Malɨkɔ 12

Isisinio yɨ watɨnɨ wʉ mijabibo

(Mat 21:33-46; Luk 20:9-19)

1Yeso ambufaniso naɓɔ ngakɨa moni 'upi akʉ isisinio ɓɔ: « Mombi mʉngana a꞉hʉna watɨnɨ wʉ mijabibo, ambuukunguo nʉ aga ɓʉ kuu. Ambʉmba ʉpɨa wɔɔ naminyoke lipumo lʉ mijabibo. Ambʉtɨa aga mʉngana ɔɔ ikongo ɓʉ tʉa aka ekoo ʉ pɨmakɨa watɨnɨ. Mbise ɔngɔ, ambunzo watɨnɨ nguʉnanɨ akʉ lɨkɔndɔ lʉ ɓombi ɓʉ kuu, kija a꞉sa kɨnda. 2Iya wati wɔɔ bʉɛ masɔɔ wa꞉ndana nayɔ, ambʉtʉma mombi ʉ kuu mʉngana ɓɔ ʉsa nayɔ kʉchɨkɨa lipumo nga langɔ akʉ lɨkɔndɔ lʉ ɓombi ɓʉ kuu ɓʉ watɨnɨ. 3Ɓombi ɓʉ kuu ngiɓʉnanɨ ɓambʉfa gue ngiinanɨ ɓi꞉nye ɓʉmʉtʉmeni, ɓambumutindio nʉ ɓɛnda tʉkʉ ɓʉ sɛkɛ, ɓambumutuiso lɨkɔndɔ kuno. 4Ambʉtʉma mombi ʉ kuu ngia wʉ ɓepini. Ɓambʉmʉɓɨnda akʉ 'ʉtʉ, ɓambʉmʉzɨaka. 5Ambʉtʉma mombi ʉ ɓeetu, kija ɓa꞉wa iinanɨ tii tʉkʉ esinini. Ambʉtʉma ɓata ɓombi ɓɔmɔ ɓaja, ɓambʉɓɛnda ɓɔmɔ, ɓambʉdʉka iɓa ɓɔmɔ. 6Makʉʉ ʉ watɨnɨ i꞉nye utukueni nʉ mombi tii tʉkʉ mʉngana, mwana ngiangɔ wʉ ɓʉkʉnda. Tiga akʉ 'upipio ambʉmʉtʉma tii tʉkʉ ɛyɔ. Ambusigo ɓɔ: ‹ Ma꞊tʉma tiga‑zʉ tʉkʉ mwana ngiasɛmɛ. Yandʉ ɓa꞊mukumo pɛpɛ tiga ɛyɔ kumoo. › 7Ɨkyɛmɨngana, iya ɓombi ɓʉ kuu ngiɓʉnanɨ ɓa꞉mʉna nayɔ kʉka, ɓambufaniso yakanaka ati ʉndaɓʉ ɓɔ: ‹ Makʉʉ ʉ mʉa ngua, iiya akʉka oki. Ikeni, kʉmʉweni waa, tiga isu kambʉdyɨa mʉa ngua. › 8Kʉ ɓwanɨ, ɓambʉmʉfa, ɓambʉmʉwa. Ɓambugiso mʉnda wangɔ aɓei ʉ watɨnɨ. » 9Yeso ambuɓukuo ɓɔ: « Makʉʉ ʉ watɨnɨ a꞊kyɨa tiga nanɨ tanɨ? A꞊ka tʉkʉ kʉdʉka ɓombi ɓʉ kuu ngiɓʉnanɨ, ambunzo watɨnɨ nguʉnanɨ akʉ lɨkɔndɔ lʉ ɓombi nga ɓɔmɔ. 10Ajʉ nambupopokokɔmʉ sina amati ʉ Mubio ngika ɓa꞉tɨndakɨa‑ɔɔ ɓɔ:

‹ Ikopi ngia ɓabʉbʉma ɓɔɔ ɓʉtɨɛ lɨkáa

ɓa꞉igiso anambamba,

iiya ya꞉nɨtanaka tiga ikopi yɛɛ tʉngbʉɛ tungbu wʉ ɨkáa.

11Asʉɓɨɨ Makʉʉɓɨɨ a꞉tambanaka jɛnɛ moni ngikʉnanɨ ɓɔ kuɓio ndʉ ananɨ.

Moni ngikʉnanɨ ka moni kɔɔ mʉmbangɛ akʉ mesu kʉndɛsʉ. › »#Popoko Mʉm 118:22

12Ɓangama ɓʉ ɓakumu‑kumu, nʉ ɓapananakɨa ɓʉ mapanʉ, nʉ ɓagʉgʉ ɓa꞉pimiso tʉkʉ ɓɔ Yeso u꞉nzo isisinio ngiinanɨ tʉkʉ aka ekoo ʉndaɓʉ. Kʉ ɓwanɨ, ɓambufaniso hata ɓɔ ɓamʉfa nɨngbaa tɨmanɨ. Ɨkyɛmɨngana, ɓambʉmʉsɨa, ɓambʉsa yɨndaɓʉ jʉ ɓi꞉nye kukumo ungbutu wʉ ɓombi.

Ɓuɓukuo Yeso moni ekoo ʉ lipa manzanza

(Mat 22:15-22; Luk 20:20-26)

13Kija ɓa꞉tʉma Ɓafalisayɔ ngana ngana, nʉ ɓombi ngiɓa ɓi꞉nye amati ʉ ɨtanda ngia yɨ Ɛlɔdɛ apɛɛ ʉ Yeso. Ɓi꞉nye kʉhata ɓɔ ʉfana akʉ ipindi ɨngbaa akʉ moni ngika ka꞊ɓʉa akʉ moni ngikangɔ makʉɔngɔ. 14Iya ɓa꞉ka nayɔ, ɓambusigio Yeso ɓɔ: « Mʉpananakɨa! Kakʉmbɨa ɓɔ, waayaka moni tʉkʉ akʉ ɓingono. Nʉ wambʉkɔmʉ nʉ ʉɓa. Waana ɓombi kʉ ɓuɓomu tʉkʉ ngbanga. Waapanɨa nʉ ingono ɓɔ yɨkwanana kʉkpata Asʉɓɨɨ tanɨ. Tɨɓɨa‑zʉ ɓɔ wakʉna tanɨ. Ajʉ kʉkwanana kulipa manzanza kʉ ngama ɔɔ ʉja wʉ Ɓalɔma, gʉ ɓɔ kɔɔlipakɔmʉ? » 15Iya Yeso a꞉mbɨa nayɔ ɓufili ngiɓʉndaɓʉ, ambuɓutisio ɓɔ: « Jʉtanɨ nanɛmɛ kupindikio lipindi? Napaneni‑zʉ 'ukpekpe wʉ ʉfalanga mungono. » 16Kija ɓa꞉ka nʉ 'ukpekpe wʉ ʉfalanga mungono, Yeso ambuɓukuo ɓɔ: « Umwendu nʉ ino yɨ anɨ ya ekoo ʉ ʉfalanga nguakɛ? » Ɓambumutisio ɓɔ: « Wʉ Kaisala ngama ɔɔ ʉja wʉ Ɓalɔma. » 17Kʉ ɓwanɨ, ambuɓusigio ɓɔ: « Nzeni Kaisala kʉ ɨkyɛmɛ ngia yɨ Kaisala, nambunzo Asʉɓɨɨ kʉ ɨkyɛmɛ ngia yɨ Asʉɓɨɨ. » Iya Yeso a꞉ɓutisio nayɔ ɓwanɨ, moni ngikʉnanɨ kambʉɓʉmbangɨa nadɨndɨ.

Ɓuɓukuo Yeso moni ekoo ʉ jʉkana akʉ ingyo

(Mat 22:23-33; Luk 20:27-40)

18Kija Ɓasadukayɔ ngana ngana ɓa꞉ka anambamba ʉ Yeso. Ɛɓɔ ɓa ɓombi ngiɓa ɓambakabaya moni kʉ jʉkana akʉ ingyo. Ɓa꞉ka tiga kuɓukuo Yeso ɓɔ: 19« Mʉpananakɨa, Mʉsa a꞉tinzo ʉpanʉ amati ʉ Mubio ngikangɔ ɓɔ: ‹ Ndʉ gue awo, ambʉsɨa moi ngia ɓa꞉nʉtakɔmʉ nayɔ, woko ngiinanɨ a꞊nazana tii tʉkʉ manye ʉ swaɨ ambʉ ʉnʉtɨa abɨa ʉ manye ɓana. › 20Ʉna tɔ, yi꞉nye nʉ ɓana ɓɔɔ gue ʉmalɨanɨka ɓaa ɓʉa mʉngana. Pʉta ambʉchɨkana, ambuwo chʉkɔmʉ ambʉsɨa gʉkʉ mwana. 21Manye ngia a꞉mijo ambʉnazana woko ngiinanɨ, ɛyɔ ambuwo ɓata kʉ woni, chʉkɔmʉ ambʉsɨa mwana kʉ ɓwanɨ. Gwa ngia wʉ ɓeetu yambʉkyananakɨa nayɔ kʉ ɓwanɨ. 22Yambʉsanaka tii tʉkʉ ɓwanɨ, kʉɓʉya aka ɓugue ngiɓʉnanɨ ʉmalɨanɨka kʉ ɓuɓomu ɓa꞉sio‑ɔɔ, chʉkɔmʉ ɓambʉsɨa gʉkʉ mwana. Tiga akʉ 'upipio, moi ngiinanɨ ambuwo tiga kʉ woni. 23Tiga akʉ ɓisi ɓʉ jʉkana akʉ ingyo, ati ngia ɛɓɔ kʉ ɓuɓomu ɓa꞊jʉkana sina‑ɔɔ akʉ ingyo, moi ngiinanɨ aɓio tiga moi anɨ? Jʉ i꞉nye moi ʉndaɓʉ ʉmalɨanɨka kʉ ɓuɓomu. » 24Yeso ambuɓutisio ɓɔ: « Inu na amati ʉ ɓujangi‑jangi jʉ nambakapimiso gʉkʉ moni ngika ka amati ʉ Mubio, abana kʉndʉ angu ngia wʉ Asʉɓɨɨ. 25Jʉ isiya ɓombi ɓa꞊jʉkana sina‑ɔɔ akʉ ingyo, ɓugue nʉ ɓoi ɓambukuɓio sina tii ɓata kʉchɨkana. Ɓaɓio sina tiga ndʉ ɓamalaika ekoo ʉ ɓisi. 26Aka ekoo ʉ moni ngikʉnanɨ kʉ jʉkana akʉ ingyo, ajʉ inu nambupopokokɔmʉ sina amati ʉ Mubio kʉ Mʉsa moni ngika ɓa꞉ngaka aka ekoo ʉ ɓʉtɨ ngiɓa ɓi꞉nye kʉɗɨtɨa ɓiɛ? Ɓa꞉tɨndakɨa ɓɔ Asʉɓɨɨ a꞉sigio Mʉsa ɓɔ: ‹ Ɛmɛ ma Asʉɓɨɨ ngia wʉ Abalama, Asʉɓɨɨ ngia wʉ Ɨsaka nʉ Asʉɓɨɨ ngia wʉ Yakɔbɔ. › 27Asʉɓɨɨ ambʉkɔmʉ Asʉɓɨɨ wʉ mɨnda, ɨkyɛmɨngana a Asʉɓɨɨ wʉ ɓombi ngiɓa ɓa kʉkʉʉ. Ya tʉkʉ kingono ɓɔ na amati ʉ ɓujangi‑jangi. »

Ʉpanʉ ngua wʉ pɛɛ ʉwʉkanɨ?

(Mat 22:34-40; Luk 10:25-28)

28Mʉpananakɨa wʉ mapanʉ mungono wi꞉nye kʉ ananɨ kʉkɔ moni ngika Ɓasadukayɔ ɓi꞉nye kʉkyɨa wai ekoo ɔngɔ ati ʉndaɓʉ. Ambʉna kʉtaa aka Yeso i꞉nye‑ɔɔ naɓɔ kutisio moni nʉ mbɨmbanaka. Kija a꞉singana anambamba angɔ, ambumuɓukuo ɓɔ: « Mʉpananakɨa, amati ʉ mapanʉ kʉ muɓomu, uwa wʉ pɛɛ‑zʉ ʉwʉkanɨ? » 29Yeso ambutisio ɓɔ: « Amati ʉ mapanʉ kʉ muɓomu, ʉwa wʉ pɛɛ wa ɓɔ: ‹ Ɔwɛ Ɨsalaɛlɛ kɔ moni ngika muɗo, Asʉɓɨɨ Makʉʉɓɨɨ ngiʉndɛsʉ, tʉkʉ ɛyɔ a Makʉʉɓɨɨ kʉ nangana. 30Wʉkwanana kʉkʉnda Asʉɓɨɨ nʉ 'ʉtʉma nguusɔɔ kʉ uɓomu, nʉ ʉwɔndɔ wʉ 'ʉtʉma nguʉsɔɔ kʉ 'uɓomu, nʉ mbɨmbanaka ngiisɔɔ kʉ iɓomu, nʉ angu ngiasɔɔ kʉ 'uɓomu. › 31Ʉpanʉ ngua wʉ ɓepini wa ɓɔ: ‹ Kʉnda mangɛ kʉndʉ waakʉndana ɔwɛ makʉɔngɔ. › Ʉpanʉ nga wɔmɔ wɔɔ ʉja kʉɓaa mapanʉ ngikʉnanɨ wambʉkɔmʉ. » 32Mʉpananakɨa wʉ mapanʉ nguʉnanɨ wambumusigio ɓɔ: « Mʉpananakɨa, wutisio iɗo. Asʉɓɨɨ a tʉkʉ mʉngana, nʉ yambʉkɔmʉ nʉ wɔmɔ iya a ndʉ ɛyɔ. 33Yɨkwanana mombi ʉkʉnda Asʉɓɨɨ nʉ 'ʉtʉma kʉ 'uɓomu, nʉ mbɨmbanaka ngiangɔ kʉ iɓomu, nʉ angu ngiangɔ kʉ 'uɓomu. Nʉ yɨkwanana mombi ʉkʉnda mangɛ kʉndʉ aakʉndana ɛyɔ makʉɔngɔ. Moni ngikʉnanɨ kanʉ dada nadɨndɨ kʉɓaa kunzo Asʉɓɨɨ 'ʉtʉmbɨa wʉ ɓanama ɓɔɔ ɓʉyɛ, nʉ mɨgbʉ yɨ apɛpɛ kʉ iɓomu. » 34Iya Yeso a꞉na ɓɔ u꞉mutisio moni nʉ mbɨmbanaka ɓwanɨ, ambumusigio ɓɔ: « Ɔwɛ wambʉkɔmʉ danga nʉ Ɓʉngama ɓʉ Asʉɓɨɨ. » Mbise ngiinanɨ, yambikinye tii ɓata aka mombi gʉkʉ mʉngana a꞉kwanana ɓata‑ɔɔ nayɔ kuɓukuo ɨngbaa yɨ moni.

Klisito a‑zʉ mwana anɨ?

(Mat 22:41-46; Luk 20:41-44)

35Ati ngia Yeso i꞉nye‑ɔɔ kʉpanɨa akʉ ɨkáa yɨ Asʉɓɨɨ, ambuɓukuo ɓombi ɓɔ: « Jʉtanɨ‑zʉ ɓapananakɨa ɓʉ mapanʉ ɓaasigo ɓɔ Klisito a 'ʉnɔnɔ wʉ Daudi? 36Ʉna tɔ, Daudi ɛyɔ makʉɔngɔ, 'upi akʉ 'Ʉtʉma wɔɔ Tu, a꞉sigo ɓɔ:

‹ Makʉʉɓɨɨ Asʉɓɨɨ a꞉sigio Makʉasɛmɛ ɓɔ:

Wulo akʉ ɨkɔndɔ yɨ guɔngɔ ngiisɛmɛ

kʉɓʉya aka ma꞊napɨa‑ɔɔ ɓakwa ngiɓʉsɔɔ

ɛsɨ ʉ mɨtɨndɨ ngiisɔɔ. ›#Popoko Mʉm 110:1

37Daudi ɛyɔ makʉɔngɔ aasoko Klisito ɓɔ ‹ Makʉʉɓɨɨ ›, aɓio‑zʉ tiga mwana ʉ mwana angɔ ɨkyɨkyɨɓʉmʉ tanɨ? »

'Ʉkɔmbɔ ngua wʉ ɓapananakɨa ɓʉ mapanʉ

(Mat 23:1-36; Luk 20:45-47)

Ungbutu wʉ ɓombi wɔɔ 'ʉja wi꞉nye kʉkɔ Yeso nʉ taa yengo. 38Amati ʉ mapanʉ ngikangɔ, Yeso a꞉sigio ɓombi ɓɔ: « Pɨmɨeni ɓapananakɨa ɓʉ mapanʉ pɨmɨaa. Ɛɓɔ ɓaakʉnda kɨndaka nʉ ɓakanzʉ ɓʉ ɨbɨba, nʉ ɓaakʉnda ɓɔ ɓombi ɓuɓio naɓɔ kuɓukuo nʉ ɨbɨba akʉ lizi lʉ junikio. 39Nʉ, ɓaakʉnda kuwulo tʉkʉ akʉ muweikie ngika kaakyɨa apɛɛ, amati ʉ lɨkáa lʉ nɨta, ɓaahata tʉkʉ muweikie kʉ ɨbɨba akʉ ɓaatiniso‑ɔɔ mʉmbɔ kɔɔ mʉkpɔkpɔ. 40Ɓaahinyio ɓawoko kumbo, nʉ ɓaata ɨngɔlɨ ɨta kʉpanana apɛɛ ɓombi. 'Ʉkɔmbɔ nguʉndaɓʉ waɓio sina ɓʉkaɨ nadɨndɨ. »

Yeso ʉbɨba apɛpɛ ɔɔ ɗɛkɛkɛ ngia wʉ woko

(Luk 21:1-4)

41Ɓisi mʉngana, Yeso a꞉ka kuwulo tʉkʉ tinene nʉ ikpoko yɨ apɛpɛ amati ʉ ɨkáa yɨ Asʉɓɨɨ. Ambufaniso kʉna aka ɓombi ɓi꞉nye‑ɔɔ kunzo apɛpɛ. Ɓombi ɓʉ lɨkyɛmɛ ɓaja ɓi꞉nye kunzo falanga kʉ 'ʉja. 42Ambʉna tiga woko wʉ ɓanangyɨa mʉngana kʉka kunzo apɛpɛ. A꞉giso tʉkʉ mikpekpe yɨ falanga yɛɛ ɗɛ ɗɛ ɗɛ ɓepini iya yi꞉nye nʉ mwanʉ dada ngbanga ndʉ sengi ɓepini. 43Yeso ambusoko ɓakpataka ngiɓangɔ, ambuɓusigio ɓɔ: « Maninu kʉɓɨa tʉkʉ kingono, woko ngiakɛ, mombi ʉ ɓanangyɨa, u꞉giso falanga 'ʉja nadɨndɨ amati ʉ ikpoko yɨ apɛpɛ kʉɓaa ɓombi nga ɓɔmɔ kʉ ɓuɓomu. 44Jʉ ɓombi nga ɓɔmɔ ɓu꞉nzo tʉkʉ falanga ngia ɓinye nayɔ ʉnzɨanakɨɛ ɨsʉkʉɓwanɨ. Ɨkyɛmɨngana, woko ngiakɛ amati ʉ ɓanangyɨa ngiɓangɔ, u꞉nzo falanga kʉ 'uɓomu ngia aakyɨa nayɔ ɓɔ amʉsalɨa akʉ ʉɓɨɨ nguangɔ. »

Currently Selected:

Malɨkɔ 12: BudKoya

Highlight

Copy