लूका 23

राएजपाल पीलातूस कर आगू में ईसू

(मत्ती 27:1,2,11-14; मरकुस 15:1-5; यूहन्ना 18:28-38)

1तेकर सब दरबार कर मईनसे मन उईठ के, ईसू ला राएजपाल पीलातूस जग ले गईन। 2ओमन एकस कहीके, ओकर ऊपर दोस लगावत रहीन, “हमरे एके ला हमर मईनसे मन ला बहकात देखे हन, अऊ कहथे कि रोम कर महाराजा ला, लगान झईन देईहा अऊ अपने-आप ला मसीह अऊ राजा कहथे।” 3राएजपाल पीलातूस हर ओके ला पूछीस, “का तंए यहूदी मन कर राजा लागस?” ईसू हर कहीस, “तंहीच तो कहत हस।” 4तेकर राएजपाल पीलातूस हर, मुख याजक मन ला अऊ भीड़ ला कहीस, “मंए ए मईनसे में दोस लगाए कर कांहीच बात नई पाएं।” 5बकिन ओमन अऊ जोर देके कहत रहीन, “एहर सबेच एहूदिया जिला कर मईनसे मन ला उपदेस देके, भड़कात हवे। एला ओहर गलील जिला में सुरू करे रहीस, अऊ अझेर इहां ले पहुंच गईस।” 6ए बात ला सुईन के राएजपाल पीलातूस हर पूछीस, “का ए मईनसे हर गलील जिला कर लागे?” 7जे घनी राएजपाल पीलातूस ला, ए पता चलीस कि ईसू हर हेरोदेस राजा कर जिला कर लागे, त ओके हेरोदेस राजा जग भेज देहीस, काबरकि ओ घनी हेरोदेस राजा हर यरूसलेम सहर में रहीस।

हेरोदेस राजा कर आगू में ईसू

8हेरोदेस राजा हर ईसू ला देख के ढेरेच खुस होईस, काबरकि ओहर ढेरे दिन ले ईसू ला देखे बर करत रहीस, काबरकि ओकर बारे में ओहर सुने रहीस अऊ कोनो चमत्कार ईसू जग ले देखे बर करत रहीस। 9हेरोदेस राजा हर ओकर जग ढेरेच बात ला पूछीस, बकिन ईसू हर ओके ला कांहीच नई बताईस। 10मुख याजक मन अऊ कानहूंन कर सिखोईया मन ओ जग ठड़होए के, ओकर ऊपरे ढेरेच जोर देके दोस लगात रहीन। 11तेकर हेरोदेस राजा हर अपन सिपाही मन कर संगे, ईसू ला बईदनाम कएर के मजाक उड़ाईस अऊ राजा कस ओढ़ना पहिराए के, ओके राएजपाल पीलातूस जग वापिस भेज देहीस। 12ओही दिन ले पीलातूस अऊ हेरोदेस संगता बईन गईन; आगू ओमन एक दूसर कर दुसमन रहीन।

राएजपाल पीलातूस द्वारा ईसू ला मिरतु दंड

(मत्ती 27:15-26; मरकुस 15:6-15; यूहन्ना 18:39—19:16)

13राएजपाल पीलातूस हर मुख याजक, अऊ दूसर अधिकारी मन ला अऊ मईनसे मन ला बलाईस; 14अऊ कहीस, “तुमन ए मईनसे ला मोर जग ए कईह के, लाने हवा कि एहर मईनसे मन ला बहकाथे; अऊ सुना, मंए तुमन कर आगू में एके ला तजबीजें, बकिन एकर ऊपरे में कांहीच दोस ला नई पाएं, जेकस तुमन कहथा। 15राजा हेरोदेस हर भी ओकर ऊपरे कांहीच दोस नई पाईस, अऊ एके ला मोर जग वापिस भेज देहीस अऊ सुना, एहर जान ले मारे लाएक, कांहीच गलती नई करीस हवे। 16एकरले मंए एके ला कोड़ा मरुवाए के छोंएड़ देहत हों।” 17(राएजपाल पीलातूस ला यहूदी मन कर फसह कर तिहार में, ओमन बर एक ठे कएदी ला, छोंड़े बर परत रहीस#23:17 तनिक हाथ ले लिखल किताब मन में ए बचन हर नई मिले। ।) 18ते घनी सब झे एके संगे किरलाए के कहीन, “एके ला माएर दे, अऊ हमर बर बरअबा ला छोंएड़ दे।” 19बरअबा हर जेहल में रहीस, काबरकि ओहर यरूसलेम सहर में, रोमी सरकार कर बिरोध में लडाई-झगरा करे रहीस, अऊ कोनो मईनसे कर जान मारे रहीस 20बकिन राएजपाल पीलातूस हर ईसू ला छोंड़े बर करत रहीस, तेकर ले मईनसे मन ला फेर समझाईस, 21बकिन ओमन किरलाए के कहे लागीन, “ओके ला कुरूस में चघाए दे, ओके ला कुरूस में चघाए के मरुवाए दे।” 22राएजपाल पीलातूस हर ओमन ला तीसर तोर ले कहीस, “काबर? ए मईनसे हर का गलती करीस हवे? मंए एकर ऊपरे जान ले मारे लाएक कांहीच गलती नई पाएं हों, एकरे बर मंए एके ला कोड़ा लगवाए के छोंएड़ देहथों।” 23बकिन ओमन रोसे किरलाए-किरलाए के कहत रहीन, कि ओके ला कुरूस में चघाए दे, अऊ ओमन कर किरलाई कर जीत होईस। 24राएजपाल पीलातूस हर ओमन कर मांग ला माएन लेहीस। 25राएजपाल पीलातूस हर ओ आदमी ला छोंएड़ देहीस, जेला लड़ाई-झगरा अऊ जान मारे कर चलते जेहल में हूरके रहीन, (एहर ओही आदमी रहीस जेके ला छोंड़े कर मांग ओमन करत रहीन) अऊ ईसू ला ओमन कर हाथ में सोंएप देहीस कि ओमन जेकस चाहें, ओकस करें।

ईसू ला कुरूस में चघाईन

(मत्ती 27:32-44; मरकुस 15:21-32; यूहन्ना 19:17-27)

26जे घनी ईसू ला ले जात रहीन, ते घनी ओमन कुरेनी सहर कर समोन नांव कर एगोट मईनसे ला, गांव कती ले आवत देखीन अऊ ओके ला धएर के, ईसू कर कुरूस ला डोहाए देहीन कि ओला ईसू कर पाछू-पाछू ले चले।

27मईनसे मन कर ढेरेच बगरा भीड़ हर, ईसू कर पाछू जात रहीन अऊ ओ भीड़ में ढेरे अकन सवांघीनो मन रहीन, जेमन ओकर बर छाती पीट-पीट के, रोवत रहीन। 28ईसू हर ओमन कती ला देख के कहीस, “ए यरूसलेम कर बेटी मन, मोर बर झईन रोवा; बकिन तुमन अपन बर अऊ अपन लईका मन बर रोवा। 29काबरकि सुना, एकस दिन आवत हवे, जे घनी मईनसे मन कहीं, ‘धन्य हवें, ओमन जेमन बांझ हवें अऊ कभों आसापती नई होईन हवें, अऊ अपन छाती ले कभों दूध नई पीयाईन हवें।’ 30ओ घनी ओमन बड़खा पहार मन जग कहे लागहीं,

‘हमर ऊपरे गिर जा

अऊ घूंटरा मन जग कहे लागहीं कि हमके मन ला तोएप ले।’

31काबरकि अगर ओमन कंचा रूख कर संगे एकस करत हवें, त झुरा रूख कर संगे अऊ का नई करहीं?” #23:31 ईसू कर समय में ए कहावत ला कहत रहीन, एजग ईसू मसीह हर कंचा रूख लागे अऊ यहूदी मन झुरा रूख लागें, ए दुनो झन कर तुलना एजग होवथे। 32ओमन ईसू कर संगे अऊ दुई झन अपराधी मन ला, मरुवाए बर ले जात रहीन। 33जे घनी ओमन ओ जघा में पहुंचीन, जे जघा ला खोपड़ी कथें, त ओजग ईसू ला अऊ ओ दुनो अपराधी मन ला, ओकर संगे कुरूस में चघाए देहीन, एक झेला ओकर जवनी कती अऊ दुसर झेला ओकर डेरी कती। 34तेकर ईसू हर कहीस, “ए दाऊ, एमन ला तंए छमा कएर देबे, काबरकि एमन नई जानें कि एमन का करत हवें।” तेकर सिपाही मन चिट्ठी डाएल के, ईसू कर ओढ़ना ला बांएट लेहीन।

35मईनसे मन ठड़होए के देखत रहीन अऊ यहूदी मन कर अधिकारी मन ए कहीके, ईसू कर मजाक उड़ाईन, “एहर आने झन ला बचाईस, अगर एहर परमेस्वर कती ले भेजल मसीह हवे, अऊ ओकर चुनल हवे, त अपन-आप ला बचाए ले।” 36सिपाहीयो मन ईसू कर ठांवें आए के, ओकर मजाक उड़ाईन अऊ अमट मेरावल अंगूर कर रस #23:36 अमट मेरावल अंगूर कर रस, मतलब सिरका। ला देके के कहत रहीन, 37“अगर तंए यहूदी मन कर राजा लागस, त अपन-आप ला बचाए ले।” 38अऊ ईसू कर कुरूस कर ऊपरे लिखल रहीस, “एहर यहूदी मन कर राजा लागे।”

मन फिरोईया डांकू

39ओ जग कुरूस में ठोंकल अपराधी में ले, एक झन हर ईसू कर निंदा कएर के कहीस, “का तंए मसीह ना लागस? त फेर अपन-आप ला अऊ हमके ला बचाओ।” 40बकिन दूसर अपराधी हर, ओके ला दबकाए के कहीस, “का तंए परमेस्वर ला नई डरावस? तंहूच तो ओहीच दंड ला पावत हस, 41अऊ हमरे तो नियाओ कर अनुसार, सही सजा पावत हन, काबरकि हमरे जेकस काम करे हन, ओही कस सजा पावत हन, बकिन ए मईनसे हर, कांहीच गलती नई करीसे।” 42तब ओहर कहीस, “ए ईसू, जब तंए अपन राएज में राजा बएन के आबे, त मोर सुरता करबे।” 43ईसू हर ओके ला कहीस, “मंए तोके फूरोंच कहथों कि आएज तंए मोर संगे, सरगलोक में होबे।”

ईसू कर मिरतु

(मत्ती 27:45-56; मरकुस 15:33-41; यूहन्ना 19:28-30)

44ओ मझेनी कर जुआर करीबन बारह बजे रहीस, तेहीच घनी ले तीन बजे दिन तक, सबेच देस में अंधार छाए रहीस, 45काबरकि बेर हर इंजोर नई देहत रहीस। अचाकन मंदिर कर परदा हर, मझार ले चिराए के दुई टुटका होए गईस, 46तेकर ईसू हर जोर से चिकेर के कहीस, “ए दाऊ, मंए अपन आत्मा ला तोर हाथ में सोंपत हों।” अऊ एकस कहीके ईसू हर मएर गईस। 47जे घनी रोमी सेना कर एगोट सुबेदार हर, ओ जग जे जाएत होए रहीस ओला देखीस, त परमेस्वर कर बड़ाई करे लागीस अऊ कहीस, “फूरोंच में ए मईनसे हर बिगर कसूर कर रहीस।” 48जब ओजग देखे बर जूटल मईनसे मन, जे जाएत होए रहीस ओला देख के रोवत अऊ छाती पीटत, अपन घरे फिरीन। 49बकिन ईसू कर सब जान-पहिचान कर मईनसे मन, अऊ गलील जिला ले ओकर पाछू-पाछू आए रहीन, ते सवांगीन मन दुरीहां ले ठड़होए के, ए सब जाएत ला देखत रहीन।

ईसू कर लास ला मरघेटिया में राखथें

(मत्ती 27:57-61; मरकुस 15:42-47; यूहन्ना 19:38-42)

50ओही घनी उहां यूसुफ नांव कर एगोट मईनसे रहीस, जेहर यहूदी दरबार कर मुखिया रहीस। ओहर सुघर अऊ परमेस्वर कर देख में, सुघर जिनगी जीवईया रहीस। 51यूसुफ हर एहूदिया जिला कर अरमतियाह सहर कर रहीस, अऊ परमेस्वर कर राएज ला अगुरत रहीस। जे यहूदी मन ईसू ला कुरूस में चघाईन, ओमन कर काम अऊ फईसला ले ओहर खुस नई रहीस। 52यूसुफ हर राएजपाल पीलातूस जग जाए के, ईसू कर लास ला मांगीस, 53अऊ ओके कुरूस ले उताएर के, मलमल कर चदर में लपेटीस अऊ एगोट मठ में राखीस, जेला पखना ला कोएड़ के बनाए रहीन, अऊ ओमे कोनोच लास ला कभों नई राखे रहीन। 54ओ दिन हर पबितर दिन कर तियारी करे कर दिन रहीस, अऊ पबितर दिन हर सुरू होए बर रहीस। 55जे सवांगीन मन गलील जिला ले ईसू कर पाछू-पाछू आए रहीन, ओमन यूसुफ कर संगे जाए के, ओ मठ ला देखीन अऊ एहू ला देखीन कि ईसू कर लास ला कईसे राखीन हवें। 56तेकर सवांगीन मन फिर के खुसबू दार तेल अऊ आंतर तेल ला बनाईन। फेर पबितर दिन में परमेस्वर कर अगियां कर अनुसार ओमन बिसोईन।

Currently Selected:

लूका 23: SGJ

Highlight

Copy