Matayɔ 23

Yeso unzo ʉpanʉ ekoo ʉ ɓapananakɨa ɓʉ mapanʉ nʉ Ɓafalisayɔ

(Mak 12:38-39; Luk 11:43-46; 20:45-47)

1Kija Yeso a꞉sigio ungbutu wʉ ɓombi ɨzɔ nʉ ɓakpataka ngiɓangɔ ɓɔ: 2« Ɓapananakɨa ɓʉ mapanʉ nʉ Ɓafalisayɔ, kuu ngiindaɓʉ ya kʉngakanakisio ɓombi mapanʉ ngika kʉ Mʉsa. 3Kʉ ɓwanɨ, nʉkwanana kʉkɔ moni ngika ɓaayaka, nambʉkʉkyananakɨa. Ɨkyɛmɨngana, nɔɔkpatakɔmʉ ɨkyananakɨa ngiindaɓʉ. Jʉ moni ngika ɓaayaka, ɛɓɔ ɓakʉɓɔngɔ ɓambakakʉkyananakɨa. 4Ɓaasangakɨa ɓombi kumbo ɔɔ ɓuto ɓuto, kija ɓaaɓufuɓiso ɛyɔ akʉ mapaka. Ɨkyɛmɨngana, ɛɓɔ ɓakʉɓɔngɔ ɓambakaɓoto, abana tʉkʉ napɨa ɨkɔndɔ ekoo ɔngɔ. 5Moni kʉ muɓomu ngika ɓaakyɨa, ya tʉkʉ ekoo ʉ panana apɛɛ ʉ ɓombi. Ɓaasangaka magba kʉ lɨpʉkʉ akʉ lɨtɔkɔ yɛmɔ akʉ makamba, ika ɓi꞉nye tɨndakɨa‑ɔɔ mɨngbɛ ngana ngana yɨ ɨsaʉ yɨ Asʉɓɨɨ. Liguɓio lʉ ɓakɔtɨ ngiɓʉndaɓʉ laakyɨa lɨta lɨta. 6Akʉ ɓisi ɓʉ ʉmbɔ wɔɔ ʉja, ɓaakʉnda nadɨndɨ kuwulo nʉ ɨbɨba akʉ muweikie ngika kʉ pɛɛ, nʉ ika kɔɔ mʉnyɨɛ amati ʉ lɨkáa lʉ nɨta ngilʉndaɓʉ. 7Ɛɓɔ ɓaakʉnda nadɨndɨ ɓɔ ɓuɓuɓukuo nʉ ɨbɨba akʉ lɨmbaa, nʉ ɓaakyɨa naɓɔ kusoko ɓɔ ‹ Mʉpananakɨa! ›. 8Ɨkyɛmɨngana, inu nɔɔbayakɔmʉ ɓɔ ɓuɓio ninu kusoko ɓɔ: ‹ Mʉpananakɨa! ›. Jʉ inu nanʉ Mʉpananakɨa tʉkʉ mungono, nʉ na kʉ ɓuɓomu tʉkʉ ɓayoo. 9Nʉ yeeɓiokɔmʉ nʉ mombi akʉ ɨtaka ngia, iya namusoko ɓɔ: ‹ Tidoo! › Jʉ nanʉ Atɔ ʉndɛnʉ tʉkʉ mʉngana iya a ekoo ʉ ɓisi. 10Nʉ nɔɔbayakɔmʉ ɓɔ ɓuɓio ninu kusoko ɓɔ ‹ Ngama! › Jʉ nanʉ Ngama mʉngana tʉkʉ Klisito kʉ nangana. 11Mombi ɔɔ 'ʉja ati ʉndɛnʉ ʉkwanana kuɓio mombi ʉ kuu ʉndɛnʉ. 12Nʉ ndʉ mombi aɓio kʉnana nɨkʉʉ, Asʉɓɨɨ a꞊mijiso tiga nɨsɨ. Ɨkyɛmɨngana, mombi ngia aijisiniso nɨsɨ, Asʉɓɨɨ amʉzono tiga nɨkʉʉ. »

(Mak 12:40; Luk 11:39-52; 20:45-47)

13« Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ inu nakʉdɨkpɨa ɓombi umongu ngua wɔɔ kumunie amati ʉ Ɓʉngama ngiɓa ɓa ekoo ʉ ɓisi! Inu ɓakʉɓɔngɔ nambikinye kukumunio kʉ ɓwanɨ. Nʉ ɓombi ngiɓa ɓaɓio kʉhata kʉkumunio‑ɛɛ, nambakaɓʉsɨa ɓɔ ɓukumunio kʉ ɓwanɨ. 14[Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ naahɨnɨa ɓawoko kumbo ngiʉndaɓʉ kʉ uɓomu, nambuɓio tʉkʉ kʉpanana nʉ nɨta ngiindɛnʉ yɛɛ ɨta ɨta. Kʉ ɓwanɨ, 'ʉkɔmbɔ nguʉndaɓʉ waɓio sina ɓʉkaɨ nadɨndɨ.]

15Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ naakɨnda nadɨndɨ amati ʉ lɨkʉmbʉ lʉ ɨtaka kʉ liɓomu, nʉ amati ʉ ɓaɗei ɓɔɔ ɓʉkpɔkpɔ aka ekoo ngia ɓɔ nʉnyɨa nʉ mombi mʉngana iya abaya ɨtanda ngiindɛnʉ. Nʉ ati ngia na꞊nyɨa‑ɔɔ nayɔ, namʉnɨtanakiso tiga mombi ɔɔ sɛ akʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá nɨsɨ kapɨnɨ ninu kʉɓaa inu. 16Ikoko ninu ɓombi ɓɔɔ ɓuchwie mesu ngiɓa nakʉkɨndakiso ɓombi nga ɓɔmɔ! Inu ngiɓa naasigo ɓɔ mombi ʉtɨneni silika akʉ ino yɨ ɨkáa yɨ Asʉɓɨɨ, iinanɨ yambʉkɔmʉ nʉ ɨkyɛmɛ. Ɨkyɛmɨngana, ndʉ atɨna silika akʉ ino yɨ ɔlɔ ngia ɓa꞉'uɓoso akʉ ɨkáa yɨ Asʉɓɨɨ, yɨtanɨa ɓɔ ʉkyananakɨa silika ngiinanɨ angɔ tʉkʉ kyananakɨaa. 17Inu lijangi, nʉ ɓombi ɓɔɔ ɓuchwie mesu! Tiga ɨmanɨ yɨɓaa ɨkyɛmɛ yɛmɔ nʉ ɨjangɨa nadɨndɨ? Gʉ yɛmɔ ɔlɔ ngia a na akʉ ɨkáa yɨ Asʉɓɨɨ ngia yaaikiso ɔlɔ kuɓio 'ʉjaɓanakɨɛ? 18Naasigo kʉ ɓɔ: ‹ Ndʉ mombi atɨna silika akʉ ino yɨ gbɔgbɔ ɔɔ yɨɛ Asʉɓɨɨ 'ʉtʉmbɨa wʉ ɓanama, iinanɨ yambʉkɔmʉ ɨkyɛmɛ. Ɨkyɛmɨngana, ndʉ atɨna akʉ ino yɨ apɛpɛ gbagba ngia a na ekoo ʉ gbɔgbɔ, yɨtanɨa ɓɔ ʉkyananakɨa silika ngiinanɨ angɔ tʉkʉ kyananakɨaa. › 19Inu ɓombi ɓɔɔ ɓuchwie mesu! Ɨmanɨ yanʉ ɨjangɨa kʉɓaa ɨkyɛmɛ nga yɛmɔ? Gʉ apɛpɛ, gʉ yɛmɔ gbɔgbɔ ɔɔ yɛ 'ʉtʉmbɨa ngia akyiiso apɛpɛ kuɓio tu? 20Kʉ ɓwanɨ, mombi ngia aatina silika akʉ ino yɨ gbɔgbɔ ɔɔ yɛ 'ʉtʉmbɨa, aatɨna akʉ ino yɨ gbɔgbɔ ɔɔ yɛ 'ʉtʉmbɨa nʉ ɨkyɛmɛ kʉ iɓomu ngia ya ekoo ɔngɔ. 21Mombi ngia akʉtina silika akʉ ino yɨ ɨkáa yɨ Asʉɓɨɨ, akʉtɨna silika akʉ ɨkáa yɨ Asʉɓɨɨ, nʉ akʉ Asʉɓɨɨ ngia a amati ɔngɔ. 22Nʉ ati ngia mombi ʉtɨna‑ɔɔ silika akʉ ino yɨ ekoo ʉ ɓisi, ambʉ ʉtɨna tiga akʉ ino yɨ izi yɨ ɓuwei yɨ ɓʉngama ngia yɨ Asʉɓɨɨ, nʉ ɓata tiga kʉ akʉ ino yɨ mombi ngia aɓuwei na ekoo ɔngɔ.

23Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ naanzo Asʉɓɨɨ mʉngana wʉ kumi wʉ ɓana ɓʉ lɨgbɛɛ lɔɔ limve tɨpɨ tɨpɨ ila ɓaazɨa nalɔ idyo, ila naalɨhʉna. Ɨkyɛmɨngana, nʉsɨa moni ngika kanʉ ɨjangɨa nadɨndɨ amati ʉ mapanʉ sɨaa. Ʉna tɔ, moni ngika nʉkwanana piɛ kʉkyɨa engo ya moni kɔɔ ngbingbii, nʉ kuɓio nʉ 'ʉtʉma wɔɔ nɨɛ ɓombi ikoko, nʉ kuɓio nʉ baya. Ɨkyɛmɨngana, chʉkɔmʉ nambʉpaa moni nga kɔmɔ kʉ ɓwanɨ. 24Inu ɓombi ɓɔɔ ɓʉchwie mesu ngiɓa naakɨndakiso ɓombi! Naaisukuo ɓapapa amati ʉ ɨkyɛmɛ ngia naamwa, ɨkyɛmɨngana nambumio nama ɔɔ ʉja ngia ɓaamusoko ɓɔ ngamia!

25Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ inu naajaɓa ʉpata, nʉ zanɨ tʉkʉ ɓei ɔngɔ. Ɨkyɛmɨngana, amati ɔngɔ, tʉkʉ kumbo ɔɔ ɓɨɓɨ a 'uhue amati ndʉ ndiɓo nʉ taa yɛɛ ɓɨɓɨ. 26Ɔwɛ mombi ɔɔ chwie mesu 'Ufalisayɔ! Jaɓa‑zʉ ʉpata amati ɔngɔ, kʉ ɓwanɨ, ɓei ɔngɔ a꞊jaɓanɨa tiga kʉ iɗo ɓʉ ngwa!

27Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Na ndʉ manzaʉ ngika ɓa꞉kʉɗɨa nʉ tʉmʉ kɔɔ tu, ambʉ‑gʉ pe, na amati ɔngɔ, tʉkʉ muho kʉ mɨnda ka‑ɛɛ, ɨzɔ nʉ mɨgbʉ yɨ kumbo kʉ di di di ɔɔ 'ukpulunie nʉ ɔɔ pʉɛ. 28Inu na ngbanga tʉkʉ ɓwanɨ, jʉ akʉ mesu kʉ ɓombi, naanyɨa ndʉ ɓombi ɓɔɔ ngbingbii, ɨkyɛmɨngana amati ʉndɛnʉ ninyeni tʉkʉ ɓafili nʉ ɓombi ɓʉ ɓʉɓɨɓɨ.

29Ikoko ninu ɓapananakɨa ɓʉ mapanʉ nʉ Ɓafalisayɔ, inu ɓafili! Jʉ naatɨa manzaʉ kʉ lɨgbɛ, nʉ naatambanaka ika kʉ ɓombi ɓɔɔ ngbingbii apɛɛ ʉ Asʉɓɨɨ ɓʉ pɛ. 30Naasigo ɓɔ: ‹ Ambʉ́ ndʉ ki꞉nye jɛnɛ kʉ ananɨ, ati ngia ɓakuku ngiɓʉndɛsʉ ɓa꞉nzɨlakiso‑ɔɔ miniki kʉ lɨgbɛ, ambʉ́ isu ka꞉kumunikiokɔmʉ ididi yɛngɔ naɓɔ kʉdʉka. › 31Iiya ɓɔ, kʉ inu ɓakʉɓɔngɔ nakʉpananiso ɓɔ na ɓanɔnɔ ɓʉ ɓombi ngiɓa ɓa꞉dʉka lɨgbɛ! 32Kʉ ɓwanɨ, moni ngika ɓatʉngwanɨ ɓʉndɛnʉ ɓa꞉faniso jɛnɛ, inu kʉsɨnganakiseni tiga nʉpɛɛ nambukupipo!

33Inu ngiɓa na ɓɨɓɨ ndʉ ɓazɨɨ! Naɓwanaka‑zʉ 'ʉkɔmbɔ ngua wɔɔ sɛ amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá nɨngbaa tɨmanɨ? 34Kʉ ɓwanɨ, ukeni moni ngika iɗo, jʉ maninu kʉtʉmɨa lɨgbɛ nʉ ɓombi ɓɔɔ ɓupimise moni, nʉ ɓapananakɨa ɓʉ mapanʉ. Ɓɔmɔ ati ʉndaɓʉ na꞊ɓʉdʉka dʉkaa, nambʉɓakaka ɓɔmɔ ekoo ʉ mʉsalaba. Iɓa ɓɔmɔ na꞊ɓʉɓɛnda tiga fimbo amati ʉ lɨkáa lʉ nɨta ngilʉndɛnʉ, kija na꞊ɓʉkpʉngbʉa amati ʉ ɓagʉlʉ tʉkʉ kʉ ɓuɓomu. 35Ɛɛ ya ɓwanɨ! Kingono inu na꞊fuɓuo 'ʉkɔmbɔ wʉ miniki kʉ ɓombi kʉ ɓuɓomu ngiɓa ɓa꞉ɓʉdʉka akʉ ɨtaka tʉkʉ ɨsʉkʉɓwanɨ, kʉʉngwa akʉ Abɛlɛ mombi ɔɔ ngbingbii, kʉɓʉya akʉ Jakalɨa mwana ʉ Balakɨa, iya na꞉mʉwa amati ʉ ɨkáa yɨ Asʉɓɨɨ, ati ʉ mʉa wɔɔ tu nʉ gbɔgbɔ ɔɔ yɛ 'ʉtʉmbɨa.#23:35 Amati ʉ Mubio kɔɔ Tu, akʉ Ɓayuda, 'ʉtʉmbɨa ngua wʉ pɛɛ wi꞉nye Abɛlɛ, iya ɓa꞉kpanga nayɔ kʉwa. Nʉ 'ʉtʉmbɨa ngua wʉ 'upipio, wi꞉nye ɨgbɛ Jakalɨa iya ɓa꞉pipio nayɔ kʉwa. Iinanɨ, popoko amati ʉ 'ʉkpanganɨa 4, nʉ amati ʉ Wati ngua wʉ ɓepini 24:20-22. 36Maninu kusigio tʉkʉ kingono ɓɔ, 'ʉkɔmbɔ wʉ moni ngikʉnanɨ kʉ muɓomu wakʉsa ninu kʉkwɨa tii tʉkʉ inu ɓombi ngiɓa ɓʉ ɓʉɓʉnɨ! »

Yeso akʉdyɨa gʉlʉ ʉ Yelusalɛma ikoko

(Luk 13:34-35)

37Yeso ambusigo ɓata ɓɔ: « Huu! Inu ɓombi ɓʉ Yelusalɛma. Inu ɓombi ɓʉ Yelusalɛma! Inu ngiɓa naamaa lɨgbɛ lʉ Asʉɓɨɨ! Nʉ ndʉ ɓaanɨtʉmɨa ɓatitima, naaɓʉdʉka tʉkʉ dʉkaa naɓɔ kʉɓɛnda nʉ mukopi. Ʉna tɔ, nɨsɨ mʉpɨtanɨ mʉpaahata ninu kʉmʉma anambamba asɛmɛ, ngbanga ndʉ iya kɔɓɔ aamʉma‑ɔɔ ɓana ɓangɔ ɛsɨ ʉ mapapandʉa, ɨkyɛmɨngana chʉkɔmʉ nambuɓio kʉkʉnda! 38Ɨkʉmbʉ ngiindɛnʉ ya꞊tukuo tii tʉkʉ matʉnga. 39Maninu kusigio ɓɔ, kʉʉngwa ɨtakɨ‑takɨ ngiakɛ, nambʉkʉnana tii ɓata, kʉɓʉya tʉkʉ ati ngia na꞊sigo sina‑ɔɔ ɓɔ: ‹ Asʉɓɨɨ umbuiso mombi ngia akʉka akʉ ino yɨ Makʉʉɓɨɨ! › »#Popoko Mʉm 118:26

Currently Selected:

Matayɔ 23: BudKoya

Highlight

Copy