Lóka 21
21
Ɛkɔmi ndea nke á kekusa n'ana ɓuyɛnɛ ka Mokonga
(Ɔna phɔtɔ Mkɔ 12.41-44)
1Yéso áomesia mɔ̌ akɛ, áɔ̌ɓɔna ɓunde ɓáomakea imɔna nɛɓɔ suɓi á sanduku á ɛkɔmi ka Mokonga, ɓakpa ndɔ ɗáɓátú ɓatɔi. 2Â phɔtɔ ɔmɔna nke á kekusa moci n'ande múki, nke ndɔ áomakea gbútuka iɓɛ á ɓaniki á imɔna suɓi á sanduku ndɔɔ. 3Mpɔ Yéso áogea te: «Nenongoɗi ɗoni gea, múki á nke á kekusa nde amaki kɔ̌nyɛ́nya ɓakpa ɓɔbu. 4Nga, ɓunɛngbo ɓámaki ɛkɔmi ka Mokonga due á ɛ́tɔi nɛɓɔ nnde ɓaɔbɛɗanaga ně. Cɔ, yɛ múki amaki ndiu imɔna nɛkɛ bui á enda ně.»
Yéso aɔtɔmia nyɔngɔ á ujukana éndu ndea Mokonga
(Ɔna phɔtɔ Mat 24.1-2; Mkɔ 13.1-2)
5Cɔ, ɓakpa ɓuangbo ɗáɓáobeba mɔphɛkɔ éndu á Mokonga, ɓáɔyɔnga gea: «Ɓágɛɛmisi ánjá n'etae n'ɛkɔmi nde ɗáɓáomopha Mokonga.» Mpɔ Yéso â gǎkɛ ɔyɔnga te: 6«Kema nde ɓɔɔna nde, a n'esa nde ɓángbɔande ú. Nna n'etae nde aikande gǔ á dakɛ, bui angbɔɔkanande.»
Tambaga á mosá á sungiaga á mokonda
(Ɔna phɔtɔ Mat 24.3-14; Mkɔ 13.3-13)
7Mpɔ ɓáomúsia Yéso te: «Cɔ, Ngoisigi, nyɔngɔ ndɔ atɔtɔkɛanande mbenɔ sina, na mphangiɔ sina nde aúbisande gea kema ndɔ atɔtɔkɛanande?» 8Yéso áǒsikisia te: «Ɛ́ngɛphani! Nkpa kanódemɛmbɛ. Nga, ɓakpa ɓásii ɓábikande k'ína ani na ɓáɔyɔnga gea: ‹Eme aámbé, nende Kiísito!› ‹Mbenɔ a ye tɔ bíbí.› Nanga áɓá ɓó, ɓókǒɓeɛmbɛ. 9Mbenɔ nde ɓɔɔ́kande nyɔngɔ á emani ɗanga-ɗanga na oyombɔ á ɓakpa, ɓókoɓangɛmbɛ. Nga, nndɔ bui akeni ágeanɛ. Nna gǎkɛ nndɔ unge ande sungiaga á mokonda.» 10Yéso áotútuisa ngoɗea aɓɔ ɓe: «Ɓato á k'ékuna moci ɓámanande na ɓato á k'ékuna nɛngbo, koɓoamɛ moci amanande na koɓoamɛ nɛngbo. 11K'ɔ́ma ɗanga-ɗanga aɓande na ɓaningina akpɛ, na monganya, na kěta. Kema á ɓangisa, na mphangiɔ ángbóngbó atókande phɔtɔ na koba.
12Cɔ, mosá índɔ bui, ɓánodungande gǎkɛ na tambisaga anu. Ɓánobisande ka njaga á ɓateni-nyɔngɔ á k'éndu á madondanɔ ndea Ɓayúda ka nyɔngɔ á Mokonga na makea anu ka mekakɔ. Ɓánomámisande mosá á ɓaamɛ na ɓakɔta á ntanga-nji ka nyɔngɔ á ina ani. 13K'aphe ndɔ ungɔ ɓɔ̌tɔmiande nyɔngɔ nɛmɔ. 14Cɔ, úbani ka měma anu gea, ɓókoianɛgɛmbɛ phɔ́ nyɔngɔ sina nde ɓɔyɔngande ka phɔanu. 15Nga, eme sisani aámbé nenophande nyɔngɔ á kɔɓɔɔngɛ nnde ɓaɓiɓia anu ɓɔbu ɓákásikiɛku ye kau. 16Ɓabanu, ɓamanu, ɓana-amanu, ɓaɓɔkɔti anu na ɓadanu, ɓánɔtɔngande. Ɓɔ, ɓáekusande ɓakpa ɓuangbo sɔsɔɓɛ anu. 17Ɓakpa ɓɔbu ɓánokangeande ka nyɔngɔ á ina ani. 18Nanga áɓá ɓó, nna tanda na ka sekamɔ̌ anu moci nnde aɓúngande. 19Cɔ, bisani měma anu, nga ka gea anu ɓó aunge ɓoamisande měma anu.»
Újukana á Yɛusalɛ́ma
(Ɔna phɔtɔ Mat 24.15-21; Mkɔ 13.14-19)
20Mbenɔ nde ɓo ye ɔɔna ɓato émani ɗanga-ɗanga na ɓátimbi Yɛusalɛ́ma, úbani gea te, újukana í a ye tɔ bíbí. 21Cɔ, ambe ɓunde ɓáɓande na Yudɛ́a ɓáteɛ gǔ á mamba. Ɓakpa nde ɓá gǎkɛ suɓi á Yɛusalɛ́ma ɓájuanɛ. Ɓunde ɓáɓande k'ósaa, ɓákángiɛmbɛ suɓi á ntanga-nji. 22Nga, esa ndɔ aɓáeka esa nde Mokonga agisiande na tɔtɔkisa nyɔngɔ bui nde a suɓi á Ɓuku á Mokonga#Ɔna Ɔsɛ́ 9.7. 23Iyoo! Aɓande ngomi ka ɓama-kaeme na ɓama-mbɛnjɛ k'ésa ndɔɔ. Nga, nji ndɔ aɓande na tambaga ángbó ka nyɔngɔ nde Mokonga aphangiande ɓɛí ndeakɛ ka ɓato á ka nji ndɔɔ. 24Ɓáemowande ɓuangbo na píndí, ɓáǒga na ɓuangbo ka kɔkɔɓɛ ka nji bui. Ɓato á k'ékuna nɛngbo ɓátúkatúkande Yɛusalɛ́ma na ka ɓî mbenɔ á kɔkɔta ndeaɓɔ asungiagande.
Esa á ja á Muna-Nkpa
(Ɔna phɔtɔ Mat 24.29-31; Mkɔ 13.24-27)
25Mphangiɔ aɓande ka maní, songe na ɓasɛɛngɔa#Ɔna Isa 13.10; Ɛjɛ 32.7; Yɔɛ́li 3.3-4. Cɔ, ka mokonda, ɓakpa ɓáɓande na tambaga. Ɓáyayamande ɓî oɓenge aophúia eongo n'ana kɛtɛmbɔ. 26Ɓukpɛkpɛ á ɓakpa asiande ka nyɔngɔ á kɔɓɔɓɔkɔ á kema ájeɗe ɗanga-ɗanga nde atɔtɔkɛanande ka mokonda nde ɓáiki kau. Nga, kema bui nde ana ɓukpɛkpɛ na koba, aɗengande. 27Mpɔ, ɓámɔnande Muna-Nkpa n'abiki k'égugu na ɓukpɛkpɛ na ɓoombia ángbó#Dan 7.13. 28Cɔ, kema ndɔ a ye okpanga tɔtɔkɛana, ikani ánjá, ɓómesiɛgɛ mɔ̌ anu. Nga, ɓoamia nɛnu a ye tɔ bíbí.
Mphangiɔ á nsô á kasa á ɓame
(Ɔna phɔtɔ Mat 24.32-35; Mkɔ 13.28-31)
29Mbusa índɔ, Yéso áǒngoɗea ɓagoigi nɛkɛ mɛní ndee: «Ɔ́njiani phɔ́ me á mtini na me bui. 30Mbenɔ nde ɓo ye kɔɔna nsô á kasa í n'akpangi júana, úbáni sasanu gea matú á okame a ye tɔ bíbí. 31A tɔ ɓó ka ɓenu. Mbenɔ nde ɓɔɔna nyɔngɔ ndɔ n'atɔtɔkɛani, úbani gea koɓoamɛ ndea Mokonga a ye tɔ bíbí.» 32Nenóngoɗi ɗoni gea, ɛɓɔkɔti nde kásiɛku kema ndɔ bui na kákiɗianimbɛ. 33Koba na mokonda, anyɛ́nyande. Nyɔngɔ nɛmɔ gǎkɛ unge kányɛ́nyɛku.
Kóɗani iso anu
34«Ɛ́ngɛphani! Měma anu kaɗokómanɛmbɛ ka nyɔngɔ á eaga n'ɛbɛɗi á makana, phɔtɔ na mɔphɛ á enda. Ɓoogea ɓó, mmbe esa ndɔ anosɛnɛkɛande kángá mosenda. 35Nga, nyɔngɔ ndɔ aěimisande ɓakpa ɓɔbu á ka mokonda ɓea mɛ̌kɔ. 36Cɔ, ɓókóɗɛmbɛ. Mɛmani Mokonga ka mbenɔ bui. Kaɓondɔ, ɓoɓande na ɓukpɛkpɛ á oloka nyɔngɔ bui nde akiɗianande, mpɔ ɓômama mosá ani eme Muna-Nkpa.»
37Yéso ɗáogoisaga k'éndu á Mokonga n'esa. Ɗá gǎkɛ ojuana ɔgɔgɔ ka gǎ ɗa gǔ á mamba á Mijɛitúni. 38Ɓakpa ɓɔbu ɗáɓáobika mɔtɛ á Yéso kamɓimba k'aphe á ɔ́ka ɓɔphɛi nɛkɛ k'éndu á Mokonga.
Currently Selected:
Lóka 21: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
