Malɨkɔ 11
11
Yeso ukumunio anʉ Yelusalɛma
(Mat 21:1-11; Luk 19:28-40; Yʉa 12:12-19)
1Iya ɓa꞉pa tiga tinene nʉ Yelusalɛma, akʉ ɨkʉmbʉ yɨ Bɛtɛfagɛ nʉ Betania, anambamba ʉ ɨkpangba yɨ Mijeituni, Yeso ambʉtʉma ɓakpataka ɓangɔ ɓapɨnɨ apɛɛ. 2Ambuɓusigio ɓɔ: « Seni akʉ ɨkʉmbʉ ngia ya apɛɛ ʉndɛnʉ akɛ. Ati ngia na꞊kumunio‑ɔɔ nani, na꞊gbʉka punda mʉngana 'ʉngɛ iya mombi ambuɗitokɔmʉ ekoo ɔngɔ. Muɓoneni nambʉnɨkyɨa nayɔ. 3Ndʉ mombi aniɓukuo ɓɔ: ‹ Jʉtanɨ nakʉkyɨa ɓwanɨ? ›, musigieni ɓɔ: ‹ Makʉʉɓɨɨ akʉkʉnda ɓʉmʉsɨa nayɔ. Ɨkyɛmɨngana, a꞊mutuiso tuiso mbise ɗɛkɛkɛ. › » 4Kija ɓa꞉sa tʉkʉ ɓwanɨ, ɓambʉgbʉka mwana ʉ punda 'ʉngɛ aɓei, anambamba ʉ ɨngbaa, anʉ umongu mungono ɓɔ. Ɓambumuɓono. 5Ɓombi ngana ngana ngiɓa ɓi꞉nye nanɨ, ɓambuɓuɓukuo ɓɔ: « Nakʉkyɨa ɨmanɨ ananɨ? Jʉtanɨ nakuɓono mwana ʉ punda ngiinanɨ? » 6Kija ɛɓɔ ɓa꞉ɓutisio ngbanga kʉndʉ aka Yeso a꞉ɓusigio‑ɔɔ, ɓambʉɓʉsɨa kʉsa nayɔ. 7Ɓambʉɨkyɨa Yeso nʉ mwana ʉ punda ngiinanɨ, ɓambʉnaa lɨpʉkʉ ekoo angɔ, gʉ ɛyɔ ɓuwule ekoo ɔngɔ ɓʉ jika. 8Ɛyɔ tii tʉkʉ kʉsa, ɓombi ɓaja ɓambufaniso naa lɨpʉku akɛsɨ, ɓɔmɔ kʉnaa mɨtapɨ yɨ matɨ ngia ɓi꞉nye kʉtɨna akʉ ɓanzɛnzɛ. 9Ɓombi ngiɓa ɓi꞉nye kʉsa apɛɛ, kʉndʉ iɓa ɓi꞉nye naɓɔ kʉkpata ambise, ɓambufaniso tʉɓɨa ɓɔ:
« Asʉɓɨɨ ʉchɨka ɨbɨba,#11:9 Asʉɓɨɨ ʉchɨka ɨbɨba: Yɛmɔ ɓɔ « Hosana » nʉ ɨbʉla.
Umbuiso mombi ngia akʉka akʉ ino yɨ Makʉʉɓɨɨ Asʉɓɨɨ!
10Asʉɓɨɨ umbuiso ɓʉngama ngiɓa ɓakʉka,
ɓʉngama ngiɓa ɓʉ tidoo ngiʉndɛsʉ Daudi!
Asʉɓɨɨ ʉchɨka ɨbɨba akʉ mʉa ngua wa ekoo ʉ ɓisi nadɨndɨ! »
11Kija Yeso a꞉ɓʉya anʉ Yelusalɛma, ambukumunio amati ʉ ɨkáa yɨ Asʉɓɨɨ. Iya a꞉pipo nayɔ kʉnaka mʉa, ambʉsa tiga mesu anʉ Betania ɨzɔ nʉ ɓakpataka ngiɓangɔ kumi nʉ ɓapɨnɨ, jʉ yi꞉nye tiga nɨpasɨ.
Yeso ʉʉga ɓʉtɨ ngiɓa ɓambikinye mɔ lipumo
(Mat 21:18-19)
12Kʉɓa ɔngɔ, iya Yeso i꞉nye tiga kʉʉngwa anʉ Betania, ambʉkɔnɔ taa. 13Ɛyɔ zʉ kʉ danga ɓɔ, ambʉna ɓʉtɨ mʉngana nʉ manɨ ɓu juku juku. Ambʉsa ɛsɨ ɔngɔ ɓɔ ʉna gɔ ipumo yɛɛ ɨdyɛ. Ɨkyɛmɨngana, iya a꞉sa kʉ tinene naɓɔ, a꞉gbʉka tʉkʉ manɨ ekoo ɔngɔ ɓʉ juku juku, jʉ yambikinye ɨjɔ yɨ lipumo. 14Kʉ ɓwanɨ, ambʉʉga ɓʉtɨ ngiɓʉnanɨ kusigo ɓɔ: « Sinani nʉ sinani, mombi ambʉkʉdya sina ɓata ipumo yɨsɔɔ! »
Ɓakpataka ngiɓangɔ ɓambʉkɔ moni ngikʉnanɨ tʉkʉ kɔnɨ.
Yeso ukpinyo ɓombi ɓʉ magabʉ akʉ ɓʉmba ɓʉ ɨkáa yɨ Asʉɓɨɨ
(Mat 21:12-17; Luk 19:45-48; Yʉa 2:13-22)
15Iya Yeso a꞉ɓʉya anʉ Yelusalɛma, ambukumunio amati ʉ ɨkáa yɨ Asʉɓɨɨ. Ambufaniso kpinyo ɓombi ngiɓa ɓi꞉nye kʉgabiso nʉ kʉa kumbo amati ʉ ɨkáa yɨ Asʉɓɨɨ. Ambugbukumoko ɓamɛza ɓʉ ɓombi ngiɓa ɓaaɓaliso falanga, nʉ muweikie kʉ ɓombi ngiɓa ɓi꞉nye kʉgaba ɓapizo. 16Chʉkɔmʉ ambʉsɨa mombi gʉkʉ mʉngana kʉɓaa nʉ ɨkyɛmɛ ɨndandɛ na akʉ ɓʉmba ɓʉ ɨkáa yɨ Asʉɓɨɨ. 17Ambufaniso kunzo mapanʉ kusigo ɓɔ: « Asʉɓɨɨ a꞉sigo amati ʉ Mubio ɓɔ: ‹ Ɨkáa ngiisɛmɛ ɓa꞊ɓuisoko ɓɔ ɨkáa yɨ nɨta yɨ mababa kʉ ɓombi kʉ muɓomu. › Ɨkyɛmɨngana, inu nʉɨnɨtanakiso tiga izi yɛɛ junikie yɨ ɓombi ɓʉ ndiɓo. » 18Iya ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓa꞉mʉkɔ kʉyaka ɓwanɨ, ɓambufaniso hata ɓɔ ɓamʉwa nɨngbaa tɨmanɨ. Ʉna tɔ, ɓi꞉nye ɓata nayɔ kʉ kukumo jʉ ʉpanʉ nguangɔ wa꞉ɓoto mɨtʉma yɨ ɓombi ɓaja. 19Iya ɨpasɨ ya꞉dʉa nayɔ, ɔɔ Yeso nʉ ɓakpataka ngiɓangɔ ɓambʉɓʉa aɓei ʉ gʉlʉ.
Angu ngia wʉ baya nʉ nɨta Asʉɓɨɨ
(Mat 21:20-22)
20Tiga kʉɓa ɔngɔ, iya ɓi꞉nye tiga kʉɓaa anɨngbaa, ɓakpataka ɓambʉna ɓʉtɨ ngiɓa ɓaaɓusoko ɓɔ mutini, iɓa Yeso a꞉ɓʉʉga ɓʉmɔkɔkeni kʉɓʉya tʉkʉ akʉ mii yɛngɔ ɓʉ ke ke ke. 21Pɛtɛlɔ ambutunguo moni ngika Yeso a꞉yaka. Ambusigio Yeso ɓɔ: « Mʉpananakɨa! Ʉna ɓʉtɨ ngiɓa ɓaaɓusoko ɓɔ mutini ngiɓa wa꞉ɓʉʉga bɛ akʉ ɓʉmɔkɔkɔ‑ɛɛ! » 22Yeso ambuɓusigio ɓɔ: « Ɓieni tʉkʉ nʉ baya akʉ Asʉɓɨɨ! 23Mombi usigieni ɨkpangba ngia ɓɔ: ‹ Ɗuunio aka, wambʉsa kʉkwa amati ʉ ɗei ɔɔ 'ʉja ›, chʉkɔmʉ ambuɓio nʉ ɓatanga akʉ 'ʉtʉma, ambʉbaya tʉkʉ ɓɔ moni ngika ʉ꞉yaka ka꞊kyɨanɨa kyɨanɨanɨ. Tʉkʉ kingono, maninu kusigio ɓɔ ka꞊kyɨanɨa tʉkʉ ndʉ ananɨ. 24Iiya maninu kusigio ɓɔ, ɨkyɛmɛ kʉ iɓomu ngia na꞊ta 'upi akʉ nɨta Asʉɓɨɨ, ɓieni nʉ baya ɓɔ nʉnyɨa nayɔ nyɨanɨ, nʉ ɓɔ a꞊ninzo ɛyɔ nzoni. 25Ati ngia naɓio‑ɔɔ ɓʉmaɨ kʉta, ndʉ naɓio nʉ moni kʉ mombi akʉ 'ʉtʉma, pɨeni mombi ɔngɔ tʉkʉ pɨaa, ambʉ Tidoo ngiʉndɛnʉ a ekoo ʉ ɓisi ʉnɨpɨa inu ɓʉɓɨɓɨ ngiɓʉndɛnʉ kʉ pɨaa. [26Ɨkyɛmɨngana, ndʉ nambʉkʉɓʉpɨa ɛɓɔ, Atɔ ʉndɛnʉ ngia ekoo ʉ ɓisi, ambʉkʉnɨpɨa inu ɓʉɓɨɓɨ ngiɓʉndɛnʉ kʉ ɓwanɨ.] »
Ʉpanʉ ngua Yeso aakyɨa nawɔ ɓamoni waaʉngwa gbanɨ?
(Mat 21:23-27; Luk 20:1-8)
27Kija ɔɔ Yeso nʉ ɓakpataka ngiɓangɔ ɓa꞉tʉa kumbise anʉ Yelusalɛma. Ati ngia Yeso i꞉nye tiga‑ɔɔ kʉkɨndaka amati ʉ ɨkáa yɨ Asʉɓɨɨ, ɓangama ɓʉ ɓakumu‑kumu nʉ ɓapananakɨa ɓʉ mapanʉ, nʉ ɓagʉgʉ, ɓambʉka anambamba angɔ. 28Ɓambumuɓukuo ɓɔ: « Moni ngika wakʉkyɨa engo akɛ ka kʉʉngwanakɨa nʉ ʉpanʉ wʉ anɨ? Anɨ kʉ a nɔwɛ kutitio kʉkyɨa engo? » 29Yeso ambuɓutisio ɓɔ: « Ɛmɛ ma‑zʉ ninu kʉ kuɓukuo ɨngbaa yɨ moni. Ndʉ nanatisio, kija ɛmɛ ma꞊nɨɓɨa tiga ɓɔ ʉpanʉ ngua maakyɨa nawɔ moni ngikʉnanɨ waaʉngwa gbanɨ. 30Naɓɨeni‑zʉ ɓɔ ʉpanʉ ngua Yʉanɨ i꞉nye ɓatiso nawɔ ɓombi, ajʉ wa꞉ʉngwa ɔɔ Asʉɓɨɨ, gʉ ɓɔ wa꞉ʉngwa ɔɔ ɓombi? » 31Kija ɓa꞉faniso yakanaka ati ʉndaɓʉ ɓɔ: « Ndʉ kamutisio ɓɔ wa꞉ʉngwa ɔɔ Asʉɓɨɨ, a꞊tiɓukuo ɓɔ: ‹ Akʉ moni kʉ ɨmanɨ tiga na꞉mʉbayakɔmʉ? › 32Ndʉ katisio tɔ ɓɔ wa꞉ʉngwa ɔɔ ɓombi, ɓuɗo ɓambukuɓio! » Kingono, ɛɓɔ ɓi꞉nye kukumo ɓombi, jʉ ɓombi kʉ ɓuɓomu ɓi꞉nye chɨka Yʉanɨ ndʉ ɨgbɛ yɨ Asʉɓɨɨ. 33Kija ɓa꞉tisio Yeso ɓɔ: « Isu kambʉkʉmbɨa. » Yeso ambuɓutisio ɓɔ: « Abana gʉ ɛmɛ, mambʉkʉnɨɓɨa kʉ ɓwanɨ ɓɔ ʉpanʉ ngua makʉkyɨa nawɔ moni ngika wakʉʉngwa gbanɨ. »
Currently Selected:
Malɨkɔ 11: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
