Yoáni 9
9
Yéso anamisi keíme-íme
1Ka nyɛ́nya á Yéso, áɔmɔna nkpa moci mmbé ɗáɓɔkɔtɛani keíme-íme. 2Ɓagoigi nɛkɛ ɓáomúsia: «Ngoisigi ca, nkpa nde ɗáɓɔkɔtɛani keíme-íme ka ɓo? Ande gea te, nkpa nde ɗági ɓojeɗe sasakɛ kaɓɛ ɓaɓɔkɔti akɛ ɓáunge ɗáɓági ɓojeɗe#Ɔna Jua 20.5?»
3Yéso áǒsikisia: «Nna yɛ, nna phɔtɔ ɓaɓɔkɔti akɛ ɓáunge ɗáɓági ɓojeɗe. A tɔ keíme-íme ka gea, ekuma ndea Mokonga áɔnɛkanɛ ka yɛ. 4Ɓî esa a phɔ́tɔ ɓei, akeni ɓɛ́bɛɗanɛgɛ ekuma ndea mmbé ɗámoteki. Keiphe a ye bíbí, nnde nkpa kábɛɗanɛgɛku ye. 5Ka mbenɔ nde ne phɔ́tɔ ka mokonda, nende owanga á ka mokonda.» 6Mbusa á yɔnga akɛ ɓó, áosúa soki akɛ ka oɗo, áoúpha ú n'esau, áosia esau ndɔ k'íso á keíme-íme. 7Aongea: «Cɔ, gǎ, ósokosɛ iso akɔ ka ntogɔ á Silɔámu#Ɔna Isa 8.6.» (Kantíti á ina ndɔ Silɔámu, ande «Mmbé ɓánteki.») Keíme-íme áoga osokosa iso akɛ ka ntogɔ ndɔ, â ye tɔ oja n'aɔnapha.
8Ɓamasambe akɛ, na ɓunde ɗáɓáɔmɔna n'aɔmɛmaga mosá, ɓáogea: «Nna phɔ́ nkpa nde aámbé ɗáoikaga ka oɗo n'aɔmɛmaga?» 9Ɓakpa ɓuangbo ɓáɔyɔnga te: «Yɛ aámbɔ.» Ɓuangbo ɓâ gǎkɛ ɔyɔnga te: «Nna tanda yɛ, akengeani ndiu na yɛ.» Nami ndɔ â gǎkɛ ogea: «Eme aámbɔ!» 10Ɓáomúsia: «Iso akɔ akoɗokani ɓo?» 11Áǒsikisia: «Nkpa nde ɓáɔmɔphana Yéso, aúphimá tɔ soki akɛ n'esau, áomosia k'iso, áomogea: ‹Gǎ, ósokosɛ iso akɔ ka ntogɔ Silɔámu.› Mbusa, néoga osokosa iso ani, nɛ́ɔnapha.» 12Ɓáomúsia: «Nkpa ndɔ a wani?» Aǒsikisia: «Kéoúba.»
Ɓaphaisayɔ ɓáomúsiaga keíme-íme nde ɗáami
13Cɔ, nkpa ndɔ ɗátú keíme-íme, ɓáombika ně mosá á Ɓaphaisáyɔ. 14Esa ndɔ Yéso ɗáúphi esau na amisa á keíme-íme ndɔ ɗátú esa á saɓáto. 15Kaɓondɔ, Ɓaphaisáyɔ ɓâ phɔtɔ omúsia nkpa ndɔ: «Ɔɔnaphi ɓo?» Aǒsikisia: «Amosíí n'esau k'iso, néǒsokosa k'iso. Cɔ, kɛ̌kɛnde ne ye tɔ ɔ̌napha.» 16Ɓaphaisáyɔ ɓuangbo ɓáogea: «Nkpa ndɔ kátóki ka Mokonga nga, nna koamba ɛɔphi á saɓáto.» Ɓuangbo ɓâ ndiu ogea: «Ai! Nto á ɓojeɗe aɔtɔka n'atɔtɔkisi mphangiɔ ɓínde ɓo?» Kaɓondɔ, ɓáokatanaga.
17Mpɔ, Ɓaphaisáyɔ ɓâ goto omúsia nami ndɔ: «Ogi ɓo ka nyɔngɔ á nkpa ndɔ aokoɗi iso?» Áǒsikisia: «Ande mɔtu-nyɔngɔ ndea Mokonga.»
18Ɓayúda ɗáɓákáɓeeki gea, ɗátú keíme-íme na kɛ̌kɛnde a ye tɔ ɔnapha, na ka ɓî ɗáɓáɛɓɔphani ɓaɓɔkɔti akɛ. 19Mpɔ, ɓáǒɓúsia gea: «Mmbé ande ananu? Ɓoɓeeki gea, ɗáɓɔkɔtɛani keíme-íme? Cɔ, kɛ̌kɛnde gǎkɛ, aɔɔnapha ɓo?» 20Ɓaɓɔkɔti akɛ ɓáǒsikisia te: «Ɓeoúba gea, yɛ ande miki nɛsu, ɗáɓɔkɔtɛani keíme-íme. 21Ɓéké gǎkɛ oúba kema sina nde ageani kɛ̌kɛnde ka ɔnapha akɛ. Ɓéké phɔtɔ omúba mmbé ankoɗi iso. Cɔ, músiani tɔ yɛ. Nga, a ye tɔ oúbapha ka sikisia á nyɔngɔ.» 22Ɓaɓɔkɔti akɛ ɗáɓáyɔngi ɓó ka nyɔngɔ nde ɗáɓáǒɓanga Ɓayúda. Nga, Ɓayúda ɗáɓáɔ́kani gea, nkpa nde aoɓeekea gea Yéso ande Kiísito, ɓámɓeagande k'éndu á madondanɔ ndea Ɓayúda ka nyɔngɔ á Mokonga. 23Ka nyɔngɔ índɔ unge, ɓaɓɔkɔti akɛ ɗáɓági: «A ye tɔ oúbapha, músiani tɔ yɛ.»
24Mpɔ, Ɓaphaisáyɔ ɓâ goto ɔmɔphana nami ndɔ ɗátú keíme-íme, ɓáongoɗea: «Yɔnga phɔ́ ɗoni mosá á Mokonga. Ɓeoúba gea, mogáa ndɔ ande nto á ɓojeɗe.» 25Áǒsikisia: «Kaɓɛ n'ande nto á ɓojeɗe kéoúba. Nnde neoúba ande gea, ɗétú keíme-íme. Cɔ, kɛ̌kɛnde, nɛɔnapha.»
26Ɓâ goto omúsia: «Akogǐí ɓo? Atókoɗi iso akɔ ɓo?» 27Áǒsikisia: «Ɗénóngoɗi ye, ɓɔ́kɔ́mɔɔ́kɛ gǎkɛ. Cɔ, eke nde ɓomoúsií goto? Ande gea, ɓokondi phɔtɔ ɓóɓɛ ɓagoigi nɛkɛ?»
28Mpɔ, ɓáombóma, ɓáogea: «Oɓɛ aámbé onde ngoigi nɛkɛ, ɓe ndiu ɓagoigi ndea Mósa. 29Ɓeoúba gea, Mokonga ɗáyɔngi na Mósa. Cɔ, mogáa nde ɓéké gǎkɛ oúba kuɓî atóki.»
30Nkpa ndɔ áǒsikisia te: «Kema nde ande ketangaɔ. Ɓókóoúba ɔma nde nkpa nde atóki, na yɛ aámbé amokoɗi iso. 31Ɓeoúba gea, Mokonga nnaɔ̌ɓɔ́ka ɓato á ɓojeɗe. A ndiu tɔ ɔmɔ́ka mmbé aomɓánga, phɔtɔ mmbé aɔtɔtɔkisa mɔphɛ akɛ. 32Nna na nkpa nde aɔkimbɛ mɔnɔ gea nkpa akoɗi iso á nkpa, mmbé ɗáɓɔkɔtɛani keíme-íme. 33Atúoɓá nkpa nde na kátóki mɔtɛ á Mokonga, ámbé kátɔtɔkisi tanda ka kema.» 34Ɓayúda ɓáonsikisia gea: «Caa! Ɔɓɔkɔtɛani tɔ suɓi á ɓojeɗe. Ookaɓa goisaga asu?» Mpɔ, ɓáomɓeaga ka nsɛngɛ éndu á madondanɔ ndea Ɓayúda ka nyɔngɔ á Mokonga.
Keíme-íme á ka měma
35Ɓî Yéso aɔ́ki gea, ɓámɓîgi nami ndɔ, áondonda, áomúsia: «Cɔ, omɓeeki Muna-Nkpa?» 36Áonsikisia: «Mɔkɔta, ani mmbɔ ka gea, némɓeekeɛ?» 37Yéso áongoɗea: «Ɔ tɔ ɔmɔna, yɛ aámbɔ ɓɔɔyɔnga na yɛ kɛ̌kɛnde.» 38Áongea: «Mɔkɔta, neɓeeki.» Áogbuka muanku mosá akɛ.
39Mbusa, Yéso áogea: «Nebiki ka mokonda nde ka tena á nyɔngɔ. Ɓakeíme-íme ɓáɔnaphɛ, ɓunde ɓáɔɔnapha, ɓáɓɛ ɓakeíme-íme.»
40Ka Ɓaphaisáyɔ nde ɗáɓátú wa, ɓî ɓáɔ́ki nyɔngɔ ndɔ, ɓáomúsia: «Ande gea te, ɓe phɔtɔ ɓakeíme-íme?» 41Yéso áǒsikisia: «Aoɓá na ɗóɓotú ɓakeíme-íme, ámbé ɗóɓókótú ye ɓato á ɓojeɗe. Cɔ, ɓî ɓo gǎkɛ ogea ɓɔɔnapha, ande gea, ɓo phɔ́tɔ na ɓojeɗe nɛnu.»
Currently Selected:
Yoáni 9: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
