Malɨkɔ 9

1Kija Yeso a꞉ɓusigio ɓata ɓɔ: « Maninu kusigio tʉkʉ kingono ɓɔ, ɓombi ngana ngana ngiɓa ɓaɓʉmaɨ aka ɓɔmʉ ɓambʉkʉdʉka ɨsʉkʉɓwanɨ, ɓambʉnenikɔmʉ Ɓʉngama ɓʉ Asʉɓɨɨ kʉka nʉ angu. »

Imbangumba ngia yɨ Yeso

(Mat 17:1-13; Luk 9:28-36)

2Makwaa ʉmalɨa mbise ʉ moni ngikʉnanɨ, Yeso ambʉchɨka ɔɔ Pɛtɛlɔ, nʉ Yakɔbɔ, nʉ Yʉanɨ, ɓambʉsa ɨzɔ naɓɔ ɓʉ kɛlɛ ekoo ʉ ɨkpangba. Nani, ndʉtʉ ngiangɔ yambʉnɨtanaka tiga kʉ di tʉkʉ na apɛɛ ʉndaɓʉ. 3Lɨpʉkʉ ngilangɔ lambʉka tiga tu nadɨndɨ, nʉ jɨa ɓʉ nzɛkpɛ nzɛkpɛ. Yambʉkɔmʉ nʉ mombi gʉkʉ mʉngana akʉ ɨtaka iya a꞊kwanana kujiiso lɨpʉkʉ ngilangɔ ikanzi ngiinanɨ. 4Ɓakpataka ɓambʉna ɔɔ Ɛlɨa nʉ Mʉsa kʉyakanaka nʉ ɔɔ Yeso.

5Kija Pɛtɛlɔ a꞉sigio Yeso ɓɔ: « Mʉpananakɨa, ambʉ́ kuɓieni tii tʉkʉ aka. Ka꞊tɨa lɨhɨma dyetu. Yɨsɔɔ kʉ mɨngana, yɨ Mʉsa kʉ mɨngana, yɨ Ɛlɨa kʉ mɨngana. » 6A꞉sigo moni ngikʉnanɨ jʉ ambikinye kʉmbɨa ɓɔ ayaka tanɨ. Ɛɓɔ ɓaatʉ kʉ ɓuɓomu ɓambʉkwa ʉɓa nadɨndɨ. 7Ɨkʉɓa yɨ ɓisi yambʉɓʉɓwanɨa, igyiɓi yɛngɔ yambuɓukuto ɓʉ ɗipa. Iyo mɨngana yambʉɓʉa akʉ ɨkʉɓa ngiinanɨ kusigo ɓɔ: « Mwana ngiasɛmɛ wʉ ɓʉkʉnda iyakɛ. Mʉkeni ɛyɔ! » 8Kʉ nɨma ngiinanɨ, iya ɓakpataka ɓa꞉kanga nayɔ anambamba ʉndaɓʉ, chʉkɔmʉ ɓambʉna tii mombi, tii tʉkʉ Yeso i꞉nye kʉ nangana ɨzɔ naɓɔ. 9Ati ngia ɓi꞉nye tiga‑ɔɔ kijo ɨkpangba, Yeso ambuɓusigio ɓɔ: « Kpɔ, kpɔ, kpɔ, moni ngika nʉ꞉na aka ɓɔmʉ, nɔɔngakɨakɔmʉ mombi kʉɓʉya tʉkʉ aka Mwana ngia ʉ Mombi, a꞊jʉkana sina‑ɔɔ akʉ ingyo ati ʉ mɨnda. » 10Ɓakpataka ɓa꞉pɨmakɨa ʉpanʉ nguʉnanɨ tʉkʉ pɨmakɨaa, ɓambuɓio kʉyakanaka ati ʉndaɓʉ ɓɔ: « Ndʉ wakɔ‑zʉ ɓɔ jʉkana akʉ ingyo ati ʉ mɨnda ambʉ tanɨ? »

Ɓakpataka ɓuɓukuo Yeso moni ekoo ɨgbɛ Ɛlɨa

11Kija ɓakpataka ɓa꞉ɓukuo Yeso ɓɔ: « Jʉtanɨ ɓapananakɨa ɓʉ mapanʉ ɓaasigo ɓɔ yɨkwanana ɓɔ Ɛlɨa ʉka‑zʉ pɛɛ? » 12Ambuɓutisio ɓɔ: « Ya ɓwanɨ. Yɨkwanana Ɛlɨa ʉka‑zʉ kumaiso moni kʉ muɓomu. Ɨkyɛmɨngana, jʉtanɨ ɓa꞉tɨndakɨa tiga ɓɔ Mwana ngia ʉ Mombi a꞊dya sina ɓʉka‑ɓʉkaɨ nadɨndɨ, kija ɓa꞊mundapiso? 13Ɨkyɛmɨngana, maninu kusigio ɓɔ Ɛlɨa a꞉ka jɛnɛ kanɨ, ɓambʉmʉkyananaka tʉkʉ ndʉ aka ɓi꞉nye‑ɔɔ kʉkʉnda, kʉndʉ akʉ ɓa꞉tɨndakɨa‑ɔɔ amati ʉ Mubio ekoo angɔ. »#9:13 Yeso i꞉nye kʉyaka aka ekoo ʉ Yʉanɨ ngia i꞉nye ɓatiso ɓombi.

Yeso uhiiso mwana ngia i꞉nye nʉ 'ʉtʉma wʉ abɨa

(Mat 17:14-21; Luk 9:37-43a)

14Iya ɔɔ Yeso nʉ ɓakpataka ɓaatʉ ɓa꞉ɓʉya nayɔ aka ɓakpataka ngiɓɔmɔ ɓi꞉nye‑ɔɔ, ɓambʉna ungbutu wʉ ɓombi wu꞉ɓukungueni tʉkʉ ɓʉ kuu. Ɓi꞉nye kungbanganakiso moni nʉ ɓapananakɨa ɓʉ mapanʉ. 15Iya ɓombi ɓa꞉na nayɔ Yeso, yambʉɓʉmbangɨa nadɨndɨ. Kʉ nɨma ngiinanɨ, ungbutu wʉ ɓombi nguʉnanɨ wambʉsa nayɔ kuɓukuo. 16Yeso ambuɓukuo ɓakpataka ngiɓangɔ ɓɔ: « Moni tɨmanɨ ika naakyɨa‑sa kʉngbanganakiso naɓɔ? » 17Mombi mʉngana ati ʉ ungbutu wʉ ɓombi nguʉnanɨ ambumutisio ɓɔ: « Mʉpananakɨa! Ma꞉ka bɛ nʉ mwana ngiasɛmɛ ɔɔ gue apɛɛ asɔɔ jʉ anʉ 'ʉtʉma wʉ abɨa amati angɔ uwa wa꞉mukatiso ɓʉ nyɛ. 18Iya tʉkʉ 'ʉtʉma wʉ abɨa nguʉnanɨ waamʉnda nayɔ, waamugiso akɛsɨ ɓʉ kpruu, lihuu lambufaniso nayɔ ɓʉa akʉ moni ɓʉ fɔtɔ fɔtɔ. Kija aakɨtana menu ɓʉ nzɨkɨ, ambʉmɔkɔkɔ ɓʉ ke ke ke. Ma꞉ta bɛ ɓakpataka ngiɓʉsɔɔ ɓɔ ɓuiso ɓaka 'ʉtʉma wʉ abɨa nguʉnanɨ, ɨkyɛmɨngana yambʉɓʉkyaka bɛ tʉkʉ ɨsʉkʉɓwanɨ. » 19Yeso ambuɓusigio ɓɔ: « Inu ɓombi ɓʉ ɨjɨjɨ ngia, iɓa nambʉkɔmʉ nʉ baya akɛ! Wati ʉpɨtanɨ maɓio ɓata zʉ‑ɔɔ ɨzɔ ninu? Wati ʉpɨtanɨ ɓata ma꞊nɨpɨa‑ɔɔ? Ikeni tiga nayɔ aka. » 20Kija ɓa꞉ka nayɔ. Tʉkʉ iya mwana a꞉na nayɔ Yeso, 'ʉtʉma wʉ abɨa nguʉnanɨ wambʉmʉjʉkʉa tiga nadɨndɨ, i꞉nye kusubo tii tʉkʉ akɛsɨ. Ambufaniso kpungbonoko, lihuu lumuhueni akʉ moni ɓʉ fɔ. 21Yeso ambuɓukuo ɨsɛ ʉ mwana ɓɔ: « Ɨkyɛmɛ ngia ya꞉mufaniso ati tɨmanɨ? » Ɨsɛ ʉ mwana ambumutisio ɓɔ: « Ya꞉mufaniso kʉʉngwa tʉkʉ akʉ ɨɓwana ngiangɔ. 22'Ʉtʉma wʉ abɨa nguʉnanɨ waamugiso yɛmɔ tʉkʉ amati ʉ dyaa ɓʉ bu, yɛmɔ amati ʉ mepo kʉhata ɓɔ wʉmʉwa tʉkʉ wanɨ. Ndʉ yaɓio ikanzi ngia wakyɨa‑ɔɔ ɨkyɛmɛ, tɨnɨa ɓaka ikoko wambʉtɨsalɨa! » 23Yeso ambumusigio ɓɔ: « Wusigo‑zʉ ɓɔ ndʉ yaɓio ikanzi ngia wakyia‑ɔɔ ɨkyɛmɛ jʉtanɨ? Mombi ngia anʉ baya akʉ Asʉɓɨɨ, yambʉkɔmʉ nʉ ɨkyɛmɛ ngia yamʉkyaka gʉkʉ mɨngana. » 24Tʉkʉ nɨma ngiinanɨ, ɨsɛ ʉ mwana ambʉtʉɓɨa ɓɔ: « Mʉ꞉baya bayaa! Ɨkyɛmɨngana, nasalɨa ɓaka salɨaa jʉ mambʉkɔmʉ nʉ baya! »

25Iya Yeso a꞉na nayɔ ungbutu wʉ ɓombi kʉmʉmanakɨa ʉja, ambʉngbaa nʉ 'ʉtʉma wʉ abɨa nguʉnanɨ ɓɔ: « Ɔwɛ 'ʉtʉma wʉ abɨa ngua wa꞉katiso mwana ɔɔ gue ngia, wambʉmʉdɨkpa muchwei! Mu꞉nanzo ʉpanʉ ɓɔ ɓʉa amati ʉ mwana ngia! Wɔɔtʉakɔmʉ sinani ɓata amati angɔ! » 26'Ʉtʉma wʉ abɨa nguʉnanɨ wambʉnatɨa ɓʉ waa waa, wambʉjʉkʉa mwana ngiinanɨ nadɨndɨ, wambʉɓʉa amati angɔ. Mwana ambʉyʉmanɨa ndʉ mʉnda ɓʉ gɔ, ɓombi ɓambusigo ɓɔ: « Ʉ꞉tɨnɨa 'ʉtʉma tɨnɨaa ». 27Ɨkyɛmɨngana, Yeso ambʉmʉfa ɨkɔndɔ, ambumumaiso, mwana ngiinanɨ ambʉmáa ɓʉ gba.

28Ati ngia Yeso a꞉tʉa‑ɔɔ andei, ɛɓɔ tii tʉkʉ nʉ ɓakpataka ngiɓangɔ, ɓambumuɓukuo ɓɔ: « Jʉtanɨ‑zʉ isu kambakakyɨa‑sa ikanzi ngia kaiso‑ɔɔ 'ʉtʉma wʉ abɨa nguʉnanɨ? » 29Yeso ambuɓutisio ɓɔ: « Ikanzi yɨ 'ʉtʉma wʉ abɨa nguʉnanɨ, wambʉkʉkwanana kʉɓʉa ɨsʉkʉɓwanɨ yambikinye tʉkʉ ɨngbaa kʉnɨta Asʉɓɨɨ. »

Yeso a ɓata kʉɓɨakɨa ɨsaʉ yɨ ingyo nʉ jʉkana ngiangɔ akʉ ingyo

(Mat 17:22-23; Luk 9:43-45)

30Iya ɔɔ Yeso nʉ ɓakpataka ngiɓangɔ ɓa꞉ʉngwa nayɔ nanɨ, ɓambʉɓaa 'upi akʉ gɨpa ʉ Galilaya. Yeso ambikinye kʉkʉnda ɓɔ ɓombi ɓʉmbɨa, 31jʉ i꞉nye‑zʉ kʉpanɨa tʉkʉ ɓakpataka ngiɓangɔ. Ambuɓusigio ɓɔ: « Ɛmɛ Mwana ngia ʉ Mombi, ɓa꞊nagaba ɓisi akʉ lɨkɔndɔ lʉ ɓombi, kija ɓa꞊nawa. Mbise ʉ makwaa kaatʉ, mambʉjʉkana ati ʉ mɨnda. » 32Ɨkyɛmɨngana, ɓakpataka ɓa꞉pimisokɔmʉ moni ngikʉnanɨ gʉkʉ ɗɛkɛkɛ, ɓambukumo nayɔ kuɓukuo engo.

Anɨ a mombi ɔɔ 'ʉja kʉɓaa ɓangɛ

(Mat 18:1-5; Luk 9:46-48)

33Kija ɔɔ Yeso ɓa꞉ɓʉya anʉ Kapelenaumu. Ati ngia ɓa꞉kumunio‑ɔɔ ambɛnɨ, Yeso ambuɓukuo ɓakpataka ɓɔ: « Moni tɨmanɨ ɨka naakyɨa‑sa kʉyakanaka ekoo ɔngɔ nɨngbaa? » 34Ɨkyɛmɨngana, ɓambʉkata tʉkʉ ɓʉ nyɛ. Jʉ ɓi꞉nye kʉyakanaka nɨngbaa ɓɔ, ɓʉmbɨa ɓɔ anɨ‑zʉ a mombi ɔɔ 'ʉja ati ʉndaɓʉ. 35Yeso ambuwulo ɨsɨ, ambusoko ɓakpataka kumi nʉ ɓapɨnɨ ngiɓʉnanɨ, ambuɓusigio ɓɔ: « Mombi ngia akʉnda kuɓio mombi ʉ pɛɛ, ʉkwanana kuɓio ndʉ mombi ʉ mbise ati ʉ ɓangɛ kʉ ɓuɓomu, nʉ kuɓio bayo ʉ ɓombi kʉ ɓuɓomu. » 36Yeso ambʉchɨka mwana ɔɔ ɗɛkɛkɛ, ambumumaiso ati ʉndaɓʉ, ambumunaputo, ambuɓusigio ɓɔ: 37« Mombi kʉ 'uɓomu ngia ajananɨa mwana ndʉ iyakɛ akʉ ino yɨsɛmɛ, ambʉ ʉnajananɨa tʉkʉ ɛmɛ. Nʉ mombi ngia anɛmɛ kʉjananɨa, ambʉkɔmʉ nɛmɛ kʉjananɨa tʉkʉ ɛmɛ, ɨkyɛmɨngana akʉ kʉ kʉjananɨa mombi ngia a꞉natʉma. »

Anɨ iya anʉ wagba wʉ Yeso?

(Luk 9:49-50)

38Yʉanɨ ambusigio Yeso ɓɔ: « Mʉpananakɨa, ka꞉na pongo mombi mʉngana kiso mɨtʉma yɨ ɓabɨa akʉ ino yɨsɔɔ, kambʉhata nayɔ kʉgbʉma jʉ ambʉkɔmʉ ɨzɔ nisu. » 39Yeso ambuɓutisio ɓɔ: « Nɔɔmʉgbʉmakɔmʉ, jʉ mombi gʉkʉ mʉngana ambʉkʉkwanana kʉkyɨa moni kɔɔ mʉmbangɛ akʉ ino yɨsɛmɛ, mbise ɔngɔ ambufaniso ɓata kʉ nɛmɛ kʉbʉla. 40Ya ɓwanɨ, jʉ mombi ngia ambʉkɔmʉ makwa wʉndɛsʉ, anʉ wagba wʉndɛsʉ. 41Jʉ tʉkʉ kingono, mombi kʉ 'uɓomu ngia aninu kunzo ʉpata wʉ mepo kɔɔ mʉmwɛ, jʉ na ɓombi ɓʉ Klisito, ambʉkʉkwanana kʉya ʉkʉa wɔngɔ gʉkʉ ɗɛkɛkɛ. »

Yeso unzo mapanʉ ekoo ʉ nɨkwa akʉ ɓʉɓɨɓɨ

(Mat 18:6-9; Luk 17:1-2)

42« Ɨkyɛmɨngana, ndʉ mombi akwisiso mʉngana ʉ ɓana ngiɓa ɓanɛmɛ kʉbaya ɛmɛ akʉ ɓʉɓɨɓɨ, yɨkwanana ɓʉmʉnga ikopi yɛɛ kpʉgʉɛ idyo akʉ ɨmɨɔ, ɓambumugiso amati ʉ ɗei ɔɔ 'ʉja ɓʉ ɗu. 43Ɨkɔndɔ ngiisɔɔ yɨnatiteni kʉkyɨa ɓʉɓɨɓɨ, ɨtɨna tʉkʉ tɨnaa. Jʉ ya piɛ iɗo ɔwɛ kʉsa akʉ ʉɓɨɨ wʉ ingono nʉ ɨkɔndɔ mɨngana, chʉkɔmʉ waɓio kʉpɨmakɨa lɨkɔndɔ dyepini, ɓambunagiso nalɔ akʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá.#9:43 dyaa ngia yɨ mɨtʉ yɨ ɨpá nʉ mɨtʉ yɨ ɨpá: Ino yɨ izi ngiinanɨ ya kʉ ɓɔ « Gɛhɛna ». [44Izi ngiinanɨ ɓakute ɓambakadʉka‑ɛɛ, nʉ dyaa yambakaimunio‑ɛɛ kʉ ɓwanɨ.] 45'Ʉtɨndɨ nguʉsɔɔ wʉnatiteni akʉ ɓʉɓɨɓɨ, ʉtɨna tʉkʉ tɨnaa. Jʉ ya piɛ iɗo ɔwɛ kʉsa akʉ ʉɓɨɨ wʉ ingono 'ʉtɨndɨ mungono, chʉkɔmʉ waɓio nʉ mɨtɨndɨ ɓepini, ɓambunagiso tiga amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá. [ 46Izi ngiinanɨ ɓakute ɓaambakadʉka‑ɛɛ, nʉ dyaa yambukuimonio‑ɛɛ kʉ ɓwanɨ.] 47Iso ngiisɔɔ yɨnatiteni kʉkyɨa ɓʉɓɨɓɨ, wʉkwanana nayɔ kiso. Jʉ ya piɛ iɗo ɔwɛ kukumunio akʉ Ɓʉngama ɓʉ Asʉɓɨɨ nʉ iso mɨngana, chʉkɔmʉ ɓanagiso amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá winyeni nʉ mesu kapɨnɨ kʉ muɓomu. 48Izi ngiinanɨ ɓakute ɓambakadʉka‑ɛɛ, nʉ dyaa yambakaimunio‑ɛɛ kʉ ɓwanɨ. 49Jʉ ɓa꞊gbɨnya mombi kʉ 'uɓomu nʉ 'ukwe akʉ dyaa.#9:49 'ukwe akʉ dyaa: Yakusigo ɓɔ mombi kʉ 'uɓomu a꞊ɓaa amati ʉ kanyo nʉ ɓʉka‑ɓʉkaɨ ambʉ ʉjaɓanakɨa nʉ kʉka tu apɛɛ Asʉɓɨɨ.

50'Ukwe ka ɨkyɛmɛ yɛɛ tɨpɨ, ɨkyɛmɨngana, ndʉ kasio ɓʉtɨpɨ ɓɔngɔ, ɓakʉtambana tiga ɓata nʉ ɨmanɨ? Inu ɓakʉɓɔngɔ, ɓieni‑zʉ nʉ 'ukwe, nambuɓio nʉ majɨɔ ati ʉndɛnʉ. »

Currently Selected:

Malɨkɔ 9: BudKoya

Highlight

Copy