Matayɔ 22

Yeso unzo isisinio ekoo ʉ ʉmbɔ wʉ chɨkana

(Luk 14:15-24)

1Kija Yeso a꞉nzo ɓata ungbutu wʉ ɓombi nguʉnanɨ lisisinio nga lɔmɔ kusigo ɓɔ: 2« Ɓʉngama ngiɓa ɓa ekoo ʉ ɓisi ɓa ngbanga ndʉ ngama mʉngana iya a꞉tambanakɨa mwana angɔ ɔɔ gue ʉmbɔ wʉ chɨkana. 3Ɛyɔ ngama ngiinanɨ ambʉtʉma ɓombi ɓʉ kuu ngiɓangɔ ɔɔ ɓombi ngiɓa ɓa꞉ɓusoko kʉka akʉ ʉmbɔ wʉ chɨkana. Ɨkyɛmɨngana, ɛɓɔ mubika ɓakʉndakɔmʉ kʉka. » 4Kʉ ɓwanɨ, ambʉtʉma ɓata ɓombi ɓʉ kuu nga ɓɔmɔ, ambuɓusigio ɓɔ: « Ɓɨakɨeni ɓombi ngiɓa kuɓusoko akʉ ʉmbɔ ɓɔ: ‹ Moni kʉ muɓomu kusio kʉtambanaka sioo. Mʉ꞉wa ɓugue ɓʉ ɓangɔmbɛ ngiɓʉsɛmɛ wanɨ, ɨzɔ nʉ ɓanama ngiɓʉsɛmɛ ɓɔɔ ngbʉlʉ ngbʉlʉ, idyo yɨpɨa pɨaa. Ikeni kʉdya idyo yɨ chɨkana! › 5Ɨkyɛmɨngana, chʉkɔmʉ moni ngikʉnanɨ kambuɓuduiso 'ʉtʉma gʉkʉ ɗɛkɛkɛ. Ɓambʉnanzana tʉkʉ akʉ lɨngbaa lʉ ɓakuu lʉndaɓʉ ɓʉ nyɛ. Mʉngana ambʉsa akʉ watɨnɨ, kija iya wɔmɔ ambʉsa yangɔ kʉgabanaka. 6Ɓiga nga ɓɔmɔ ɓambufio ɓombi ɓʉ kuu ngiɓʉnanɨ ɓangɔ, kija ɓa꞉ɓiko nʉ ɓɛnda tʉkʉ ɓʉ sɛkɛ, ɓambʉɓʉdʉka. 7Ɛyɔ ngama, ambʉkwa ʉnganga, kija a꞉tʉma ɓasʉda ngiɓangɔ kʉsa kʉdʉka ɓakwa ngiɓʉnanɨ nʉ kʉya gʉlʉ ngiʉndaɓʉ. 8Mbise ɔngɔ, gʉ ngama nʉ ɓombi ɓʉ kuu ngiɓangɔ ɓɔ: ‹ Ʉmbɔ wʉ chɨkana wusio piɛ kutambanaka sioo. Ɨkyɛmɨngana, ɓombi ngiɓa ɓu꞉ɓusoko ɓʉkwananakɔmʉ kʉdya idyo yɨ ʉmbɔ nguʉnanɨ. 9Kʉ ɓwanɨ, seni tii tʉkʉ akʉ majio yɨ mɨngyɛndʉ, kija nasoko ɓombi kʉ ɓuɓomu ngiɓa na꞊ɓʉgbʉka nani kʉka akʉ idyo yɨ chɨkana. › 10Ɓombi ɓʉ kuu ɓambʉsa akʉ mɨngyɛndʉ, ɓambʉmʉma ɓombi kʉ ɓuɓomu ngiɓa ɓi꞉nye naɓɔ kʉgbʉka nani, iɓa ɓɔɔ ɓɨɓɨ kʉndʉ iɓa ɓɔɔ ɓuɗo. Kija ɓa꞉ka naɓɔ, ɨkáa ngia ɓi꞉nye‑ɛɛ kutiniso ʉmbɔ wʉ chɨkana yambuhuo tʉkʉ ɓʉ kpɨ. 11Kija ngama a꞉kumunio amati ʉ ɨkáa ɓɔ ʉna‑zʉ mubika. Ambʉna mombi mʉngana iya a꞉pɨnyakɔmʉ lɨpʉkʉ lʉ ʉmbɔ. 12Ambumuɓukuo ɓɔ: ‹ Adii! Wu꞉kumunio yeni ɨkyɨkyɨɓʉmʉ tanɨ? Ʉna‑zʉ wʉ꞉pɨnyakɔmʉ lɨpʉkʉ lʉ ʉmbɔ kʉ ɓwanɨ? › Ɨkyɛmɨngana, chʉkɔmʉ mombi ngiinanɨ ambumutisio ɨngbaa yɨ moni. 13Ngama ambusigio ɓombi ɓʉ kuu ngiɓangɔ ɓɔ: ‹ Sangeni mombi ngiakɛ mɨtɨndɨ nʉ lɨkɔndɔ, nambumugiso aɓei akʉ umomo! Nani, aɓio tiga amati ʉ ndɨa nʉ dyana menu. › » 14Yeso ambupipio tiga kusigo ɓɔ: « Ɓombi ngiɓa ɓa꞉ɓusoko ɓa ɓaja, ɨkyɛmɨngana iɓa ɓa꞉ɓʉchwa ɓa ɗɛkɛkɛ. »

Ɓafalisayɔ ɓuɓukuo Yeso moni ekoo ʉ lipa manzanza

(Mak 12:13-17; Luk 20:20-26)

15Kija Ɓafalisayɔ ɓa꞉sa kuwulio Yeso ididi kʉhata ɓɔ ʉfana akʉ ipindi tʉkʉ nʉ moni ngika kaɓʉa akʉ moni ngikangɔ makʉɔngɔ. 16Kʉ ɓwanɨ, ɓambʉmʉtʉmɨa mikpekpe yɨ ɓakpataka ngiɓʉndaɓʉ, ɨzɔ nʉ mikpekpe yɨ ɓombi ngiɓa ɓi꞉nye amati ʉ ɨtanda ngia yɨ Ɛlɔdɛ. Ɓambumusigio ɓɔ: « Mʉpananakɨa! Kakʉmbɨa ɓɔ waatɨna moni tʉkʉ akʉ ɓungbingbii. Nʉ waapanɨa ɨngbaa yɨ Asʉɓɨɨ akʉ ɓungbingbii tʉkʉ ndʉ aka yɨ kwananaka‑ɔɔ. Wambakambomboko ɓombi, nʉ ɓombi kʉ ɓuɓomu apɛɛ asɔɔ ɓa tʉkʉ kʉ ngbanga. 17Tɨɓɨa‑zʉ ɓɔ ɔwɛ wakʉna tanɨ? Ajʉ kʉkwanana kʉ kulipa manzanza kʉ ngama ɔɔ ʉja wʉ Ɓalɔma gʉ ɓɔ kɔɔlipakɔmʉ? » 18Ɨkyɛmɨngana, Yeso a꞉mbɨa itungwio yɛɛ ɓɨɓɨ ngiindaɓʉ tʉkʉ pɛɛ. Ambuɓusigio ɓɔ: « Inu ɓafili ngiɓa! Nʉka nɛmɛ kʉnapiikio lipindi jʉtanɨ? 19Napaneni‑zʉ ʉfalanga ngua naalipa nawɔ manzanza. » Kija ɓa꞉munzo 'ukpekpe wʉ ʉfalanga. 20Yeso ambuɓuɓukuo ɓɔ: « Umwendu wʉ anɨ, nʉ ino yanɨ iya ya ekoo ʉ ʉfalanga nguakɛ? » Ɓambumutisio ɓɔ: 21« Umwendu wu Kaisala ngama ɔɔ ʉja wʉ Ɓalɔma. » Yeso ambuɓusigio ɓɔ: « Nzeni Kaisala kʉ ɨkyɛmɛ ngia yɨ Kaisala, nzeni Asʉɓɨɨ kʉ ɨkyɛmɛ ngia yɨ Asʉɓɨɨ. » 22Iya ɓa꞉kɔ nayɔ moni ngika Yeso a꞉ɓutisio, kambʉɓʉmbangɨa nadɨndɨ. Ɓambʉmʉsɨa tii tʉkʉ ɓʉ vu, ɓambʉsa yɨndaɓʉ.

Ɓasadukayɔ ɓuɓukuo Yeso moni ekoo ʉ jʉkana akʉ ingyo

(Mak 12:18-27; Luk 20:27-40)

23Tʉkʉ isiinanɨ, Ɓasadukayɔ ngana ngana ɓambʉka ɔɔ Yeso. Ɛɓɔ ɓaasigo ɓɔ jʉkana akʉ ingyo yambʉkɔmʉ. Kija ɓa꞉musigio ɓɔ: 24« Mʉpananakɨa! Mʉsa a꞉sigo ɓɔ ndʉ mombi awo, ambʉsɨa moi ɓʉ꞉nʉtenikɔmʉ nayɔ, yɨkwanana manye ngia ɔɔ mwana ʉmʉnazana ambʉ ʉnʉtɨa tiga manye ɔɔ 'ʉkʉʉ ɓana.#Popoko Tung 25:5 25Ʉna tɔ, yi꞉nye ati ʉndɛsʉ nʉ ɓandambʉ ʉmalɨanɨka iɓa ɓi꞉nye tʉkʉ ɓaaɓʉa mʉngana. Pʉta ambʉchɨka moi, ambʉwo chʉkɔmʉ ɓambʉnʉta nayɔ. Kija a꞉sɨa woko tiga akʉ lɨkɔndɔ lʉ manye ngia a꞉mijo akʉ 'ʉkɔngɔ. 26Yambʉkyananakɨa nʉ manye ngia a꞉mijo tʉkʉ ngbanga. Yi꞉nye kʉ ɓwanɨ nʉ gwa ngia wʉ ɓeetu, yambʉsanaka tʉkʉ ɓwanɨ kʉɓʉya tʉkʉ akʉ gwa ngia wʉ ʉmalɨanɨka. 27Mbise ʉndaɓʉ kʉ ɓuɓomu, moi ngiinanɨ ambuwo tiga kʉ woni. 28Tiga akʉ ɓisi ɓʉ jʉkana akʉ ingyo, moi ngiinanɨ aɓio tiga moi anɨ? Jʉ i꞉nye moi ʉndaɓʉ ɛɓɔ kʉ ɓuɓomu ʉmalɨanɨka! » 29Yeso ambuɓutisio ɓɔ: « Inu na amati ʉ ɓujangi‑jangi, jʉ nambakapimiso moni ngika ka amati ʉ Mubio, abana kʉndʉ angu ngia wʉ Asʉɓɨɨ. 30Jʉ isiya ɓombi ngiɓa ɓa꞉dʉka ɓa꞊jʉkana sina‑ɔɔ akʉ ingyo, ɓugue nʉ ɓoi ɓambukuɓio sina tii ɓata kʉchɨkana. Ɓombi ɓaɓio sina tiga ndʉ ɓamalaika ngiɓa ɓa ekoo ʉ ɓisi. 31Nʉ ekoo ʉ moni kʉ jʉkana akʉ ingyo, ajʉ inu nambupopokokɔmʉ sina Mubio kʉ Asʉɓɨɨ aka a꞉nisigio‑ɔɔ ɓɔ: 32‹ Ɛmɛ ma Asʉɓɨɨ wʉ Abalama, Asʉɓɨɨ wʉ Ɨsaka, nʉ Asʉɓɨɨ wʉ Yakɔbɔ. › Asʉɓɨɨ ambʉkɔmʉ Asʉɓɨɨ wʉ ɓombi ngiɓa ɓa꞉dʉka, ɨkyɛmɨngana a Asʉɓɨɨ wʉ ɓombi ngiɓa ɓa kʉkʉʉ. » 33Ungbutu wʉ ɓombi ngiɓa ɓi꞉nye kʉkɔ moni ngikʉnanɨ, ʉpanʉ wɔngɔ wambʉɓʉmbangɨa nadɨndɨ.

Ʉpanʉ ngua wɔɔ ʉja

(Mak 12:28-34; Luk 10:25-28)

34Iya Ɓafalisayɔ ɓa꞉kɔ ɓɔ Yeso ʉkatisio Ɓasadukayɔ tʉkʉ ɓʉ nyɛ, ɓambʉmʉmanakɨa. 35Mʉngana ati ʉndaɓʉ ngia i꞉nye bʉbʉma wʉ mapanʉ ambumuɓukuo moni nayɔ kʉpɨndɨa ipindi. 36Kija a꞉muɓukuo ɓɔ: « Mʉpananakɨa! Amati ʉ mapanʉ ngika kʉ Mʉsa, ʉpanʉ tɨmanɨ ʉwa wɔɔ ʉja kʉɓaa ika kɔmɔ kʉ muɓomu? » 37Ambumutisio ɓɔ: « Kʉnda Asʉɓɨɨ Makʉasɔɔ nʉ 'ʉtʉma nguʉsɔɔ kʉ uɓomu, nʉ ʉwɔndɔ wʉ 'ʉtʉma nguʉsɔɔ kʉ uɓomu, nʉ mbɨmbanaka ngiisɔɔ kʉ iɓomu. 38Ʉpanʉ ngua wʉ pɛɛ, nʉ ʉwa wɔɔ ʉja uʉnanɨ. 39Ʉwa wʉ ɓepini wa ngbanga kʉ nʉ uwʉnanɨ, wa ɓɔ: ‹ Kʉnda mangɛ kʉndʉ waakʉndana ɔwɛ makʉɔngɔ. ›#Popoko Ɓal 19:18 40Mapanʉ kʉ muɓomu ngika kʉ Mʉsa, nʉ moni kʉ lɨgbɛ ka mʉmaɨ tʉkʉ ekoo mapanʉ kapɨnɨ ngikʉnanɨ. »

Klisito a ʉja kʉɓaa Daudi

(Mak 12:35-37; Luk 20:41-44)

41Ati ngia Ɓafalisayɔ ɓi꞉nye‑zʉ‑ɔɔ ɓʉmʉmanɨɛ tʉkʉ ananɨ, Yeso ambuɓusigio ɓɔ: 42« Inu naasigo‑zʉ ɓɔ Masɨa a anɨ? Nʉ a꞉ɓʉa akʉ anza ngia wʉ anɨ? » Ɓambumutisio ɓɔ: « A꞉ɓʉa akʉ anza wʉ Ngama Daudi. » 43Kʉ ɓwanɨ, Yeso ambuɓuɓukuo ɓata ɓɔ: « Ya꞉kwa tiga tanɨ iya 'Ʉtʉma wɔɔ Tu wa꞉titio‑ɔɔ Daudi kusoko Masɨa ɓɔ Makʉʉɓɨɨ, ati ngia asigo‑ɔɔ ɓɔ:

44‹ Makʉʉɓɨɨ Asʉɓɨɨ a꞉sigio Makʉasɛmɛ ɓɔ:

Wulo akʉ ɨkɔndɔ yɨ guɔngɔ ngiisɛmɛ,

kʉɓʉya tʉkʉ aka ma꞊napɨa‑ɔɔ ɓakwa ngiɓʉsɔɔ,

izi yɛɛ napɨɛ mɨtɨndɨ ngiisɔɔ. ›#Popoko Mʉm 110:1

45Ndʉ Daudi aɓio‑zʉ nayɔ kusoko ɓɔ ‹ Makʉʉɓɨɨ ›, aɓio tiga mwana ʉ mwana ʉ Daudi ɨkyɨkyɨɓʉmʉ tanɨ? » 46Mombi gʉkʉ mʉngana a꞉mutisiokɔmʉ ɓata moni. Kʉʉngwa isiinanɨ, mombi mʉngana a꞉kanyokɔmʉ tii ɓata nayɔ kuɓukuo ɨngbaa yɨ moni.

Currently Selected:

Matayɔ 22: BudKoya

Highlight

Copy