Lóka 16
16
Mɛní á nambi-nkumba n'ana maibe-maibe
1Yéso â goto ǒngoɗea ɓagoigi nɛkɛ mɛní ndee: «Nkpa moci ntɔi ɗátú na nambi-nkumba nɛkɛ. Ɓakpa ɓáobika ɔntɔnga nambi-nkumba ndɔ mɔtɛ-akɛ gea te: ‹Nambi-nkumba nɛkɔ aúji nkumba nɛkɔ.› 2Kaɓondɔ, ntɔi áɔmɔphana nambi-nkumba, áongoɗea ɓe: ‹Nyɔngɔ sina nde ɓakpa ɓáɔkɔtɔnga ájeɗe ně? Cɔ, ómoúbisa nyɔngɔ á nkumba ndɔ ooamba. Nga, kpanga á kesande, kóɓɛku ye nambi-nkumba nɛmɔ.› 3Mbusa, nambi-nkumba áogea suɓi á měma akɛ ɓe: ‹Negeande ɓo? Nga, mɔkɔta nɛmɔ amɔkpɔi kɔkɔta á amba nkumba nɛkɛ. Cɔ, kéna ɓukpɛkpɛ á guba. Aoɓá na nɛɔmɛmaga, ámbé nekuwande na soni. 4Eya, neoúba kema nde negeande ɓî mɔkɔta amotokisande k'ékuma, ka gea ɓakpa ɓámoseseɛ mɔtɛ-aɓɔ.›
5Mpɔ, áɔ̌ɔphana ɓakpa ɓɔbu ɓunde ɗáɓábɛɗi nkumba ndea mɔkɔta nɛkɛ kángá á phenda í. Ɓáobika moci-moci. Áomúsia mmbɔ andondi mosá: ‹Ojigi n'ophendɔ á nkumba ndea mɔkɔta nɛmɔ ángaáni?› 6Áonsikisia gea: ‹Nejigi na mboso á gamba nkama iɓɛ (20).› Nambi-nkumba áongea: ‹Cɔ, bɛɗa ɓaoɓa-óphendɔ nɛkɔ, óikɛ ka oɗo, ókamisɛgɛ ɗundua nkama (10).› 7Mpɔ, áongea ɓaangbo: ‹Oɓɛ gǎkɛ, ophendande nɛkɔ ángaáni?› Wa, mmbɔ áonsikisia te: ‹Nejigi na jɔ á mponga mia moci (100).› Nambi-nkumba áongea: ‹Cɔ, bɛɗa ɓaoɓa-óphendɔ nɛkɔ, óikɛ ka oɗo, óɗunduɛ nkama ngianjaga isaɔ (80).› 8Mpɔ, mɔkɔta áobeba kɔɓɔɔngɛ ndea nambi-nkumba nanga ɓî ɗátú nto á maibe. Cɔ, ɓato á ka matú nde ɓá na kɔɓɔɔngɛ sɔsɔɓɛ aɓɔ.»
Nkpa nnaɔtɔka n'aébɛɗaneigi ɓakɔta ɓaɓɛ mɔngɔ ímoci
9Mpɔ, Yéso áɔsɛkisia ɓe: «Nenógie, gabani nkumba nɛnu ódemayɔ ka gea te, ɓóokondisɛgɛ na ɓadanu. Nga, esa nɛngbo, ɛtɔi nɛnu asiande. Mpɔ ɓánoseseande k'ɔ́ma á ɓoiki á mɛyɔ.» 10Nkpa nde ande nto á koɗoni mbenɔ nde aoamba kema ábɔa, aɓande phɔtɔ ɓó mbenɔ nde aoamba kema ángbó. Nkpa nde nna nto á koɗoni mbenɔ nde aoamba kema ábɔa, aɓande phɔtɔ ɓó mbenɔ nde aoamba kema ángbó. 11A gǎkɛ oɓá na ɓókóambi na koɗoni ɛtɔi ódemayɔ, ani mmbé ánophande ɛtɔi á ɗoni gea te ɓóambɛ? 12Aoɓá na ɓókóambi phɔtɔ na koɗoni nkumba ndea ɓakpa ɓunɛngbo, ani mmbé ánophande nkumba ínɛnu?
13Nna na mbɛɗanigi nde aɔtɔka n'aɛ́bɛɗaneigi ɓakɔta ɓaɓɛ. Ámbé ankangeande moci, áonkonda ɓaangbo. Ámbé aɗakateanande na moci, áɔmɓɛnjiaga ɓaangbo. Eya ɓókóɔtɔka na ɓɔmbɛɗaneigi Mokonga na bɛɗaneaga phɔtɔ ɛtɔi.
Ɛɔphi na koɓoamɛ ndea Mokonga
(Ɔna phɔtɔ Mat 11.12-13; 5.31-32; Mkɔ 10.11-12)
14Wandɔ, Ɓaphaisáyɔ ɓáɔntɛbɛaga Yéso ka nyɔngɔ ndɔ bui nga, ɗáɓáokondaga imɔna. 15Kaɓondɔ, Yéso áǒngoɗea ɓe: «Ɓǒphangisia k'íso á ɓakpa gea te, ɓonde ɓato á ɗoni. Mokonga aámbé a gǎkɛ oúba měma anu. Kema nde ɓakpa ɓáoɗokomisa, aunge Mokonga aɔɔna n'ajɔɔkani.
16Matú ɛ́ɔphi ndea Mósa na ɓuku á ɓaɔtu-nyɔngɔ ndea Mokonga ɗáge osungiaga ka saga ndea Yoáni-Mɓatisi. Kpangea esa ndɔ unge Mbino-Ánjá á koɓoamɛ ndea Mokonga aúbikani, mpɔ nkpa buakɛ a tɔ ǒkukumisa ka gea ángiɛ kau. 17Koba na mokonda anyɛ́nyande kángá ngǎka. Nna ndiu tanda na miki á ɗundua n'ábɔa ɛ́ɔphi nde anyɛ́nyande ɓó.»
18Aoɓá mǒko n'an'yé nkakɛ, áomuka nke ɓaangbo, ande nto á iɛɓɛ. Aoɓá mǒko n'amukí nke nde munyakɛ an'yé, ande phɔtɔ nto á iɛɓɛ.
Ntɔi na Lajáɔ
19Ntɔi moci ɗáɔɔ́laga bɔngɔ áphǒ-phǒ n'esombi í n'akpɛ phɛɛ. Ɗá phɔtɔ oenda esa bubui ánjá na eaga eea nde aotena soki. 20Nto á ɓuyɛnɛ moci ina akɛ Lajáɔ, ɗáoikaga ka oɗo k'íso á mpume éndu ndea ntɔi ndɔɔ. Nyama akɛ bui ɗátú n'aphɛphɔa. 21Ɗátú na siki á eea nde ɗáoguaga kusi á mɛja ndea ntɔi, ɓambowa ɗáɓá ndiu obika oɗíaga aphɛphɔa nɛkɛ. 22Esa ímoci, nto á ɓuyɛnɛ ndɔ ɗáku. Ɓamalaéka ɓáombisa ka kɛbɛ á Abalaámu. Ntɔi ndɔ â phɔtɔ okuwa, ɓáomúmba.
23Ɓî ɗáotambaga ka nji á ɓasí, áomesia iso akɛ, áɔmɔna Abalaámu ɗanga, Lajáɔ n'aiki ka kɛbɛ akɛ. 24Áontoɓea Abalaámu ɓe: «Abɛ hoo! Ómokuia ngomi. Nteka kani Lajáɔ, áubɛ́ sese á miki á njaga akɛ ka iɓo, ádɛkisɛgɛ n'eɗáka ani. Eme aámbé neotambaga k'ɛɛmbɛ á nsa ndee.» 25Abalaámu â ndiu ongoɗea te: «Miki amɔ, kanisia gea te, ɗɔ́tɔi kema ánjánja ka enda akɔ, Lajáɔ â gǎkɛ ɔtɔa kema ájeɗe-jeɗe. Kɛ̌kɛnde gǎkɛ, aphɔngi tɔ wani phio! Oɓɛ aámbé o ndiu ká tambaga. 26Goto, mininga ángbó a sɔsɔɓɛ asu na ɓenu. Kaɓondɔ unge, ɓakpa nde ɓákondi tóka wani, ɓágɛ mɔtɛ-anu, ɓánáɔtɔka. Nna phɔtɔ na nkpa nde áɔtɔka tóka á kó, áojua koni.»
27Ntɔi â goto ongoɗea: «Abɛ, kaɗenge-ɗenge, nteka Lajáɔ k'éndu ndea abɛ. 28Nga, nena ɓana-ayi ɓɔku, ágɛ ɛngɛphisɛ ɓákájuɛmbɛ phɔtɔ k'ɔ́ma á tambaga ndee.» 29Abalaámu áonsikisia: «Ɓana-amakɔ ɓá na Mósa na ɓaɔtu-nyɔngɔ ndea Mokonga kó. Cɔ, ambe ɓɛ́ɓɔkɛ.» 30Ntɔi áogea: «Nna ɓó! Abɛ Abalaámu, atú oɓá nkpa n'atóki ka ɔlɔ á ɓasí, áoga mɔtɛ-aɓɔ, ɓékětiande.» 31Abalaámu áongoɗea gea: «Aoɓá na ɓákámɔ́ki Mósa na ɓaɔtu-nyɔngɔ ndea Mokonga, nanga nkpa ájujuka ka ɔlɔ á ɓasí, ɓákáɓeekeɛku.»
Currently Selected:
Lóka 16: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
