Lóka 1
1
Ngia ka nyɔngɔ nde a suɓi á ɓuku
1Mɔkɔta Tɛɔphílɔ#1.1 Ɔna Eku 1.1. Tɛɔphílɔ ɗátú ntɔi nde Lóka antekisií ɓaoɓa ndee.,
Ɓakpa ɗanga-ɗanga ɗáɓákengi ɗundua nyɔngɔ á Mɔkɔta, nnde ɗágeani sɔsɔɓɛ asu. 2Ɗáɓáúsigi nyɔngɔ ndɔ ka ɓaɗigimisi ɓundɔ ɗáɓáɔni kema bui ka nkpangeɔ í, ɓáoɓá ɓabɛɗanigi á tɔ̌miaga nyɔngɔ á Mokonga. 3Cɔ! Eme nebɛɗi phɔtɔ moangɔ á cɔca á cina á nyɔngɔ bui ka gea, néúbɛ, mpɔ néoɗunduiɛ ú ánjá mɔkɔta Tɛɔphílɔ. 4Netógi ɓó, ka gea, óengekisɛ koɗoni á nyɔngɔ nde ɓátóogoisigi.
Éme á ketangaɔ ndea Ɛlijabɛ́ti
5Ka matú á Ɛlɔ́dɛ, moamɛ á ka Yudɛ́a#1.5 Yudɛ́a: ande nji bui á Ɓayúda., nkpa moci ɗátú ntoɓeigi-phɛ́a ina akɛ Jakaía. Yɛ, ɗátú ka ketoto ndea Abíya#Ɔna 1 Nyɔ 24.7-18. Nkakɛ Ɛlijabɛ́ti ɗátú k'ékombo ndea Alɔ́ni#1.5 Ɗátú ngbɛga á ɓatoɓeigi-phɛ́a ɓa k'ama mosá-mosá. Dátú phɔtɔ phomiakɛ na Mósa.. 6Ɓɔbu ɓaɓɛ ɗáɓátú ɓato á koɗoni k'íso á Mokonga. Ɗáɓáotambea ɓíndɔ ɛɔphi bui ndea Mɔkɔta ayɔngi, na tɔtɔkisa á kema bui nde Mokonga ɗáososea kángá kisɛki. 7Ɗáɓákátú gǎkɛ na miki nga, Ɛlijabɛ́ti ɗátú ngomba. Ɗáɓátú phɔtɔ ɓɔbu ɓaɓɛ ɓaphomi phɛɛ.
8Cɔ, esa moci, Jakaía ɗáɔbɛɗanaga ekuma nɛkɛ á ntoɓeigi-phɛ́a mosá á Mokonga. Nga, ɗátú esa á ketoto nɛkɛ ka toɓoa á phɛ́a. 9Ɓíndɔ ɗátú asii á ɓatoɓeigi-phɛ́a, ɓana-mɛlɔɛ ɗáɓángúi tɔ yɛ gea te, ángiɛ suɓi éndu#1.9 suɓi éndu ande gea te ɔma nde ɓatoɓeigi-phɛ́a sasaɓɔ tɔ ɓáunge ɗáɓátú na kɔkɔta á ngia kau. ndea Mokonga ka toɓoa á ngaɛ́#Ɔna Jua 30.1-6 á esomba. 10Ɓî ɗáɔbɛɗanaga ekuma á toɓoa á ngaɛ́, ɓakpa ɓásii ɗáɓátú ɔmɛma Mokonga ka nsɛngɛ.
11Wa, malaéka nde ɓa Mɔkɔta, áɔnsɛnɛkɛa Jakaía, áomama ka njaga á mǔku á ɛtɛ-ɔ́phɛ́ɔ á toɓoa á ngaɛ́#Ɔna Jua 30.1-6; 1 Ɓam 7.48. 12Ɓî Jakaía amɔni malaéka, áoyayama, áoɓá na kɔɓɔɓɔkɔ. 13Malaéka áongea te: «Jakaía, koɓángɛmbɛ nga, Mokonga aɔ́ki ɛmɛmi nɛkɔ. Nkakɔ Ɛlijabɛ́ti, amɓɔkɔtande k'akɔ miki-mǒko. Onsuande Yoáni. 14Abikande k'akɔ na maseye phɛɛ, ɓakpa ɓásii ɓáguande jaí ka ɓɔkɔtɛana akɛ. 15Nga, aɓande nto á ɓoombia k'íso á Mɔkɔta. Kánoɛeka tanda divai na etéte á makana bui#Ɔna Mɔɔ 6.3. Atúmande na Měma á kanga ɓojeɗe n'a phɔ́tɔ suɓi á sɔphɔ á amakɛ. 16Ějisande Ɓaisilaɛ́li ɓásii ka Mokonga, Mɔkɔta nɛɓɔ#Ɔna Mkɔ 2.6. 17Ammɛande Mɔkɔta mosá, atambande na měma á ɓukpɛkpɛ ɓíndɔ Elía mɔtu-nyɔngɔ ndea Mokonga ɗátú ně. Abikande k'aphe á ɔnganisa á ɓaɓɔkɔti na ɓ'anaɓɔ, ɓaɗakekanigi-kecue ɓáúbaphande ɓea ɓato á koɗoni#Ɔna Mki 3.23-24. Abisande měma ánjá suɓi á ɓakpa ka ɓondea á Mɔkɔta nɛɓɔ.»
18Mpɔ Jakaía áongoɗea malaéka: «Kema sina nde amoúbisande nyɔngɔ ndɔ nga, eme na nkani ɓe ye tɔ ɓaphomi?» 19Malaéka áonsikisia: «Eme nende Gabiliɛ́li#Ɔna Dan 8.16; 9.21; Lók 1.26, neomamaga mosá á Mokonga ka bɛɗaneaga akɛ. Yɛ, aámbé amoteki ka ngoɗea akɔ nyɔngɔ ánjá ndee. 20Cɔ, oɓande kaúma. Ɔyɔngaeka tɔ esa nde nyɔngɔ ndɔ bui atɔtɔkɛanaeka nga, kóɓeeki nyɔngɔ nɛmɔ. Nyɔngɔ ndɔ bui atɔtɔkɛanande ka mbenɔ nde Mokonga aangí.»
21Wa, ɓakpa ɓunde ɗáɓátú omɓondea Jakaía, ɓáotangaaga ka nyɔngɔ sina nde ɗáíphí k'éndu á Mokonga. 22Â gǎkɛ ojuana na ká ye ɔyɔnga na ɓɔ. Mpɔ, ɓáoúba gea, aɔni mphangiɔ k'éndu ndea Mokonga. Â tɔ ɔyɔnga na ɓɔ na njaga, áojiga kauma.
23Matú ékuma nɛkɛ así ye, áoja mɔtɛ-akɛ. 24Mbusa á esa ábɔa, nkakɛ Ɛlijabɛ́ti áokumba éme, áǒbuniaga ně ka ɓasonge ɓɔku. Áɔyɔnga ka yɛ sasakɛ: 25«Cɔ, ɔna kema nde Mɔkɔta agi ka phɔani kesande, amophúi soni ka nkíndí á ɓakpa.»
Áɓɛ k'éme ɓíndɔ ɔyɔngi
26Ka songe á ko ngianjaga á éme ndea Ɛlijabɛ́ti, Mokonga áonteka malaéka Gabiliɛ́li ka ntanga-nji moci Najalɛ́ti ndea ka Galiláya. 27Áoga mɔtɛ á nseka moci ina akɛ Malía, mmbé mǒko moci k'ékombo ndea moamɛ Daúdi, ina akɛ Yɔsɛ́phu aámbé ɗántɔ́mi. 28Malaéka ndɔ áongia mɔtɛ á Malía, áonsesea: «Samba! Oɓɛ aámbé Mɔkɔta nɛmɔ akobisíí měma. Yɛ, a kimoci n'oɓɛ.» 29Malía áoyayama ka nyɔngɔ ndɔ, áoianaga, kantíti á nsesɔ ndɔɔ. 30Mpɔ Malaéka áongoɗea ɓe: «Malía, kóɓɛmbɛ na kɔɓɔɓɔkɔ nga, Mokonga akobisíí měma. 31Cɔ, okumbande éme, ɔmɓɔkɔtande miki-mǒko, onsuande Yéso. 32Aɓande na ɓoombia. Ɓámɔphanande phɔtɔ Muna-Mokonga Mmbé ana kɔkɔta bui. Mɔkɔta Mokonga amophande phɔtɔ koɓoamɛ ndea tatakɛ Daúdi. 33Aɓande moamɛ ndea Ɓaisilaɛ́li esa bubui, koɓoamɛ nɛkɛ káɓɛku na sungiaga#Ɔna 2 Sam 7.12,13,16; Isa 6.6; Dan 7.14.»
34Malía áomúsia malaéka: «Nyɔngɔ ndɔ atɔtɔkɛanande ɓo, ɓî kédondanimbɛ mɔnɔ na mǒko?» 35Malaéka áonsikisia te: «Měma á kanga ɓojeɗe adidande, áoika gǔ akɔ. Mokonga, Mmbé ana kɔkɔta bui, aogbukumiande n'iimbiɔ á ɓukpɛkpɛ nɛkɛ. Kaɓondɔ unge mmbé ɔmɓɔkɔtande aɓande nto á kanga ɓojeɗe, ɓámɔphanande phɔtɔ Muna-Mokonga. 36Nga, Ɛlijabɛ́ti, nto á k'ékombo nɛkɔ, a phɔtɔ na éme á miki-mǒko ka kophomi akɛ. Mmbɔ ɓátúma ɔmɔphana ngomba, ana éme á ɓasonge ngianjaga (6). 37A tɔ ɓó, ka nyɔngɔ nde, kema bubui a tɔ ɔtɔtɔkɛana ka Mokonga#Ɔna Nkp 18.14.» 38Mpɔ Malía áoɓeekea: «Nende mbɛɗanigi nde ɓa Mɔkɔta. Átɔtɔkɛanɛ k'éme ɓíndɔ ɔyɔngi.» Wa, malaéka áoga.
Njokoa á miki ka sɔphɔ á amakɛ
39Ka ɓ'esa ndɔ tɔ, Malía áoma, áokamisaga gǎ ka ntanga-nji á mamba-mamba á Yudɛ́a. 40Áongia k'éndu ndea Jakaía, áonsesea Ɛlijabɛ́ti. 41Ɓî Ɛlijabɛ́ti aɔki nsesɔ ndea Malía, miki ímbɛkɛ áonjokoa akpɛ ka sɔphɔ akɛ. Kaɓondɔ, Ɛlijabɛ́ti áotúma na Měma á kanga ɓojeɗe, 42áɔyɔnga akpɛ gea: «Mokonga akophi ɓosegi kɔ̌nyɛ́nya ɓake ɓɔbu. Ɓosegi ndɔ a phɔtɔ ka miki ndɔ a ka sɔphɔ akɔ. 43Cɔ, nende ani ka gea, ama-Mɔkɔta nɛmɔ abiki mɔtɛ-amɔ? 44A ɓondɔ nga, kɛ̌kɛnde, ɓíndɔ nɛɔ́ki nsesɔ ndeakɔ, miki anjoku na maseye ka sɔphɔ ani. 45Maseye phɔtɔ k'óɓɛ ímbɔ oɓeeki nyɔngɔ bui nde Mɔkɔta akongoɗi nga, atɔtɔkɛanande.»
Embɔ ndea Malía
46Cɔ, Malía áɔɔ́tɔa gea#1.46 Embɔ nde akengeani n'índe á Ana. Ɔna 1 Sam 2.1-10:
«Nenɗokomisi Mɔkɔta ka měma,
47měma ani ana maseye phɛɛ ka Namisi nɛmɔ Mokonga,
48nga, amɔɛnji na ngomi, eme mbɛɗanigi nɛkɛ á jǎi-jǎi#Ɔna 1 Sam 1.11.
Eya, kpanga á kesande ɛɓɔkɔti n'ɛɓɔkɔti ɓámɔɔphanande Ama-ɓosegi,
49ka nyɔngɔ nde, Mɛna-Ɓukpɛkpɛ amogǐí kema ángbó.
Ina akɛ a tɔ Nto á kanga ɓojeɗe,
50ngomi nɛkɛ aendande ka saga na saga ka ɓundɔ ɓáomɓánga.
51Amesi njaga akɛ á ɓukpɛkpɛ,
ěphanji ɓato á éɗokomisa ka měma.
52Ětókisi ɓaamɛ ka kankaanga á kɔkɔta, áǒsamboa ɓakusi#Ɔna Yob 5.11; 12.19.
53Ěkutisi ɓato á nja na kema ánjá,
â gǎkɛ ǒjisa ɓatɔi kángá á kema.
54Ěengi Ɓaisilaɛ́li, ɓabɛɗanigi nɛkɛ,
kángá ɓosea ɓonjánja nɛkɛ,
55ka Abalaámu, k'ɛ́ɓɔkɔti n'ɛɓɔkɔti nɛkɛ esa bubui,
ɓíndɔ ɗɛ́ɔku ɓatatasu.»
56Cɔ, Malía áoika mɔtɛ á Ɛlijabɛ́ti ɓea ɓasonge ɓasaɔ. Mbusa, áoja mɔtɛ-akɛ.
Miki ndɔ Yoáni aɓande ɓo?
57Ka mbenɔ á ɓoaé nɛkɛ, Ɛlijabɛ́ti áɔmɓɔkɔta miki-mǒko. 58Ɓamasambe akɛ na ɓaɓɔkɔti akɛ, ɓáɔ́ki ye ɓíndɔ Mɔkɔta ankui ngomi phɛɛ, ɓáogua jaí kimoci na yɛ.
59Mbusa ésa ngianjaga isaɔ (8), ɓáoga ongusa ganja#Ɔna Ɓlw 12.3. Ɗáɓáogea, ɓánsuɛ ina á abakɛ Jakaía. 60Wa, amakɛ áǒngoɗea te: «Gbati! Ina akɛ áɓɛ tɔ Yoáni.» 61Ɓáonsikisia gea te: «Nna na nkpa nde ina akɛ a gǎkɛ ɓó, k'ékombo nɛnu.» 62Mpɔ, ɓáomúsia abakɛ na njaga gea te: «Ɓánsuande ina sina?» 63Jakaía áɔmɛma miki á gaó, áoɗundua kau ɓe: «Ina akɛ ande Yoáni.» Ɓakpa ɓɔbu ɓáotangaaga. 64Kɛ̌kɛndɔ, aphenɔkɔ n'ɛsɔ á Jakaía áoúkukana, áokpanga beba á Mokonga k'ɛ́sɔ akpɛ. 65Ɓakpa ɓɔbu á ka mpɛphɛ aɓɔ ɓáoɓá na kɔɓɔɓɔkɔ. Nyɔngɔ ndɔ áondanda ka nji á mamba-mamba á ka Yudɛ́a bui. 66Cɔ, ɓundɔ ɗáɓáɔ́ki nyɔngɔ ndɔ, ɓáoianaga phɛɛ, ɓáoúsianaga: «Miki ndɔ aɓande gǎkɛ ɓo?»
Njaga á ɓukpɛkpɛ ndea Mɔkɔta áoɓá ka miki.
Embɔ ndea Jakaía ka ɔtɔa akɛ nyɔngɔ
67Mpɔ Jakaía, aba-miki, áotúma na Měma á kanga ɓojeɗe suɓi akɛ. Áɔɔ́tɔa nyɔngɔ ɓe:
68«Ɓosegi ka Mɔkɔta, Mokonga á Ɓaisilaɛ́li,
nga, akiɗi ka enga ɓakpa nɛkɛ na tókisa aɓɔ ka kɔkɔɓɛ.
69Asóphi Namisi angbóngbó k'ékombo ndea mbɛɗanigi nɛkɛ Daúdi.
70A tɔ ɓíndɔ ɗátɔ̌mi kala k'aphenɔkɔ á ɓaɔtu-nyɔngɔ nɛkɛ.
71Asóamisande na ɓaɓíɓia nɛsu,
phɔtɔ ka njaga á ɓundɔ ɓásokangei.
72Ka gea ékuiɛ ɓatatasu ngomi,
kángá ɓosea ɔngana nɛkɛ á ɓonjánja.
73N'ande ɓíndɔ ɗáɔphí ka tatasu Abalaámu#Ɔna Nkp 22.16-17,
74gea, asóphúiande ka njaga á ɓaɓíɓia nɛsu ka gea,
ɓɛ́mbɛɗaneɛgɛ kángá á kɔɓɔɓɔkɔ,
75ɓéɓɛ na ɓonjánja na koɗoni mosá akɛ ka enda asu bui.
76Oɓɛ gǎkɛ miki, ɓákɔɔphanande mɔtu-nyɔngɔ ndea Mmbé ana kɔkɔta bui,
nga, ɔmmɛɛande Mɔkɔta mosá ka ɓɔngisiaga aphe nɛkɛ#Ɔna Mkɔ 3.1,
77na úbisa á ɓakpa nɛkɛ nyɔngɔ á ɓoamia á ka měma,
n'aphe á íma ɓojeɗe nɛɓɔ.
78Nga, Mokonga nɛsu asókondi ka měma akɛ phɛɛ.
Asóengi ɓea maní á kamɓimba ka toka na koba.
79Ka bɛnya gǔ asu, ɓesu íɓunde ɓe ka keiphe na kusi á iimbiɔ á kukuwa,
na ka ubisa asu aphe á ɓujɛjɛ.#Ɔna Isa 9.1»
80Cɔ, Yoáni áɔmɔta, áokakamana ka měma. Mpɔ, áoika ka nkanda, na ka ɓî agaeka ǒphangisia base ka Ɓaisilaɛ́li.
Currently Selected:
Lóka 1: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
