यूहन्ना 10
10
चरवाहा अऊ ओकर लेंहड़ कर अहना
1एक दिन ईसू हर उपदेस देहे घरी कहीस, “मंए तुमन के फूरोंच कहथों कि जेहर दुरा में ले होए के, भेंड़ कर कोठा में नई ढूके, बकिन कोनो दूसर कती ले चएघ जाथे, ओहर चोर अऊ डांकू हवे। 2बकिन जेहर दुरा ले भीतरी ढूकथे, ओही हर भेंड़ी मन कर चरवाह लागे। 3ओ चरवाह बर दुरा कर पहरादार हर, दुरा ला उघाएर देथे, अऊ भेंड़ी मन ओकर अवाज ला चिनथें अऊ ओहर अपन भेंड़ी मन कर नांव ला, ले लेके बलाथे अऊ ओहर भेंड़ी मन ला बाहरी ले जाथे। 4जब ओहर अपन सब भेंड़ी मन ला बाहरी निकाएल लेथे, त ओहर ओमन कर आगु-आगु रेंगथे अऊ भेंड़ी मन, ओकर पाछू-पाछू रेंगत रथें, काबरकि ओमन ओकर अवाज ला चिनथें। 5अऊ भेंड़ मन कोनो आने मईनसे कर पाछू नई जाहीं, बकिन ओमन ओकर जग ले दुरिहां भागहीं। काबरकि ओमन आने मईनसे कर गोएठ ला नई चिन्हें।” 6ईसू हर ओमन के ए बात ला अहना में कहीस, बकिन ओमन नई समझीन कि ओहर का बतात रहीस।
ईसू सुघर चरवाह लागे
7तेकर ईसू हर ओमन जग कहीस, “मंए तुमन जग फूरोंच कहथों, भेंड़ी मन बर दुरा मंए लागों। 8मोर ले आगू जेतना झूठा चरवाह मन आईन, ओमन सब चोर अऊ डांकू रहीन, बकिन भेंड़ी मन ओमन कर नई सुनीन। 9दुरा मंए लागों, अगर कोनो हर मोर द्वारा भीतरी ढूंकही, त ओहर बांएच जाही#10:9 उद्धार पाही।। ओहर भीतर-बाहर आही जाही अऊ चारा पाही। 10चोर हर बस चोराए बर, अऊ जान मारे बर, अऊ नास करे बर आथे। बलकि मंए एकर बर आएं कि ओमन जीवन पाएं, अऊ भरपूर जीवन पाएं।
11सुघर चरवाह मंए लागों, अऊ सुघर चरवाह हर, भेंड़ी मन बर अपन जानोच ला देथे। 12बकिन एगोट बनिहार हर चरवाह ना लागे अऊ भेंड़ी मन कर गोंसियोच ना लागे। जब ओहर बिगुवा मन ला आवत देखथे, त भेंड़ी मन ला छोंएड़ के भाएग जाथे। अऊ बिगुवा हर भेंड़ी मन ला ओकर जग ले लूईट लेथे, अऊ इते-ऊते कएर देथे। 13ओहर एकर बर भाएग जाथे कि ओहर तो सिरीप बनी पाए बर काम करथे, अऊ ओके भेंड़ी मन कर कोनो फिकर नई रहे। 14-15सुघर चरवाह मंए लागों, जेकस दाऊ हर मोके जानथे, अऊ मंए ओके ला जानथों। ओही कस मंए अपन भेंड़ मन ला जानथों, अऊ मोर भेंड़ मन मोके जानथें अऊ मंए अपन भेंड़ मन बर जान देथों। 16मोर अऊरोच भेंड़ मन हवें, जेमन ए भेंड़ कर कोठा कर नईएं, मोके ओहूच मन ला जरूर लाने बर हवे। ओमन मोर गोएठ ला सुनहीं अऊ मानहीं, तब ओमन कर एकेच ठन लेंहड़ होही, अऊ एकेच झन चरवाह होही। 17दाऊ हर मोर ठन एकरले मया करथे, काबरकि मंए अपन परान ला देहे बर तियार हवों। मंए एकर बर परान ला देथों, ताकि मंए ओला फेर ले सकों। 18कोनो मोर परान ला मोर जग ले नई ले सके, बकिन मंए ओला अपन ईछा ले देथों। मोके ओला देहे कर अधिकार हवे, अऊ फेर ओला ले लेहोच कर अधिकार हवे, ए हुकुम हर मोर दाऊ जग ले मोके मिलीस हवे।”
19ईसू कर ए गोएठ ला सुईन के, यहूदी मन कर मंझार में फूट होए गईस। 20ओमन में ले ढेरेच झेमन एकस कहे लागीन, “ओके भूत धरीस हवे अऊ ओहर जकलाए गईसे, ओकर काबर सुनथा?” 21त दूसर झेमन कहीन, “का भूत धरल मईनसे हर कभों एकस गोठियाए सकथे? भूत हर अंधा मन ला आंएख दे सकथे का?”
यहूदी मन बिस्वास नई करें
22तेकर यरूसलेम सहर में, मंदिर कर समरपन तिहार#10:22 करीबन 170 ईसा. पू. में अंतिओखुस एपिफानूस नांव कर सिरीया कर राजा हर, यरूसलेम कर मंदिर ला असुद्ध करे रहीस। तेकर 164 ईसा. पू. में मकाबेस भाई मन कर जरिए, यहूदी मन लड़ाई जीत के यरूसलेम कर मंदिर ला सुद्ध कएर के परमेस्वर ला समरपन करीन, एकर चलते ए तिहार कर ओर करीन। मनावत रहीन, अऊ ओ घनी जड़हा कर दिन रहीस। 23ईसू हर परमेस्वर कर मंदिर में, सुलेमान राजा कर ओसरा में रेंगत-बुलत रहीस। 24तेकर यहूदी नेता मन आए के ओके छेंक लेहीन, अऊ ईसू जग पूछीन, “तंए हमके ला केतेक दिन ले दुबिधा में राखबे, अगर तंए मसीह लागस, त हमके ला सफा-सफा बताए दे।”
25ईसू हर ओमन ला जबाब देहीस, “मंए तुमन के कएह देहें, बकिन तुमन बिस्वास नई करा। जे बूता ला मंए अपन दाऊ कर अधिकार ले करथों, ओहीच हर मोर बारे में गवाही देथे। 26बकिन तुमन एकर बर बिस्वास नई करा, काबरकि तुमन मोर भेंड़ी मन ले नई हवा। 27मोर भेंड़ी मन मोर गोएठ ला सुनथें अऊ मानथें अऊ मंए ओमन के जानथों अऊ ओमन मोर पाछू चलथें। 28अऊ मंए ओमन के अमर जिनगी देथों, ओमन कभों नास नई होहीं, अऊ कोनो हर ओमन के मोर हाथ ले लुटे नई सकही। 29मोर दाऊ हर ओमन ला मोके जिमा देहीस हवे, ओहर सबले बड़खा हवे, अऊ कोनो हर ओमन ला दाऊ कर हाथ ले लुटे नई सके। 30मंए अऊ मोर दाऊ एकेच हवन।”
31त यहूदी नेता मन में ले, जेमन ईसू कर विरोध करत रहीन, ओमन ओके जान ले मारे बर फेरेच पखना उठाईन। 32बकिन ईसू हर ओमन ला कहीस, “मंए अपन दाऊ कर सक्ति ले, तुमन के ढेरेच भलाई कर काम ला देखाएं, ओमे ले कोन काम बरीक तुमन मोके पखना में मारे बर चाहत हा?” 33यहूदी नेता मन ईसू ला जबाब देहीन, “हमरे कोनो भलाई कर काम बर तोके पखना नई मारी, बकिन एकरले मारबो, काबरकि तंए एगोट मईनसे होए के अपन आप ला परमेस्वर बनाथस, अऊ एकस कहिके परमेस्वर कर निंदा करथस।”
34ईसू हर ओमन ला जबाब देहीस, “का तुमन कर पबितर में अईसना नई लिखल हवे, जिहां परमेस्वर हर कहीस, मंए कहें #भजन संहिता 82:6तुमन देवता हवा? 35अगर पबितर किताब में ओमन ला देवता कहीस, जेमन ला परमेस्वर कर बचन देहल गए रहीस, (अऊ पबितर किताब कर लिखल हर, कभों टएल नई सके।) 36त जब मंए कहथों कि मंए परमेस्वर कर बेटा लागों, त एमे निंदा कर का बात हवे? मोके तो दाऊ परमेस्वर हर चुईन के ए संसार में भेजीस हवे।”
37अगर मंए अपन दाऊ कर काम मन ला नई करत हवों, त तुमन मोर ऊपरे बिस्वास झईन करा। 38बकिन अगर मंए ओकर काम मन ला करथों, त भले मोर ऊपरे बिस्वास झईन करा, बकिन ओ काम मन कर चलते तो बिस्वास करा, ताकि तुमन जाना अऊ समझा कि दाऊ हर मोर में हवे, अऊ मंए दाऊ में हवों। 39तेकर फेर ओमन ईसू ला धरे कर कोसिस करीन, बकिन ईसू हर ओमन जग ले बांएच के निकेल गईस।
40फेर ईसू हर एरदन नदी कर ओ पार ओ जघा में चईल देहीस, जिहां यूहन्ना हर आगू बतिस्मा देहत रहीस, अऊ ओही जग रहे लागीस। 41ढेरेच झन मईनसे मन ओकर जग आए के कहत रहीन, यूहन्ना हर तो कोनो चिन्ह चमत्कार नई देखाईस। बकिन जे जाएत यूहन्ना हर एकर बारे में कहे रहीस, ओहर सब हर सही रहीस। 42अऊ ओजग ढेरेच मईनसे मन ईसू कर ऊपरे बिस्वास करीन।
Currently Selected:
यूहन्ना 10: SGJ
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
