkwaɨ nʉ ɨkyɛmɛ yɛɛ ɨdyɛ akʉ lɨkʉmbʉ ngila la kʉ tine tine aka, jʉ ka akʉ ɨza. » 13Ɨkyɛmɨngana, Yeso ambuɓusigio ɓɔ: « Inu ɓakʉɓɔngɔ ɓunzeni ɨkyɛmɛ yɛɛ ɨdyɛ! »
Kija ɓa꞉mutisio ɓɔ: « Ka aka tʉkʉ nʉ mikati ɓɔkɔ nʉ sipe ɓepini. Ajʉ wakʉkʉnda ɓɔ kʉsa kʉkʉya ɓombi idyo ɓiɛ? » 14(Ɓugue kʉ ɓuɓomu ɓi꞉nye ndʉ ɓombi ɛlɛfʉ ɓɔkɔ.)
Yeso ambusigio ɓakpataka ngiɓangɔ ɓɔ: « Ɓuwuliseni akʉ limbi. Imbi mɨngana nʉ ɓombi ndʉ makumi ɓɔkɔ. »
15Ɓakpataka ɓa꞉kɔ moni ngikʉnanɨ tʉkʉ kɔɔ, kija ɓa꞉wuliso ɓombi kʉ ɓuɓomu. 16Yeso ambʉchɨka mikati ɓɔkɔ nʉ sipe ɓepini ngiinanɨ, ambʉtɨna waja ekoo ʉ ɓisi, ambutuisio Asʉɓɨɨ ɨbɨba aka ekoo ʉ idyo ngiinanɨ. Kija a꞉iɓokoko, ambunzikio ɓakpataka. Ɓambʉɨpakɨa ungbutu wʉ ɓombi. 17Mombi kʉ nangana nangana a꞉dyakaka, ambʉmʉta. Ɓakpataka ɓambʉmʉmaka ɓadudu ɓʉ idyo ngiɓa ɓa꞉tukoko. Kija ɓa꞉kwa ɓajaɨ kumi nʉ ɓapɨnɨ ɓuhuoke tʉkʉ ɓʉ kyɛɛ kyɛɛ.
Yeso a Masɨa
(Mat 16:13-16,21-28; Mak 8:27-29; 8:31—9:1)
18Ɓisi mʉngana, Yeso ɛyɔ kʉ nangana i꞉nye kʉta Asʉɓɨɨ, ɓakpataka tiga kʉ anambamba angɔ. Kija a꞉ɓuɓukuo ɓɔ: « Ɓombi ɓaasigo‑zʉ ɓɔ ɛmɛ ma anɨ? » 19Ɓambumutisio ɓɔ: « Ɓombi nga ɓɔmɔ ɓaasigo gʉ wa Yʉanɨ ngia aaɓatiso ɓombi, ɓɔmɔ gʉ wa Ɛlɨa, ɓɔmɔ ɓata gʉ wa ɨgbɛ mɨngana ati ʉ lɨgbɛ ngila lɔmɔ lʉ Asʉɓɨɨ lʉ pɛɛ, iya a꞉jʉkana bɛ akʉ ingyo uweni jɛnɛ woni. » 20Yeso ambuɓuɓukuo ɓɔ: « Andʉ tiga inu, naasigo ɓɔ ɛmɛ ma‑zʉ anɨ ɓʉ kpɛ? » Pɛtɛlɔ ambumutisio ɓɔ: « Ɔwɛ wa Klisito#9:20 Yɛmɔ ɓɔ: Masɨa. ngia Asʉɓɨɨ a꞉mʉchwa. »
Yeso akʉyaka moni ekoo ɓʉka‑ɓʉkaɨ nʉ ingyo ngiangɔ
(Mat 16:20-28; Mak 8:30—9:1)
21Yeso ambʉɓʉgbʉma nʉ angu ɓɔ ɓɔɔngakɨakɔmʉ mombi moni ngikʉnanɨ. 22Kija a꞉ɓusigio ɓata ɓɔ: « Yɨkwanana ɓɔ ɛmɛ Mwana ngia ʉ Mombi ɓʉnadyiso ikoko nadɨndɨ, ɓagʉgʉ, ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓʉnayaa, ɓambʉnawa. Kija ɓisi ɓʉ kaatʉ ma꞊jʉkana akʉ ingyo. »
23Kija a꞉sigio ɓombi kʉ ɓuɓomu ɓɔ: « Ndʉ mombi akʉnda nɛmɛ kʉkpata, ʉsɨa kʉkyɨa ɓʉkʉnda ɓangɔ, nʉ ʉbaya kuɓio 'ʉndanɛ makwaa kʉ muɓomu kufuɓuo mʉsalaba nguangɔ, ambʉnakpata. 24Mombi ngia akʉnda kʉpɨmakɨa ʉɓɨɨ nguangɔ, a꞊ʉyangiso yangisoo. Ɨkyɛmɨngana, mombi ngia a 'ʉndanɛ kʉyangiso ʉɓɨɨ nguangɔ jʉ anɛmɛ kʉkpata, a꞊uhiiso hiisoo. 25Ndʉ mombi anyɨa nʉ ɨngama yɨ ɨtaka ngia kʉ iɓomu, ɨkyɛmɨngana ambʉyangiso ʉɓɨɨ nguangɔ, nʉ kʉtambiso ʉɓɨɨ nguangɔ mambɨnyɔngɔ, yanʉ ɨjangɨa tɨmanɨ? 26Jʉ ndʉ mombi a꞊na soni ekoo ʉ ino ngiisɛmɛ, nʉ ekoo ʉ mapanʉ ngikʉsɛmɛ, ɛmɛ Mwana ngia ʉ Mombi, ma꞊na sinani soni ekoo angɔ kʉ nanɨ ati ngia ma꞊ka‑ɔɔ nʉ ɨbɨba ngiisɛmɛ, nʉ iya yɨ Tidoo nʉ iya yɨ ɓamalaika ɓɔɔ tu. 27Kingono maninu kusigio ɓɔ, ɓombi ngana ngana nga ɓɔmɔ ati ʉ ndɛnʉ aka, ɓambukuwo ɨsʉkʉɓwanɨ ɓʉnenikɔmʉ Ɓʉngama ɓʉ Asʉɓɨɨ. »
Ɔɔ Yeso nʉ Mʉsa nʉ Ɛlɨa
(Mat 17:1-8; Mak 9:2-8)
28Mbise ʉ makwaa ndʉ bɛlɛsɛ mʉngana aka Yeso i꞉nye ʉyakeni‑ɔɔ moni ngikʉnanɨ, a꞉chɨka ɔɔ Pɛtɛlɔ, Yʉanɨ, nʉ Yakɔbɔ, ɓambuɗito ekoo ʉ ɨkpangba kʉta Asʉɓɨɨ. 29Ati ngia i꞉nye‑ɔɔ kʉta, mesu ngikangɔ kambʉnɨtana kʉ di, kija lɨpʉkʉ ngilangɔ la꞉ka tiga tu, kʉjɨa ɓʉ nzɛkpɛ nzɛkpɛ. 30Kʉ nɨma ngiinanɨ, ɓombi ɓapɨnɨ ɓambʉɓwanɨa. Yi꞉nye ɔɔ Mʉsa nʉ Ɛlɨa. 31Ɛɓɔ ɓi꞉nye ɓʉɓwanɨeni nʉ imbangumba ngia ya ekoo ʉ ɓisi. Ɓi꞉nye kʉyakanaka nʉ‑ɔɔ Yeso ekoo ʉ moni kʉ kɨnda ngiangɔ, kʉndaniso tʉma ngiangɔ kʉsa kuwo anʉ Yelusalɛma. 32Kija ɔɔ Pɛtɛlɔ nʉ ɓombi ngiɓa ɓi꞉nye ɨzɔ nayɔ ɓi꞉nye tiga kʉjɨnga tɔɔ. Ɨkyɛmɨngana, iya ɓa꞉jʉkana nayɔ, ɓa꞉na imbangumba ngia yɨ Yeso nʉ ɓombi ɓapɨnɨ ɓʉmaɨ anambamba angɔ. 33Mbise ngiinanɨ, iya ɓombi ngiɓʉnanɨ ɓi꞉nye tiga kʉsɨa Yeso, kija Pɛtɛlɔ a꞉musigio ɓɔ: « Mʉpananakɨa, mʉna iɗo ɓɔ kuɓieni tii tʉkʉ aka. Ka꞊tɨa lɨhɨma dyetu, yɨsɔɔ kʉ mɨngana yɨ Mʉsa kʉ mɨngana, nʉ yɨ Ɛlɨa kʉ mɨngana. » (Ambikinye kʉmbɨa moni ngika i꞉nye kʉyaka engo.)
34Ati ngia i꞉nye‑ɔɔ kʉngaka moni ngikʉnanɨ, ɨkʉɓa ya꞉ka yambuɓukuto nʉ igiɓi. Yambukiso ɓakpataka kʉ ʉɓa kʉna ɨkʉɓa ngiinanɨ naɓɔ kukuto. 35Ɓambʉkɔ iyo kʉɓʉa amati ʉ ɨkʉɓa ngiinanɨ kusigo ɓɔ: « Mwana ngiasɛmɛ iinanɨ, iya ma꞉mʉchwa. Mʉkeni ɛyɔ! »
36Mbise ʉ iyo ngiinanɨ kʉɓʉa, ɓa꞉na tii tʉkʉ Yeso kʉ nangana. Ɓakpataka ngiɓa ɓa꞉na moni ngikʉnanɨ, ɓambʉkata ɓʉ nyɛ. Kija amati ʉ makwaa ngikʉnanɨ, ɓa꞉ngakɨakɔmʉ mombi gʉkʉ mʉngana moni ngikʉnanɨ ɓi꞉nye ɓuneni.
Yeso u꞉hiiso mombi wʉ 'ʉtʉma wʉ abɨa
(Mat 17:14-18,22-23; Mak 9:14-27,30-32)
37Kʉɓa ɔngɔ, ati ngia ɔɔ Yeso nʉ ɓakpataka ɓaatʉ ngiɓʉnanɨ ɓa꞉ijo‑ɔɔ ɨkpangba, ungbutu wʉ ɓombi wɔɔ 'ʉja wambʉka kʉgbʉka Yeso. 38Amati ʉ ungbutu wu ɓombi nguʉnanɨ, mombi mʉngana ambufaniso nachokoo ɓɔ: « Mʉpananakɨa, kikiliki nakangɨa ɓaka‑zʉ mwana ɔɔ gue ngiasɛmɛ akɛ, jʉ a 'ukpekpe wɔngɔ tʉkʉ mungono! 39'Ʉtʉma wʉ abɨa mungono ɓɔmʉ waamuɓotoko, kʉ nɨma ngiinanɨ aafaniso nachokoo, kija waamʉjʉkʉa ɓʉmʉ, lihuu lambufaniso nayɔ ɓʉa akʉ moni ɓʉ fɔtɔ fɔtɔ. Waamʉkyananaka, kija waamʉsɨa tʉkʉ nʉ ɨɓʉmbʉmʉ. 40Ma꞉kikilikio bɛ ɓakpataka ngiɓʉsɔɔ ɓɔ ɓiso ɓaka 'ʉtʉma wʉ abɨa nguʉnanɨ, ɨkyɛmɨngana wʉ꞉ɓʉkyɨaka bɛ tʉkʉ ɨsʉkʉɓwanɨ. »
41Kija Yeso a꞉sigo ɓɔ: « Inu ɓombi ɓɔɔ ɓɨɓɨ ɓʉ ɨjɨjɨ ngia, iɓa nambʉkɔmʉ nʉ baya akɛ! Wati ʉpɨtanɨ maɓio ɓata zʉ‑ɔɔ ɨzɔ ninu? Nʉ wati 'ʉpɨtanɨ ɓata ma꞊nɨpɨa‑ɔɔ? Ɨka tiga nʉ mwana asɔɔ aka. »
42Ati ngia mwana i꞉nye kʉsɨngana apɛɛ ʉ Yeso, 'ʉtʉma wʉ abɨa nguʉnanɨ wambumugboso akɛsɨ, wambʉmʉjʉkʉa tiga nʉ angu nadɨndɨ. Ɨkyɛmɨngana, Yeso ambʉngbaa nʉ 'ʉtʉma wʉ abɨa nguʉnanɨ, mwana ambʉhɨa. Yeso ambumutuisio ɨsɛ. 43Kija moni ngikʉnanɨ ka꞉mbangɨa ɓombi kʉ ɓuɓomu kʉna angu ɔɔ 'ʉja ngiinanɨ wʉ Asʉɓɨɨ.
Yeso a ɓata kʉyaka moni ekoo ingyo ngiangɔ
(Mat 17:22,23; Mak 9:30-32)
Ndʉ moni kʉ muɓomu ngika Yeso i꞉nye kʉkyɨa ki꞉nye‑zʉ tʉkʉ kʉmbangɨa mombi kʉ nangana nangana, ambusigio tiga ɓakpataka ɓangɔ ɓɔ: 44« Pɨmakɨeni moni ngika maninu kʉngakɨa ɨtakɨ‑takɨ ngia muɗo ɓɔ: Ɛmɛ Mwana ngia ʉ Mombi, ɓabi nɛmɛ kʉgaba akʉ lɨkɔndɔ lʉ ɓombi. » 45Ɨkyɛmɨngana, chʉkɔmʉ ɓakpataka ɓambupimiso moni ngikʉnanɨ, jʉ inyi yɨ moni ngikʉnanɨ yi꞉nye naɓɔ ɨnayɛ ambʉ ɓɔɔipimisokɔmʉ. Nʉ ɓi꞉nye kʉ kukumo kuɓukuo Yeso moni ngikʉnanɨ.
Mombi ɔɔ 'ʉja
(Mat 18:1-5; Mak 9:33-40)
46Ɓakpataka ɓambufaniso wai kʉhata kʉmbɨa ɓɔ anɨ‑zʉ a mombi ɔɔ 'ʉja ati ʉndaɓʉ kʉ ɓuɓomu. 47Ɨkyɛmɨngana, Yeso ambʉmbɨa moni ngika ɓi꞉nye kutunguo engo. Kija a꞉chɨka mwana ɔɔ ɗɛnɛkɛ, ambumumaiso anambamba angɔ. 48Ambuɓusigio ɓɔ: « Mombi ngia wa꞊jananɨa mwana ngia akʉ ino yɨsɛmɛ, ambʉ wʉnajananɨa kʉ ɛmɛ. Nʉ mombi ngia wa꞊najananɨa ɛmɛ, ambʉ wʉjananɨa kʉ mombi ngia a꞉natʉma ɛmɛ. Jʉ mombi ngia ɔɔ ɨsʉkʉɓwanɨ ati ʉ ndɛnʉ kʉ ɓuɓomu, iiya a mombi ɔɔ 'ʉja kʉɓaa ɓangɛ. »
Mombi ngia ambʉkɔmʉ makwa wʉndɛnʉ a mombi ʉndɛnʉ
(Mak 9:38-40)
49Kija Yʉanɨ a꞉mutisio aka ɓɔ: « Mʉpananakɨa, kʉna piɛ mombi mʉngana kiso mɨtʉma yɨ ɓabɨa akʉ ino yɨsɔɔ, nʉ ki꞉nye kʉkʉnda nayɔ kʉgbʉma jʉ ɛyɔ ambʉkɔmʉ akʉ undindo nguʉndɛsʉ. » 50Ɨkyɛmɨngana, Yeso ambumutisio ɓɔ: « Nɔɔmʉgbʉmakɔmʉ, jʉ mombi ngia ambʉkɔmʉ ninu kʉyaa, a kʉ mʉngana ʉndɛnʉ. »
Ɓombi ɓʉ Samalɨa ɓʉyaa ɓɔ Yeso ʉkwaa andaɓʉ
51Iya wati ngua wʉ Yeso wɔɔ tʉɛ ekoo ɓisi wa꞉pa tiga kʉ tinene, kija a꞉kwaisio kingono kʉsa anʉ Yelusalɛma. 52Kija a꞉tʉma mikpekpe yɨ ɓatitima apɛɛ. Iya ɓatitima ɓa꞉sa nayɔ, ɓambukumunio akʉ ɨkʉmbʉ mɨngana yɨ Ɓasamalɨa, nayɔ kʉtambanakɨa kumbo kʉ 'uɓomu ngia i꞉nye nʉ taa yengo. 53Ɨkyɛmɨngana, ɓombi ɓʉ ɨkʉmbʉ ngiinanɨ ɓa꞉yaa naɓɔ kʉpana mʉa, jʉ ɓambɨa ɓɔ ɓi꞉nye kʉsa anʉ Yelusalɛma. 54Iya ɔɔ Yakɔbɔ nʉ Yʉanɨ, ɓakpataka ɓʉ Yeso, ɓa꞉kɔ nayɔ moni ngikʉnanɨ, ɓambusigio Yeso ɓɔ: « Makʉʉndɛsʉ, ajʉ wakʉkʉnda ɓɔ kutitio dyaa kʉʉngwa ekoo ʉ ɓisi yambʉɓʉdʉka ɓiɛ? »
55Yeso ambʉnɨtana mesu akʉ ɓi꞉nye‑ɛɛ, ambʉɓʉgʉmʉa.#9:55-56 Mubio nga kɔmɔ kaamatɨa kusigo ɓɔ: Nambʉkɔmʉ kʉmbɨa 'ʉtʉma tɨmanɨ wa ninu kutitio kʉkyɨa moni ngikʉnanɨ. Jʉ ɛmɛ Mwana ngia ʉ Mombi, ma꞉kakɔmʉ kʉmaa mɨtʉma yɨ ɓombi, ɨkyɛmɨngana ma꞉ka nayɔ kuhiiso. 56Kija ɓa꞉sa akʉ ɨkʉmbʉ nga yɛmɔ.
Kʉkpata Yeso
(Mat 8:19-22)
57Ɛɓɔ tii tʉkʉ nɨngbaa yɨ kɨnda, mombi mʉngana ambusigio Yeso ɓɔ: « Ma꞊nakpata mʉa kʉ uɓomu akʉ wabi‑ɛɛ. »
58Kija Yeso a꞉mutisio ɓɔ: « Ɓakakaa ɓa tʉkʉ nʉ mɨfɔkɔɓɔ, abana ɓunoi ngiɓa ɓaabʉmbʉa akʉ maba kʉ ɓisi ɓa tʉkʉ nʉ lɨkáa. Ɨkyɛmɨngana, Mwana ngia ʉ Mombi ambʉkɔmʉ nʉ izi ngia ahumuo‑ɔɔ. »
59Ambusigio mombi nga kɔmɔ ɓɔ: « Nakpata! » Ɨkyɛmɨngana, mombi ngiinanɨ ambumutisio ɓɔ: « Makʉʉɓɨɨ, ambʉ́ wʉnasɨa‑zʉ kʉsa kʉhʉna tidoo. »
60Yeso ambumusigio ɓɔ: « Sɨa mɨnda yɨhʉna mɨnda ngiindaɓʉ, sa yɨsɔɔ kʉɓɨakɨa Ɨsaʉ yɨ Ɓʉngama ɓʉ Asʉɓɨɨ. »
61Mombi nga kɔmɔ ɓata ambusigio Yeso ɓɔ: « Makʉʉɓɨɨ, ma꞊nakpata kpataa. Ɨkyɛmɨngana, nanzo‑zʉ kɨnda mʉsa kʉɓɨakɨa anza ngiasɛmɛ kɨnda. »
62Yeso ambuɓutisio ɓɔ: « Mombi ngia akuɓoto ɨyɛmbɛ kʉmba mʉa, mbise ambʉtɨna ɓata waja ambise, ʉkwananakɔmʉ kukumunio akʉ Ɓʉngama ɓʉ Asʉɓɨɨ. »
Currently Selected:
Luka 9: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
