मत्ती 2

गियानी मन ईसू जग भेंटाथें

1जब हेरोदेस राजा हर एहूदिया जिला में राएज करत रहीस, तब उहां कर बेतलहेम गांव में ईसू कर जनम होईस, त पूरब दिसा कर देस ले, तरईया मन कर बारे में जनोईया तनीक गियानी मन यरूसलेम सहर में आईन अऊ ओमन मईनसे मन ठे पूछे लागीन, 2“ओ लईका कर जनम कहां होईसे, जेहर यहूदी मन कर राजा लागे? काबरकि हमरे पूरब दिसा में ओकर जनम कर बारे में जानकारी देवईया तरईया ला देखे हवन अऊ ओकर पांव परे बर आए हवन।”

3एला सुईन के हेरोदेस राजा अऊ यरूसलेम कर जमेच मईनसे मन घबराए गईन। 4राजा हर सब मुख याजक मन ला अऊ कानहूंन कर सिखोईया मन ला, एक जघा में बलाईस अऊ ओमन ला पूछीस “मसीह कर जनम कहां होए बर चाही?” 5ओमन कहीन, “एहूदिया जिला कर बेतलहेम गांव में होही, काबरकि अगमजानी हर अईसने लिखीस हवे कि 6ए यहूदिया जिला कर बेतलहेम गांव, तंए यहूदा परदेस कर बड़े सहर मन ले कोनोच मधे ले छोटे नई हवस, काबरकि तोर में ले एक झन सासन करोईया निकलही, जेहर मोर परजा इसराएल कर देख-रेख करही।”

7तब हेरोदेस राजा हर ओ गियानी मन ला कले-कस बलाईस अऊ ओमन जग पूछीस “तरईया हर ठीक कोन घरी दिखे रहीस?” 8तब ओहर ओमन ला ए कहिके बेतलहेम भेजीस, “जावा ओ लईका कर बारे में सही-सही पता लगावा, अऊ जब ओहर तुमन के भेंटाए जाही; त मोके खभेर कएर देईहा, तेमेकि मंहूच जाए के ओकर पांव परहूं।”

9त ओमन राजा कर बात ला सुईन के, अपन डगर में चएल देहीन अऊ जे तरईया ला ओमन पूरब दिसा में देखे रहीन, ओहर ओमन कर आगु-आगु गईस अऊ ओ जघा कर ऊपरे में जाए के ठहेर गईस; जिहां लईका हर रहीस। 10जब ओमन ओ तरईया ला देखीन, त ढेरेच फुरमा होईन। 11घर कर भीतरी जाए के, ओमन ओ लईका ला ओकर दाई मरियम कर संगे देखीन अऊ भुईयां में गिर के लईका कर पांव परीन। तेकर अपन-अपन थईला ला छोएर के सोना, लोबान अऊ गंधरस#2:11 ए तीनो चीज हर राजा मन ला देहे लाएक ढेरेच महंगा, महकेदार संदेस रहीस। कर भेंट चघाईन। 12अऊ परमेस्वर हर ओमन ला सपना में चेतावनी देहीस कि हेरोदेस ठन झईन जईहा, एकरे ले ओमन आने डगर में अपन देस फिर गईन।

ईसू कर परिवार हर मिसर देस कती भागथे

13जब ओ गियानी मन चएल देहींन, तब परभू कर एगोट दूत हर सपना में यूसुफ ला देखार देहीस अऊ ओके कहीस, “उठ, लईका अऊ ओकर दाई ला लेके मिसर देस में भाएग जा। अऊ जब तक मंए नई कहूं; तब तक तंए उहेंच रहबे, काबरकि हेरोदेस राजा हर ओ लईका ला मरुवाए बर खोजवईया हवे।”

14तब यूसुफ उठीस, अऊ रातीच जुआर लईका अऊ ओकर दाई ला लेके मिसर देस में चएल देहीस। 15अऊ ओहर हेरोदेस कर मरत तक उहें रहीस। एकर बर कि जे बात ला परभू हर अपन अगमजानी कर द्वारा कहे रहीस, ओहर पूरा होए “मंए अपन बेटा ला मिसर देस ले बलाएं।”

16जब हेरोदेस राजा हर देखीस कि ओ गियानी मन, ओकर ठे धोखा करीन हवें, त ओहर ढेरेच रिसे होईस अऊ ओहर मईनसे मन ला भेज के, ओ गियानी मन कर बताल समय कर अनुसार बेतलहेम अऊ ओकर अगल-बगल गांव कर सबेच लईका जेमन दुई साल अऊ ओकर ले छोटे रहीन, ओमन के माएर देहीन। 17तब जे बात ला यिरमियाह अगमजानी कर द्वारा कहल गए रहीस, ओहर पूरा होईस:

18रामाह में रोए कर अऊ ढेरेच दुख कर अवाज सुनाई देहीस,

राहेल हर अपन लईका मन बर रोवत रहीस,

अऊ ओ नई चाहत रहीस कि कोनोच हर ओके चुपवाए,

काबरकि ओकर लईका मन मएर गए रहीन।

ईसू कर परिवार हर मिसर देस ले फिरथे

19हेरोदेस राजा कर मरे कर पाछू, परभू कर एगोट दूत हर, मिसर देस में यूसुफ ला सपना में देखार देहीस। 20अऊ कहीस, “उठ! लईका अऊ ओकर दाई ला लेके इसराएल देस में चले जा, काबरकि जेमन ए लइका ला माएर दारे कर कोसिस करत रहीन, ओमन मएर गईन हवें।” 21यूसुफ हर उठीस, अऊ लइका अऊ ओकर दाई मरियम ला लेके इसराएल देस में चएल देहीस। 22बकिन जब ओहर एला सुनीस कि अरखीलाउस हर अपन दाऊ हेरोदेस कर जघा में एहूदिया जिला में राएज करत हवे, त ओहर उहां जाए बर डराईस। फेर सपना में परमेस्वर ले चेतावनी पाए के ओहर गलील जिला में चएल देहीस, 23अऊ ओहर उहां जाए के नासरत नांव कर एगोट सहर में बएस गईस, एकर बर कि जे बात हर अगमजानी मन कर द्वारा कहल गए रहीस, ओहर पूरा होए कि ईसू हर नासरी कहाही।

Currently Selected:

मत्ती 2: SGJ

Highlight

Copy