यूहन्ना 7

ईसू कर भाई मन ओकर ऊपरे बिस्वास नई करीन

1तेकर ईसू हर गलील जिला में रेंगत-बूलत रहीस। ओहर एहूदिया जिला में जाए बर नई चाहत रहीस। काबरकि यहूदी नेता मन, ओके माएर देहे कर कोसिस करत रहीन। 2यहूदी मन कर झाला नांव कर तिहार#7:2 ए तिहार हर यहूदी मन कर तीन मुख तिहार में ले एगोट हवे। हर लिघे रहीस। 3एकरे ले ईसू कर भाई मन ओकर जग कहीन, “एजग ले एहूदिया जिला में जा, तेमेकि जे काम तंए करथस, ओला तोर चेलो मन देखें। 4काबरकि एकस कोनो नई होही, जेहर नामी होए बर चाही, अऊ लुकाए के काम करही। अगर तंए ए अचमहों कर काम मन ला करथस, त एला संसार कर मईनसे मन कर आगू में जाए के खुद देखा।” 5काबरकि ओकर भाईयोच मन, ओकर ऊपरे बिस्वास नई करत रहीन।

6तब ईसू हर ओमन जग कहीस, “मोर काम ला ओर करे कर सही समय अझेर ले नई आईसे, बकिन तुमन बर सब समय हर ठीक हवे। 7संसार कर मईनसे मन तुमन ले बैर नई कएर सकें, बकिन ओमन मोर जग बैर राखथें, काबरकि मंए ओमन कर बिरोध में, एकस गवाही देथों कि ओमन कर जमो काम हर घिनक हवे। 8तुमन खुद ए तिहार में जावा, मंए ए तिहार में अझेर नई जाथों, काबरकि मोर काम करे कर समय हर, अझेर नई आईस हवे।” 9ईसू हर ओमन जग एकस कहिके, गलील जिला में रएह गईस।

10बकिन जब ओकर भाई मन तिहार में चईल देहींन, त ईसू हर ककरो देखार में नहीं, बकिन कले-कस उहां गईस। 11यहूदी नेता मन तिहार में ओके खोजत रहीन, अऊ पूछत रहीन, “ओहर कहां जग हवे?” 12अऊ मईनसे मन एक दूसर ले, ओकर बारे में कले-कले कहे लागीन। कोनो मन कहत रहीन, “ओहर बढ़िहां मईनसे हवे” अऊ आने झेमन कहत रहीन “नहीं, ओहर तो मईनसे मन ला भरमाथे।” 13तबो ले यहूदी नेता मन कर डर कर मारे कोनो मईनसे मन, ईसू कर बारे में खुईल के नई गोठियात रहीन।

तिहार में ईसू उपदेस देथे

14जब तिहार कर आधा दिन हर बीत गईस, त ईसू मंदिर में जाए के उपदेस देहे लागीस। 15एला सुईन के यहूदी नेता मन अकबकाए गईन अऊ कहीन, “एके ला तो बिगर पढ़े, कहां ले एतना मान गियान आईस?” 16ईसू हर ओमन के जबाब देहीस, “जे उपदेस ला मंए देहत हवों, ओहर मोर ना लागे, बकिन मोर भेजोईया परमेस्वर कर लागे। 17अगर कोनो हर परमेस्वर कर इछा में चले बर चाही, त ओके ए पता चएल जाही कि ए उपदेस जेला मंए देहत हों, ओहर परमेस्वर कती ले हवे, आखिर मंए अपन अधिकार ले गोठियाथों। 18जेहर अपन अधिकार ले कांही गोठियाथे, ओहर अपनेच बड़ाई चाहथे, बकिन जेहर अपन भेजोईया कर बड़ाई चाहथे, ओही हर सचा हवे अऊ ओकर में कपट नईए। 19अगमजानी मूसा हर, तुमन के परमेस्वर कर कानहूंन ला तो देहीस हवे#7:19 मूसा कर कानहूंन में लिखल हवे “तंए ककरो जान ला झईन लेबे।”। तबो ले तुमन ओ कानहूंन में नई चला, अऊ मोके काबर मरवाए बर करत हवा?”

20मईनसे मन जबाब देहीन, “तोके तो भूत धरीसे, तोके इहां कोन मारे बर करत हवे?” 21ईसू हर ओमन ला जबाब देहीस, “मंए पबितर दिन में एगोट चमत्कार करें, अऊ ओला देख के तुमन सबेच झन अकचकाए गया। 22मुसा हर तुमन ला खतना करे कर नियम देहीस, ए नियम हर तो मूसा कती ले नई आईस, बकिन ए नियम हर तुमन कर पूरखा मन ले चलत आवत हवे, अऊ तुमन तो पबितर दिन में, बेटा लईका मन कर खतना करथा। 23पबितर दिन में तुमन बेटा लईका मन कर खतना करथा, तेमेकि मूसा कर कानहूंन हर झईन टूटे, अगर अईसना हवे, त तुमन मोर ऊपरे काबर गुसा करथा कि मंए पबितर दिन में एगोट मईनसे ला, पूरा तरह ले चंगा करें? 24तुमन मूंह देख के नियाओ झईन करा, बकिन ठीक-ठीक नियाओ करा।”

का ईसू हर मसीह लागे?

25तेकर यरूसलेम सहर कर, तनिक रहोईया मन कहे लागीन, “भई, का एहर ओही लागे, जेके ला यहूदी नेता मन मारे कर कोसिस करत रहीन? 26बकिन देखा, ओहर तो सब कर आगू में गोठियाथे, अऊ कोनो ओके कांही नई कहत हें, का यहूदी नेता मन सहीच में जाएन गईन हवें कि एहर मसीह लागे? 27एके ला तो हमरे जानथी कि एहर कहां ले आईस हवे, बकिन मसीह हर जब आही, त कोनो नई जानहीं कि ओहर कहां ले आही।”

28तेकर ईसू हर परमेस्वर कर मंदिर में, उपदेस देहत घनी रोसे कहीस, “भई, का तुमन जानथा कि मंए कोन लागों अऊ कहां ले आए हों? बकिन मंए तो अपन अधिकार ले नई आएं हों, बकिन ओ सचा परमेस्वर कर अधिकार ले आए हों, जेहर मोके भेजीस हवे अऊ तुमन तो ओके नई जाना। 29मंए ओके जानथों, काबरकि मंए ओकरे कती ले आए हों, अऊ ओही हर मोके भेजीस हवे।” 30एला सुईन के ओमन ओके धरे बर चाहीन, तबोले कोनो हर ओके छुए बर नई सकीस, काबरकि ओकर समय नई आए रहीस 31तबोले भीड़ कर मईनसे में ले ढेरे झेमन, ओकर ऊपरे बिस्वास करीन अऊ कहे लागीन, “मसीह जब आही, त का ओहर एकरो ले बगरा चिन्ह चमत्कार देखाही, जेला एहर देखाईस?”

ईसू ला धरे कर कोसिस करथें

32भीड़ कर मईनसे मन, ईसू कर बारे में कले-कले गोठियात रहीन, तेला फरीसी दल कर नेता मन सुनीन। तेकर ले ओमन अऊ मुख याजक मन, ईसू ला धरे बर मंदिर कर सिपाही मन ला भेजीन। 33तेकर ईसू हर कहीस, “मंए तनिक जुआर बर तुमन कर संगे हों, तेकर अपन भेजोईया ठन चएल देहूं। 34तुमन मोके खोजिहा, बकिन नई पईहा अऊ जिहां मंए रहूं, उहां तुमन नई आए सखीहा।” 35एला सुईन के यहूदी नेता मन आपस में कहीन, “एहर कहां जाही कि हमरे एके नई पाबो? का एहर ओमन जग जाही, जे यहूदी मन यूनानी मन#7:35 यूनानी मन कर मतलब हवे कि रोम कर मईनसे मन, जेमन यूनानी भासा गोठियाथें। कर मझारे रथें, अऊ का एहर यूनानियों मन ला उपदेस देही? 36भई, एहर कईसना गोएठ गोठियाथे कि तुमन मोके खोजिहा, बकिन नई पईहा अऊ जिहां मंए रहूं, उहां तुमन नई आए सखीहा?”

ईसू कर द्वारा पबितर आत्मा कर उपदेस

37तिहार कर आखरी दिन जेहर मुख दिन रहीस, ईसू हर ठड़होए के रोसे कहीस, “अगर कोनो पीयासे होही, त मोर जग आए। 38जेहर मोर ऊपरे बिस्वास करथे, ओहर पीए, जेकस पबितर किताब में लिखल हवे, ‘ओकर भीतर ले जीवन कर पानी कर नदी मन बहे लागहीं।’” 39ईसू हर ए गोएठ ला, ओ पबितर आत्मा कर बारे में कहे रहीस, जेहर ओकर ऊपरे बिस्वास करोईया मन ला मिलही, ओहर एकस एकर बर कहे रहीस, काबरकि पबितर आत्मा, अझर ले देहल नई गए रहीस। काबरकि ईसू हर अपन महिमा में नई पहुंचे रहीस। 40तेकर भीड़ में ले कोनो-कोनो मन ए गोएठ ला सुईन के कहीन, “फूरोंच में एही हर ओ अगमजानी लागे, जेहर अवईया रहीस।” 41दूसर मईनसे मन कहीन, “एहर मसीह लागे,” बकिन तनिक झेमन कहीन “भई, मसीह हर गलील जिला ले कईसे आए सकत हवे? 42भई, का पबितर किताब में एकस नई लिखल हवे कि मसीह हर, दाऊद राजा कर बंस ले आही, अऊ ओहर बेतलहेम गांव में जनम लेही, जिहां दाऊद राजा रहत रहीस?” 43एकरले ईसू कर चलते मईनसे मन में फूट होए गईस। 44ओमन में ले तनिक झेमन, ओके धरे बर चाहत रहीन, बकिन कोनो ओके छुए बर नई सकीन।

यहूदी अगुवा मन बिस्वास नई करीन

45तेकर मंदिर कर सिपाही मन, फिर के मुख याजक अऊ फरीसी मन ठन आईन, अऊ ओमन मंदिर कर सिपाही मन ला पूछीन, “तुमन ओके काबर नई लाना?” 46सिपाही मन जबाब देहीन, “कोनो हर आएज तक कभों एकस गोएठ नई गोठियाईस हवे, जेकस ओहर गोठियाथे।” 47फरीसी मन ओमन ला कहीन, “अईसना लागथे कि तुहूंच मन ला ओहर भरमाए देहीस हवे?” 48“का हमर अधिकारी अऊ फरीसी मन ले कोनोच हर, ओकर ऊपरे बिस्वास करीन हवें? 49बकिन ए भीड़ कर मईनसे, जेमन मूसा कर कानहूंन ला नई जानें, ओमन ला परमेस्वर सराप देही।”

50नीकुदेमुस, जेहर ईसू जग आगू आए रहीस, अऊ ओ फरीसी मन में ले एक झन रहीस, ओमन ला कहीस, 51“हमर कानहूंन कर अनुसार, कोनो मईनसे ला आगुवे ले दोसी माएन लेबो का; जब तक ओकर बारे में सब जाएत ला नई सुन लेबो, अऊ ए पता नई लगाए लेबो कि ओहर का करीस हवे?” 52ओमन ओके जबाब देहीन, “का तंहूच गलील जिला कर लागस? पबितर किताब ला पएढ़ के देख, त तंए पाबे कि गलील जिला ले कोनो अगमजानी नई आवे।”

53[तेकर पाछू सब झेमन अपन-अपन घरे चईल देहीन।

Currently Selected:

यूहन्ना 7: SGJ

Highlight

Copy