परेरीत ए किताब कर बारे में दम अकन गोएठ
ए किताब कर बारे में दम अकन गोएठ
ए किताब ला बईध लूका हर अपन संगता थियुफिलूस बरीक लिखीस। ए किताब हर नांवा करार कर एतिहासिक किताब हवे। ईसू मसीह कर सरग जवाई कर पाछू, ओकर चेला मन ला का-का होईस अऊ ओमन कर जिनगी हर कईसे बदलीस, एकर बारे में ए किताब हर परगट करथे। ईसू कर सरग जाए कर पाछू, चेला मन ला लागीस कि हमरे अकेला होए गएन। ओमन डर अऊ निरासा में पईर गईन अऊ सोंचत रहीन कि अब ओमन कर अगुवाई कोन करही। बकिन परमेस्वर हर अपन जबान कर अनुसार पबितर आत्मा ला भेजीस। पबितर हर आत्मा हर, डरावल मन कर जिनगी ला हिमेत ले भरीस। ओकर सामर्थ अऊ अगुवाई ले चेला मन, अपन सेवकाई कर ओर करीन; चिन्ह चमत्कार अऊ अचमहों कर काम कर द्वारा, परभू अपन बचन ला बजर करत रहीस।
चेला मन सोंचत रहीन कि सुघर खभेर हर सिरीप यहूदी मन बर लागे, गैर यहूदी मन बर ना लागे। ए किताब में पबितर आत्मा हर, एला परगट करीस कि परमेस्वर ककरो मूंह देखी नई करे, ओ सुघर खभेर ला अपन परेरीत मन कर द्वारा, गैर यहूदी मन जग पहुंचाईस। ए किताब में पौलुस कर बारे में देखथन, जेहर आगू मसीही मन कर विरोधी रहीस अऊ परमेस्वर हर ओकर मन ला बदलीस। तेकर ओहर परभू, कर परेरीत बएन के गैर यहूदी मन बर इंजोर बनीस, अऊ ओमन जग सुघर खभेर सुनाईस। ओहर तीन दाएर सेवकाई बरीक पानी जहाज में ढेरे तान गईस, अऊ ओकर जरिए ढेरेच मसीह मंडली कर सुरुवात होईस।
ए किताब ला पढ़े ले निरासा, डर अऊ अकेलापन में परल मईनसे मन ला असरा अऊ हिमेत देवईया, एगोट बढ़िहां संगता कर चिन्हारी जरूर मिलही। ओ संगता हर पबितर आत्मा लागे। ओकर अगुवाई ले चलोईया मन कर जिनगी हर, आसीस ले भएर जाही। एकरले ए किताब ला, मन लगाए के पएढ़ लेआ।
ए परेरीत मन कर काम हर खालहे लिखल भाग में बांटल हवे
यरूसलेम सहर में सुघर खभेर ला बताथे 1:1-8
एहूदिया अऊ सामरिया में सुघर खभेर ला बताथे 8:4—12:25
सुघर खभेर सुनाए बर पौलुस कर पहिलो यातरा 13:1—14:28
यरूसलेम सहर में परेरीत मन ठाएन लेथें 15:1-35
सुघर खभेर सुनाए बर पौलुस कर दूसरा यातरा 15:36—18:22
सुघर खभेर सुनाए बर पौलुस कर तीसर यातरा 18:23—21:16
पौलुस ला यरूसलेम में धरुवाथें 21:17—23:22
पौलुस हर कैसरिया सहर में जाथे 23:23—26:32
पौलुस ला रोम देस में ले जाथें 27:1—28:31
Currently Selected:
परेरीत ए किताब कर बारे में दम अकन गोएठ: SGJ
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.