Malɨkɔ 13
13
Yeso akʉɓɨakɨa ɓɔ ɓapanza ɨkáa yɨ Asʉɓɨɨ panzaa
(Mat 24:1-2; Luk 21:5-6)
1Ati ngia Yeso i꞉nye tiga‑ɔɔ kʉɓʉa amati ʉ ɨkáa yɨ Asʉɓɨɨ, 'ʉkpataka wangɔ mungono wambumusigio ɓɔ: « Mʉpananakɨa, ʉna‑zʉ mukopi kɔɔ manzanza nʉ lɨkáa lɔɔ lɨkpɔkpɔ ngila! » 2Yeso ambumusigio ɓɔ: « Mɛɛ‑zʉ wakʉna lɨkáa lɔɔ lɨkpɔkpɔ ngila kʉtaa ɓiɛ? Ikopi gʉkʉ mɨngana yambukutukuo sina iɗitise ekoo ikopi nga yɛmɔ, jʉ ɓa꞊kʉpanza sina tʉkʉ kʉ muɓomu ɓʉ gbatata. »
'Ʉkpanganɨa wʉ ɓʉka‑ɓʉkaɨ
(Mat 24:3-14; Luk 21:7-19)
3Yeso ambʉsa kuwulo ekoo ʉ ɨkpangba yɨ Mijeituni, nʉ wagba wʉ mondu wʉ ɨkáa yɨ Asʉɓɨɨ. Ɔɔ Pɛtɛlɔ, nʉ Yakɔbɔ, nʉ Yʉanɨ nʉ Andelea ɓambusigio Yeso ɓɔ ɓʉɗʉana‑zʉ naɓɔ anambamba ɓʉ kɛlɛ. Ɓambumuɓukuo ɓɔ: 4« Tɨɓɨa‑zʉ ɓɔ moni ngikʉnanɨ ka꞊kyananakɨa sina ati tɨmanɨ? Kɔkɔ tɨmanɨ iya isu ka꞊pimiso sina nayɔ moni ngikʉnanɨ ɓɔ ka tiga kʉ tinene kʉkyɨanɨa? »
5Yeso ambuɓutisio ɓɔ: « Pɨmɨeni pɨmɨaa, mombi ɔɔnɨpɨtakakɔmʉ! 6Jʉ ɓombi ɓaja ɓa꞊ka sina nʉ ino yɨsɛmɛ ɓinyeni kusigo ɓɔ: ‹ Ɛmɛ Klisito iya. › Nʉ ɓa꞊pɨtaka sina ɓombi ɓaja. 7Ati ngia na꞊kɔ sina‑ɔɔ masaʉ kʉ ɗite nʉ ɓaakɔ ɓʉ ɗite, nɔɔmbambaniakɔmʉ. Jʉ yɨkwanana ɓɔ moni ngikʉnanɨ kʉkyananakɨa‑zʉ tʉkʉ ndʉ ananɨ. Ɨkyɛmɨngana, moni ngikʉnanɨ kambukuɓio‑zʉ 'upipio wʉ ɨtaka. 8Mababa kʉ ɓombi ka꞊mana sina nʉ mababa kʉ ɓombi nga kɔmɔ. Nʉ ɓʉngama ɓa꞊mana sina kʉ nʉ ɓʉngama nga ɓɔmɔ. Ajigijo a꞊ɓaa sina akʉ ɓamʉa kʉ di di di, nʉ taa yɛɛ ɨja ya꞊kwa sina akʉ lɨkʉmbʉ kʉ di di di. Moni ngikʉnanɨ kʉ muɓomu kaɓio sina tʉkʉ 'ʉkpanganɨa wʉ ɓʉka‑ɓʉkaɨ, ngbanga ndʉ ɓʉka‑ɓʉkaɨ ɓʉ ʉnɔtɔ. »
Ɓombi ɓʉ baya ɓa꞊dya ɓʉka‑ɓʉkaɨ
9Pɨmɨeni pɨmɨaa inu ɓakʉɓɔngɔ. Ɓa꞊niɓaiso sina apɛɛ ʉ 'ʉkɔmbɔ, ɓambʉnɨɓɛnda fimbo amati ʉ lɨkáa lʉ nɨta ngila lʉ Ɓayuda aka ekoo asɛmɛ. Kija ɓa꞊niɓaiso sina akʉ 'ʉkɔmbɔ, apɛɛ ʉ ɓangama ɓʉ ɓagɨpa nʉ ɓangama ɓɔɔ ɓʉkpɔkpɔ, ambʉ nyɨeni nʉ wati naɓɔ kʉngakɨa moni ngika ɛmɛ Yeso ma꞉kyɨa akʉ ʉɓɨɨ nguʉndɛnʉ. 10Nʉ yɨkwanana‑zʉ kʉɓɨakɨa mababa kʉ ɓombi kʉ muɓomu Ɨsaʉ yɛɛ Iɗo. 11Ati ngia ɓa꞊nɨfa sina‑ɔɔ, ɓambʉsa ninu apɛɛ ʉ 'ʉkɔmbɔ, nɔɔkwakɔmʉ ɓatanga kʉpɛɛ ɓɔ na꞊yaka moni tɨmanɨ. Ɨkyɛmɨngana, sigeni tʉkʉ moni ngika ka꞊ka amati ʉndɛnʉ akʉ wati nguʉnanɨ, jʉ moni ngikʉnanɨ kambʉkʉɓʉa ninu, ɨkyɛmɨngana ka꞊ɓʉa nʉ 'Ʉtʉma wɔɔ Tu. 12Ɓisi ongo ati ngiinanɨ, mombi a꞊gaba sina manye akʉ ingyo, ɨsɛ ʉ mwana a꞊gaba sina mwana angɔ. Ɓana ɓa꞊chakanakɨa sina ɓɨsɛ nʉ ɓinye ɓʉndaɓʉ, ɓambuɓudukiso. 13Ɓombi kʉ ɓuɓomu ɓa꞊nɨyaa sina aka ekoo asɛmɛ. Ɨkyɛmɨngana, mombi ngia a꞊pɨmakɨa ɓaya ngiangɔ kʉɓʉya tʉkʉ akʉ 'upipio, a꞉nyɨa sina nʉ ɓʉhɨa.
Ɓʉɓɨɓɨ ɓɔɔ ɓʉɓaanɛ ngiɓa ɓa꞊ka sina
(Mat 24:15-28; Luk 21:20-24)
14« Na꞊na sina mombi ngia ɓaamusoko ɓɔ ‹ Ɓʉɓɨɓɨ ngiɓa ɓɔɔ ɓʉɓaanɛ ›. Ya ndʉ aka ɨgbɛ Danyɛlɛ a꞉sigo jɛnɛ‑ɔɔ ɓɔ, ɓa꞉mumaiso tii tʉkʉ akʉ izi yɛɛ tu, kʉka kuɓio akʉ izi ngia ʉkwananakɔmʉ‑ɔɔ kuɓio. (Ɔwɛ ngia wakupopoko moni ngikakɛ, pimiso inyi yɛngɔ pimisoo.)#Popoko Dan 11:31 Nʉ ɓombi ngiɓa ɓaɓio amati ʉ gɨpa ʉ Yudɛa, ɓʉsa bangʉ ekoo ʉ lɨkpangba. 15Nʉ gwa ngia aɓio ekoo ʉ ʉpaʉ#13:15 ekoo ʉ ʉpaʉ: Mapaʉ kʉ lɨkáa ngikʉndaɓʉ ki꞉nye kyɨa ɓʉ gbata gbata. Yi꞉nye mʉa wɔɔ humue nʉ wɔɔ junikie. ɔɔijokɔmʉ, nʉ ɔɔtʉa tii ɓata numbise kʉchɨka ɨpʉkʉ ngiangɔ. 16Mombi ngia aɓio akʉ watɨnɨ, ɔɔtʉakɔmʉ tii ɓata kʉchɨka ɨpʉkʉ ngiangɔ andɔngɔ. 17Ikoko nʉ ɓoi ɓʉ mʉmɨ nʉ iɓa ɓaɓio sina kumwiso ɓana maɓɛɛ isiinanɨ! 18Teni Asʉɓɨɨ ɓɔ moni ngikʉnanɨ kɔɔkyɨanɨakɔmʉ sina akʉ ɨjɨjɨ yɨ ʉgbaa. 19Jʉ ikoko yɛɛ ɨja yaɓio sina ati ngiinanɨ. Ikanzi yɨ ɓʉka‑ɓʉkaɨ ngiɓʉnanɨ, ɓaɓio ɓambʉgbʉkenikɔmʉ sina ɓombi kʉʉngwa aka Asʉɓɨɨ a꞉kyɨa‑ɔɔ ɨtaka, kʉɓʉya kʉndʉ ɓʉɓʉnɨ. Nʉ ɓambʉkʉka sina tii ɓata. 20Asʉɓɨɨ Makʉʉɓɨɨ u꞉tuisenikɔmʉ jɛnɛ makwaa ngikʉnanɨ kuɓio gbititi, ambʉ́ mombi ambʉkʉhɨa gʉkʉ mʉngana. Ɨkyɛmɨngana, a꞉tuiso makwaa ngikʉnanɨ gbititi aka ekoo ʉ ɓombi ngiɓangɔ a꞉ɓʉchwa jɛnɛ kʉpɛɛ.
21Mombi unisigieni ɓɔ: ‹ Klisito aka ɓɔmɔ! › Yɛmɔ ɓɔ: ‹ Ɛyɔ iya oki! › Nɔɔmʉbayakɔmʉ. 22Jʉ ɓombi ɓʉ yakanaka ɓa꞊ɓwanɨa ɓisi ongo iɓa ɓaɓio kusigo ɓɔ ɛɓɔ ɓa klisito, nʉ lɨgbɛ lʉ yakanaka la꞊ɓwanɨa kʉ ɓwanɨaa. Nʉ ɓaɓio sina kʉkyɨa ɓamoni ɓɔɔ ɓʉmbangɛ nʉ ɓakɔkɔ, kʉhata kukwisiso ɓombi ngiɓa Asʉɓɨɨ a꞉ɓʉchwa. 23Kʉ ɓwanɨ, pɨmɨeni pɨmɨaa! Mʉ꞉nɨɓɨa moni ngikʉnanɨ kʉpɛɛ. »
Nɨka ngia yɨ Mwana ngia ʉ Mombi
(Mat 24:29-31; Luk 21:25-28)
24« Akʉ makwaa ngikʉnanɨ sina, mbise ʉ ɓʉka‑ɓʉkaɨ ɓɔɔ ɓaja ngiɓʉnanɨ, kija ɨpá ya꞊kutunio sina nʉ umomo ɓʉ ɗipa, uyi wambʉsɨa jɨa. 25Ndata ya꞊ɓwanaka sina ya ɛsɨ ɓʉ kpu kpu kpu. Nʉ ɨkyɛmɛ kʉ iɓomu ngia yanʉ angu ekoo ʉ ɓisi ya꞊gʉgʉma sina gʉgʉmaa. 26Kija ɓombi ɓa꞊na sina Mwana ngia ʉ Mombi kʉ꞊ka akʉ maba kʉ ɓisi nʉ angu ɔɔ 'uja, nʉ ɨbɨba. 27Kija ɛyɔ a꞊tʉma sina ɓamalaika ngiɓangɔ kʉmʉma ɓombi ngiɓangɔ a꞉ɓʉchwa jɛnɛ akʉ ɓatungbu ɓʉgɨna kʉ ɓuɓomu ngiɓa ɓʉ miɓo wʉ ekoo ʉ ɓisi nʉ uwa wʉ ɨtaka. »
Ʉpanʉ ngua ɓa꞉usisinio nʉ ɓʉtɨ ngiɓa ɓaaɓusoko ɓɔ mutini
(Mat 24:32-35; Luk 21:29-33)
28« Pimiseni isisinio yɨ ɓʉtɨ ngiɓa ɓaaɓusoko ɓɔ mutini iɗo. Ati ngia mɨtapɨ yɛngɔ yaaka‑ɔɔ ɓʉ mbɔngɔ mbɔngɔ, nʉ kʉnaa manɨ, mbɨeni tʉkʉ ɓɔ ɨjɨjɨ yɨ ʉgbaa ya tiga kʉ tinene. 29Ngbanga kʉ ɓwanɨ, ati ngia na꞊na sina‑ɔɔ moni ngikʉnanɨ kʉkyɨanɨa, mbɨeni kusigo ɓɔ Mwana ngia ʉ Mombi a tiga kʉ tinene anʉ umongu. 30Maninu kusigio tʉkʉ kingono ɓɔ, ɓombi ɓʉ ɨjɨjɨ ngiakɛ ɓambʉkʉdʉka ɨsʉkʉɓwanɨ, moni ngikʉnanɨ kʉ muɓomu kambʉkyananakienikɔmʉ. 31Ekoo ʉ ɓisi nʉ ɨtaka ya꞊ɓaa ɓaa, ɨkyɛmɨngana moni ngikʉsɛmɛ kambʉkʉɓaa sina gʉkʉ ɗɛkɛkɛ. 32Yambʉkɔmʉ nʉ mombi gʉkʉ mʉngana iya aambɨa ɓisi kʉndʉ wati ngua moni ngikʉnanɨ ka꞊kyananakɨa‑ɔɔ. Abana kʉndʉ ɓamalaika ngiɓa ɓa ekoo ʉ ɓisi, abana kʉndʉ ɛmɛ Mwana ngiangɔ, mambʉkɔmʉ kʉmbɨa kʉ ɓwanɨ. Ɨkyɛmɨngana, tʉkʉ Tidoo kʉ nangana akʉmbɨa engo. »
Ɓieni mesu ɓʉ gbɛ
(Mat 24:36-44)
33« Pɨmɨeni pɨmɨaa, ɓieni mesu ɓʉ gbɛ, jʉ nambʉkɔmʉ kʉmbɨa aka wati nguʉnanɨ wa꞊ka‑ɔɔ. 34Moni ngikʉnanɨ ka꞊kyananakɨa sina ngbanga ndʉ iya mombi aaʉngwa‑ɔɔ andɔngɔ, ambʉsa kɨnda yɛɛ danga. Pɛɛ angɔ kʉʉngwa, ambʉsɨa ɓombi ɓʉ kuu ngiɓangɔ nayɔ kʉpɨmakɨa ɨkáa. Ambunzo mombi kʉ nangana nangana ɨngbaa yɨ kuu. Ambunzo mombi ngia aapɨmakɨa umongu ʉpanʉ kʉkanga engo. 35Iiya ɓɔ inu ɓieni mesu ɓʉ gbɛ, jʉ nambʉkɔmʉ kʉmbɨa ɓɔ Makʉʉ ʉ ɨkáa a꞊tʉa ati tɨmanɨ. Yaɓio yɛmɔ tiga mbise nadɨndɨ, yɛmɔ nʉgʉndʉ, yɛmɔ aka kɔɓɔ ngia wʉ pɛɛ aanatɨa‑ɔɔ, yɛmɔ kʉɓa ɓʉ cha. 36Chʉkɔmʉ ndʉ aɓwanɨa, a꞊nɨgbʉka tiga akʉ tɔɔ. 37Moni ngika munisigio akɛ ka aka ekoo ʉndɛnʉ kʉ ɓuɓomu. Ɓieni mesu ɓʉ gbɛ! »
Currently Selected:
Malɨkɔ 13: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
