Matayɔ 21

Yeso ukumunio anʉ Yɛlʉsalɛma

(Mak 11:1-11; Luk 19:28-40; Yʉa 12:12-19)

1Iya ɓa꞉pa tiga tinene nʉ Yelusalɛma, kija ɓa꞉ɓʉya akʉ ɨkʉmbʉ yɨ Bɛtɛfagɛ, anambamba ʉ ɨkpangba yɨ Mijeituni, Yeso ambʉtʉma ɓakpataka ngiɓangɔ ɓapɨnɨ apɛɛ. 2Ambuɓusigio ɓɔ: « Seni akʉ ɨkʉmbʉ ngia ya apɛɛ ʉndɛnʉ akɛ. Nanɨ na꞊gbʉka punda nʉ mwana ɔngɔ ɓʉngɛ. Ɓuɓoneni nambʉnɨkyɨa naɓɔ. 3Ndʉ mombi aniɓukuo moni ekoo ɔngɔ, musigieni ɓɔ: ‹ Makʉʉɓɨɨ anʉ taa yangɔ. › Tʉkʉ nɨma ngiinanɨ, a꞊ninzo ɛyɔ tʉkʉ nzoni. » 4Moni ngikʉnanɨ ka꞉kyɨanɨa ɓwanɨ, kʉkpatanakɨa nʉ moni ngika ɨgbɛ Ɨsaya a꞉sigo jɛnɛ ɓɔ:

5« Sigieni ɓombi ɓʉ gʉlʉ ʉ Siona ɓɔ:

‹ Kanganieni! Ngama ngiʉndɛnʉ akʉka andɛnʉ!

A 'uhue nʉ 'ʉtʉma wʉ majɨɔ, nʉ akʉka ɓuwei ekoo ʉ punda,

ekoo ʉ ɨgbɔndɔ yɨ punda, mwana ʉ punda. › »#Popoko Jak 9:9

6Kija ɓakpataka ngiɓʉnanɨ ɓa꞉sa ɓambʉkyɨa ngbanga tʉkʉ ndʉ aka Yeso a꞉ɓusigio‑ɔɔ. 7Ɓambʉka nʉ punda ɨzɔ nʉ mwana ɔngɔ kʉtaa. Ɓambʉnapioko lɨpʉkʉ ngilʉndaɓʉ ekoo angɔ, Yeso ambuwulo ekoo angɔ ɓʉ jika. 8Ɓombi ɓaja ati ʉ ungbutu wʉ ɓombi nguʉnanɨ, ɓambufaniso naaka lɨpʉkʉ ngilʉndaɓʉ anɨngbaa. Ɓombi nga ɓɔmɔ ɓi꞉nye kʉtɨna mɨtapɨ yɨ matɨ, nʉ kʉnaaka engo anɨngbaa. 9Ungbutu wʉ ɓombi ngiɓa ɓi꞉nye kʉkɨnda apɛɛ ʉ Yeso, kʉndʉ iɓa ɓi꞉nye nayɔ kʉkpata ambise ɓambufaniso nachokoo kusigo ɓɔ:

« Ɨbɨba akʉ Mwana ʉ mwana ʉ Daudi!

Asʉɓɨɨ umbuiso mombi ngia akʉka akʉ ino yɨ Makʉʉɓɨɨ!

Ɨbɨba akʉ Asʉɓɨɨ akʉ mʉa ngua wa ekoo ɓisi nadɨndɨ! »

10Iya Yeso a꞉ɓʉya anʉ Yelusalɛma, ɓombi kʉ ɓuɓomu ɓambʉmaa ɓʉ nzataa. Kija ɓa꞉faniso ɓukuono ɓɔ: « Mombi ngia a‑zʉ anɨ? »

11Ungbutu wʉ ɓombi ɓambumutisio ɓɔ: « Yeso iinanɨ, ɛyɔ a ɨgbɛ ngia a꞉ʉngwa anʉ Najalɛtɛ, amati ʉ gɨpa ʉ Galilaya. »

Yeso ukpinyo ɓombi ɓʉ magabʉ amati ʉ ɨkáa yɨ Asʉɓɨɨ

(Mak 11:15-19; Luk 19:45-48; Yʉa 2:13-22)

12Iya Yeso a꞉kumunio amati ʉ ɨkáa yɨ Asʉɓɨɨ, ambufaniso kpinyo ɓombi ngiɓa ɓi꞉nye kʉgabiso nʉ kʉa kumbo amati ʉ ɨkáa yɨ Asʉɓɨɨ. Ambugbukumoko ɓamɛza ɓʉ ɓombi ngiɓa ɓaaɓaliso falanga, nʉ muweikie kʉ ɓombi ngiɓa ɓi꞉nye kʉgaba ɓapizo. 13Gʉ ɛyɔ naɓɔ ɓɔ: « Ɓa꞉tɨndakɨa ɓɔ: ‹ Ɨkáa ngiisɛmɛ ɓa꞊ɓuisoko ɓɔ ɨkáa yɨ nɨta Asʉɓɨɨ. › Ɨkyɛmɨngana, inu nʉ꞉ɨnɨtanakiso tiga izi yɛɛ junikie yɨ ɓombi ɓʉ ndiɓo! » 14Ɓombi ɓɔɔ ɓuchwie mesu, nʉ ɓombi ɓɔɔ ɓʉjʉnganakɛ, ɓambʉka anambamba ʉ Yeso amati ʉ ɨkáa yɨ Asʉɓɨɨ, kija a꞉ɓuhiiso. 15Kʉnɨna moni kɔɔ mʉmbangɛ ngika Yeso a꞉kyɨa, nʉ nachokoo ngia ɓana ɓi꞉nye kʉnachokoo akʉ ɨkáa yɨ Asʉɓɨɨ kusigo ɓɔ: « Ɨbɨba akʉ Mwana ʉ ngama Daudi! » Moni ngikʉnanɨ ka꞉ijo ɓangama ɓʉ ɓakumu‑kumu ɨzɔ nʉ ɓapananakɨa ɓʉ mapanʉ akʉ 'ʉtʉma ɓʉ gbe. 16Kija ɓa꞉ɓukuo Yeso ɓɔ: « Ajʉ wakʉkɔ moni ngika ɓana ngiɓa ɓakusigo engo kʉtaa ɓiɛ? » Yeso ambuɓutisio ɓɔ: « Oo, makʉkɔ kʉtaa! Ajʉ inu nambupopokokɔmʉ sina Mubio ngika ɓɔ:

‹ Amati ʉ moni kʉ ɓana ngiɓa ɓɔɔ ɗɛ ɗɛ ɗɛ, nʉ ɓana ɓɔɔ kpala kpala

ɔwɛ wa꞉ɓuiso ɨbɨba ngiisɔɔ. › »#Popoko Mʉm 8:3

17Mbise ngiinanɨ, Yeso ambʉɓʉsɨa, ambʉɓʉa amati ʉ gʉlʉ, kija a꞉sa yangɔ kʉkwaa anʉ Betania.

Yeso ʉʉga ɓʉtɨ ngiɓa ɓambikinye nʉ lipumo

(Mak 11:12-14,20-24)

18Kʉɓa ɔngɔ, iya Yeso i꞉nye tiga‑ɔɔ kʉtʉa anʉ Yɛlʉsalɛma, ambʉkɔnɔ taa. 19Ambʉna ɓʉtɨ ngiɓa ɓaaɓusoko ɓɔ mutini anambamba ʉ ɨngbaa, kija a꞉sɨngana tinene naɓɔ. Ɨkyɛmɨngana, chʉkɔmʉ ambʉna ipumo ekoo ɔngɔ gʉkʉ mɨngana, tʉkʉ manɨ ekoo ɔngɔ ɓʉ juku juku. Gʉ ɛyɔ nʉ ɓʉtɨ ngiɓʉnanɨ ɓɔ: « Kʉʉngwa ɨtakɨ‑takɨ ngiakɛ sinani nʉ sinani, ipumo ya꞊mbʉkʉmɔ sina tii ɓata ekoo asɔɔ gʉkʉ ɗɛkɛkɛ. » Gbɛgbɛ tʉkʉ ananɨ, ɓʉtɨ ngiɓʉnanɨ ɓambʉmɔkɔkɔ tʉkʉ ɓʉ waka.#21:19 Figi ya ino yɨ ɓʉtɨ ngiɓʉnanɨ nʉ Ɨfalasɨ 20Ati ngia ɓakpataka ngiɓa ɓʉ Yeso ɓa꞉na‑ɔɔ moni ngikʉnanɨ, yambʉɓʉmbangɨa nadɨndɨ. Ɓambumuɓukuo ɓɔ: « Ɓʉtɨ ngiɓa ɓʉmɔkɔkɔ ɨkyɨkyɨɓʉmʉ tanɨ ɓɔmʉ? » 21Yeso ambuɓutisio ɓɔ: « Tʉkʉ kingono, maninu kusigio ɓɔ ndʉ naɓio nʉ baya nʉ chʉkɔmʉ nʉ jatuoko amati ɔngɔ, nakwanana kʉkyɨa moni kʉɓaa ika ɛmɛ mʉ꞉kyɨa ɓʉtɨ ngiɓa. Abana piɛ tʉkʉ ɨkpangba ngiakɛ nakwanana nayɔ kusigio ɓɔ: ‹ Ɗuunio, kija wabi kʉkwa amati ʉ ɗei ɔɔ ʉja ɓʉ kyɔɔ. › Yakyɨanɨa tʉkʉ ndʉ ananɨ. 22Ɨkyɛmɛ kʉ iɓomu ngia na꞊ta nʉ baya 'upi akʉ nɨta Asʉɓɨɨ, na꞊nyɨa nayɔ nyɨaa. »

Angu ngia wʉ Yeso akʉʉngwa gbanɨ

(Mak 11:27-33; Luk 20:1-8)

23Yeso ambukumunio ɓata amati ʉ ɨkáa yɨ Asʉɓɨɨ. Tiga ati ngia i꞉nye‑ɔɔ kʉpanɨa ɓombi, ɓangama ɓʉ ɓakumu‑kumu, ɨzɔ nʉ ɓagʉgʉ ɓʉ Ɓayuda, ɓambʉka nayɔ kuɓukuo ɓɔ: « Moni kʉ mʉɓomu ngika wakʉkyɨa engo, wa nakɔ kʉkyɨa nʉ ʉpanʉ tɨmanɨ? Nʉ anɨ kʉ a꞉nanzo ɛwɔ? » 24Yeso ambuɓutisio ɓɔ: « Ɛmɛ, ma‑zʉ ninu kʉ kuɓukuo ɨngbaa yɨ moni. Ndʉ nanatisio, kija ɛmɛ ma꞊nɨɓɨa tiga ɓɔ ʉpanʉ ngua makʉkyɨa nawɔ moni ngikʉnanɨ wakʉʉngwa gbanɨ. 25Uɓatiso ngua Yʉanɨ i꞉nye ɓatiso wa꞉ʉngwa ekoo ʉ ɓisi gʉ ɓɔ wa꞉ʉngwa ɔɔ ɓombi? » Kija ɓa꞉faniso yakanaka ati ʉndaɓʉ kusigo ɓɔ: « Ndʉ kasigo ɓɔ wa꞉ʉngwa ekoo ʉ ɓisi, atiɓukuo ɓɔ: ‹ Akʉ moni kʉ ɨmanɨ tiga na꞉mʉbayakɔmʉ? › 26Ndʉ kasigo ɓɔ wa꞉ʉngwa ɔɔ ɓombi, kʉpɨmɨeni ungbutu wʉ ɓombi ngiɓa pɨmɨaa. Jʉ ɛɓɔ kʉ ɓuɓomu ɓaachɨka Yʉanɨ ndʉ ɨgbɛ. »

27Kija ɓamutisio ɓɔ: « Isu kambʉkʉmbɨa. » Gʉ Yeso naɓɔ ɓɔ: « Abana gʉ ɛmɛ, mambʉkʉnɨɓɨa kʉ ɓwanɨ ɓɔ ʉpanʉ ngua makʉkyɨa nawɔ moni ngika wakʉʉngwa gbanɨ. »

Yeso unzo isisinio ekoo ʉ ɓana ɓapɨnɨ

28Yeso ambʉmatɨa ɓata kusigo ɓɔ: « Itungwio ngiindɛnʉ ya tanɨ ekoo ʉ isisinio ngiakɛ? Yi꞉nye nʉ gue mʉngana ngia i꞉nye nʉ ɓana ɓangɔ ɓɔɔ gue ɓapɨnɨ. Kija gue ngiinanɨ a꞉sigio mwana angɔ ngia pʉta ɔngɔ ɓɔ: ‹ Mwana asɛmɛ! Ɓʉɓʉnɨ makʉkʉnda ɓɔ wasaaka kyɨa kuu amati ʉ watɨnɨ wʉ mijabibo nguʉsɛmɛ. › 29Kija a꞉tatɨa ɨsɛ ɓɔ: ‹ Mambʉkɔmʉ kʉsa! › Ɨkyɛmɨngana, mbise ɔngɔ, ambunicho itungwio ngiangɔ, ambʉsa kʉkyɨa kuu tʉkʉ sanɨ. 30Mbise ɔngɔ, ɛyɔ gue ngiinanɨ ambusigio mwana ngia wɔmɔ kʉ ɓwanɨ. Gʉ ɛyɔ gwa ngiinanɨ nayɔ ɓɔ: ‹ Oo, tidoo, mabi bii! › Ɨkyɛmɨngana, mbise ɔngɔ chʉkɔmʉ ambʉsa. » 31« Ati ʉ ɓana ɓapɨnɨ ngiɓʉnanɨ, anɨ iya a꞉kyɨa ɓʉkʉnda ngiɓa ɓʉ ɨsɛ? » Ɓambumutisio ɓɔ: « Mwana ngia ʉ pɛɛ. » Kija Yeso a꞉ɓʉsigio ɓɔ: « Tʉkʉ kingono, maninu kusigio ɓɔ, ɓandɔmbɛ ɓɔɔ ɓulipise manzanza, ɨzɔ nʉ langaka, ɓa꞊nɨɓaa sina kukumunio amati ʉ Ɓʉngama ngiɓa ɓʉ Asʉɓɨɨ. 32Jʉ ati ngia Yʉanɨ ngia i꞉nye ɓatiso ɓombi a꞉ka‑ɔɔ ninu kʉpanɨa moni kɔɔ ngbingbii apɛɛ ʉ Asʉɓɨɨ, inu na꞉mʉbayakɔmʉ. Ɨkyɛmɨngana, tiga ɓandɔmbɛ ɓɔɔ ɓulipise manzanza, ɨzɔ nʉ langaka, ɛɓɔ ɓa꞉mʉbaya tʉkʉ bayanɨ. Abana ndʉ inu na꞉na moni ngikʉnanɨ nʉ mesu kititi, na꞉nichokɔmʉ mɨtʉma ngiindɛnʉ, nʉ na꞉bayakɔmʉ kʉ ɓwanɨ. »

Yeso unzo isisinio ekoo ʉ ɓombi ɓʉ ɨhʉna ɓɔɔ ɓɨɓɨ

(Mak 12:1-12; Luk 20:9-19)

33Kija Yeso a꞉sigo ɓata ɓɔ: « Ʉkeni ɓata isisinio nga yɛmɔ. Yi꞉nye nʉ mombi ngia a꞉hʉna watɨnɨ wʉ mijabibo, ambuukunguo nʉ aga ɓʉ kuu. Ambʉmba ʉpɨa wɔɔ naminyoke lipumo lʉ mijabibo. Ambʉtɨa aga mʉngana ɔɔ ikongo ɓʉ tʉa, aka ekoo ʉ pɨmakɨa watɨnɨ. Mbise ɔngɔ, ambunzo watɨnɨ nguʉnanɨ akʉ lɨkɔndɔ lʉ ɓombi ɓʉ kuu, kija a꞉sa kɨnda. 34Iya wati wɔɔ bʉɛ masɔɔ wa꞉ndana nayɔ, ambʉtʉma ɓombi ɓʉ kuu ngiɓangɔ ɔɔ ɓombi ɓʉ ɨhʉna ngiɓʉnanɨ, kʉchɨka masɔɔ nga kangɔ. 35Ɨkyɛmɨngana, ɛɓɔ ɓombi ɓʉ ɨhʉna ngiɓʉnanɨ, ɓambʉfa ɓombi ɓʉ kuu ngiɓʉnanɨ. Mʉngana ʉndaɓʉ ɓambumutio nʉ ɓɛnda tʉkʉ ɓʉ sɛkɛ. Ɓambʉwa gwa ngia wɔmɔ. Iya wɔmɔ ɓata, ɓambʉmʉɓɛnda nʉ mukopi. 36Mbise ɔngɔ, ambʉtʉma ɓata ɓombi ɓʉ kuu nga ɓɔmɔ, tiga ɓaja kʉɓaa iɓa a꞉ɓʉtʉma pɛɛ. Ɨkyɛmɨngana, ɓambʉɓʉkyananaka ɓata kʉndʉ ɓa꞉kyɨa iɓa ɓʉ pɛɛ. 37Tiga akʉ 'upipio, ambʉtʉma tii tʉkʉ mwana ngiangɔ ɔɔ gue inyeni kusigo ɓɔ: ‹ Ya ndʉ ɓa꞊kumo pɛpɛ mwana ngiasɛmɛ kumoo. › 38Ɨkyɛmɨngana, iya ɓombi ɓʉ kuu ngiɓʉnanɨ ɓa꞉mʉna nayɔ kʉka, ɓambufaniso yakanaka ati ʉndaɓʉ ɓɔ: ‹ Makʉʉ ʉ mʉa ngua iiya akʉka oki. Ikeni, kʉmʉweni, tiga isu kambʉdyɨa mʉa ngua. › 39Kija ɓa꞉mʉfa, ɓambʉɓʉa nayɔ aɓei ʉ watɨnɨ wʉ mijabibo, ɓa꞉mbʉmʉwa. » 40Kija Yeso a꞉ɓukuo tiga ɓɔ: « Ati ngia makʉʉ ʉ watɨnɨ a꞊tʉa sina‑ɔɔ, a꞊kyɨa tiga ɓombi ɓʉ kuu ngiɓʉnanɨ tanɨ? » 41Gʉ ɛɓɔ nʉ Yeso ɓɔ: « Ɓombi ɓɔɔ ɓɨɓɨ ngiɓʉnanɨ, a꞊ɓʉdʉka sina dʉkaa. Kija a꞊napɨa tiga ɓombi nga ɓɔmɔ amati ʉ watɨnɨ nguʉnanɨ, iɓa mbise ʉ bʉa masɔɔ, ɓakwanana nayɔ kʉ kunzo ʉkangɔ akʉ ɨjɨjɨ yɛngɔ. »

42Kija Yeso a꞉ɓutisio ɓata ɓɔ: « Amati ʉ Mubio kɔɔ Tu, ajʉ nambupopokokɔmʉ sina ɓɔ:

‹ Ikopi ngia ɓabʉbʉma ɓɔɔ tɨɛ lɨkáa ɓa꞉igiso anambamba,

ɛyɔ iya ya꞉ka tiga ikopi yɨ dada nadɨndɨ akʉ tungbu wʉ ɨkáa.

Tʉkʉ ɛyɔ Makʉʉɓɨɨ iya a꞉kyɨa ɨkanzi yɨ moni ngikʉnanɨ.

Akʉ isu, iinanɨ, ya moni kɔɔ mʉmbangɛ. ›#Popoko Mʉm 118:22-23

43Maninu kusigio tʉkʉ akʉ ɓʉmba ɓɔ: Ɓa꞊nɨhɨnɨa sina inu Ɓʉngama ngiɓa ɓʉ Asʉɓɨɨ, kija ɓa꞊nzo tiga lɨkáa lʉ ɓanza ngila la꞊kwanana kunzo masɔɔ. [ 44Mombi kʉ uɓomu ngia a꞊kwɨa ikopi ngiinanɨ a꞊ɓunzoo ɓunzoo. Nʉ mombi ngia ya꞊mʉkwɨa ekoo, ya꞊mutio tʉkʉ ɓʉ sɛkɛ sɛkɛ.] »

45Iya ɓangama ɓʉ ɓakumu‑kumu ɨzɔ nʉ Ɓafalisayɔ ɓa꞉kɔ nayɔ moni ngikʉnanɨ Yeso a꞉sigo, kija ɓa꞉mbɨa tʉkʉ nɨma ngiinanɨ ɓɔ unzo lisisinio ngilʉnanɨ tʉkʉ ekoo ʉndaɓʉ. 46Kʉ ɓwanɨ, ɓambufaniso tii tʉkʉ hata ɨngbaa ngia ɓamʉfa nayɔ. Ɨkyɛmɨngana, ɓi꞉nye kukumo tiga ungbutu wʉ ɓombi, jʉ ɓombi ɓi꞉nye chɨka Yeso ndʉ ɨgbɛ.

Currently Selected:

Matayɔ 21: BudKoya

Highlight

Copy