Ioane 12
12
1Sikes gaire gerger epe paseka akerare, Iesu Bethania tabarki, Lazaro dali, abele le eded akaida eudelam Iesu de.
2Uiaba abele leuer derser abim: Maretha memeg le; Lazaro uiabi kemem leuer ero abi dog.
3Maria muro netate paun tekalu, lu kar, a Iesu ra neisi teter dedered, a itkir abi mus de: mitkar abele meta muro lag de.
4Nerute abara kaimeg giz, nei Iuda Isakariota, Simona ra uerem, abele le ko abi keserkeser, E detager, kega,
5Nalugelam nole terapei abele muro, bodomalam thri handed denari, ko ikuar gaire le lu kak?
6E nole abele detaut abelelam E gaire le lu kak omare; epe E eruam le, a epei abi dog, E tais gaire lu arot.
7Iesu detager, kega, Nole abi ekai; E abele ge ikedilu a ko tabarki abele gerger kari natkobei.
8Gaire le lu kak mena uabi dog; kaka nole niaiem uabi dog.
9Dordor Iudaia giz umele E abele ge emri: uiaba tabakeuare, nole Iesuelam tepteb, epe uiaba lagelag Lazaro ko dasmer, abele le eded akaida eudelam Iesu de.
10Gaire tarim zogozogo le mer atager ko Lazaro ipit eumilu;
11Abelelam gaire Iudaia bakeuare, a Iesu oituli abielam.
12Iuaokaer, gaire le lakub uetpurem tabakeuare asoli, kega, Iesu ko tabakeam Ierusalemem,
13Uiaba pama lislis taisare, a bakeuare abi obapit, a ereretikri, kega, Hosana: Isaraela Opole despili, Iehoua nei ge tabakeam.
14Iesu nerute kebi asina erdalu, E abi tumge egimulu; mokakalam mer detali, kega,
15Ma nole geum kak Ziona ra neur; dasmer, mara Opole tabakeam, asina ra uerem egimulu.
16Abara kaimeg giz nole akmer kak abele gaire lu gizlam: epe emetu Iesu despereda, uiaba dikiapor, kega, Emetu detali abele gaire lu abielam, a emetu uiaba ikerare abele gaire lu abim.
17Gaire le abi dog ageakarem E Lazaro dabgiri aolam, a abi eded akaida eudelam.
18Abelelam gaire le lakub bakeuare abi obapit uiaba asoli E ikeli abele atamelam.
19Abelelam Faresaio giz mer atager, kega, Uaba dasmer, uaba umer kak nerute lu; dasmer, geseb ge uridili abi irmili.
20Uader Helene giz kemem gaire le uetpurem tabakeuare ko esorerapare:
21Ui Filipoim tabakeuare, Bethesaida Galilaia le, a abi eutumer, kega, Kole, ki lagelag Iesu dasmer.
22Filipo bakeam a Anedereaim detager: epe Anederea a Filipo tabakeamulei, a Iesuim detaut.
23Iesu uiabim detaut, kega, Kerker idali, Le la Uerem despili.
24Ageakar, ageakar, kaka uabi detager, kega, Ese nerute kon kep nole seb ge abi, a uatuet, E tepteb ipe: ese E uatuet, E au turum.
25Abele le abara eded nasge, abele ko abi: epe abele le abara eded dedkoli geseb ge, E ko eded nagri aseamur kak.
26Ese nerute le kara memeg le, abara dorge kari narmili; abele uteb kaka emri, kara memeg le la uteb dali: ese nerute le kari memeg le, Baba de abi despili.
27Peirdi kara nerkep okasosok; nalu kaka ko detaut? Baba kari nakai abele kerkerlam. Epe abelelam kaka tabarki abele kerker ge.
28Baba, mabara nei despili. Ege kodo mer uatabu kotorlam, kega, Kaka emetu despili, kaka iako despili.
29Gaire le abele bako asoli, a detaut, kega, Girgir dali: uader detager, kega, Angela abi mer egali.
30Iesu detaut, kega, Abele kodo mer nole uatabu karim, epe uabim.
31Peirdi dulam gesepem tabarki: peirdi ko adem imu geseb tarim le.
32A kaka, ese kari nagaret armem geseblam, kaka ko eguatumur gaire le uridili karim.
33E abele ge detaut, ko etomeret abele eud ko abim tabarki.
34Gaire le abi detaut, kega, Keriba asoli gelarlam, kega, Keriso niaiem tekue: nalugelam mama detaut, kega, Ko armem egaret Le la Uerem? Nete Le la Uerem dali?
35Iesu uiabim detaut, kega, Datki teupei uabi dog. Bakeuare kerker uaba datki nagri uabi dog, kupkupilam uabim tabarki: abele le ki ge degemili, E nole umer kak E na gedim bakeam.
36Datki egaret kerker datki uabi dog, ueakai uaba datki ra uerem. Iesu abele detaut, E bakeamulu, a uiabielam ispilu.
37E ikerare gaire adigir uiabi opem, epe uiaba nole abim oatur kak:
38Ueakai eski abele mer Isaia perofeta de detaut, kega, Opole, nete de egaret keriba merkem? A neteim paret kak Iehoua ra tag?
39Uiaba umer kak oituli, abelelam Isaia de iako detaut, kega,
40E uiaba gaire pone darasamare, a uiaba nerkep imirida; ueakai uiaba nole asmer kak gaire pone de, a nole akiapor kak nerkep de, akomelam, a kaka uiabi nadgirare.
41Abele Isaia de detaut, abelelam E abara zorom dasmer; E abi abeilu.
42Gaire uiabielam tarim le abi oituli; epe uiaba nole etomeret kak gaire Faresaiolam, uiabi amulam sunagolam:
43Abelelam lu kar uiabim despili lelam, tumem despili Adelam.
44Iesu ereretikri, a detaut, kega, Abele le kari oituli, E nole kari oituli tepteb, epe abim kari namarida.
45Abele le kari nasmili, E abi dasmer kari namarida.
46Kaka nabue geseb datki, ueakai nole kupkup ge emri gaire le uridili karim oituli.
47Ese nerute le gaire kara mer asoli, a nole oatur kak, kaka nole abi itmer: abelelam kaka nole gesepem tabarki ko eutumer, epe gesepem ko ededem.
48Abele le kari natuaki, a nole kara mer egaret, abi dog dulam: abele mer kaka detaut, E dali abi dulam keubu gerger.
49Kaka nole karbabu detaut; epe Baba de kari namarida, E kari gelar nakuar abele lu kaka ko detager, a detaut.
50Kaka umele eded aseamur kak abara gelar; abele gaire mer kaka detager, abkoreb Baba de kari nataut, eko kaka detaut.
Currently Selected:
Ioane 12: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
