Lóka 12
12
Nyɔngɔ á ɓɔsɔmɛa angoɗokanande
(Ɔna phɔtɔ Mat 10.26-27)
1Wandɔ, usɛsɛ á ɓakpa ɓáotúndukanaga. Ɓáoɓá ɛlɛphu na ɛlɛphu na ka ɓî ɗáɓáɗɛtɛanigi. Yéso â phɔ́ kǒngoɗeaga ɓagoigi nɛkɛ mosá ka mpɛphɛ gea: «Óengani na cacu ájeɗe ndea Ɓaphaisáyɔ. Ande gea, maibe-maibe nɛɓɔ. 2Nyɔngɔ bui nde aɛsɔmɛani, angoɗokanande. Nndɔ á ka ɓɔsɔmɛa, aúbukanande. 3Kaɓondɔ, nyɔngɔ bui nde ɓɔɔyɔnga ka kaiphiɔ, aɔ́kɛkanande somani. Nnde ɓɔɔyɔnga ka kɔsɔ-kɔsɔ k'éndu na ɓáphǎti, ɓátɔmiagande akpɛ ka ntɔ́ndɔ.»
Ani mmbé akeni ɓómɓangɛ?
(Ɔna phɔtɔ Mat 10.28-31)
4Nenóngoɗi ɓenu ɓadani: «Ɓókóɓɛmbɛ na kɔɓɔɓɔkɔ á ɓunde ɓáomowa nyama á nkpa. Mbusa, ɓákágeɛ ka kema. 5Nenóphangiande mmbé akeni ɓómɓangɛ. Mɓángani ndiu Mokonga mmbé ana ɓukpɛkpɛ á maka anu ka nji á ɓasí#Ɔna Mat 10.28 mbusa á kukuwa. Eya! Nenóngoɗi ambe mmbɔ ambɔ akeni ɓómɓangɛ.
6Ɓánáǒsombisa ɓ'ijɛngɛɛ ɓɔku ka miki á imɔna iɓɛ? Cɔ, Mokonga nna tanda omɓosea ka ɓɔ moci.
7A phɔtɔ oúba sekamɔ̌ angaáni ɓo ně. Kaɓondɔ, ɓókoɓángɛmbɛ nga, ɓɔ̌nyɛ́nyi ɓ'ijɛngɛɛ ɓásii.»
8«Nenogie, mmbé amoɗigimisíí nyɔngɔ base mosá á ɓakpa, eme Muna-Nkpa nenɗigimisiaeka phɔtɔ base mosá á ɓamalaéka ndea Mokonga. 9Mmbé amoyé mosá á ɓakpa, nen'yáeka phɔtɔ mosá á ɓamalaéka ndea Mokonga.
10Nkpa buakɛ, mmbé aɔyɔnga nyɔngɔ ájeɗe gǔ á eme Muna-Nkpa, Mokonga aímande ɓojeɗe nɛkɛ. Mmbé a gǎkɛ ombóma Měma á kanga ɓojeɗe, Mokonga káímɛku ndiu ɓojeɗe nɛkɛ.
11Mbenɔ nde ɓáonóga ně k'éndu á madondanɔ ndea Ɓayúda ka nyɔngɔ á Mokonga na mosá á ɓakɔta na ɓaamɛ, ɓókoianɛgɛmbɛ nyɔngɔ nde ɓǒsikisiande n'índe ɓɔ̌yɔngɛande sasanu. 12Nga, Měma á kanga ɓojeɗe anógoisagande ka mbenɔ ndɔ tɔ, nyɔngɔ nde ɓɔyɔngande.»
Mɛní á ntɔi mbóbó
13Nkpa moci ka usɛsɛ á ɓakpa ndɔ áongoɗea Yéso te: «Ngoisigi, ngoɗea muna-ayi gea, ɓékatisanɛ ɓotukɔ nde abasu ɗásósagei.» 14Mpɔ Yéso áonsikisia te: «Moko, ani mmbé amobisi nteni-nyɔngɔ, kaɓɛ ngabi-nkumba nɛnu?» 15Mpɔ, áǒngoɗea ɓɔbu ɓe: «Ɛ́ngɛphani na nyɔngɔ á ekondi á ɛtɔi nga, enda á nkpa nna ka nyɔngɔ á nkumba nɛkɛ nanga áɓá ntɔi phɛɛ.»
16Mpɔ, áɔ̌tɔmiaga mɛní ndee: «Ntɔi moci ɗátú na ciko nɛkɛ nnde mbó í ɗáphondi phɛɛ ka mbenɔ á ɗungu. 17Kaɓondɔ, ntɔi ndɔ ɗáokanisia ɓe: ‹Negeande ɓo? Kéná ɔma ka bisa á ɗungu nɛmɔ bui.› 18Áogea: ‹Negeande ɓendee: Nɛngbɔande egbóngbó, nɛ́ɔphɛka nɛngbo n'aángbó phɛɛ. Mpɔ, néobisa ɗúngú nɛmɔ bui na nkumba nɛmɔ bui kau. 19Mbusa, néǒsega sasani gea: Moko, ona nkumba ásii phɛɛ ka saga ásii. Cɔ, úmbia phɔ́, eaga, ónoɛ, óguɛ jaí.› 20Mpɔ, Mokonga áongea: ‹Mbóbó nde ca! Ka keiphe nde tɔ, neutande měma akɔ. Cɔ, ani mmbé ajigande na nkumba ndɔ ɓî otóbisi ka phɔakɔ?›» 21Yéso aogea: «Ɓondɔ unge aɓande ka nkpa nde aodondanisaga nkumba ásii ka phɔakɛ sasakɛ na nna n'ɛtɔi k'íso á Mokonga.»
Káɓáni phɔ́ nyɔngɔ á ka koɓoamɛ ndea Mokonga
(Ɔna phɔtɔ Mat 6.25-34)
22Mbusa, Yéso â phɔtɔ ǒngoɗea ɓagoigi nɛkɛ: «Kaɓondɔ unge nenógie, ɓókotambɛgɛmbɛ ka enda anu, kema sina nde ɓoeande na bɔngɔ nde ɓɔɔ́lande ka nyama anu 23nga, eea nna na kantíti kɔnyɛ́nya enda. Bɔngɔ nna phɔtɔ na kantíti kɔnyɛ́nya nyama anu. 24Kanisiani phɔ́ ɓakungulu. Ɓánáokona, ɓáná gǎkɛ oɗungua. Ɓáná n'egbóngbó na mǒkomba. Mokonga aámbé aǒisa. Ɓenu gǎkɛ ɓɔ̌nyɛ́nyi ɓambǔ!
25Cɔ, ɓî ɓootambaga ka měma anu ndɔ, ka ɓenu sina mmbé aɔtɔka n'atútuisi ábɔa esa á enda akɛ ka nyɔngɔ á tambaga kau? 26Cɔ, kaɓɛ na ɓɔ́kɔ́ɔtɔka kema ábɔa ɓíndɔ, ka nyɔngɔ sina nde ɓootambaga ka nyɔngɔ á kema nde ajigi? 27Ɔnjiani phɔ́ maya á k'osaa. Maya nnaɔbɛɗanaga, nnaophopha bɔngɔ. Negie, nanga moamɛ Sɔlɔmɔ́nɔ ɗátú n'ɛtɔi bui, ɗákátɔí bɔngɔ ánjá phɛɛ ɓea ka maya ndɔɔ. 28Ɓenu ɓato á ɓeekea ábɔa nde ca! Mokonga aɔɔ́lisa ɔphɔ bui á ka ciko nnde áɔtɛa kesande na mama ɓáomaka ka nsa. Cɔ, Mokonga kánɔɔ́lisande phɔtɔ ánjá kɔnyɛ́nya ú!
29Ɓókǒtambisɛgɛmbɛ ka nkaɓɔ á kema nde ɓoeande n'índe ɓonoande. 30Nga, ɓato á ka mokonda ɓunde ɓánáomúba Mokonga ɓáunge ɓáotambeaga kema ndɔ bui. Abanu a gǎkɛ oúba kema nde ɓona siki í. 31Káɓáni ndiu phɔ́ nyɔngɔ á koɓoamɛ ndea Mokonga! Mbusa í, Mokonga aámbé anóphande kema nde anójiganei.
Bisani ɛtɔi nɛnu mɔtɛ á Mokonga
(Ɔna phɔtɔ Mat 6.19-21)
32Miki á nsamba á ɓamɔgɔgɔ nɛmɔ, ɓókoɓɛmbɛ na kɔɓɔɓɔkɔ! Nga Abanu ana siki á opha anu koɓoamɛ nɛkɛ. 33Sombisani nkumba nɛnu, ɓóɓophɛ ɓato á ɓuyɛnɛ imɔna í. Ɓɔngisiani ndiu kanu njombi á na koba, nnde nnaoújukana. Phombeagani kanu ɛtɔi na koba k'ɔ́ma nde ɓákáújɛku, ɓakukuɓa ɓákádondɛeka na ɓansɛngɛ ɓákáújɛeka 34nga, ɔma nde ɛtɔi nɛnu aɓei, wa unge ɓobisi phɔtɔ měma anu.
Ɛɓɔngisiagani ka ɓondeaga Muna-Nkpa
35Ikani tɔ na ɓɔɔ́li bɔngɔ nɛnu á ekuma na ɔbɛa nɛnu n'a tɔ ǒtoɓoaga. 36Ɓáni ɓea ɓabɛɗanigi na ɓáomɓondeaga mɔkɔta nɛɓɔ, mbenɔ nde aoja k'aphe á ɛkɛka ka gea te, ɓámúkuiɛ kǐo mbenɔ nde agbondoagande ú. 37Aɓande maseye ka ɓabɛɗanigi ɓunde mɔkɔta nɛɓɔ ědondande na ɓákáɗé. Nenóngoɗi ɗoni gea, mɔkɔta nɛɓɔ aɔ́lande bɔngɔ á ekuma, áǒikisa ɓabɛɗanigi ka mɛja, áɔ̌bɛɗaneaga! 38Aoɓá n'ajú k'ésa angedi dakɛ, kaɓɛ mbusa í na ɓákáɗé, aɓande phɔtɔ maseye ka ɓabɛɗanigi ndɔɔ! 39Úbani phɔtɔ nnde: Ɗátúoɓá mɛna-endu n'aúbi mbenɔ sina nde nkukuɓa abikande, ámbé ɗákáɓeeki gea, áɓunɛ endu nɛkɛ. 40Ɓenu phɔtɔ, ɛ́ɓɔngisagani nga, ɓókóoúba mbenɔ nde eme Muna-Nkpa nebikande.»
41Mpɔ Pɛ́tɛɛ áongea: «Mɔkɔta, mɛní ndɔ oosóngoɗeaga a tɔ ka ɓesu, a phɔtɔ ka ɓakpa ɓɔbu?» 42Mɔkɔta áonsikisia te: «Ani mmbé ande mbɛɗanigi á koɗoni n'ande múbaphi? Nga mɔkɔta nɛkɛ ambisi gǔ á ɓadakɛ ka gabea aɓɔ eea mbenɔ nde ɓá na siki í. 43Aɓande maseye ka mbɛɗanigi ndɔ, aoɓá mɔkɔta nɛkɛ n'andondi n'a phɔ́tɔ ɔtɔtɔkisa ekuma ndɔɔ! 44Nenóngoɗi ɗoni gea, mɔkɔta nɛkɛ amophande kɔkɔta gǔ á nkumba nɛkɛ bui. 45A gǎkɛ oɓá mbɛɗanigi ndɔ n'ěgi sasakɛ: ‹Hoo! Mɔkɔta kábikɛku soma.› Áokpanga ɓinda á ɓadakɛ ɓabɛɗanigi, ɓǒko na ɓake. Áoikia eaga na noa n'ɛbɛɗi á makana. 46Mpɔ, mɔkɔta áobika esa nde na mbenɔ nde mbɛɗanigi kásendi ú. Kaɓondɔ, mɔkɔta amɓeagande na tena á nyɔngɔ nɛkɛ akpɛ ɓea ɓakpa nde ɓákámɓeeki Mokonga.
47Ande gea te, mbɛɗanigi nde aoúba mɔphɛ á mɔkɔta nɛkɛ, na nnaɔtɔtɔkisa ú, ɓámɓindande ásii. 48Mmbé nna gǎkɛ oúba mɔphɛ á mɔkɔta nɛkɛ, n'aogea ájeɗe, ɓámɓindande ábɔa, ande gea te nkpa nde ɓámophi kema ásii, ɓámɛmande phɔtɔ kema ásii. Nkpa nde ɓámophi kɔkɔta ángbó, ɓámúsiagande ka kema ásii.
Yéso cina á katanaga
(Ɔna phɔtɔ Mat 10.34-36)
49Cɔ, nebiki ka mokonda k'aphe á makea nsa#Ɔna Isa 66.15-16. Nekondi étoɓoɛ ye tɔ. 50Nena oɓatisɔ nde nengiande gǎkɛ kau. Néotambaga phɛɛ na ka ɓî negande ɔtɔtɔkisa ú! 51Ɓookanisia te nebiki k'aphe á bisa á ɓujɛjɛ ka mokonda? Nna ɓó! Nebiki ndiu okatanisaga. 52Kpanga á kɛ̌kɛnde, ɓakpa ɓɔku á k'ékombo moci ɓákatanagande. Ɓakpa ɓaɓɛ ɓákáɔ́kanɛku na ɓakpa ɓasaɔ, ɓakpa ɓasaɔ ɓákáɔ́kanɛku phɔtɔ na ɓakpa ɓaɓɛ.
53Eya, miki á nganja n'abakɛ ɓákatanagande, abei akatanagande n'anakɛ. Nseka n'amakɛ, ɓákatanagande, ama-nseka akatanagande na nseka nɛkɛ. Nka-miki na nyamɔtɔ akɛ ɓákatanagande, nyamɔtɔ-éyamani na nka-anakɛ ɓákatanagande phɔtɔ#Ɔna Mik 7.6.»
Úba á matú
(Ɔna phɔtɔ Mat 16.2-3)
54Yéso áǒngoɗea usɛsɛ á ɓakpa: «Mbenɔ nde ɓɔɔni egugu n'oyonga, ɓôgea: ‹Asóɔka.› Â tɔ ɔɔka. 55Mbenɔ nde maphopho aotóka kusi ɓôgea: ‹Maní aɓɛtande akpɛ.› Â tɔ oɓá ɓó. 56Ɓato á maibe-maibe nde ca! Ɓooúba kantíti á mphangiɔ á ka oɗo n'ego. Cɔ, eke nde ɓókóoúba mphangiɔ á ka matú nde?
Ɔ́kanani na mɓiɓia nɛkɔ mosá á tena á nyɔngɔ
(Ɔna phɔtɔ Mat 5.25-26)
57Eke nde ɓókóoúba tena á nyɔngɔ sɔsɔɓɛ anu ka koɗoni? 58Aoɓá na ɓoge na mɓiɓia nɛkɔ ka ntua á tena nyɔngɔ, akeni ókaɓɛ aphe á ɔkana na yɛ na ɓɔ phɔ́tɔ k'aphe ka gea, kakojusɛmbɛ ka ntua á ɓateni-nyɔngɔ nga, ɓákobisande ka njaga á mɔkɔta, yɛ áokomakisa ka mekakɔ. 59Nekongoɗi gea, kójuanɛku kó na kóphendimbɛ imɔna bubui.»
Currently Selected:
Lóka 12: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
