Ioane 11

1Nerute le gimgim, Lazaro Bethania le, Maria pako Maretha abi narbete ra uteb.

2Abele Maria Kole basao muro de, a tabara neisi teter itkir mus de, abara berbet gimgim, pe Lazaro.

3Neisi abara berbet abim namarida, a detager, kega, Kole, ma dasmer E mama abi nasge, E gimgim.

4Iesu asoli, a detager, kega, Nole niai eud abele gim, epe ko Ade despereda, iaueakai Ade ra Uerem despereda.

5Iesu Maretha omare, a tabara keimer, a Lazaro.

6E asoli E gimgim, E iako emri abele uteb neisi gerger.

7Abele iobaru, E abara kaimeg giz detager, kega, Meriba iako bakeauare Iudaiaem.

8Ege kaimeg giz abi detager, kega, Rabi, emeret ge Iudaia giz mari deraimer ko bakeru mari natimdare; nako ma iako bakeam abele?

9Iesu detaut, kega, Nako, nole tuelf gaire haua gerger ge? Ese nerute le gerger ge ekas, E nole teter itur, abelelam E geseb datki dasmer.

10Ese nerute le kige ekas, E ko teter itur, abelelam datki nole abi dog.

11Abele gaire lu E detaut: keubu abele, E uiabim detager, kega, Lazaro uteid, meriba boai; kaka bakeam iaueakai kaka abi itiri uteidelam.

12Abara kaimeg giz abi detaut, kega, Opole, ese E uteid, E iako eded.

13Iesu abara eud detaut; uiaba dikiapor, kega, E detaut uteid, a nerezi.

14Abelelam Iesu paret kak detaut uiabim, kega, Lazaro eumida.

15Uabielam kaka sererge, abelelam kaka nole nali, iaueakai uaba oituli; epe mi nabakeauare abim.

16Toma, nei atker, Didumo, tabara keme kaimeg giz detaut, kega, Mi ko nabakeauare, abi kemem eumilu.

17Iesu tabarki, E dasmer foa gerger, E ao ge.

18Bethania maike Ierusalema, mokakalam fiftin gaire setadia:

19Dordor Iudaia le tabakeuare Marethaem a Mariaem, ui ko baimilei ui berbetlam.

20Maretha asoli, kega, Iesu tabarki, E bakeam abim obapit: Maria penoka muige meta.

21Maretha Iesu detager, kega, Kole, ese ma ge emri, kara berbet nole eud kak.

22Peirdi kaka umele, gaire lu uridili ma damos Adelam, E ko mari ikuar.

23Iesu abi detaut, kega, Mara berbet ko eded akaida.

24Maretha abi detager, kega, Kaka umele E ko eded akaida abele keubu gerger.

25Iesu abi detaut, kega, Kaka abele eded akaida, pako eded: abele le karim oituli, ese eud, E ko eded:

26Abele le eded karielam, pako karim oituli, E nole eud kak niaiem niai karem. Nako, ma egaret abele mer?

27E abi detaut, kega, Eko, Opole: kaka dikiapor mama Keriso, Ade ra Uerem, gesepem tarabu.

28E emetu abele mer detaut, E bakeamulu, a Maria abara keimer gumik dabgeri, a detager, kega, Opole emetu tabarki, E mari dabgeri.

29E abele asoli, E sobkak tekue, a abim bakeam.

30Iesu nole uteb ge tabarki, E no emri abele uteb Maretha abi obapit.

31Iudaia giz abi dog meta ge, abi baimida, uiaba dasmer Maria sobkak tekue, a adem bakeam, uiaba abi irmili, a detager, kega, E aoem bakeam ko ezoli abele.

32Maria tabarki Iesu dog, a abi dasmer, E ekesmer abara teter ge, a abi detager, kega, Opole, ese ma ge emri, kara berbet nole eud kak.

33Iesu abi dasmer ezoli, a Iudaia giz abi kemem bakeam ko ezoli, E kemge nerezi, a okasosok,

34A detager, kega, Nade uaba abi ikederare? Uiaba detager, kega, Opole, tabakeam a dasmer.

35Iesu ezoli.

36Iudaia giz detaut, kega, Dasmer, E abim au omare!

37Epe uader detaut, kega, Nako, abele le sadamer le la neisi pone diski, E umer kak daisumda a nole eud kak abele le?

38Iesu iako taba nerkep ge nerezi, a aoem tabarki. Kur peik, baker te ge dimilu.

39Iesu detager, kega, Baker adem. Maretha, abara berbet eumida, detaut, kega, Opole, E simelag: ege foa abara gerger.

40Iesu abi detaut, kega, Nako, kaka nole mari natager, ese mama oituli, ma ko dasmer Ade ra adigir?

41Uiaba baker adem uteblam eud le uteid. Iesu kotorem etilu, a detaut, kega, Baba, kaka marim esoao, abelelam ma kari asoli.

42Kaka umele mama mena kari asoli: kaka emetu abele detager abelelam gaire le lakub derumeda, iaueakai uiaba ko egaret ma kari namarid.

43E emetu detaut abele, E elele ereretikri, kega, Lazaro, teosmeda.

44Epe eud le osmeda, abara teter pako abara tag emetu sopem irpi ualiu, a abara op sopem irpi tauelu. Iesu uiabim detaut, kega, Abi detue, a abi emariklu ko bakeam.

45Iudaia giz Mariaem tabaruda dasmerare gaire lu Iesu de ikerer, uader abi oituli.

46Epe uader uiabielam Faresaioim barkare, a uiabi daratagerare gaire lu Iesu de ikeli.

47Zogo kemle giz, pako Faresaio giz netate gedim ko mer atager, kega, Mi nako? abelelam gaire adigir abele le ikeli.

48Ese meriba abi dekaerti mokakalam, gaire le uridili abi oituli: epe gaire Roma tabarkare meriba ged, a meriba uteb uaditkamarare.

49Nerute uiabielam, nei Kaiafa, tarim zogo kemle abele urut ge, uiabim detager, kega, Uaba umer kak nerute lu,

50A nole akiapor kak, ido lu meribim nerute le ko eumida ab ged ra kes, a ged uridili nole eud kak.

51E nole noge detaut ege: E tarim zogozogo le abele urut ge, E perofetaem, kega, Iesu ko eumida ab ged ra kes:

52A nole ab ged ra kes tepteb, epe ko netate gedim gaire Ade ra uerem bamarida, iako netate uteb.

53Uiaba okaikes, a ditimeda abele gerger ge deraimer ko abi ipit eumida.

54Abelelam Iesu nole paret kak bakeam Iudaia ge, epe E bakeam abele ged maike soge purge, nei Efaraima; a kemem emri abara kaimeg giz pedali.

55Iudaia giz ra paseka maike: gaire le bakeauare Ierusalemem ab gedelam ko kekiam tereiem, a keubu paseka.

56Uiaba Iesu deraimer, a etkemdare zogo meta muige, kega, Nalu uaua dikiapor? Nako, E uetpurem tabakeam?

57Uiaba gaire tarim zogozogo le, pako gaire Faresaio gelar ekos, kega, Ese nerute le umele abele uteb E emri, abara dorge ko etomeret, ueakai uiaba abi terpei.

Currently Selected:

Ioane 11: ulk1902

Highlight

Copy